Nehemiah 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Awˬ yanˇ a ciˉ maw la htaˇ, Yuˇda‸ chaw teˇ hpaˍ hkʼanˇ ve yoˬ.

2Teˇ hpaˍ hpaˍ lehˬ, Ngaˬ hui ve yehˬ kʼa uiˍ jaˇ ve yoˬ. Ngaˬ hui caˇ tuˬ caˬ hkʼa loˍ ve yoˬ, teh‸ kʼoˆ ve yoˬ.

3Teˇ hpaˍ hpaˍ lehˬ, Ngaˬ hui gʼa caˇ gʼa dawˬ tuˬ, ngaˬ hui ve ti mi, a pehˉ meuˇ hko, leh ngaˬ hui ve yehˬ teˇ hpaˍ hta‸ gʼa ca tan taˍ ve yoˬ, teh‸ kʼoˆ ve yoˬ.

4Teˇ hpaˍ hpaˍ kʼoˆ ve, Ngaˬ hui ve ti mi leh a pehˉ meuˇ hko awˬ pon awˬ hkawnˍ keu tuˬ hpu maˇ cawˬ ve pa taw, shu geh gʼa ca chiˇ keu piˇ taˍ ve yoˬ.

5Awˬ nu ve Yuˇda‸ chaw teˇ hpaˍ loˍ ve mawˇ ngaˬ hui ka‸ loˍ chehˇ ve maˇ heˆ laˇ. Ngaˬ hui ve yaˇ teˇ hpaˍ ka‸, yawˇ hui ve yaˇ teˇ hpaˍ hkʼa shuˍ da‸ chehˇ ve maˇ heˆ laˇ. Ya‸ hkʼaˇ, ngaˬ hui lehˬ a shu yawˇ ve yaˇ teˇ hpaˍ hta‸ shu ceˬ gʼa te tcuh chehˇ ve yoˬ. Ngaˬ hui ve yaˇ miˇ teˇ hpaˍ hpaˍ, shu hta‸ gʼa hawˇ piˇ taˍ peuˬ. Ngaˬ hui ve ti mi, a pehˉ meuˇ hko teˇ hpaˍ hta‸ shu yuˬ kʼai peuˬ ve pa taw, ngaˬ hui ca dawˇ maˇ tawˆ-o, teh‸ kʼoˆ ve yoˬ.

6Tawˇ oˇ ve teˇ hpaˍ hta‸ ngaˬ gʼa kaˇ htaˇ, ngaˬ nyi ma zuhˆ jaˇ ve yoˬ.

7Hkʼe te leh, ngaˬ suhˉ jehˬ piˇ tuˬ dawˇ cheˆ ve yoˬ. Yuˇda‸ chaw awˬ hoˉ awˬ naˬ teˇ hpaˍ hta‸ ngaˬ venˇbaˆ taˍ leh, Nawˬ hui lehˬ a shu yawˇ ve awˬ viˉ awˬ nyi teˇ hpaˍ hta‸ fawˉ mehˍ piˇ chehˇ ve yoˬ, teh‸ yawˇ hui hta‸ kʼoˆ piˇ ve yoˬ. Oˇ ve hkʼaw‸ nawˉ, ngaˬ chaw moˍ lonˉ hta‸ kuˬ hpawnˬ leh, yawˇ hui hta‸ chi hkʼe kʼoˆ piˇ ve yoˬ.

8Ngaˬ hui te puiˉ te hpeh‸ ve hkʼe, awˬ ceˬ hkʼa shuˍ, shu ve la‸ sheh hkʼaw lo gʼa hawˇ piˇ tuˬ ve Yuˇda‸ chaw teˇ hpaˍ hta‸ kʼaw‸ vuiˬ hkʼaw‸ piˇ chehˇ ve yoˬ. Ya‸ hkʼaˇ, nawˬ hui lehˬ chi beu‸ awˬ chawˇ chawˇ hawˇ caˇ da‸ chehˇ ve yoˬ, teh‸ yawˇ hui hta‸ kʼoˆ piˇ ve yoˬ. Awˬ hoˉ awˬ naˬ te chehˇ ve chaw teˇ gʼaˇ ka‸, te‸ chiˉ kʼaw‸ kʼoˆ maˇ gʼa leh, ta‸ iˉ gawˬ lehˍ chehˇ taˍ ve yoˬ.

9Hkʼe te leh ngaˬ yawˇ hui hta‸ chi hkʼe kʼoˆ piˇ ve yoˬ. Nawˬ hui te chehˇ ve kanˉ lehˬ ya‸ jaˇ ve yoˬ. Nawˬ hui Gʼuiˬsha hta‸ kawˆ cawˇ leh, hteˇ ve cawˇ ve kanˉ hta‸ ceh tiˉ te ve awˬ hkʼaw lo, ngaˬ hui ve canˇ paˍ teˇ hpaˍ ngaˬ hui hta‸ hkʼa mvuhˇ hkʼa na maˇ gʼa kʼoˆ tuˬ te cawˇ ve yoˬ.

10Ngaˬ leh ngaˬ ve awˬ chawˇ teˇ hpaˍ lehˬ, loˍ ve chaw hui hta‸ hpu leh caˬ shiˍ chiˇ piˇ chehˇ ve yoˬ. Chi beu‸ maˇ hteˇ maˇ cawˇ ve kanˉ chi hkʼa peu-eˬ hta‸ ngaˬ hui baˬ taˉ-a veuˬ.

11Yawˇ hui ve ti mi, a pehˉ meuˇ hko, shaˍ lonˍ hko leh yehˬ teˇ hpaˍ chi beu‸ yawˇ hui hta‸ kʼaw‸ hkʼaw‸ piˇ-oˆ. Yawˇ nawˬ hui geh chiˇ taˍ ve hpu, caˬ shiˍ, a pehˉ meuˇ gʼuiˬ, naˍ manˇ, chi hkʼa peu-eˬ hta‸ hkʼe leˇ ponˬ piˇ-oˆ, teh‸ yawˇ hui hta‸ kʼoˆ piˇ ve yoˬ.

12Awˬ hoˉ awˬ naˬ oˇ ve teˇ hpaˍ lehˬ, Nawˬ kʼoˆ ve hkʼe ngaˬ hui te leh, yawˇ hui ve mawˇ hkʼa peu-eˬ yawˇ hui hta‸ kʼaw‸ hkʼaw‸ piˇ tuˬ yoˬ. Yawˇ hui ve jeˬ teˇ hpaˍ hta‸ htawˇ ponˬ piˇ tuˬ yoˬ, teh‸ ngaˬ hta‸ kʼaw‸ yaw hkʼaw‸ laˇ ve yoˬ. Oˇ ve hkʼawˬ nawˉ, ngaˬ lehˬ paw hkuˇ teˇ hpaˍ hta‸ kuˬ yuˬ leh, awˬ hoˉ awˬ naˬ oˇ ve teˇ hpaˍ hta‸ yawˇ hui kʼoˆ taˍ ve hkʼe te tuˬ hkanˍ tcuh ve yoˬ.

13Oˇ hkʼe te tcuh peuˬ hkʼaw‸ nawˉ, ngaˬ lehˬ ngaˬ ve caw‸ cehˍ nyi hta‸ hpeh taˍ ve hpa hta‸ yuˬ leh yawˇ hui mehˆ gʼuˇ suhˍ hpi maˍ piˇ leh chi hkʼe kʼoˆ piˇ ve yoˬ. Nawˬ hui a shu yawˇ te taˍ ve ka ti‸ hta‸ maˇ ha‸ shaˉ ve chaw hta‸ Gʼuiˬsha chi hkʼe te yuˬ baˬ laˇ tuˬ yoˬ. Yawˇ lehˬ nawˬ hui hkʼa cawˬ taˍ ve mawˇ hkʼa peu-eˬ hta‸ yuˬ kʼai leh, nawˬ hui hta‸ te‸ chiˉ teh taˉ laˇ tuˬ ve maˇ heˆ, teh‸ yawˇ hui hta‸ kʼoˆ piˇ ve yoˬ. Oˇ kaˬ lo hkʼa chehˇ taˍ ve chaw hkʼa peu-eˬ, A menˬ, teh‸ kʼoˆ leh Gʼuiˬsha hta‸ chiˇ mvuh ve yoˬ. Chaw oˇ ve teˇ hpaˍ lehˬ, yawˇ hui kʼoˆ taˍ ve hkʼe te ve yoˬ.

14Aˍtaˍyeˍziˆ jawˇmawˇ te ve 20 hkʼaw‸ biˇ ve awˬ yanˇ hta‸ te leh 32 hkʼaw‸ biˇ la htaˇ hkʼa gaˬ, ngaˬ lehˬ Yuˇda‸ mvuhˇmiˬ ve jaw ˇmawˇ te chehˇ ve yoˬ. Awˬ yanˇ oˇ ve 12 hkʼaw‸ awˬ hkʼaw lo ngaˬ leh ngaˬ ve awˬ ceuˬ awˬ hkʼaˇ teˇ hpaˍ lehˬ, jawˇmawˇ ve caˇ tuˬ hta‸ maˇ caˇ.

15Ngaˬ gʼuˇ suhˍ jawˇmawˇ hkʼa te peuˬ ve chaw teˇ hpaˍ lehˬ, teˇ nyi ve caˇ tuˬ dawˬ tuˬ awˬ hpfuhˇ hpu 40 hta‸ mvuhˇ yaˇ miˬ yaˇ geh shaw caˇ leh fawˉ mehˍ piˇ chehˇ ve yoˬ. Ya‸ hkʼaˇ, ngaˬ lehˬ Gʼuiˬsha hta‸ kawˆ ve pa taw oˇ hkʼe maˇ te.

16Ngaˬ ve awˬ gʼaˇ awˬ shaˉ hkʼa peu-eˬ yuˬ tawˆ leh, lanˇ venˇ hta‸ ceh gu kawˍ chehˇ ve yoˬ. Mvuhˇ yaˇ miˬ yaˇ hui geh mawˇ te‸ chiˉ maˇ ca lawˬ yuˬ. Ngaˬ ve awˬ ceˬ teˇ hpaˍ htawˇ, lanˇ venˇ hta‸ gʼa ga kawˍ chehˇ ve yoˬ.

17Ngaˬ ve caˇ kuiˬ dawˬ kuiˬ lo, awˬ nu ve venˇ, hkʼaˆ teˇ hpaˍ lo laˬ ve hkehˉ chaw teˇ hpaˍ leh, Yuˇda‸ chaw awˬ hoˉ awˬ naˬ 150 gʼaˇ ve hta‸ caˍ piˇ taw piˇ chehˇ ve yoˬ.

18Teˇ nyi le le ngaˬ nuˇ paˍ lonˉ teˇ hkeh, yawˬ 6 hkeh leh gʼaˆ maˇ maˇ tiˇ caˍ piˇ chehˇ ve yoˬ. Ya‸ hkʼaˇ ngaˬ lehˬ jawˇmawˇ teˇ gʼaˇ yehˇ keunˍ ve hpu hta‸ maˇ lawˬ yuˬ. Awˬ lawn kʼo, mvuhˇ yaˇ miˬ yaˇ teˇ hpaˍ awˬ vuiˬ gʼa taˆ hawˇ jaˇ chehˇ ve pa taw yoˬ.

19Gʼuiˬsha-oˬ, ngaˬ nawˬ hta‸ lawˬ hkawˉ ve yoˬ. Chaw chi teˇ hpaˍ hta‸ ngaˬ te piˇ taˍ ve da‸ ve kanˉ teˇ hpaˍ hta‸ a ciˉ dawˇ nawˇ laˇ-oˆ.

← Chapter 4 Jump to: Chapter 6 →