Nehemiah 9

Lahu Bible Edited © Thailand Bible Society and Bible Society of Myanmar, 2010, 2020.

1Ha pa oˇ ve teˇ maˬ 24 nyi htaˇ, Iˉsaˍreˍlaˆ chaw teˇ hpaˍ lehˬ, yawˇ hui venˇbaˆ dawˇ hpfuhˆ ve hta‸ hpeu‸ maˍ tuˬ, caˇ tuˬ ce ve yoˬ. Yawˇ hui meh htuˉ pui hpa hta‸ veu‸ deh leh, oˉ kʼoˍ hkʼoˆ lo je‸ meu-e hkaˆ pfuhˍ taˍ ve yoˬ.

2Yawˇ hui lehˬ, awˬ nu ve chaw ceuˬ teˇ hpaˍ hta‸ htawˇ, hpaˆ da‸ chehˇ taˍ ve yoˬ. Oˇ hkʼe te peuˬ hkʼaw‸ nawˉ, yawˇ hui leh yawˇ hui ve awˬ puˍ awˬ pi teˇ hpaˍ te ya‸ taˍ ve venˇbaˆ teˇ hpaˍ, Gʼuiˬsha hta‸ hpeu‸ maˍ piˇ ve yoˬ.

3Yawˇ hui lehˬ, shehˆ naˍriˍ hkʼe a shu yawˇ ve venˇbaˆ Gʼuiˬsha hta‸ hpeu‸ maˍ piˇ leh oˉ kʼoˍ pui ve yoˬ.

4Leˍviˆ chaw Yawˇsuˆ, Baˍniˆ, Kaˍmeˍlaˆ, Sheˍbaˍniˆ, Buˇriˆ, Sheˍraˍbiˆ, leh Hkeˍnaˍniˆ hui lehˬ, bon maˍ kuiˬ kʼaw jaw hkʼoˆ huˉ taˍ leh Gʼuiˬsha geh awˬ hkawˇ bvuhˬ chaweh bon lawˬ ve yoˬ.

5Leˍviˆ chaw Yawˇsuˆ, Kaˍmeˍlaˆ, Baˍniˆ, Haˍshaˍbaˍniˆ, Sheˍraˍbiˆ, Hawˇdiˇyaˆ, Sheˍbaˍniˆ, leh Peˍtaˍhiˆ hui awˬ hkawˇ bvuhˬ chaweh kuˬ leh kʼoˆ ve, Tu leh nawˬ hui ve Jawˇmawˇ Gʼuiˬsha hta‸ chiˇ mvuh-o. Yawˇ hta‸ co co taiˍ taiˍ chiˇ mvuh-o. Gʼuiˬsha-oˬ, chaw yaˇ teˇ hpaˍ lehˬ nawˬ nyi hkʼaˇ suh htaˇ hkʼa gaˬ, nawˬ hta‸ chiˇ mvuh laˇ maˇ puiˉ ve htawˇ, chaw teˇ gʼaˇ le le nawˬ ve awˬ meh hta‸ chiˇ mvuh tcuh piˇ-oˆ, teh‸ kʼoˆ ve yoˬ.

6Oˇ ve hkʼaw‸ nawˉ, yawˇ hui bon chi hkʼe lawˬ ve yoˬ. Gʼuiˬsha-oˬ, nawˬ teˇgʼaˇ ceh tiˉ Gʼuiˬsha hpeh‸ ve yoˬ. Nawˬ lehˬ, mvuhˇ naw ma leh meu‸ keu shiˍ teˇ hpaˍ hta‸ te hpanˍ taˍ ve yoˬ. Nawˬ lehˬ miˬguiˬ, laˇ tsuhˇ gʼuiˬ leh, oˇ ve awˬ hkʼaw lo hkʼa cawˬ ve awˬ ceuˬ hkʼa peu-eˬ ve hta‸ te hpanˍ taˍ ve yoˬ. Nawˬ lehˬ awˬ ceuˬ hkʼa peu-eˬ ve hta‸ a sha‸ te‸ piˇ lawˬ ve yoˬ. Mvuhˇ naw tcuh yaˇ teˇ hpaˍ nawˬ hta‸ hkui tcuhˉ teh leh oˉ kʼoˍ pui chehˇ ve yoˬ.

7Jawˇmawˇ Gʼuiˬsha-oˬ, nawˬ lehˬ Aˍbranˍ hta‸ leuˆ yuˬ leh, yawˇ hta‸ Baˍbuˍlonˍ mvuhˇmiˬ hkaw shiˍ tawˆ la piˇ taˍ ve yoˬ. Nawˬ lehˬ, yawˇ ve awˬ meh hta‸ Aˍbraˍhanˍ teh‸ kʼaw‸ pa piˇ ve yoˬ.

8Yawˇ lehˬ, nawˬ hta‸ ka ti‸ yeˬ ve chaw hpeh‸ ve hta‸ nawˬ gʼa mawˬ leh, nawˬ yawˇ hta‸ ka ti‸ te piˇ taˍ ve yoˬ. Nawˬ lehˬ, Hiˇtiˆ chaw, Aˍmawˇriˆ chaw, Hpeˍraˍziˆ chaw, Yeˍbuˇsiˆ chaw leh Giˇ gaˍshiˆ chaw hui chehˇ taˍ ve Hkaˍnanˍ mvuhˇmiˬ chi, yawˇ ve awˬ ceuˬ awˬ hkʼaˇ teˇ hpaˍ ve mvuhˇmiˬ hpeh‸ la piˇ tuˬ, nawˬ yawˇ hta‸ ka ti‸ te taˍ peuˬ ve yoˬ. Nawˬ lehˬ ka ti‸ yeˬ jaˇ ve pa taw, nawˬ te taˍ ve ka ti‸ hta‸ maˇ te luˬ.

9Ngaˬ hui ve awˬ puˍ awˬ pi teˇ hpaˍ, Eˇjiˇtu‸ mvuhˇmiˬ hkʼaw hkʼaˬ ma gʼa tu‸ gʼa hkanˍ chehˇ ve hta‸ nawˬ mawˬ leh, Laˇ tsuhˇ gʼuiˬ nyi lo yawˇ hui kuˬ ve awˬ hkawˇ hta‸ htawˇ, nawˬ gʼa kaˇ ve yoˬ.

10Eˇjiˇtu‸ chaw teˇ hpaˍ lehˬ, nawˬ ve chaw teˇ hpaˍ hta‸ hkʼaˬ hkʼe te fawˉ mehˍ piˇ chehˇ ve hta‸ nawˬ shiˍ ve pa taw, nawˬ lehˬ jawˇmawˇ Hpaˍrawˇ, yawˇ ve ma‸ poˍ lonˉ teˇ hpaˍ leh yawˇ ve mvuhˇmiˬ yaˇ teˇ hpaˍ hta‸ anˇ tuˬ uiˍ jaˇ ve kanˉ teˇ hpaˍ te maˍ piˇ taˍ peuˬ ve yoˬ. Ya‸ nyi hkʼa gaˬ, nawˬ te taˍ peuˬ ve kanˉ oˇ ve teˇ hpaˍ hta‸ shu chiˇ uiˍ chiˇ mvuh chehˇ ve yoˬ.

11Laˇ tsuhˇ gʼuiˬ awˬ hkʼaw lo, nawˬ ve chaw teˇ hpaˍ awˬ pon nawˬ ya‸ kʼaw te pawnˍ piˇ leh, yawˇ hui hta‸ goˇ lehˍ ve miˬguiˬ hkʼoˆ lo shiˍ kʼai piˇ ve yoˬ. Yawˇ hui hta‸ gʼa‸ yuˬ laˬ chehˇ ve chaw hui hta‸, nawˬ laˇ tsuhˇ gʼuiˬ hkʼaw kʼa pehˍ piˇ ve yoˬ. Yawˇ hui lehˬ laˇ tsuhˇ gʼuiˬ hkʼaw ce lo‸-e ve haˉ pui shiˍ hkʼe hpeh‸ ve yoˬ.

12Mvuhˇ law‸ kʼaw htaˇ, nawˬ lehˬ moˬ hta‸ cuˇ leh, yawˇ hui hta‸ shiˍ kʼai piˇ ve yoˬ. Mvuhˇ hpeu‸ htaˇ nawˬ lehˬ aˬ miˍ hta‸ cuˇ leh yawˇ hui hta‸ awˬ gʼeuˆ paw piˇ ve yoˬ.

13Siˉnaˆ hkʼaw hkʼoˆ lo nawˬ ya‸ la leh, nawˬ ve chaw teˇ hpaˍ hta‸ tawˇ yaw piˇ ve yoˬ. Awˬliˇtawˇhkawˇ teˇ hpaˍ htawˇ, nawˬ yawˇ hui hta‸ piˇ taˍ ve yoˬ.

14Nawˬ ve da‸ kehˬ ve shinˉ nyi hta‸ ce kan tuˬ, nawˬ yawˇ hui hta‸ maˍ piˇ leh, nawˬ ve awˬ ceˬ paˍ Moˉseˍ hta‸ cuˇ leh, yawˇ hui hta‸ nawˬ ve awˬliˇtawˇhkawˇ teˇ hpaˍ piˇ taˍ ve yoˬ.

15Yawˇ hui awˍ meu‸ ve teˇ yanˇ, mvuhˇ naw ma ve hkaoˍmonˇ nawˬ yawˇ hui hta‸ caˍ piˇ ve yoˬ. Yawˇ hui iˉ kaˆ shiˉ ve teˇ yanˇ, haˉ hpawˇ hkaw ve iˉ kaˆ nawˬ yawˇ hui hta‸ taw piˇ ve yoˬ. Nawˬ yawˇ hui hta‸ piˇ taˍ ve mvuhˇmiˬ hta‸ ca bawˆ yuˬ tuˬ, nawˬ yawˇ hui hta‸ kʼoˆ piˇ ve yoˬ.

16Ya‸ hkʼaˇ, ngaˬ hui ve awˬ puˍ awˬ pi teˇ hpaˍ lehˬ, nyi ma heh leh nawˬ ve tawˇ hta‸ maˇ na yuˬ.

17Nawˬ te taˍ ve anˇ tuˬ uiˍ ve kanˉ teˇ hpaˍ hta‸ htawˇ, yawˇ hui leunˇ kʼai ve yoˬ. Yawˇ hui lehˬ nyi ma uiˍ ve awˬ hkʼaw lo, yawˇ hui hta‸ Eˇjiˇtu‸ mvuhˬ miˬ lo shiˍ kʼo‸-e laˇ tuˬ ve awˬ hoˉ teˇ gʼaˇ hta‸ leuˆ yuˬ ve yoˬ. Ya‸ hkʼaˇ, Gʼuiˬsha nawˬ lehˬ venˇbaˆ hpehˇ piˇ puiˉ ve Gʼuiˬsha hpeh‸ ve yoˬ. Nawˬ lehˬ ha‸ pehnˇ uiˍ jaˇ leh, nyi ma haˆ haˆ maˇ zuhˆ puiˉ ve yoˬ. Nawˬ ve ha kʼaˉ puiˉ ve teˇ ceuˬ uiˍ jaˇ leh, nawˬ yawˇ hui hta‸ maˇ chiˇ baˬ taˉ piˇ.

18Yawˇ hui shi nuˇ shaˉ ho‸ teˇ maˬ te leh, Chi lehˬ ngaˬ hui hta‸ Eˇjiˇtu‸ mvuhˇ hkʼaw shiˍ tawˆ laˇ taˍ ve Gʼuiˬsha teh‸ kʼoˆ ve yoˬ. Gʼuiˬsha-oˬ, yawˇ hui nawˬ hta‸ hkʼaˬ ma maˇ shawˍ maˇ caˆ te ve le.

19Ya‸ hkʼaˇ, nawˬ ve ha kʼaˉ puiˉ ve teˇ ceuˬ uiˍ jaˇ ve pa taw, yawˇ hui hta‸ nawˬ heh puiˉ hkʼaw lo maˇ chiˇ baˬ taˉ piˇ. Mvuhˇ law‸ kʼaw mvuhˇ hpeu‸ yawˇ hui hta‸ ya‸ kʼaw maˍ piˇ chehˇ ve moˍ hta‸ maˇ koˆ, aˬ miˬ hta‸ maˇ kʼoˆ, nawˬ maˇ yuˬ baˬ piˇ.

20Yawˇ hui te cawˇ ve kanˉ nawˬ yawˇ hui hta‸ maˍ piˇ leh, maˍnaˆshiˍ leh iˉ kaˆ piˇ chehˇ ve yoˬ.

21Yawˇ hui heh puiˉ hkʼaw lo te toˇ chehˇ ve awˬ yanˇ oˇ ve 40 hkʼaw‸ awˬ hkʼaw lo, yawˇ hui hkʼa loˍ ve awˬ ceuˬ hkʼa peu-eˬ hta‸ naw te piˇ chehˇ ve yoˬ. Yawˇ hui ve veu‸ kʼaˇ maˇ tzuh‸ leh, hkui sheh htawˇ maˇ naˬ.

22Awˬ nu chaw ceuˬ teˇ hpaˍ ve mvuhˇmiˬ, nawˬ yawˇ hui hta‸ bawˆ yuˬ tcuh ve yoˬ. Jawˇmawˇ Siˉ honˍ uˉ peunˍ chehˇ ve Heˍsaˍbonˍ mvuhˇmiˬ leh, jawˇmawˇ Awˇgaˆ uˉ peunˍ chehˇ ve Baˍshanˍ mvuhˇmiˬ hta‸ yawˇ hui bawˆ yuˬ ve yoˬ.

23Nawˬ lehˬ, yawˇ hui ve yaˇ teˇ hpaˍ hta‸ meu‸ keu shiˍ hkʼa shuˍ maˇ la piˇ leh, nawˬ yawˇ hui ve awˬ puˍ awˬ pi teˇ hpaˍ hta‸ piˇ tuˬ ka ti‸ te taˍ ve mvuhˇmiˬ hkʼaw, yawˇ hui hta‸ chehˇ tcuh piˇ ve yoˬ.

24Yawˇ hui Hkaˍnanˍ mvuhˇmiˬ hta‸ bawˆ yuˬ leh, oˇ kaˬ lo chehˇ taˍ ve chaw hui hta‸ nawˬ gʼa‸ kʼoˬ piˇ ve yoˬ. Oˇ kaˬ lo chehˇ taˍ ve chaw leh jawˇmawˇ teˇ hpaˍ hta‸, yawˇ hui te gaˇ ve hkʼe te piˇ tuˬ, nawˬ yawˇ hui hta‸ kanˇ paˆ piˇ taˍ ve yoˬ.

25Nawˬ ve chaw teˇ hpaˍ lehˬ, yeˬ jaˇ ve ta‸ yehˬ teˇ hpaˍ, miˬ hkuiˇ da‸ ve miˬguiˬ, hpu shi hkʼa biˇ cawˬ ve yehˬ teˇ hpaˍ, iˉ kaˆ nanˬ bawˍ teˇ hpaˍ, shaˍlonˍ hko teˇ hpaˍ leh a pehˉ meuˇ hko teˇ hpaˍ hta‸ bawˆ yuˬ ve yoˬ. Yawˇ hui caˇ gaˇ ve hkʼe caˇ leh, chu la ve yoˬ. Yawˇ hui lehˬ, nawˬ piˇ taˍ ve awˬ bon teˇ hpaˍ awˬ hkʼaw lo ha lehˬ chehˇ ve yoˬ.

26Ya‸ hkʼaˇ, nawˬ ve chaw teˇ hpaˍ lehˬ nawˬ hta‸ kʼaw‸ hpfuhˆ leh, nawˬ ve tawˇ hta‸ ponˬ leuˉ ve yoˬ. Nawˬ geh kʼaw‸ hpfuhˆ kʼaw‸ la tuˬ, yawˇ hui hta‸ shaˍ ti‸ piˇ chehˇ ve tcuh kaˍ paˍ teˇ hpaˍ hta‸ yawˇ hui tiˇ pehˍ leh, nawˬ hta‸ teˇ hkui teˇ hkui maˇ shawˍ maˇ caˆ te ve yoˬ.

27Hkʼe te leh, nawˬ lehˬ yawˇ hui hta‸ canˇ paˍ teˇ hpaˍ ve la‸ sheh hkʼaw lo chiˇ a‸ piˇ ve yoˬ. Dawˇ tui‸ gaˇ tui‸ ve awˬ yanˇ awˬ hkʼaw lo, yawˇ hui nawˬ hta‸ kuˬ ve teˇ yanˇ, nawˬ yawˇ hui hta‸ kʼaw‸ yaw hkʼaw‸ piˇ ve yoˬ. Nawˬ lehˬ yawˇ hui hta‸ ha kʼaˉ ve awˬ hkʼaw lo, yawˇ hui hta‸ htaiˍ hkʼaw‸ piˇ tuˬ awˬ hoˉ awˬ naˬ teˇ hpaˍ peu laˇ piˇ ve yoˬ.

28Yawˇ hui gawˬ lehˍ gʼa kʼaw‸ chehˇ ve teˇ yanˇ, yawˇ hui venˇbaˆ teˇ pawˆ kʼaw‸ te ve yoˬ. Oˇ htaˇ nawˬ lehˬ, yawˇ hui hta‸ canˇ paˍ ve la‸ sheh hkʼaw lo teˇ pawˆ kʼaw‸ chiˇ a‸ piˇ ve yoˬ. Yawˇ hui venˇbaˆdawˇ hpfuhˆ leh nawˬ hta‸ kʼaw‸ lawˬ hkawˉ htaˇ, nawˬ yawˇ hui hta‸ ha kʼaˉ ve awˬ hkʼaw lo, teˇ pawˆ peuˬ teˇ pawˆ htaiˍ hkʼaw‸ piˇ ve yoˬ.

29Nawˬ ve awˬliˇtawˇhkawˇ teˇ hpaˍ hta‸ na yuˬ tuˬ, nawˬ yawˇ hui hta‸ shaˍ ti‸ piˇ chehˇ ve yoˬ. Nawˬ ve awˬliˇtawˇhkawˇ lehˬ, a sha‸ te‸ kuiˬ lo shiˍ kʼai piˇ chehˇ ve htawˇ, yawˇ hui nyi ma uiˍ leh nawˬ ve tawˇ hkawˇ hta‸ maˇ na yuˬ.

30Teˇ hkʼaw‸ peuˬ teˇ hkʼaw‸, nawˬ yeunˇ hkanˍ leh, yawˇ hui hta‸ shaˍ ti‸ piˇ chehˇ ve yoˬ. Nawˬ ve tcuh kaˍ paˍ teˇ hpaˍ tawˇ yaw ve htawˇ, nawˬ ve chaw teˇ hpaˍ lehˬ naˍ paw pawˇ ve yoˬ. Chi hta‸ pa taw, nawˬ yawˇ hui hta‸ canˇ paˍ teˇ hpaˍ ve la‸ sheh hkʼaw lo chiˇ a‸ piˇ ve yoˬ.

31Ya‸ hkʼaˇ, nawˬ ve ha kʼaˉ puiˉ ve teˇ ceuˬ uiˍ jaˇ ve pa taw, nawˬ yawˇ hui hta‸ maˇ chiˇ baˬ leh maˇ te luˬ piˇ. Nawˬ lehˬ, ha kʼaˉ puiˉ jaˇ ve Gʼuiˬsha hpeh‸ ve yoˬ.

32Ngaˬ hui ve Gʼuiˬsha-oˬ, nawˬ lehˬ hkʼaˬ ma uiˍ jaˇ mvuh jaˇ ve le. Nawˬ lehˬ, hkʼaˬ ma kawˆ tuˬ uiˍ leh kanˇ paˆ uiˍ ve le. Nawˬ te taˍ peuˬ ve ka ti‸ teˇ hpaˍ hta‸ nawˬ maˇ te luˬ. Aˍsuˇriˆ jawˇmawˇ ngaˬ hui hta‸ tanˍ fawˉ mehˍ laˇ ve teˇ nyi hta‸ te leh ya‸ nyi hkʼa gaˬ, ngaˬ hui hkʼaˬ ma gʼa tu‸ gʼa hkanˍ jaˇ peuˬ ve le. Ngaˬ hui ve jawˇmawˇ, awˬ hoˉ awˬ naˬ, paw hkuˇ, tcuh kaˍ paˍ, ngaˬ hui ve awˬ puˍ awˬ pi, leh ngaˬ hui ve chaw teˇ hpaˍ gʼa hkanˍ jaˇ peuˬ ve yoˬ. Ngaˬ hui hkʼaˬ ma gʼa hkanˍ taˉ peuˬ ve hta‸ a ciˉ dawˇ nawˇ laˇ-oˆ.

33Nawˬ ngaˬ hui hta‸ oˇ hkʼe te ciˍ yanˍ laˇ ve lehˬ cawˇ jaˇ ve yoˬ. Nawˬ lehˬ ka ti‸ yeˬ jaˇ ve yoˬ. Ya‸ hkʼaˇ, ngaˬ hui venˇbaˆ te peuˬ.

34Ngaˬ hui ve awˬ puˍ awˬ pi teˇ hpaˍ, jawˇmawˇ teˇ hpaˍ, awˬ hoˉawˬ naˬ teˇ hpaˍ, paw hkuˇ teˇ hpaˍ lehˬ, nawˬ ve awˬliˇtawˇhkawˇ hta‸ maˇ na yuˬ. Nawˬ maˍ piˇ ve leh nawˬ shaˍ ti‸ piˇ ve tawˇ hta‸ htawˇ maˇ na yuˬ.

35Jawˇmawˇ teˇ hpaˍ lehˬ, nawˬ ve awˬ bon hta‸ pa taw, hkuiˇ jaˬˇ da‸ jaˇ ve mvuhˇmiˬ hkʼaw chehˇ taˍ leh, nawˬ ve chaw teˇ hpaˍ hta‸ gʼa uˉ peunˍ chehˇ ve htawˇ, yawˇ hui venˇbaˆ maˇ dawˇ hpfuhˆ.

36Chi beu‸ ngaˬ hui lehˬ, nawˬ ngaˬ hui hta‸ piˇ laˇ taˍ ve hkuiˇ jaˇ da‸ jaˇ ve mvuhˇmiˬ hkʼaw, shu ve awˬ ceˬ gʼa te chehˇ ve yoˬ.

37Ngaˬ hui venˇbaˆ te peuˬ ve pa taw, ngaˬ hui ti gʼa taˍ ve awˬ shiˍ awˬ nu teˇ hpaˍ lehˬ, ngaˬ hui hta‸ uˉpeunˍ chehˇ ve jawˇmawˇ teˇ hpaˍ ve la‸ sheh hkʼaw lo ceh tiˉ gaˬ peuˬ ve yoˬ. Yawˇ hui lehˬ, ngaˬ hui ve ceˇ caˬ teˇ hpaˍ hta‸ te gaˇ ve hkʼe te laˇ chehˇ ve yoˬ. Chi hta‸ pa taw, ngaˬ hui dawˇ tui‸ gaˇ tui‸ jaˇ ve yoˬ, teh‸ kʼoˆ ve yoˬ.

38Hkʼe te leh ngaˬ hui Yuˇda‸ chaw teˇ hpaˍ lehˬ, ka ti‸ te ve li‸ teˇ kʼoˆ bvuh‸ leh, ngaˬ hui ve awˬ hoˉ awˬ naˬ teˇ hpaˍ, Leˍviˆ chaw teˇ hpaˍ, paw hkuˇ teˇ hpaˍ, a shu yawˇ ve la‸ ma‸ nyiˉ taˍ ve yoˬ.

← Chapter 8 Jump to: Chapter 10 →