Nehemiah 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to: Chapter 7 →

1Saˍbaˍlaˆ, Tawˇbiˆ Geˍshenˍ, leh awˬ nu ve ngaˬ hui ve canˇ paˍ teˇ hpaˍ lehˬ, ngaˬ hui lanˇ venˇ hta‸ hkʼa deh‸ kʼaw‸ gu kawˍ gʼa taˍ peuˬ ve awˬ lawn hta‸ yawˇ hui gʼa kaˇ ve yoˬ.(Ya‸ hkʼaˇ, ngaˬ hui lehˬ lanˇ venˇ yehˬ miˇ hta‸ te keu maˇ peuˬ sheˍ.)

2Hkʼe te leh, Saˍbaˍlaˆ leh Geˍshenˍ lehˬ, Awˇnoˍ lawˬ hkʼo‸ hkʼaw cawˬ ve hkʼaˆ teˇ maˬ hkʼaw yawˇ huiˉ maˬ hta‸ ca hpuˇ da‸ la tuˬ, ngaˬ hta‸ li‸ teˇ kʼoˆ bvuh‸ laˇ ve yoˬ. Chi ve lehˬ yawˇ huiˉ maˬ ngaˬ hta‸ te luˬ tuˬ, awˬ hkʼaˇ gu taˍ ve teˇ ceuˬ hpeh‸ ve yoˬ.

3Hkʼe te leh ngaˬ chaw hta‸ hpehˇ leh, yawˇ huiˉ maˬ hta‸chi hkʼe ca kʼoˆ piˇ tcuh ve yoˬ. Ngaˬ lehˬ uiˍ jaˇ ve kanˉ te chehˇ ve pa taw, oˇ kaˬ lo laˬ maˇ tanˇ. Ngaˬ ve kanˉ hta‸ teh taˉ leh, nawˬ huiˉ maˬ hta‸ ca hpuˇ da‸ la maˇ hpeh‸, teh‸ kʼoˆ feu piˇ ve yoˬ.

4Yawˇ huiˉ maˬ lehˬ, awˇ pawˆ hkʼa gaˬ kuˬ laˇ ve yoˬ. Ngaˬ ka‸, Laˬ maˇ hpeh‸, teh tiˉ kʼaw‸ kʼoˆ feu piˇ ve yoˬ.

5Oˇ htaˇ, Saˍbaˍlaˆ lehˬ li‸ hpui hkʼaw maˇ keu taˍ ve li‸ 5 kʼoˆ teˇ kʼoˆ ngaˬ geh kʼaw‸ bvuh‸ feu laˇ ve yoˬ.

6Li‸ oˇ ve hkʼaw chi hkʼe kʼoˆ taˍ ve yoˬ. Nawˬ leh Yuˇda‸ chaw teˇ hpaˍ lehˬ, jawˇmawˇ hta‸ kʼaw‸ hpfuhˆ tuˬ dawˇ nyi leh, lanˇ venˇ kʼaw‸ gu te chehˇ ve yoˬ, teh‸ nawˬ awˬ paˇ awˬ kui lo chehˇ taˍ ve chaw teˇ hpaˍ kʼoˆ da‸ chehˇ ve yoˬ, teh‸ Geˍshenˍ ngaˬ hta‸ kʼoˆ laˇ ve yoˬ.

7Chi hkʼoˆ ka‸, nawˬ awˬ to hta‸ nawˬ jawˇmawˇ teh‸ shawˍ leh, Yeˍruˆsaˍlehnˍ venˇ awˬ hkʼaw lo nawˬ awˬ to hta‸ Yuˇda‸ mvuhˇmiˬ ve jawˇmawˇ, teh‸ tcuh kaˍ paˍ hui hta‸ kʼoˆ tcuh tuˬ awˬ hkʼaˇ gu chehˇ ve yoˬ, teh‸ yawˇ ngaˬ hta‸ kʼoˆ laˇ ve yoˬ. Awˬ lawn chi ve hta‸ jawˇmawˇ lonˉ awˬ to ka‸ gʼa kaˇ tuˬ yoˬ. Chi hta‸ pa taw, awˬ lawn chi ve hta‸ jehˬ da‸ tuˬ, nawˬ awˬ to laˬ-o‸, teh‸ bvuh‸ taˍ ve yoˬ

8Hkʼe te leh, ngaˬ yawˇ hta‸ li‸ chi hkʼe kʼaw‸ bvuh‸ feu piˇ ve yoˬ. Nawˬ kʼoˆ laˇ ve teˇ ceuˬ ka‸ maˇ cawˇ. Tawˇ oˇ ve teˇ hpaˍ nawˬ hkʼaˇ nawˬ ca dawˇ kʼoˆ ve yoˬ, teh‸ kʼoˆ feu piˇ ve yoˬ.

9Yawˇ hui lehˬ, ngaˬ hui awˬ gʼuˇ suhˍ kanˉ kʼaw‸ te maˇ gʼa tuˬ ho laˇ chehˇ ve yoˬ. Ya‸ hkʼaˇ, Gʼuiˬsha-oˬ, ngaˬ hta‸ awˬ gʼaˇ uiˍ la piˇ-oˆ.

10Awˬ yanˇ oˇ ve awˬ hkʼaw lo, Maˍheˍtaˍbeˍlaˆ ve awˬ hawehˍ, Deˬlaˍyaˆ ve yaˇ Sheˍmaˍyaˆ lehˬ, Gʼuiˬsha geh tawˇ teˇ hkawˇ gʼa kaˇ ve yoˬ, teh‸ kʼoˆ ve pa taw, ngaˬ yawˇ geh ca guiˇ-e ve yoˬ. Yawˇ ngaˬ hta‸ chi hkʼe kʼoˆ laˇ ve yoˬ. Yawˇ hui nawˬ hta‸ tiˇ pehˍ tuˬ laˬ chehˇ ve yoˬ. Ngaˬ huiˉ maˬ Gʼuiˬsha ve bon yehˬ hkʼaw, yehˬ miˉ hoˆ leh ca va‸ taˍ-a veuˬ, teh‸ kʼoˆ ve yoˬ.

11Oˇ htaˇ ngaˬ yawˇ hta‸ chi hkʼe kʼoˆ piˇ ve yoˬ. Ngaˬ lehˬ gʼuiˇ hpaw-e leh ca va‸ toˇ chehˇ ve chaw maˇ heˆ. Ngaˬ bon yehˬ hkʼaw ca va‸ taˍ leh, ngaˬ awˬ to gʼa ponˬ tuˬ te tuˬ yoˬ, teh‸ nawˬ dawˇ ve laˇ. Ngaˬ chi hkʼe te tuˬ ve maˇ heˆ, teh‸ yawˇ hta‸ kʼoˆ piˇ ve yoˬ.

12Awˬ lawn oˇ ve hta‸ ngaˬ kʼaw‸ dawˇ nyi ve teˇ yanˇ, Gʼuiˬsha yawˇ hta‸ tawˇ yaw piˇ taˍ ve maˇ heˆ ve hta‸ ngaˬ shiˍ la ve yoˬ. Ya‸ hkʼaˇ, Saˬbaˍlaˆ leh Tawˇbiˆ yawˇ huiˉ maˬ yawˇ hta‸ hpu piˇ leh chi hkʼe te tcuh taˍ ve yoˬ.

13Yawˇ huiˉ maˬ lehˬ, ngaˬ ve awˬ meh luˬ tu leh, ngaˬ hta‸ te ya‸ tcuh tuˬ, yawˇ hta‸ ngaˍ leh ngaˬ hta‸ ho laˇ chehˇ ve yoˬ.

14Gʼuiˬsha-oˬ, Tawˇbiˆ leh Saˍbaˍlaˆ te taˍ ve kanˉ hta‸ a ciˉ dawˇ nawˇ taˍ leh ciˍ yanˍ piˇ-oˆ. Ngaˬ hta‸ ho laˇ chehˇ ve tcuh kaˍ ma Nawˇdiˆ leh, awˬ nu ve tcuh kaˍ paˍ teˇ hpaˍ hta‸ htawˇ a ciˉ tawnˇ taˍ-o‸.

15Lanˇ venˇ hta‸ kawˍ ve 52 nyi gaˬ leh, Eˇluˇlaˆ ha pa 25 nyi htaˇ, lanˇ venˇ hta‸ kawˍ peuˬ ve yoˬ.

16Awˬ lawn chi ve hta‸ ngaˬ hui awˬ paˇ awˬ kui lo chehˇ ve canˇ paˍ teˇ hpaˍ gʼa kaˇ ve teˇ yanˇ, yawˇ hui mehˆ hpfuhˇ luˬ kʼai ve yoˬ. Awˬ lawn kʼo, Gʼuiˬsha ga laˇ ve pa taw, kanˉ chi hta‸ te peuˬ gʼa ve hta‸ chaw teˇ gʼaˇ le le shiˍ la ve pa taw yoˬ.

17Awˬ yanˇ chi teˇ hpaˍ awˬ hkʼaw lo, Yuˇda‸ chaw awˬ hoˉ awˬ naˬ teˇ hpaˍ lehˬ, Tawˇbiˆ hta‸ li‸ bvuh‸ da‸ chehˇ ve yoˬ.

18Yawˇ lehˬ, Aˍraˆ ve yaˇ paˍ Shaˍkaˍniˆ ve awˬ maˉ paˍ hpeh‸ ve pa taw, Yuˇda‸ chaw maˇ maˇ yawˇ hpawˇ lo chehˇ ve yoˬ. Chi hkʼoˆ ka‸, yawˇ yaˇ paˍ Yawˇhaˍnanˍ lehˬ, Beˍraˍhkiˆ ve awˬ hawehˍ, Meˍshuˆlanˍ ve yaˇ miˇ hta‸ heuˆ taˍ ve pa taw yoˬ.

19Yuˇda‸ chaw teˇ hpaˍ lehˬ, Tawˇbiˆ te taˍ ve da‸ ve kanˉ teˇ hpaˍ, ngaˬ hta‸ hto maˍ laˇ leh, ngaˬ hkʼa kʼoˆ ve tawˇ teˇ hkawˇ le le yawˇ hta‸ kʼaw‸ hto piˇ chehˇ ve yoˬ. Yawˇ lehˬ ngaˬ hta‸ ho laˇ tuˬ, teˇ hkui teˇ hkui ngaˬ geh li‸ bvuh‸ feu laˇ chehˇ ve yoˬ.

← Chapter 5 Jump to: Chapter 7 →