1 Samuel 1

Mossi MPBU (WẼNNAAM SEBRE 2014)

Jump to: Chapter 2 →

1Dao a ye n dag n be Ramatayim-Sofim sẽn be Efrayiim soolem ning sẽn be tãms sʋkã pʋgẽ, t'a yʋʋr boondẽ t'a Ɛlkana. Yẽnda yaa a Elihu biig a Zerokam biiga, n yaa Efrat ned a Suf biig a Tohu yagenga.

2A Ɛlkana rag n tara pagb a yiibu. A yembr yʋʋr la a Ãnde, t'a yembrã yʋʋr yaa a Penina. A Penina rag n tara kamba, la a Ãnd dag n ka paam biig ye.

3Yʋʋmd fãa, a Ɛlkana rag n yita a tẽngẽ wã n kẽnd Sɩlo n waoogd Sẽn-Ka-Saab sẽn yaa Saasẽ-Pãng-Soabã, la a maand maand n kõt-ba. A Eli kamb a yiibã, a Ofni ne a Fineyaas rag n bee beenẽ n yaa Sẽn-Ka-Saab maan-kʋʋdba.

4A Ɛlkana sã n maan a maoongã daare, a pʋɩta rũngã nemd n yãk n kõ a Penina ne a kom-dibli wã ne a kom-pugli wã fãa.

5La a yãkda pʋɩɩr a yiib n kõ a Ãnde, bala, yẽnda rag n nonga a Ãnde, baa ne Sẽn-Ka-Saab sẽn kɩt t'a yaa kiirã.

6A Ãnd pʋg-to wã rag n namsd-a lame, Sẽn-Ka-Saab sẽn maan t'a yaa kiirã yĩnga.

7Yʋʋmd fãa, a Ãnd sã n dag n kẽng Sẽn-Ka-Saab roogẽ wã, a Penina rag n namsd-a-la a woto bala. A Penina yaanda a Ãnd wa yẽnda sẽn mi n maandẽ wã, t'a yãbd n ka rat rɩɩb ye.

8Woto, a Ãnd sɩd a Ɛlkana sokd-a lame: «Yaa bõe tɩ fo yãbd n ka rat rɩɩbo? Yaa bõe tɩ f sũur sãamd a woto? Mam ka yɩɩd kom-dibli piig fo yĩng sɩda?»

9Bãmb sẽn zĩnd Sɩlo n dɩ la b yũ n sɛ, a Ãnd yikame. Maan-kʋʋd a Eli rag n zĩ a goeel zug Sẽn-Ka-Saab roogã noore.

10A Ãnd sũ-sãangã pʋgẽ, a pʋʋsa Sẽn-Ka-Saab n yãb wʋsgo.

11Yẽnda pʋlma Sẽn-Ka-Saab n yeele: «Saasẽ-Pãng-Soaba, yãmb sã n zoe mam sẽn yaa y tʋmtʋmd-poakã nimbãanega, n tẽeg m yelle, n ka yĩm m yelle, la y sã n kõ-m bi-ribla, mam na n dɩk-a lame n kõ yãmb a Sẽn-Ka-Saab a yõor tɛka, la barg kõn tol n tik a zug ye.»

12A Ãnd sẽn wa n pʋʋsd Sẽn-Ka-Saab n kaoosdẽ wã, a Eli rag n geta a no-bɩmsã.

13A Ãnd dag n gomda a sũur pʋgẽ, la yaa yẽnda no-bɩmsã bal n dag n yaagde, la a koɛɛgã rag n ka yit ye. Dẽ, a Eli tagsame t'a yũu rãam t'a neng yilimdẽ.

14A Eli yeel-a lame yaa: «Fo rãamã na n yi n bas-f-la wakat-bʋgo? Kẽng n tɩ gãand tɩ f rãamã yi!»

15La a Ãnd leoka a Eli yaa: «Ayo! M soaala, mam ka yũ reezẽ rãam wall bũmb sẽn yilimd neng ye. Mam yaa pag sẽn be sũ-sãang pʋga, la mam togsda Sẽn-Ka-Saab m sũ-sãangã.

16Da geelg-y mam sẽn yaa yãmb tʋmtʋmd-poakã wa nin-yaalg ye. Ad-y yaa mam sũ-sãangã la m toogã n kɩt tɩ m gomd hal tɩ ta moasã.»

17A Eli yeela a Ãnd yaa: «Bɩ f kẽng ne bãane, la bɩ Israyɛll Wẽnnaamã kõ foom bũmb ning fo sẽn kosã.»

18A Ãnd leokame n yeele: «Bɩ y maan y tʋmtʋmd-poakã neere.» La yẽnda loogame n tɩ rɩ la a yũ, la yẽnda nengã toeemame.

19A Ɛlkana ne a zakã rãmb yika yibeoog pĩnd n wõgemd n waoog Sẽn-Ka-Saabo, la b lebg n kuil b yir Rama. A Ɛlkana kẽe ne a pagã, la Sẽn-Ka-Saab tẽega a Ãnd yelle.

20Dẽ, yʋʋmdã sẽn wa n na n sɛ, tɩ yẽnda tara pʋga, la a roga bi-ribla. Yẽnda pʋda biigã yʋʋr t'a Sãmwɛlle, bala, yẽnda kos-a-la Sẽn-Ka-Saabo.

21A Ɛlkana ne a zakã rãmb fãa kẽngame n na n tɩ maan yʋʋmd-yʋʋmd maoongã n kõ Sẽn-Ka-Saabo, la a pids a pʋlengã.

22La so-kãnga, a Ãnd ka tũ n kẽng ye. Bala, a rag n yeela a sɩdã t'a na n basame tɩ biigã sigi, t'a yaool n tall-a n kẽng Sẽn-Ka-Saab nengẽ t'a tɩ pa beenẽ a yõor tɛka.

23A sɩd a Ɛlkana yeel-a lame: «Maan bũmb ning sẽn yaa sõama ne foom. Kell n pa kaanẽ hal tɩ biigã wa sigi. Sẽn-Ka-Saab weeg n pids b gomdã!» Dẽ, a Ãnd paa yiri. Yẽnda yẽsma a biigã hal t'a wa sigi.

24Biigã sẽn sigi, a Ãnd peeg-a lame, la a bao lols a tãabo, ne zom wamde, la reezẽ rãam ne ko-waooga, n tall n kẽng Sẽn-Ka-Saab roogẽ wã Silo. La biigã rag n ket n yaa bilfu.

25Bãmb kʋʋ loalgã, la b tall biigã n kẽng a Eli nengẽ.

26A Ãnd yeelame: «M soaala, y kabre! Mam wẽenda ne yãmba, tɩ yaa maam la pag ning sẽn dag n zĩnd-a yãmb sɛɛgẽ kaanẽ n pʋʋs Sẽn-Ka-Saabã.

27Yaa bi-kãngã raab yĩng la mam sẽn dag n pʋʋsdã, la Sẽn-Ka-Saab kõo maam bũmb ning mam sẽn kosã.

28Woto, mam me rat n dɩk-a lame n kõ Sẽn-Ka-Saabo, tɩ b soog-a a vɩɩmã tɛka. Dẽ, bãmb wõgemda Sẽn-Ka-Saab taoor beenẽ n waoog-ba.»

Jump to: Chapter 2 →