1 Samuel 24

Mossi MPBU (WẼNNAAM SEBRE 2014)

← Chapter 23 Jump to: Chapter 25 →

1A Davɩɩd yii beenẽ, n kẽng Ɛn-Gedi tãmsã sẽgsẽ n tɩ soonde.

2A Sayull sẽn tɩ zab ne Filistẽ-dãmbã n lebg n wa, b yeela yẽnda t'a Davɩɩd bee Ɛn-Gedi we-raoogã pʋga.

3Dẽ, a Sayull yãka Israyɛll gãndaad tus a tãab tɩ b kẽng n na n tɩ bao a Davɩɩd ne a nebã hal tɩ ta we-bʋʋsã pĩig kug zĩisẽ.

4A Sayull wa n taa piisã yãg sẽn be sorã noorã sẽnẽ. La bok n dag n be beenẽ, la a yẽnda kẽe be n na n yols a menga. Rẽ t'a Davɩɩd ne a nebã rag n zĩi bokã pʋga.

5Woto, a Davɩɩd nebã yeel-a lame: «Ade, Sẽn-Ka-Saab sẽn dag n yeel yãmba: Mam na n kõo foom f bɛ wã tɩ f maan f sẽn dat ne-a. Ra-kãng la woto.» A Davɩɩd soos n kolgame n wõrg a Sayull fuugã noore.

6La rẽ zugẽ, a Davɩɩd sũurã kiuusame, a sẽn wõrg a Sayull fuugã yĩnga.

7Woto, a Davɩɩd yeela a nebã yaa: «Bɩ Sẽn-Ka-Saab zãag maam ne yell a woto maanego. Bɩ b ra sak tɩ mam nug sɩɩs m soaalã sẽn yaa soab ning bãmb sẽn yãkã ye. Bala, yaa bãmb la Sẽn-Ka-Saab yãk yã.»

8A Davɩɩd gom-kãensã gɩdga a nebã tɩ b ka maan a Sayull bũmb ye. La a Sayull yikame n yi bokã pʋgẽ n dɩk a sor n looge.

9Rẽ zugẽ, a Davɩɩd me yii bokã pʋgẽ. La a zẽka a koɛɛg n yeel a Sayull yaa: «M dĩm la m soaala!» A Sayull wẽnemdame n ges a poorẽ, la a Davɩɩd fõgna a neng tẽnga,

10n yeel a Sayull yaa: «Yaa bõe tɩ yãmb kelgd neb nins sẽn yet yãmb tɩ maam a Davɩɩd rat n maana yãmb wẽngã?

11Bɩ yãmb meng gese: rũndã daarã, Sẽn-Ka-Saab yõka yãmb n kõ maam tãngã bok pʋgẽ. Nebã yeela maam tɩ m kʋ-yã! La mam zoee yãmb nimbãaneg n yeel tɩ m ka na n sɩɩs soab ning Sẽn-Ka-Saab sẽn yãkã ye.

12M dĩma, ges-y yãmb fuugã noor mam sẽn wõrg n zãada. Mam sẽn wõrg yãmb fuugã noor n yaool n bas yãmb n ka kʋ wã, bɩ y bãng tɩ m ka rat-y ne wẽnga, la m ka zabd ne-y me ye. Mam ka beeg yãmb ye, la baoosgo, yãmb digda maam n dat n kʋ.

13Sẽn-Ka-Saab n na n yɩ bʋ-kaood maam ne yãmb sʋka. Yaa bãmb n na n dok mam sũur ne yãmba, bala, mam nug kõn tol n sɩɩs yãmb ye.

14Wa yel-bũn-kʋdrã sẽn yetã: Wẽng yita nin-wẽns nengẽ. Dẽ wã, mam nug ka na n sɩɩs yãmb ye.

15Israyɛll dĩmã kẽng n na n tɩ zaba ne ãnda? Yãmb digda ãnda? Yaa ba-kɩɩng bɩ, bɩ yaa karenga?

16Sẽn-Ka-Saab n na n kao bʋʋdã. Bãmb n na n yɩ bʋ-kaood maam ne yãmb sʋka. Bãmb n na n zab n sõng maam. Bãmb na n fãaga maam yãmb nugẽ.»

17A Davɩɩd sẽn gom ne a Sayull a woto n sɛ, a Sayull yeelame: «M biig a Davɩɩde! Yaa fo koɛɛg la mam sẽn wʋmdã bɩ?» Dẽ, a Sayull yãba wʋsgo.

18Yẽnda yeela a Davɩɩd yaa: «Fo tɩrlmã yɩɩda maam, bala, baa ne mam sẽn maan foom wẽngã, fo maana maam neere.

19Rũndã, fo wilga f sõmblem ne maam, bala, Sẽn-Ka-Saab yõka maam n kõ foom, la fo basa maam n ka kʋ ye.

20Ned paamda a bɛ n leb n bas-a t'a loog ne laafɩ sɩda? Bɩ Sẽn-Ka-Saab rol foom maan-neer ning fo sẽn maan maam dũndã wã yĩnga.

21Moasã, mam miime tɩ foom n na n lebg rĩmã, la Israyɛll rĩungã na n paa fo nugẽ.

22Dẽ wã, bɩ f wẽen ne Sẽn-Ka-Saab yʋʋr tɩ mam loogr poore, f ka na n menes m yagensã, la f ka na n yẽes m yʋʋrã m buudã sʋk ye.»

23Woto, a Davɩɩd wẽena ne a Sayulli. La a Sayull lebg n kuila a yiri, la a Davɩɩd ne a nebã lebg n kẽnga b zĩ-soalgdgẽ wã.

← Chapter 23 Jump to: Chapter 25 →