1 Samuel 13

Mossi MPBU (WẼNNAAM SEBRE 2014)

← Chapter 12 Jump to: Chapter 14 →

1A Sayull sẽn wa n deeg naamã t'a tara yʋʋm sẽn zems bala. La a rag n zoe n dɩɩ naam Israyɛll yʋʋm a yiibu.

2A Sayull yãka Israyɛll neb tus a tãabo, la bãmb sʋkã neb tus a yiib n dag n be ne yẽnda Mikmaas ne Betɛll tãmsã zutu, la neb tusr n dag n be ne a Zonatã Gɩbeya tẽngã sẽn be Benzame soolmẽ wã. A Sayull kɩtame tɩ neb nins sẽn kellã ned kam fãa lebg n kuil a yiri.

3A Zonatã tõoga Filistẽ-dãmbã tãb-bi-sull ning sẽn dag n be Gɩbeya wã, la Filistẽ-dãmbã fãa wʋma yellã. A Sayull kɩtame tɩ b peeb baorg tẽngã fãa pʋgẽ n yeele: «Bɩ Ebre-rãmbã kelge!»

4Israyɛll nebã fãa wʋmame tɩ b gomd t'a Sayull tõoga Filistẽ-dãmbã tãb-bi-sulli, la Filistẽ-dãmbã kisga Israyɛll nebã. La nebã fãa tigma a Sayull nengẽ Gilgalle.

5Filistẽ-dãmbã tigmame n na n zab ne Israyɛll nebã. Bɛɛbã rag n tara saar-dãmb tus pis-tã, wed-rʋʋdb tus a yoobe, la b nebã rag n yaa wʋsg wa kʋɩlg noor bĩisri. Bãmb kẽng n tɩ tilga b tãb-sikã Mikmaas sẽn be Bɛt-Avɛn yaangã.

6Israyɛll nebã yãame tɩ b bee yell pʋga, bala, bɛɛbã rag n dɩdga bãmba. Bãmb zoe n tɩ soonda tãms bogd pʋse, bogdẽ, pĩis sʋka, yogdẽ, ne buls pʋsẽ.

7La Ebre-rãmbã neb kẽer dʋʋga Zʋrdẽ kʋɩlgã, n na n kẽng Gaad ne Galaad soolmẽ. Rẽ t'a Sayull dag n ket n bee Gilgalle, la neb nins fãa sẽn dag n be-b ne yẽnda wã rag n digda ne rabeem.

8A Sayull paa Gilgall n gũ rasem a yopoe, wa a Sãmwɛll sẽn dag n yeelã, la a Sãmwɛll dag n ket n ka wat ye. Nebã me rag n sãeegdame.

9Dẽ, a Sayull yeela nebã yaa: «Tall-y maoong sẽn yõogd bugmã rũmsi, ne zems-n-taar maandã n wa.» La yẽnda maana maoong sẽn yõogd bugmã.

10Yẽnda sẽn maan maandã n sɛ bal yee, la a Sãmwɛll sẽn be waoongẽ. A Sayull yiime n seg a Sãmwɛll n pʋʋs-a.

11A Sãmwɛll soka a Sayull yaa: «Yaa bõe la yãmb maan yã?» La a Sayull leokame yaa: «Mam sẽn wa n mik tɩ nebã sãeegdame n basd maamã, tɩ yãmb me kaoosd n ka wat wa y sẽn yeelã, tɩ Filistẽ-dãmbã yaool n tigim Mikmaasã,

12mam tagsame tɩ Filistẽ-dãmbã na n waa Gilgall n wa zab ne maam tɩ m nan ka paam n sigs Sẽn-Ka-Saab sũur ye! Yaa woto n kɩt tɩ mam keng m sũur n maan maoongã.»

13A Sãmwɛll yeela a Sayull yaa: «Yãmb sẽn maanã yaa yalemdo. Yãmb ka sak noor ning Sẽn-Ka-Saab sẽn yaa fo Wẽnnaamã sẽn kõ yãmbã ye. Sẽn-Ka-Saab rag n na n kɩtẽ lame tɩ yãmb ne y yagensã soog Israyɛll rĩungã wakat fãa.

14La moasã, yãmb rĩungã ka na n kaoos ye. Sẽn-Ka-Saab baoo ned sẽn ta bãmb yam t'a na n yɩ b nebã naaba, bala, yãmb ka sak Sẽn-Ka-Saab sẽn kõ yãmb noor ningã ye.»

15Woto, a Sãmwɛll yii Gilgall n kẽng Gɩbeya sẽn be Benzame soolmẽ wã. A Sayull sõda nebã sẽn dag n be ne yẽnda wã, la bãmb kolga neb kobs-yoobe.

16A Sayull ne a biig a Zonatã, la neb nins fãa sẽn dag n be ne bãmbã siga Gɩbeya sẽn be Benzame soolmẽ wã. La Filistẽ-dãmbã rag n tilga b tãb-sikã Mikmaase.

17Sãamdb sul a tãab n yi Filistẽ-dãmbã tãb-sikẽ wã: Sull a yembr dɩka Ofra sore, n teesd Suwall tẽngã sẽnẽ,

18tɩ sull a yembr dɩk Bɛt-Horon sore, t'a yembrã rɩk toadgã sor ning sẽn dabd Seboyim longã sẽn be we-raoogã sẽnẽ wã.

19Wakat-kãnga, sãab rag n ka leb n be Israyɛll tẽngã zĩig ba a yembr ye. Bala, Filistẽ-dãmbã rag n gɩdga Ebre-rãmbã tɩ b ra leb n kud sʋʋs ne kãn ye.

20Dẽ, Israyɛll ned ning fãa sẽn dag n dat-a n toos a wãk bɩ a soanga, wall a saas a lare ne a sʋʋga, rag n yaa tɩlɛ ne-a t'a kẽng Filistẽ-dãmbã nengẽ.

21Bãmb dag n yaooda wakɩ-koeems a yiibu, layã ne sʋʋsã manegr yĩnga, la wakɩ-koɛɛng a yembre, wãgsã ne somsã yĩnga la pĩim nins sẽn tar n tikd nag‑koodsã.

22Zabr sã n yiki, mikdame tɩ neb nins sẽn dag n be ne a Sayull la a Zonatã wã sʋk ned ba a yembr ka tar sʋʋg tɩ b gomd kãnd ye. Yaa a Sayull ne a biig a Zonatã bal n dag n tare.

23Filistẽ-dãmbã sull a yembr yiime n kẽng Mikmaas tãngã zĩ-lɛngẽ wã.

← Chapter 12 Jump to: Chapter 14 →