1 Samuel 20

Mossi MPBU (WẼNNAAM SEBRE 2014)

← Chapter 19 Jump to: Chapter 21 →

1A Davɩɩd yii Nayot sẽn be Rama wã n zoe n kẽng a Zonatã nengẽ n tɩ yeel-a yaa: «Mam maana bõe? Mam kongrã yaa bõe? Mam maana yel-wẽn-bʋg n beeg y baaba tɩ b rat n kʋ-ma?»

2A Zonatã leoka yẽnda yaa: «A ka na n yɩ a woto ye. Fo ka na n ki ye. M baaba ka maand bũmb tɩ b ka reng n wilg maam ye. Bõe tɩ b na n solg maam yel-kãngã? Yellã ka woto ye.»

3La a Davɩɩd leb n wẽename n yeele: «Yãmb ba wã mii vẽeneg tɩ yãmb nonga maam. Daar ninga, b tagsame tɩ yãmb sã n bãnge, y sũurã na n sãamame. La mam wẽenda ne Sẽn-Ka-Saab sẽn vɩ wã yʋʋre, la ne yãmba, tɩ mam ka leb n zãr ne kũum ye.»

4La a Zonatã yeela a Davɩɩd yaa: «Fo sẽn dat tɩ mam maan bũmb ning fãa, mam na n maaname.»

5Dẽ, a Davɩɩd leoka a Zonatã yaa: «Ade, beoog yaa ki-paalgã tigri, mam segd n zĩnda ne rĩmã n dɩ. Bas-m tɩ m kẽng weoogẽ wã n tɩ soond hal n tãag rayɩt zaabre.

6La f baaba sã n wa bãng tɩ mam ka be, bɩ f yeel-b tɩ mam kosa yãmb sor ne pẽdgr n kuil m tẽngẽ wã Betlehɛm, bala, yaa m buudã fãa yʋʋmd-yʋʋmd maoong maaneg daare.

7La b sã n yeel tɩ yell ka be, rẽnd b ka rat n maan maam wẽng ye. La b sũurã sã n yiki, bɩ y bãng tɩ b paam n yãka yam, n dat n maan maam wẽnga.»

8Bɩ y maan y tʋmtʋmdã neere, tõnd sẽn lagem taab n maan kaool Sẽn-Ka-Saab taoorã yĩnga. Mam sã n maana wẽng bɩ y kʋ-ma. Yaa bõe tɩ y na n tall-m n kẽng y baaba nengẽ?

9A Zonatã yeela a Davɩɩd yaa: «Da tags a woto ye. Ra tẽ tɩ m baaba tõe n dat n maana foom wẽnga, tɩ mam miẽ n yaool n ka wilg-f ye.»

10A Davɩɩd soka a Zonatã yaa: «La y ba sã n leok yãmb ne sũ-yikri, yaa ãndã n na n wa togs-ma?»

11A Zonatã yeela a Davɩɩd yaa: «Wa tɩ d kẽng weoogẽ wã.» Dẽ, bãmb b yiibã kẽngame.

12A Zonatã yeela a Davɩɩd yaa: «Mam wẽenda ne Sẽn-Ka-Saab sẽn yaa Israyɛll Wẽnnaamã yʋʋre, tɩ m na n soka m baaba beoog wall rayɩt woto wẽnde. B sã n ka baood foom ne wẽnga, m na n tʋmame tɩ wa togs-fo.

13Sã n leb n mikame tɩ b rata foom ne wẽng tɩ mam ka tʋm tɩ b wa togs foom, bɩ Sẽn-Ka-Saab sɩbg maam ne sɩbg-kãsenga. Mam na n togsa foom tɩ f loog ne bãane, la bɩ Sẽn-Ka-Saab zĩnd ne foom wa b sẽn dag n be ne m ba wã.

14La mam vɩɩmã fãa tɛka, bɩ y maan-m neere, wa sẽn zems Sẽn-Ka-Saab nimbãan-zoeerã, la y ra kʋ-m ye.

15Baa Sẽn-Ka-Saab sã n wa n menes yãmb bɛɛbã fãa dũni zugu, bɩ y kell n tall nonglem ne m yirã rãmb wakat fãa. Bɩ y ra bas tɩ m yʋʋrã menem m buudã pʋgẽ ye.»

16Dẽ, a Zonatã maana kaool ne a Davɩɩd roogã n yeele: «Bɩ Sẽn-Ka-Saab rok b sũur ne a Davɩɩd bɛɛbã.»

17A Zonatã kɩtame t'a Davɩɩd leb n wẽen a zoodã yĩnga, bala, yẽnda rag n nonga a Davɩɩd wa a menga.

18A Zonatã yeela a Davɩɩd yaa: «Ade, beoog yaa ki-paalgã tigri. La b na n yãame tɩ y ka be be ye. Bala, y zĩigã na n yɩɩ vɩʋʋgo.

19La rayɩta, bɩ f kẽng n tɩ soond zĩig ning yãmb sẽn dag n tɩ soondẽ pĩndã, n pa Ezɛll kugrã poore.

20Mam na n teesa kugrã n tão pɛɛm a tãabo, wa yaa bũmb la m dat n tão.

21Dẽ poore, mam na n tʋma m tʋmtʋmdã t'a tɩ gẽes pɛɛmã. Mam sã n yeel m dakõorã tɩ pɛɛmã be a taoor la a rɩk-ba, bɩ f wa ne Sẽn-Ka-Saab yʋʋr tɩ yell ka be ye.

22La mam sã n yeel-a tɩ pɛɛmã bee hal taoore, bɩ f loog tɩ yaa Sẽn-Ka-Saab n yet tɩ f looge.

23La sã n yaa ne kaool ning tõnd sẽn maan ne taabã, Sẽn-Ka-Saab na n yɩɩ tõnd kaset soab wakat fãa.»

24Woto, a Davɩɩd tɩ soonda weoogã pʋgẽ. Rag n yaa ki-paalgã tigr daare, la rĩmã zĩndame n na n dɩ.

25Rĩmã zĩnda b zĩigẽ, lalgã sɛɛga, wa b sẽn mi n maandẽ wã. A Zonatã yikame t'a Abneer zĩnd n pẽneg rĩm a Sayulli, la a Davɩɩd zĩigã rag n yaa vɩʋʋgo.

26La badaare, a Sayull ka yeel tɩ bũmb ye. Bala, yẽnda rag n tagsdame tɩ daar ninga, tõe t'a Davɩɩd ka yɩlg a meng ye.

27La vẽkembeoogã sẽn yaa ki-paalgã rasem a yiib daarã, a Davɩɩd zĩigã rag n ket n yaa vɩʋʋgo. Dẽ, a Sayull soka a biig a Zonatã yaa: «Maana a wãn t'a Izayi biigã ka wa rɩ zaamẽ ne rũndã fãa?»

28La a Zonatã leoka a Sayull yaa: «A Davɩɩd kosa maam ne pẽdgr tɩ m kõ-a sor t'a kẽng Betlehɛm.

29A kosame tɩ m bas-a t'a kuili, t'a buudã tara maoong n dat n maane, t'a kẽemã tʋm tɩ b bool-a t'a wa. La a yeelame tɩ m sã n nong-a, bɩ m kõ-a sor t'a kẽng n tɩ ges a kẽem-dãmbã la a lebg n wa. Yaa rẽ n kɩt t'a ka wa n naag rĩmã n na n dɩ ye.»

30Woto, a Sayull sũurã yika ne a Zonatã t'a yeel-a yaa: «Pʋg-kõb-wẽng pʋg-tõatg biiga, mam miime tɩ fo be a Izayi biigã poorẽ. Fo ninga f meng yãnde, la f ning f ma sẽn dog foomã yãnde.

31A Izayi biigã sã n ket n vɩ, fo kõn tol n paam laafɩ, la fo kõn paam rĩungã me ye. Tʋm neb tɩ b tɩ yõk-a n wa, bala, a toga ne kʋʋbo.»

32A Zonatã leoka a Sayull yaa: «Yaa bõe yĩng tɩ b rat n kʋ a Davɩɩde? A maana bõe?»

33A Sayull dɩka a kãndã n na n tão a Zonatã. Dẽ, a Zonatã bãngame t'a baaba sɩd yãka yam n dat n kʋ a Davɩɩde.

34A Zonatã sũurã yika hal wʋsgo, t'a yik n bas rɩɩbã. Yẽnda ka tol n dɩ ki-paalgã tigr dasem a yiib daarã rɩɩb ye. Yẽnda sũurã sãama a Davɩɩd yĩnga, a ba wã sẽn ning-a yãndã yĩnga.

35Vẽkembeoogã yibeoogo, a Zonatã kẽnga weoogẽ wã, n na n tɩ seg a Davɩɩd wa b sẽn dag n sedã, la bi-bɩɩg a yembr n tũ yẽnda.

36A Zonatã yeela bi-bɩɩgã yaa: «M kotame tɩ f wudg n tɩ wʋk pɛɛm nins mam sẽn na n tão wã n wa.» Dẽ, bi-bɩɩgã zoeeme, la a Zonatã tãoo peemdã tɩ zʋʋg bi-bɩɩgã n tɩ lʋɩ taoore.

37La bi-bɩɩgã sẽn ta zĩig ning peemdã sẽn lʋɩẽ wã, a Zonatã zẽka a koɛɛg n yeel yaa: «Peemdã bee hal taoore.

38Zoe tao-tao n da yals ye.» La bi-bɩɩgã wʋka pɛɛmã n wa kɩs a soaal a Zonatã.

39La bi-bɩɩgã ka bãng bõn-kãng võor ye. La a Zonatã ne a Davɩɩd rag n mi a võore.

40A Zonatã rɩka a zab-teedã n kɩs a bi-bɩɩgã, n yeel-a t'a tall-b n kẽng tẽngã pʋgẽ.

41Bi-bɩɩgã loogr poore, a Davɩɩd yika goabg sẽnẽ wã n yi, n wõgemd n fõgen a neng tẽng naoor a tãabo. A Davɩɩd ne a Zonatã moka taab n yãbe, la a Davɩɩd zẽka a koɛɛg n yãb n yɩɩd a Zonatã.

42La a Zonatã yeela a Davɩɩd yaa: «Moasã, kẽng ne bãane. Tõnd d yiibã fãa wẽena ne Sẽn-Ka-Saab yʋʋr n yeele: bɩ Sẽn-Ka-Saab zĩnd maam ne foom sʋka, la mam yagensã ne fo yagensã sʋk wakat sẽn kõn sɛ yĩnga.»

← Chapter 19 Jump to: Chapter 21 →