1 Samuel 19

Mossi MPBU (WẼNNAAM SEBRE 2014)

← Chapter 18 Jump to: Chapter 20 →

1A Sayull yeela a biig a Zonatã ne a tʋmtʋmdbã fãa, tɩ yẽnda rat n kʋ a Davɩɩde. La a Zonatã sẽn yaa a Sayull biigã yaool n dag n nonga a Davɩɩd hal wʋsgo.

2A Zonatã rɩka yellã n taas a Davɩɩde, la a yeel a Davɩɩd yaa: «Mam ba a Sayull dat n kʋʋ foom. Dẽ wã, m kotame tɩ beoog yibeoogo, bɩ f maan gũusgu, n bao zĩig n solge.

3Mam na n yiime n yals m ba wã sɛɛgẽ, pʋʋg ning fo sẽn na n zĩndẽ wã. Mam na n goma fo yell ne bãmb n bãng b ratmã, n yaool n wa togs foom.»

4A Zonatã pẽga a Davɩɩd a ba a Sayull taoor n yeele: «N-na, m kotame tɩ y ra maan y tʋmtʋmd a Davɩɩd wẽng ye. Bala, a ka beeg-y ye. Yẽnda maana yãmb neer wʋsgo.

5Yẽnda gẽnega a yõore, n kʋ Filistẽ daoã. La Sẽn-Ka-Saab tall-a lame n wa ne fãag-kãseng Israyɛll nebã fãa yĩnga. Yãmb yãnda bõn-kãng tɩ y sũurã yɩ noog hal wʋsgo. La maana a wãn moasã, tɩ y rat n maan wẽnga, n kʋ a Davɩɩd n daag bʋʋm soab zɩɩm zaalem?»

6A Sayull kelga a Zonatã goamã, la a wẽen n yeele: «Ne Sẽn-Ka-Saab sẽn vɩ wã yʋʋre, mam ka na n kʋ a Davɩɩd ye!»

7Dẽ, a Zonatã boola a Davɩɩd n togs-a gom-kãens fãa, la a tall-a n leb a Sayull nengẽ, t'a tɩ maand a tʋʋmdã wa pĩndã.

8Zabrã leb n yikame, t'a Davɩɩd kẽng n na n tɩ zab ne Filistẽ-dãmbã. A Davɩɩd paama tõog-kãsenga, n kʋ b neb wʋsgo, la a rig-b tɩ b zoe.

9La sɩ-wẽng ning Sẽn-Ka-Saab sẽn dag n tʋmã leb n kẽ a Sayulli, a sẽn wa n zĩ a roogẽ wã n zãad a kãndã, la a Davɩɩd me rag n wẽeda a kʋndã.

10A Sayull rag n dat n dɩdga a Davɩɩd ne roogã n tão ne a kãndã n kʋ. La a Davɩɩd kuugame tɩ kãndã yõg roogã. Woto, a Davɩɩd yiime n zoe ne yʋngã n põse.

11A Sayull tʋma neb ne yʋngã, tɩ b gũus a Davɩɩd a zakẽ wã tɩ vẽkembeoogã yibeoog bɩ b kʋ-a. La a Mikall sẽn yaa a Davɩɩd pagã rɩka yellã n wilg a Davɩɩde, n yeel-a yaa: «Yʋn-kãngã tɩ yãmb sã n ka zoe, beoogo y na n yɩɩ kũum.»

12Dẽ, a Mikall kɩtame t'a Davɩɩd tũ roogã võorẽ n sig n zoe, n paam n põse.

13La a Mikall rɩka bõn-naandg n gãneg a Davɩɩd gãagẽ wã, n kʋgl-a ne zu-kʋk sẽn maan ne bʋʋg kõbdo, n yaool n bao fu-goabg n pil-a.

14A Sayull tʋmame tɩ b tɩ yõk a Davɩɩde, la a Mikall yeelame t'a Davɩɩd ka keem ye.

15Dẽ, a Sayull leb n tʋma nebã tɩ b tɩ ges a Davɩɩde. Yẽnda yeela bãmb yaa: «Bɩ y tɩ tall a Davɩɩd ne a gãagã fãa n wa tɩ m kʋ-a.»

16B sẽn tʋm-b rãmbã kẽ a Davɩɩd doogẽ wã, la b yãame tɩ bõn-naandg n be gãagã zugu, tɩ bʋʋg kõbd be a zugã tẽngre.

17A Sayull soka a Mikall yaa: «Yaa bõe tɩ fo belg maam a woto tɩ m bɛ wã põse?» La a Mikall leokame yaa: «A Davɩɩd yeelame tɩ m sã n ka bas-a t'a looge, a na n kʋ-m lame.»

18Yɩɩ woto t'a Davɩɩd tõog n zoe n põse. Dẽ, yẽnda kẽnga a Sãmwɛll nengẽ Rama n tɩ wilg-a bũmb nins fãa a Sayull sẽn maan yẽnda wã. La yẽnda tũ a Sãmwɛll n tɩ zĩnd Nayote.

19B wa n togsa a Sayull t'a Davɩɩd bee Nayot sẽn be Rama wã.

20Dẽ, a Sayull tʋma neb tɩ b tɩ yõk a Davɩɩde. La nin-kãens yãnda Wẽnnaam no-rɛɛsdb wʋsg tɩ b maand no-rɛɛs manesem, la a Sãmwɛll n dag n yaa bãmb taoor soaba. Wẽnnaam Sɩɩgã kẽe bãmba, tɩ bãmb me sɩng n maand no-rɛɛs manesem.

21B rɩka yellã n tɩ togs a Sayulli, la yẽnda leb n tʋma neb a taaba, la bãmb me sɩng n maanda no-rɛɛsdb manesem. A Sayull leb n tʋma neb naoor a tãabẽ soaba, la bãmb me sɩngame n maand no-rɛɛsdb manesem.

22Dẽ, a Sayull kẽnga Rama a toore, la yẽnda sẽn ta bul-kẽengã sẽn be Seku wã, a sokame yaa: «A Sãmwɛll ne a Davɩɩd bee yɛɛnẽ?» La b leokame tɩ b bee Nayot sẽn be Rama wã.

23Woto, a Sayull yii be n kẽng Nayot sẽn be Rama wã. Wẽnnaam Sɩɩgã kẽe yẽnda me, t'a rɩk sorã n kẽnd la a togsd pĩnd-n-bãngr goam hal n tɩ ta Nayot sẽn be Rama wã.

24Yẽnda sẽn ta beenẽ, yẽnda me yeesa a futu, n sɩng n togsd pĩnd-n-bãngr goam a Sãmwɛll taoore. La yẽnda lʋɩɩme n vãbend n pa be daarã ne yʋngã tõre. Woto n kɩt tɩ nebã wẽed yel-bũnd n yetẽ yaa: «A Sayull me lebga Wẽnnaam no-rɛɛs la?»

← Chapter 18 Jump to: Chapter 20 →