2 Samuel 9

Mossi MPBU (WẼNNAAM SEBRE 2014)

← Chapter 8 Jump to: Chapter 10 →

1Daar a yembre, a Davɩɩd sokame yaa: «A Sayull buud ned ka ket tɩ m tõe n maan-a neer a Zonatã maasem yĩnga?»

2A Sayull zakẽ wã tʋmtʋmd a ye yʋʋr sẽn boond t'a Siba n dag n bee beenẽ, la b kɩtame t'a wa a Davɩɩd nengẽ. La rĩmã sok-a lame: «Yaa foom la a Siba bɩ?» T'a leoke: «N-na, yaa maam!»

3Rĩmã sokame: «A Sayull roogã ned ka ket tɩ m maan-a neer Wẽnnaam yĩnga?» A Siba leoka rĩmã yaa: «A Zonatã biig bal n ket n beẽ, la a yaa põore.»

4Rĩmã sokame tɩ biigã bee yɛɛnẽ? La a Siba leokame t'a bee Lodebaar tẽng rao a Amiyɛll biig a Makɩɩr yiri.

5Rĩm a Davɩɩd tʋmame tɩ b kẽng be n tɩ tall-a n wa.

6La a Sayull biig a Zonatã biig a Mefibosɛt waa n yĩgimda rĩm a Davɩɩd taoor n fõgen a neng tẽnga. A Davɩɩd boola a Mefibosɛte, la a leokame: «N-na! Ad-ma!»

7A Davɩɩd yeela yẽnda: «Da zoe rabeem ye. Mam na n maana foom neere, fo ba a Zonatã maasem yĩnga. Mam na n lebsa foom f yaab a Sayull pʋtã fãa, la fo na n naagda maam daar fãa n dɩtẽ.»

8A Mefibosɛt wõgemdame n yeel yaa: «N-na! Mam me yaa ãnda, tɩ y get m yelle? Mam sẽn yaa wa ba-kɩɩng balã.»

9Rĩmã kɩtame tɩ b bool a Sayull tʋmtʋmd a Siba n yeel-a yaa: «Mam na n kõo fo soaal a Sayull yagengã bũmb nins fãa sẽn dag n yaa a Sayull ne roogã rẽndã.

10Bɩ foom ne f kambã la f tʋmtʋmdbã ko n kõ a Mefibosɛte, la f tall koodã n wa tɩ f zu-soabã biig paam dɩɩb n dɩ. La a Mefibosɛt na n naagda maam n dɩt daar fãa.» A Siba rag n tara kom-dibli piig la a nu, la tʋmtʋmdb pisi.

11La a Siba yeela rĩmã yaa: «Mam na n maana bũmb nins fãa yãmb sẽn yeelã.» La a Mefibosɛt dag n naagda rĩm a Davɩɩd daar fãa n dɩtẽ, wa rĩmã meng biiga.

12A Mefibosɛt rag n tara bi-ribla t'a yʋʋr boondẽ t'a Mika. Neb nins fãa sẽn dag n be a Siba zakẽ wã lebga a Mefibosɛt tʋmtʋmdba.

13La a Mefibosɛt sẽn dag n tog n naagd rĩmã daar fãa n dɩtẽ wã yĩnga, yẽnda tɩ zĩnda Zeruzalɛm, bala, a rag n yaa põore.

← Chapter 8 Jump to: Chapter 10 →