Revelation 1

Marwari Bible

Jump to: Chapter 2 →

1आ यीसु मसीह रै दरसण री किताब है, जिकौ उणनै परमेसर इण वास्तै दी की आपरै दासो नै वो बातां, जिणरौ हाथोहाथ होणौ जरुरी है, दिखावै। अर यीसु आपरै सरगदूत नै भेजनै उणरै जरियै आपरै दास यूहन्‍ना नै बताई,

2जिणै परमेसर रै वचन अर यीसु मसीह री गवाई, अरथ जे कीं उणै देख्यौ हो उणरी गवाई दीनी।

3धन्य है वो जिकौ इण भविसयवांणी रै वचन नै पढ़े है, अर वे जिकौ सुणै है अर इणमे लिख्योड़ी बातां नै मांनै है, क्यूंकै वगत नैड़ौ आयग्यौ है।

4यूहन्‍ना री तरफ ऊं आसिया री सात कलीसियाओ रै नाम। उणरी तरफ ऊं जिकौ है, अर जिकौ हा, अर जिकौ आवणवाळा है। अर उण सात आतमाओ री तरफ ऊं, जिकौ उणरै सिंहासण रै सांम्ही है। अर यीसु मसीह री तरफ ऊं, जिकौ विसवास लायक गवाई अर मरयोड़ौ मांय ऊं जी उठनैवाळौ मे पहिलौठो, अर धरती रै राजाओ रौ हाकिम है, थांनै अनुग्रह अर सानति मिळती रै। जिकौ म्हौरै ऊं परैम राखै है, अर जिणै आपरै लोई रै जरियै अपांनै पापों ऊं छुड़ाया है।

6अर म्हौ नै एक राज अर उणरौ पिता परमेसर रै लियै याजक ही बणा दिया। उणरी महिमा अर ताकत जुग जुग होती रै। आमीन।

7सुणौ, वो बादळो रै साथै आवणवाळौ है। अर हरैक आंख उणनै देखेला, बल्कि जिणौ उणनै बिंधियों है, वे भी उणनै देखेला, अर धरती रा सगळा कुळ उणरै खातर छाती पीटेला। हां। आमीन।

8परभु परमेसर जिकौ है, अर जिकौ हा, अर जिकौ आवण वाळौ है, जिकौ सबां ऊं ताकतवर है, ओ कैवै है, “म्हैं ही अल्फा अर ओमेगा हूं।”

9म्हैं यूहन्‍ना, जिकौ थौरो भाई अर यीसु रै दुख, अर राज, अर धीरज में थौरे साथै हूं, परमेसर रै वचन, अर यीसु री गवाई रै कारण पतमुस नाम रै टापू में भेज्यौ गियौ।

10म्हैं परभु रै दिन पवितर आतमा में आ ग्या, अर म्हारै लारै तुरही ज्यूं जोर ऊं ओ सबद कैवतै सुण्यौ,

11“जिकौ कांई थूं देखे है वांनै पोथी मे लिखनै सातों कलीसियाओ रै खनै भेज दे, ज्यूं इफिसुस, अर स्मुरना, अर पिरगमुन, अर थुआतीरा, अर सरदीस, अर फिलदिलफिया, अर लौदीकिया नै।”

12अर म्हैं उणनै जिकौ म्हारै ऊं बोल रियौ हो, देखणै रै लियै म्हारौ मूंडौ फेरयो। अर लारै घूमनै म्हैं सोने रा सात दीया देख्यां,

13अर उण दीयौ रै बीच में मिनख रै बेटे सरीखे एक आदमी नै देख्यौ, जिकौ पगां तांई रा गाभा पैरयोड़ा, अर छाती ऊपर सोने रौ पटुको बांधयोड़ौ हो।

14उणरै माथा रा बाल बरफ री ज्यूं उजळा हा। अर उणरी आंख्यां अग्‍नि री लपटो री ज्यौ ही।

15अर उणरा पग उतम पीतळ रै जैड़ा हा जांणै भठी मे तपाया हो। अर उणरौ सबद घणै पांणी रै चालनै री आवाज रै जैड़ौ हो।

16अर वो आपरै जीमणै हाथ मे सात तारा लियोड़ा हा। अर उणरै मूंडै ऊं चौखी दोधारी तरवार निकळती ही। अर उणरौ मूंडौ ऐड़ौ चमकतौ हो, ज्यूं सूरज तड़कै री वैळा चमकै है।

17जद म्हैं उणनै देख्यौ, तो उणरै पगां में मरयोड़े जैड़ौ होयनै पड़ गियौ अर उणनै म्हारै माथै आपरौ जीमणौ हाथ राखनै ओ कयौ, “डर मती। म्हैं पैला अर आखरी हूं।

18म्हैं वोहीज ऊं जिणरै खनै जीवन है। पैला म्हैं मर ग्यौ हो, अर अबै देख म्हैं जुग जुग जीवतौ हूं। अर मौत अर अधोलोक री चाबियो म्हारै खनै इज है।

19इण वास्तै जिकौ बातां थै देखी है अर जिकौ बातां होय रीं है अर जिकौ बातां इणरै पछै होणवाळी है, उण सबां नै लिख दे।

20अरथावूं उण सात तारो रौ भेद जिणनै थै म्हारै जीमणै हाथ मे देख्यौ हो, अर उण सात सोने रै दीयौ रौ भेद, वे सात तारा सातों कलीसियाओ रा दूत है, अर वे सात दीया सात कलीसियाओ है।”

Jump to: Chapter 2 →