Revelation 5

Marwari Bible

← Chapter 4 Jump to: Chapter 6 →

1जिकौ सिंहासण ऊपर बैठौ हो, म्हैं उणरै जीमणै हाथ मांय एक किताब देखी ही जिकौ मांय ऊं अर बारै ऊं लिखयोड़ी ही, अर वो सात मुहर लगाय नै बंद कियोड़ी ही।

2पछै म्हैं एक ताकतवर सरगदूत नै देख्यौ जिकौ ऊंची आवाज ऊं घोसणा की, “इण किताब नै खोलनै अर इणरी मुहरो तोड़नै रै लायक कुण है?”

3पण नीं सरग मांय, नीं धरती माथै, नीं धरती रै नीचे कोई उण किताब नै खोलणै या उण माथै निजर घाल नै रै लायक निकळयौ।

4तद म्हैं फूट फूटनै रोवण लागौ, क्यूंकै उण किताब नै खोलनै या उण ऊपर निजर घाल नै रै लायक कोई नीं मिळियौ।

5इण कारण उण वडेरो में ऊं एक म्हनै कयौ, “मती रोव। सुण, यहूदा रै गोत्र रौ वो सिंघ जिकौ दाऊद रौ मूल है, उण किताब नै खोलणै अर उणरी सातों मुहरे तोड़नै रै खातर जीतयो है।”

6तद म्हैं उण सिंहासण अर च्यांरू जीवते प्राणियों अर उण वडेरो रै बीच में, एक बलि करयोड़ौ उनिया जैड़ौ ऊभौ देख्यौ। उणरै सात सींग अर सात आंख्यां ही। ऐ परमेसर री सातों आतमाओ है जिकौ सगळी धरती माथै भेजी गी है।

7वो आयनै उणरै जीमणै हाथ ऊं जिकौ सिंहासण माथै बैठौ हो, वो किताब ले ली।

8जद उणै किताब ले ली, तो वे च्यांरू जीवते प्राणी अर चौबीस वडेरा उण उनिया रै पगां पड़या। उणमे ऊं हरैक रै हाथ में वीणो अर धूप, जिकौ पवितर लोगां री पराथनाओं है उण ऊं भरयोड़ा सोने रा कटोरा हा।

9वे ओ नवो गीत गान लागा, “थूं इण किताब नै लेवण, अर इणरी मुहरो खोलनै रै लायक है। क्यूंकै थै बलि होयनै अपणै लोई ऊं हरैक कुळ अर भासा अर लोग अर जाति में ऊं परमेसर रै लियै लोगां नै मोल लिया है,

10अर उणनै म्हौरै परमेसर रै लियै एक राज अर याजक बणाया। अर वे धरती माथै राज करै है।”

11जद म्हैं देख्यां, तो उण सिंहासण अर उण जीवता प्राणियों अर उण वडेरा रै च्यांरूमेर घणाहारा सरगदूतो नै बोलता सुण्या, जिणरी गिणती लाखो अर करोड़ो री ही,

12अर वे ऊंची आवाज ऊं कैवता हा, “बलि कियोड़ौ उनियां इज सामरथ अर धन अर ग्यांन अर सगति अर आदर अर महिमा अर धन्यवाद रै लायक है।”

13पछै म्हैं सरग में अर धरती माथै अर धरती रै नीचे अर समंदर रै मांय हरैक जीव नै ओ केवतो सुण्यौ, “जिकौ सिंहासण माथै बैठौ है उणरौ अर उनियां रौ धन्यवाद अर आदर अर महिमा अर राज युगानयुग रैवै।”

14अर च्यांरू जीवतौ प्राणियों आमीन कयौ, अर वडेरो झुकनै परणाम करयौ।

← Chapter 4 Jump to: Chapter 6 →