Revelation 13

Marwari Bible

← Chapter 12 Jump to: Chapter 14 →

1तद म्हैं एक डरावणै पसु नै समंदर में ऊं निकळतो देख्यौ, जिणरै दस सींग अर सात माथा हा। उणरै सींगो ऊपर दस राजमुगट, अर उणौरै हरैक रै माथा ऊपर परमेसर री निंदा रा नाम लिख्यौड़ा हा।

2जिकौ पसु म्हैं देख्यौ, वो चीते रै जैड़ौ हो। अर उणरा पग भालू रै ज्यूं, अर मूंडौ सिंघ रै जैड़ौ हो। अर उण अजगर नै आपरी सामरथ, अर आपरौ सिंहासण, अर मोटो अधिकार, उणनै दे दियौ।

3अर म्हैं उणरै माथै ऊपर ऐड़ौ मोटो घाव लागोड़ो देख्यौ, जांणै वो मरण वाळौ हो, पछै उणरौ जानलेवा घाव सावळ होय गियौ, अर सगळी धरती रा लोग उण पसु रै लारै लारै अचूम्बो करता होया चालया।

4अर उणौ अजगर री पूजा की, क्यूंकै उणै पसु नै आपरौ अधिकार देय दियौ हो। वळै उणौनै उण डरावणै पसु री भी पूजा किनी ओ कैयनै, “इण पसु रै जैड़ौ कुण है? कुण इण ऊं लड़ सकै है?”

5उण डरावणै पसु नै मोटा बोल बोलणै अर निंदा करणै रै वास्तै एक मूंडौ दियौ, अर उणनै बयाळीस महीनै तांई कांम करणै रौ अधिकार दियौ।

6उणनै परमेसर री बेजती करणै रै वास्तै मूंडौ खोलयो की उणरै नाम अर उणरै तम्बू अरथावूं सरग रै रैवणवाळौ री बेजती करै।

7अर उणनै ओ अधिकार दियौ, की परमेसर रै पवितर लोगां ऊं लड़ै, अर उणौ माथै जीत हासल करै, अर उणनै हरैक कुळ, अर लोग, अर भासा, अर जाति ऊपर अधिकार दियौ गियौ।

8धरती रा वो सगळा रैवणवाळा, जिणरा नाम उण उनियां री जीवन री किताब में लिख्या कोनीं ग्या हा, वो उण डरावणै पसु री पूजा करैला। उनियां जिकौ जगत री सरूआत ऊं बलि होणै रै खातर तैयार कियोड़ौ हो।

9जिणरा कांन होवै वो सुण ले।

10जिणनै कैद में पड़णौ है, वो कैद में पड़ैला। जिकौ तरवार ऊं मारैला, जरुरी है की वो तरवार ऊं मारयो जावैला। परमेसर रा पवितर लोगां रौ धीरज अर विसवास इणी में है।

11पछै म्हैं एक वळै डरावणै पसु नै धरती में ऊं निकळतो होयौ देख्यौ, उणरै उनियां रै जैड़ा दो सींग हा, पण वो अजगर रै ज्यूं बोलतौ हो।

12वो उण पैलै डरावणै पसु रा सगळा अधिकार उणरै सांमै कांम में लातो हो, अर धरती अर उणरै रैवणवाळौ ऊं उण पैलै पसु री, जिणरौ प्राणघातक घाव सावळ होय गियौ हो, पूजा करातो हो।

13वो मोटा मोटा चिन्ह देखातो हो, एठै तांई की मिनखौ रै सांम्ही आभै ऊं धरती माथै अग्‍नि बरसा देतो हो।

14पैला डरावणै पसु रै अधिकार ऊं वो चमतकार बतातौ हो, वो धरती रै रैवणवाळौ नै भरमातो हो अर केवतो हो की जिण पसु रै तरवार लगी ही वो जी ग्यौ है, अर उणरी मूरत बणाओ।

15उणनै उण पसु री मूरती में प्रांण घालनै रौ अधिकार दियोड़ो हो की पसु री मूरती बोलण लागै, अर जिता लोग उण पसु री मूरती री पूजा नीं करै, उणौनै मरवा नोखे।

16उणै छोटे-मोटे, अमीर-कंगाल, आजाद-गुलाम सबां रै जीमणै हाथ या उणौरै माथा ऊपर एक एक छाप लगाणै वास्तै मजबूर किया।

17की उणनै छोड़ जिण ऊपर छाप मतलब उण डरावणै पसु रौ नाम या उणरै नाम रौ अंक नीं हो, दूजा कोई लेण-देण नीं कर सकै।

18ग्यांन इणी में है। जिणै बुद्धि हो वो इण पसु रौ अंक जोड़ ले, क्यूंकै वो मांनखै रा अंक है, अर उणरा अंक छह सौ छियासठ है।

← Chapter 12 Jump to: Chapter 14 →