Revelation 18

Marwari Bible

← Chapter 17 Jump to: Chapter 19 →

1इणरै पछै म्हैं एक सरगदूत नै सरग ऊं उतरतो देख्यौ, जिणनै मोटो अधिकार मिळियोड़ो हो। अर धरती उणरै तेज ऊं चमक उठी।

2उणै ऊंचै सबद ऊं हेलौ करनै कयौ, “नास होयौ, मोटो बेबिलोन नास व्‍है ग्यौ! वो दुस्ट आतमाओ रौ रैवास, अर हरैक असुद्ध आतमा रौ अडो, अर हरैक असुद्ध अर भूंडै जिनावरां रौ अडो व्‍है ग्यौ।

3क्यूंकै उणरै व्यभिचार री खतरनाक मदिरा रै खातर सगळी जातियो गिर गी है, अर धरती रै राजाओ नै उणरै साथै व्यभिचार करयौ है, अर धरती रा व्यापारी उणरै सुख-विलास रै घणै होणै रै खातर धनवान होया है।”

4पछै म्हैं सरग ऊं एक वळै सबद सुण्यौ, “हे म्हारै लोगां, उण में ऊं निकळ आओ की थै उणरै पापों में भागी मत होवो, अर उणरी तकलीफो में ऊं कोई थांरै ऊपर नीं आ पड़ै।

5क्यूंकै उणरै पापों रौ ढ़ेर सरग तांई पूग गियौ है, अर उणरै अधरम परमेसर नै याद आवै है।

6जैड़ौ उणै थांनै दियौ है वैड़ौ ही उणनै दो, अर उणरै कांमां रै मुजब उणै दो गुणा बदळा दो। जिण कटोरे में उणै भर नै दियौ हो उणी में उणरै लियै दो गुणा भर दो।

7जिती उणै आपरी सौभा की अर सुख विलास कियो, उती उणनै पीड़ा अर सौग दो। क्यूंकै वां आपरै मन में कैवै है, ‘म्हैं राणी ज्यूं बैठी हूं, विधवा कोनीं। अर सौग में कदैई नीं पड़ूं ला।’

8इण खातर एक इज दिन में उण ऊपर विपतियां आ पड़ैला, ज्यूं मौत, सौग, अर अकाळ। अर वो अग्‍नि में भसम कर दी जावैला, क्यूंकै उणरौ न्यावी परभु परमेसर सगतिमान है।

9“धरती रै राजा जिणौनै उणरै साथै व्यभिचार अर सुख-विलास कियो, जद उणरै बळणै रा धुआं देखेला, तो उणरै खातर रोवेला अर छाती पीटेला।

10उणरी पीड़ा रै डर रै मारै वे घणा आगा ऊभा होयनै कैवैला, ‘हे मोटे नगर, बेबिलोन! हे मजबुत नगर, हाय! हाय! घड़ी भर में ही थनै डंड मिळ ग्यौ है।’

11“धरती रा व्यापारी उणरै खातर रोवेला अर कळपैला, क्यूंकै अबै कोई उणरौ माल मोल कोनीं ले ला।

12अरथावूं सोनों, चांदी, रत्‍न, मोती, अर मलमल, अर बैंजनी, रेसमी, अर लाल रंग रा गाभा, अर हरैक तरैह रा सुगन्धित काठ, अर हाथीदात री हरैक तरैह री चीजों, अर किमती काठ, अर पीतळ अर लोह अर संगमरमर री सगळी भांति री चीजों,

13अर दालचीनी, मसालो, धूप, अन्तर, लोबान, मदिरा, तेल, मैदो, गेहूंं, गाय-बळद, लरड़ियां-बकरियां, घोड़ा, रथ। अर मिनखौ नै गुलाम बणाणै वास्तै भी बेचे है।

14“अबै थारै मन लायक फळ थारै खनै ऊं जाता रिया, अर मधुर अर भड़कीली चीजों थारै ऊं आगी होय गी है, अर वे कदैई नीं मिळैला,

15इण चीजों रै व्यापारी जिकौ उणरै दवारा धनवान होय गिया हा, उणरी पीड़ा रै डर रै कारण आगा ऊभा रैला, अर रोता अर कळपता होया कैवैला,

16‘हाय! हाय! ओ मोटो नगर जिकौ मलमल, अर बैंजनी अर लाल रंग रा गाभा पैरयोड़ा हा, अर सोनों अर रत्‍नों अर मोतियो ऊं सजायोड़ो हो।

17घड़ी भर में ही उणरौ ऐड़ौ घणौहारौ धन नास व्‍है ग्यौ।’ ” हरैक नाव चलानवाळा अर यात्री अर कप्तान, अर जिता समंदर ऊं कमाता हा, सगळा आगा ऊभा रिया,

18अर उणरै बळणै रौ धुआं देखनै हेलौ करनै केवोला, “कौण सौ नगर इण मोटे नगर रै जैड़ौ है?”

19अपणै अपणै माथा ऊपर धूड़ घालैला, अर रोता होया अर कळपता होया चिला चिलानै कैवैला, “हाय! हाय! ओ मोटो नगर जिणरी जायदाद रै दवारा समंदर रा सगळा जहाज वाळा धनवान होय ग्या हा, पण देख, घड़ी भर में ही उजड़ ग्यौ।

20“हे सरग, अर हे पवितर लोगां, अर प्रेरितों, अर भविसयदाताओ, उण खातर आंणंद करौ, क्यूंकै परमेसर नै न्याव करनै उण ऊं थौरो बदळौ लियौ है!”

21पछै एक ताकतवर सरगदूत नै मोटी चक्‍की रौ पाट रै जैड़ौ एक भाठौ उठायौ, अर ओ कैन समंदर में फेंक दियौ, “मोटो नगर बेबिलोन यूं ही घणी ताकत ऊं गिरायो जावैला, अर पछै कदैई उणरौ पतौ नीं चालै ला।

22वीणा बजाणैवाळा, अर गायक, अर बंसी बजाणवाळा, अर तुरही बजाणवाळा रौ सबद पछै कदैई थांनै सुणाई नीं दैला। अर किणी धंधे रौ कारीगर भी पछै कदैई थांरै में नीं मिळैला। अर चक्‍की रै चालनै री आवाज पछै कदैई थांनै सुणाई नीं दैला।”

23अर दीये रौ उजाळौ पछै कदैई थांरै में नीं चमकैला, अर बींद अर बींदणी री आवाज पछै कदैई थांनै सुणाई नीं दैला। क्यूंकै थारा व्यापारी धरती रा परधान हा, अर थारै जादू टोने ऊं सगळी जातियो भरमाई गी है।

24परमेसर रा भविसयदाताओ अर उणरै पवितर लोगां, अर धरती माथै घात कियोड़ौ रौ लोई रौ जिम्मेदार ओहीज नगर है।

← Chapter 17 Jump to: Chapter 19 →