Revelation 19

Marwari Bible

← Chapter 18 Jump to: Chapter 20 →

1इणरै पछै म्हैं सरग में मांनौ घणी भीड़ नै ऊंची आवाज ऊं ओ कैवतै सुण्यौ, “हल्लिलूय्याह! उद्धार अर महिमा अर सामरथ म्हौरै परमेसर री ही है।

2क्यूंकै उणरौ फैसलो साचौ अर ठीक है। उणै उण मोटी वेसया नै, जिकौ अपणै व्यभिचार ऊं धरती नै भीस्ट करती ही, न्याव कियो अर उण ऊं अपणै दासो रै लोई रौ बदळौ लियौ है।”

3पछै दूजी बार उणौ कयौ, “हल्लिलूय्याह! उणरै बळणै रौ धुआं युगानयुग उठतौ रैला।”

4तद चौबीस पूर्वजों अर च्यार जीवित प्राणियों नै परमेसर रै पगां पड़नै नमण करी, जिकौ सिंहासण ऊपर बैठा हा, अर कयौ, “हल्लिलूय्याह! आमीन!”

5तद सिंहासण में ऊं एक आवाज निकळी, “हे अपांरै परमेसर ऊं सगळा डरनवाळौ दासो, कांई छोटा, कांई मोटा। थै सगळा उणरी स्तुति करौ।”

6पछै म्हैं घणी भीड़ रै ज्यूं अर घणै पांणी रै झरना रै ज्यूं आवाज, अर बादळ रै गरजणै रै ज्यूं घणी आवाज सुणी। “हल्लिलूय्याह! क्यूंकै परभु अपांरा परमेसर सर्वसक्तिमान राज करै है।

7आओ, अपां आंणंद अर मगन हो, अर उणरी स्तुति करौ, क्यूंकै उनियां रौ ब्याव आय गियौ है, अर उणरी बींदणी अपणै आप नै तैयार कर ली है।

8उणनै सुद्ध अर चमकदार महीन मलमल पैरणै रौ अधिकार दियौ गियौ।” क्यूंकै उण महीन मलमल रौ अरथ पवितर लोगां रै धरम रा कांम है।

9तद सरगदूत म्हारै ऊं कयौ, “ओ लिख, की धन्य वे है, जिकौ उनियां रै ब्याव रै खाणै में बुलाया गिया है।” पछै उणै म्हारै ऊं कयौ, “ऐ वचन परमेसर रा सत्य वचन है।”

10तद म्हैं उणनै नमण करनै रै लियै उणरै पगां पड़ियौ। उणै म्हनै कयौ, “देख, ऐड़ौ मत कर, म्हैं थांरौ अर थांरै भाइयो रौ संगी दास हूं, जिकौ यीसु री गवाई दैणै रै लियै तैयार हूं, परमेसर नै ही नमण कर। क्यूंकै यीसु री गवाई भविसयदाता री आतमा है।”

11पछै म्हैं सरग नै खुलयोड़ौ देख्यौ, अर देखूं हूं की एक उजळो घोड़ौ है। अर उण माथै एक सवार है, जिकौ विसवास लायक अर सत्य कहीजै है। अर वो धरम रै साथै न्याव अर युध करै है।

12उणरी आंख्यां अग्‍नि री लपटो है। अर उणरै माथा ऊपर घणाहारा राज मुगट है। उण ऊपर एक नाम लिख्योड़ौ है, जिणै उणनै छोड़ ओर कोई नीं जांणै।

13वो लोई छिड़कयोड़ो गाभा पैरया है, अर उणरौ नाम परमेसर रौ वचन है।

14सरग री सेना सफेद घोड़ौ माथै सवार अर सफेद अर सुद्ध मलमल पैरयोड़ो उणरै लारै लारै है।

15जाति जाति नै मारणै रै लियै उणरै मूंडै ऊं एक चौखी तरवार निकळै है। वो लोह रौ राज डंड लियोड़ो उण माथै राज करैला, अर सर्वसक्तिमान परमेसर रै खतरनाक परकोप री जलजलाहट री मदिरा रै कुंड में दाख रौंदेला।

16उणरै कपड़ा अर जांघ माथै ओ नाम लिख्यौ है, “राजाओ रौ राजा अर परभुओ रौ परभु।”

17पछै म्हैं एक सरगदूत नै सूरज माथै ऊभौ देख्यौ। उणै जोर ऊं हेलौ करनै आभै रै बीच में ऊं उड़नै वाळा सगळा पंखैरूओ ऊं कयौ, “आओ, परमेसर रै महान भोज रै लियै भेळा हो जाओ,

18जिण ऊं थै राजाओ रौ सरीर, अर सरदारो रौ सरीर, अर ताकतवर मिनखौ रौ सरीर, अर घोड़ौ रौ अर सवारों रौ सरीर, अर कांई आजाद कांई गुलाम, कांई छोटा कांई मोटा, सगळै लोगां रौ सरीर खाओ।”

19पछै म्हैं उण डरावणै पसु, अर धरती रै राजाओ अर उणरी सेनाओ नै उण घोड़े रै सवार अर उणरी सेना ऊं लड़नै रै लियै भेळा देख्यां।

20वो डरावणौ पसु, अर उणरै साथै वो झूठौ भविसयदाता पकड़यौ जिणै उणरै सांमै ऐड़ा चिन्ह दिखाया हा जिणरै दवारा उणै उणौनै भरमाया जिण माथै उण पसु री छाप ही अर जिकौ उणरी मूरती री पूजा करता हा। ऐ दोनूं जीते जी उण अग्‍नि री झील में, नोख दिया जिकौ तेजाब ऊं जळे है।

21बाकी लोग उण घोड़े रै सवार री तरवार ऊं, जिकौ उणरै मूंडै ऊं निकळती ही, मार नोखया। अर सगळा पंखेरू उणरै सरीर नै खायनै धाप ग्या।

← Chapter 18 Jump to: Chapter 20 →