Revelation 17

Marwari Bible

← Chapter 16 Jump to: Chapter 18 →

1जिण सात सरगदूतो रै खनै वो सात कटोरा हा, उणमे ऊं एक आयनै म्हारै ऊं ओ कयौ, “एठै आ, म्हैं थांनै उण मोटी वेसया रौ डंड दिखाऊं, जिकौ घणैहारे पांणी खनै बैठी है,

2जिणरै साथै धरती रै राजाओ नै व्यभिचार करयौ। अर धरती रै रैवणवाळा उणरै व्यभिचार री मदिरा ऊं मताला होय ग्या हा।”

3तद वो म्हनै आतमा में रिंदरोही में लेय गया, अर म्हैं लाल रंग रै डरावणै पसु माथै, जिकौ निंदा रै नामों ऊं भरयोड़ौ हो अर जिणरै सात माथा अर दस सींग हा, एक लुगाई नै बैठी व्‍ही देखी।

4आ लुगाई बैंजनी अर लाल रंग रा गाभा पैरयोड़ा हा, अर सोने अर किमती मणियों अर मोतियो ऊं सजयोड़ी ही, अर उणरै हाथ में एक सोने रौ कटोरो हो जिकौ घिरणा री चीजों ऊं अर उणरै व्यभिचार री गंदी चीजों ऊं भरयोड़ौ हो।

5उणरै माथा ऊपर भेदवाळौ ओ नाम लिख्योड़ौ हो, “मोटो बेबिलोन, धरती री वेसयाओ, अर गंदी चीजों री माता।”

6म्हैं उण लुगाई नै पवितर लोगां रौ लोई अर यीसु रै गवाहो रौ लोई पीणै ऊं मताली देखी। उणनै देखनै म्हैं अचूम्बो करयौ।

7तद उण सरगदूत म्हारै ऊं कयौ, “थूं क्यूं अचूम्बो करै? म्हैं इण लुगाई अर उण डरावणै पसु रौ, जिण माथै वां सवार है अर जिणरै सात माथा अर दस सींग है, थनै भेद बताऊं हूं।

8जिकौ डरावणै पसु थै देख्यौ है, वो पैला तो हो, पण अबै कोनीं है, अर पाताळ कुंड ऊं निकळनै विनास में पड़ैला। अर धरती रै रैवणवाळा जिणरा नाम जगत री सरूआत रै वगत ऊं जीवन री पोथी में लिख्या कोनीं ग्या, इण पसु री आ दसा देखनै अचूम्बो करैला। क्यूंकै, पैला हा, अर अबै कोनीं है अर वळै आ जावैला।

9“उण बुद्धि रै लियै जिणमे ग्यांन है, ओहीज मौकौ है। वे सातों माथा सात भाखर है जिण माथै वां लुगाई बैठी है।

10वे सात राजा ही है, पांच तो नास होय ग्या है, अर एक अजी है अर एक अजी तांई आयौ कोनीं, अर जद आवैला तो कीं वगत तांई उणरौ रैणौ भी जरुरी है।

11जिकौ डरावणौ पसु पैला हो, अर अबै नीं है, वो आप आठवां राजा है अर उण सातों में ऊं पैदा होयौ, अर विनास में पड़ैला।

12“जिकौ दस सींग थै देख्यां वो दस राजा है, जिणौ अजी तांई राज कोनीं पायो। पण उण डरावणै पसु रै साथै घड़ी भर रै लियै राजाओ जैड़ौ अधिकार पावैला।

13ऐ सगळा एक मन होवैला, अर वे अपणी अपणी सामरथ अर अधिकार उण डरावणै पसु नै दैला।

14वे उनियां ऊं लड़ैला, अर उनियां उण ऊपर जय पावैला, क्यूंकै वो परभुओ रौ परभु अर राजाओ रौ राजा है, अर जिकौ बुलायोड़ा अर चुणयोड़ा अर विसवासी है वे उणरै साथै है।वे भी जय पावैला।”

15पछै उण म्हारै ऊं कयौ, “जिकौ पांणी थै देख्यौ, जिण खनै वेसया बैठी है, वे तो लोग अर भीड़ अर जातियो अर भासाओं है।

16जिकौ दस सिंग थै देख्यां, वे और डरावणौ पसु उण वेसया ऊं बैर राखैला, अर उणनै लाचार अर नागी कर दैला, अर उणरौ सरीर खा जावैला, अर उणनै अग्‍नि में बाल दैला

17क्यूंकै परमेसर उणरै मन में ओ विचार घालैला की वे उणरी मनसा पूरी करै, अर जैड़ी तांई परमेसर रै वचन पूरा नीं हो ले उठै तांई एक मन होयनै अपणा अपणा राज डरावणै पसु नै दे दे।

18वां लुगाई, जिणनै थै देखी है, वो मोटो नगर है जिकौ धरती रै राजाओ ऊपर राज करै है।”

← Chapter 16 Jump to: Chapter 18 →