Revelation 15

Marwari Bible

← Chapter 14 Jump to: Chapter 16 →

1पछै म्हैं सरग में एक वळै मोटो अर अचूम्बो चिन्ह देख्यौ, मतलब सात सरगदूत जिणरै खनै सातों आखरी विपतियां ही, क्यूंकै उणरै अंत हो जांणै पर परमेसर रै परकोप रौ अंत है।

2तद म्हैं अग्‍नि मिळियोड़े कांच जैड़ौ एक समंदर देख्यौ। अर जिकौ लोग उण डरावणै पसु माथै अर उणरी मूरती माथै अर उणरै नाम रै अंक माथै जीत पाई ही, उणौनै उण कांच रै समंदर रै नजीक परमेसर री वीणाओं रै लियै ऊभा देख्यां।

3वे परमेसर रै दास मूसा रा गीत, अर उनियां रा गीत गान कैवता हा, “हे सर्वसक्तिमान परभु परमेसर, थांरा कांम महान अर अदभुत है। हे युग-युग रा राजा, थारी चाल ठीक अर साची है”।

4“हे परभु, कुण थारै ऊं नीं डरैला अर थारै नाम री महिमा नीं करैला? क्यूंकै कैवल थूं ही पवितर है। सगळी जातियो आयनै थारै सांम्ही नमण करैला, क्यूंकै थारै न्याव रा कांम परगट होय गिया है।”

5इणरै पछै म्हैं देख्यां की सरग में वाचा रै तम्बू रौ मिंदर खुल रियौ है।

6अर वो सातों सरगदूत जिणरै खनै सातों विपतियां ही, सफेद अर सुद्ध अर चमकीला गाभा पैरयोड़ा अर कमर में सोने री पटियां बांधयोड़ी मिंदर ऊं निकळयौ।

7तद उण च्यारौ जीवता प्राणियों में ऊं एक नै उण सात सरगदूतो नै परमेसर, जिकौ युगानयुग जीवता है, परकोप ऊं भरयोड़ा सात सोने रा कटोरा दिया।

8अर परमेसर री महिमा अर उणरी सामरथ रै कारण मिंदर धुंए ऊं भर ग्यौ, अर जैड़ी तांई उण सातों सरगदूतो री सातों विपतियां मिट नीं गी उठै तांई कोई मिंदर में नीं जा सकै।

← Chapter 14 Jump to: Chapter 16 →