Revelation 7

Marwari Bible

← Chapter 6 Jump to: Chapter 8 →

1इणरै पछै म्हैं धरती रै च्यांरू कोनों ऊपर च्यार सरगदूत ऊभा देख्यां, वे धरती री च्यांरूमेर हवा नै रोक रिया हा ताकी धरती या समंदर या किणी दरखत ऊपर हवा नीं लागै।

2पछै म्हैं एक वळै सरगदूत नै जीवते परमेसर री मुहर लियोड़ी पूरब ऊं ऊपर री तरफ आवतौ देख्यौ। उणै उण च्यारौ सरगदूतो ऊं जिणौनै धरती अर समंदर रौ नुकसाण करणै रौ अधिकार दियोड़ो हो, ऊंची आवाज ऊं बोलनै कयौ,

3“जैड़ी तांई म्हौ अपणै परमेसर रै दासो रै माथा ऊपर मुहर नीं लगा दो, उठै तांई धरती अर समंदर अर दरखतो रौ नुकसाण नीं करणौ।”

4जिण ऊपर मुहर दी है म्हैं उणरी गिणती सुणी है, अरथावूं इजरायल री औळादों रै सगळै गोत्रों में ऊं एक लाख चौवालीस हजार ऊपर मुहर लगा दी।

5यहूदा रै गोत्र में ऊं बारैह हजार ऊपर मुहर लगाई। रूबेन रै गोत्र में ऊं बारैह हजार ऊपर, गाद रै गोत्र में ऊं बारैह हजार ऊपर,

6आसेर रै गौत्र में ऊं बारैह हजार ऊपर, नप्ताली रै गोत्र में ऊं बारैह हजार ऊपर, मनस्सिह रै गोत्र में ऊं बारैह हजार ऊपर,

7समौन रै गोत्र में ऊं बारैह हजार ऊपर, लेवी रै गोत्र में ऊं बारैह हजार ऊपर, इस्साकार रै गोत्र में ऊं बारैह हजार ऊपर,

8जबूलून रै गोत्र में ऊं बारैह हजार ऊपर, यूसुफ रै गोत्र में ऊं बारैह हजार ऊपर, अर बिन्यामीन रै गोत्र में ऊं बारैह हजार ऊपर मुहर दीनी।

9इणरै पछै म्हैं निजर किनी, अर देख्यौ, हरैक जाति अर कुळ अर लोग अर भासा में ऊं एक ऐड़ी घणी भीड़, जिणनै कोई गिण नीं सकै हो, उजळा गाभा पैरयोड़ा अर आपरै हाथ में खजूर री डाळियो लियोड़ी सिंहासण रै सांम्ही अर उनियां रै सांम्ही ऊभी है,

10अर ऊंचै सबद ऊं बोलनै कैवै है, “उद्धार रै लियै म्हौरै परमेसर रौ, जिकौ सिंहासण ऊपर बैठौ है, अर उनियां री जय जयकार हो।”

11अर सगळै सरगदूत, उण सिंहासण अर वडेरा अर च्यारौ जीवता प्राणियों रै च्यांरूमेर ऊभा हा। पछै वे सिंहासण रै सांम्ही झुकनै परमेसर नै नमण करनै कयौ,

12“आमीन! अपांरै परमेसर री स्तुति अर महिमा अर ग्यांन अर धन्यवाद अर आदर अर सामरथ अर सगति युगानयुग बणी रैवै। आमीन।”

13इण कारण वडेरो में ऊं एक म्हनै कयौ, “ऐ उजळा गाभा पैरयोड़ा कुण है? अर कठै ऊं आया है?”

14म्हैं उणनै कयौ, “हे मालिक थूं ही जांणै है।” उणै म्हनै कयौ, “ऐ वे है, जिकौ उण महाक्लेस में ऊं निकळनै आया है। इणौनै आपो आपरा गाभा उनियां रै लोई में धोयनै उजळा करया है।

15इण कारण वे परमेसर रै सिंहासण रै सांमै है, अर उणरै मिंदर में रात-दिन सेवा करै है, अर जिकौ सिंहासण ऊपर बैठौ है, वो उणौरै मांय रैवता होया उणौरी रूखाळी करैला।

16वे पछै भूखा अर तिरसां नीं होवैला। अर नीं उणौ ऊपर तावड़ो, नीं कोई तपती पड़ैला।

17क्यूंकै उनियां जिकौ सिंहासण रै बीच में है उणरी रूखाळी करैला। अर उणनै जीवन रूपी जळ रै झरनौ रै खनै ले जाया करैला। अर परमेसर उणरी आंख्यां ऊं सगळा आंसू पोंछ दैला।”

← Chapter 6 Jump to: Chapter 8 →