Revelation 14

Marwari Bible

← Chapter 13 Jump to: Chapter 15 →

1वळै म्हैं निजर की, अर देख्यौ, वो उनियां सिय्योन भाखर माथै ऊभौ है, अर उणरै साथै एक लाख चौवालीस हजार लोग है, जिणौरे माथै ऊपर उणरौ अर उणरै पिता रौ नाम लिख्योड़ौ है।

2अर सरग ऊं म्हनै एक ऐड़ौ सबद सुणाई दियौ जिकौ जळ री घणी धाराओ अर घणै गरजनै रै जैड़ौ सबद हो, अर जिकौ सबद म्हैं सुण्यौ वो ऐड़ौ हो मांनौ वीणो बजाणैवाळौ वीणो बजाय रियौ हो।

3वे सिंहासण रै सांमै अर च्यारौ जीवित प्राणियों अर पूर्वजों रै सांमै एक नवो गीत गा रिया हा। उण एक लाख चौवालीस हजार जणौ नै छोड़, जिकौ धरती माथै ऊं मोल लियोड़ा हा, कोई वो गीत नीं सीख सकै हो।

4ऐ वे है जिकौ लुगाईयां रै साथै असुद्ध नीं होया, पण कुंवारा है। ऐ वे इज है की जठै कठै उनियां जावै है, वे उणरै लारै हो जावै है। ऐ तो परमेसर रै निमित पैलौ फळ होणै रै लियै मिनखौ में ऊं मोल लियोड़ा है।

5उणरै मूंडै ऊं कदैई झूठ कोनीं निकळयौ हो, वे निरदोस है।

6पछै म्हैं एक वळै सरगदूत नै आभै रै बीच में उडतौ होयौ देख्यौ, जिणरै खनै धरती माथै रा रैवणवाळौ री हरैक जाति, अर कुळ, अर भासा, अर लोगां नै सुणाणै रै लियै सनातन सुभ संदेस हो।

7उणै जोर ऊं कयौ, “परमेसर ऊं डरौ, अर उणरी महिमा करौ, क्यूंकै उणरै न्याव करणै रौ वगत आय ग्यौ है। अर उणरा भजन करौ, जिणै सरग अर धरती अर समंदर अर जळ रा झरना बणाया।”

8वळै इणरै पछै एक वळै, दूजौ सरगदूत ओ केवतो होयौ आयौ, “उणरौ सर्वनास हो गियौ है, वो मोटे बेबिलोन नगर रौ सर्वनास होय ग्यौ, जिणनै आपरै व्यभिचार री वासना री दाखरस सगळी जातियो नै पिलाई है।”

9वळै इणरै पछै एक वळै, तीजौ सरगदूत जोर री आवाज ऊं ओ केवतो होयौ आयौ, “जिकौ कोई उण डरावणौ पसु अर उणरी मूरती री पूजा करै, अर आपरै माथा या आपरै हाथ ऊपर उणरी छाप ले,

10वो परमेसर रै परकोप री निरी मदिरा, जिकौ उणरै रीस रै कटोरे में घाली गी है, पीएला अर पवितर सरगदूतो रै सांम्ही अर उनियां रै सांम्ही अग्‍नि अर गन्धक री पीड़ा में पड़ैला।

11उणरी पीड़ा रौ धुओं युगानयुग उठतौ रैला, अर जिकौ उण डरावणै पसु अर उणरी मूरती री पूजा करै है, अर जिकौ उणरै नाम री छाप लेवे है, उणौनै रात-दिन आराम नीं मिळैला।”

12परमेसर रा पवितर लोगां रौ धीरज इणी में है, जिकौ परमेसर री आग्याओं नै मांनै अर यीसु माथै विसवास राखै है।

13पछै म्हैं सरग ऊं ओ सबद सुण्यौ, “लिख। जिकौ लोग परभु में मरै है, वो अबै ऊं धन्य है।” आतमा कैवै है, “हां, क्यूंकै वे आपरै सगळी मेनत ऊं आराम पावैला, अर उणरै कांम उणरै साथै हो लेवे है।”

14म्हैं निजर की, अर देख्यौ, एक उजळो बादळ है, अर उण बादळ माथै मिनख रै बेटे जैड़ौ कोई बैठौ है, जिणरै माथा ऊपर सोने रौ मुगट अर हाथ में चौखौ दातरो है।

15पछै एक वळै सरगदूत मिंदर में ऊं निकळनै उण ऊं, जिकौ बादळ ऊपर बैठौ हो, जोर ऊं हेलौ करनै कयौ, “अपणौ दातरो लगायनै कटनी कर, क्यूंकै कटनी रौ वगत आय गियौ है, इण वास्तै की धरती री खेती पक गी है।”

16अतस जिकौ बादळ माथै बैठौ हो उणै धरती माथै आपरौ दातरो लगायौ, अर धरती रौ कातीरो लियौ।

17पछै एक वळै सरगदूत उण मिंदर में ऊं निकळयौ जिकौ सरग में है, अर उणरै खनै भी चौखौ दातरो हो।

18पछै एक वळै सरगदूत जिणनै अग्‍नि माथै अधिकार हो, वेदी में ऊं निकळयौ, अर जिणरै खनै चौखौ दातरो हो उण ऊं ऊंची आवाज ऊं कयौ, “आपरौ चौखौ दातरो लगायनै धरती रै बगीचें में लुम्बा काट ले, क्यूंकै उणरा अंगूर पक ग्या है।”

19तद उण सरगदूत नै धरती माथै आपरौ दातरो लगायौ अर धरती री अंगूरो री वाड़ी रा फळ काटनै अपणै परमेसर रै परकोप रै मोटे रसकुंड में नोख दिया।

20अर नगरी रै बारै उण रसकुंड में अंगूर खूंदया, अर रसकुंड में ऊं इतरौ लोई निकळयौ की घोड़ौ री लगामो तांई पूगो, अर सौ कोस तांई बह ग्यौ।

← Chapter 13 Jump to: Chapter 15 →