Revelation 11

Marwari Bible

← Chapter 10 Jump to: Chapter 12 →

1पछै म्हनै नापनै रै लियै एक सरकंडो दियौ, अर किणी कयौ, “उठ, परमेसर रै मिंदर अर वेदी नै नाप ले, अर उणमे उपासना करणैवाळौ नै गिण ले।

2पण मिंदर रै च्यार दीवारी रै बारै छोड़ दे। उणै मत नाप क्यूंकै वो गैर यहूदियो नै दियोड़ो है, अर वे पवितर नगर नै बयाळीस महीनै तांई आपरै पगां ऊं रौंदेला।

3म्हैं म्हारै दो गवाहो नै ओ अधिकार दूंला, की बोरा ओढ़नै एक हजार दो सौ साठ दिन तांई भविसयवांणी करै।”

4ऐ वे इज दो गवाई जैतून रा दो दरखत नै अर दो दीवट नै दिखावै है जिकौ धरती रै राज करणैवाळा परभु रै सांमै सरग में ऊभा रैवै है।

5जे कोई उणौनै नुकसाण पुगाणौ चावै है, तो उणरै मूंडै ऊं लाय निकळ नै उणरै बैरियो नै भसम करै है। अर जे कोई उणौनै नुकसाण पुगाणौ चावैला, तो जरुर इणी रीत ऊं मार दियौ जावैला।

6उणै अधिकार है, की आभै नै बंद करै, की उणरी भविसयवांणी रै दिनां में मेंह नीं बरसे, अर उणै सगळै पांणी ऊपर अधिकार है, की उणै लोई बणावै, अर जद जद चावै तद तद धरती ऊपर हरैक तरैह री तकलीफो लावै।

7जद वे आपरी गवाई दे दैला, तो वो डरावणौ पसु जिकौ पाताळ कुंड मांय ऊं निकळै ला, उणौ ऊं लड़नै उणौनै जीतैला अर उणौनै मार दैला।

8उणौरी लासां उण मोटे नगर रै चौक में पड़ी रैवैला, जठै उणौरौ परभु ही सूली माथै चढ़ायौ गियौ हो। ओ नगर बुराई री वजै ऊं आत्मिक रीति ऊं सदोम अर मिसर रै नाम ऊं बोल्यौ जावै है।

9सगळै लोगां अर कुलो अर भासाओं अर जातियो रै कईक लोग उणौरी लासां नै साढ़ै तीन दिन तांई देखता रैला, अर उणौरी लासां नै कबर में राखणै नीं दैला।

10धरती रा रैवण वाळा उणौरै मरण ऊं राजी अर मगन होवैला, अर एक दूजै रै खनै भेट भेजेला, क्यूंकै इण दोनो भविसयदाताओ नै धरती रा रैवण वाळा नै घणौ दुख दियौ हो।

11पण साढ़ै तीन दिन रै पछै परमेसर री तरफ ऊं इण दोनो में प्रांण आयौ अर वे उठनै ऊभा होया, अर उणौनै देखणै वाळौ ऊपर भय छा गियौ।

12तद उणै सरग ऊं जोर रौ सबद सुणाई दियौ, “एठै ऊपर आओ!” ओ सुण वे बादळो पर सवार होयनै आपरै बैरियो रै देखते देखते सरग ऊपर चढ़ग्या।

13पछै उणी घड़ी एक घणौहारौ भूकम्प होयौ, अर नगरी रौ दसवो भाग टूट पड़िया। अर उण भूकम्प ऊं सात हजार मिनख मरग्या, अर बाकी डरग्या अर सरग रै परमेसर री महिमा की।

14दूजी विपति बीत चुकी। सुणौ, तीजी विपति जल्दी आवण वाळी है।

15जद सातवे दूत नै तुरही बजाई, तो सरग में इण बारै रै मोटा मोटा सबद होवण लागा। “जगत रौ राज म्हौरै परभु रौ अर उणौरै मसीह रौ होय ग्यौ, अर वो युगानयुग राज करैला।”

16तद चौबीस पूर्वजों जिकौ परमेसर रै सांम्ही अपणै अपणै सिंहासण ऊपर बैठा हा, मूंडै रै बल झुकनै परमेसर नै नमण करनै

17ओ कैवण लागा, “हे सर्वसक्तिमान परभु परमेसर, जो है अर जो हा, म्हौ थौरो धन्यवाद करौ हो की थै अपणी घणी सामरथ नै कांम में लायनै राज कियो है।

18जातियो नै रीस करी, पण थांरौ परकोप आ पड़ियौ, अर वो घड़ी आय पूगी है की मरयोड़ौ रौ न्याव कियो जावैला, अर थारा दास भविसयदाताओ अर पवितर लोगां नै अर उण छोटे मोटे नै जिकौ थारै नाम ऊं डरै है बदळा दिया जावैला, अर धरती रै बिगाड़ नै वाळा नास किया जावैला।”

19तद परमेसर रौ जिकौ मिंदर सरग में है वो खोलयो गियौ, अर उणरै मिंदर मांय उणरी वाचा रौ संदूक देठाळौ दियौ। अर बिजळी चमकण लागी अर गरजनै री आवाज आई अर भूकम्प होया अर मोटा मोटा ओळा पड़या।

← Chapter 10 Jump to: Chapter 12 →