Revelation 13

Mazanderani WMB (کتاب مقدس به زبان مازندرانی - گویش غربی)

← Chapter 12 Jump to: Chapter 14 →

1اَزما بَئیمِه یَتِه وحشی جانِوَر دریایی جا دِ دیرگا اِنِه. دَه تا شاخ و هفتا کَلِّه داشتِه، دَه تا تاج وی شاخیشونی سَر دَوِه؛ و وی هر کَلِّه ای سر یَتِه کِفرآمیزِ اِسم بَنوِشت بَوِه وِه.

2هون وحشی جانِوَر گه مِن بَئیمِه هِتی پلنگی تَرا وِه، و اَشی لینگیشون و شیری دِهِنِ داشتِه. و اژدها، شی قِدرت و شی تَخت و یَتِه گَتِ اقتدارِ وحشی جانِوَرِ هادا.

3یَتِه از هون وحشی جانِوَری کَلِّه ها، انگار یَتِه کِشنده زَخم بَئیت وِه، ولی هون کِشندِه زخم خِب بَوِه وِه و دِشتِه زمین بِهت هاکِردِنِه و هون وحشی جانِوَری جا پیروی هاکِردنِه.

4مَردِن اژدهارِه پَرَسِش کِردِنِه چون شی اقتدارِ هون وحشی جانِوَرِ هادا وِه. و هون وحشی جانِوَرم پَرَسِش کِردِنِه و گِتِنِه: «کیِه گه بَتنِّه هون وحشی جانوری تَرا ووئِه؟ کیِه گه بَتِنِّه وی هَمرا جنگ هاکِنِه؟»

5یَتِه دِهِن هون وحشی جانِوَرِ هادا بَوِه تا غِرور و کِفری هَمرا گَب بَزِنِه، و وِرِه اِجازه هادا بَوِه تا چِل و دِ ماه شی اقتدارِ به کار بَیرِه.

6وی شی دِهِنِ وا هاکِردِه تا خِدارِه کِفر بُئِه، کِفر بُتَن وی اِسم و اوجه گه مونِّه، یَعنی اونانیگه آسِمونی دِلِه دَرِنِه.

7و هین هَم، وِرِه اِجازه هادا بَوِه گه مِقدّسینی هَمرا جنگ هاکِنِه و اونانی سَر پیروز بَوو؛ و وِرِه اقتدار هادا بَوِه تا هر طایفه، مَردِن، زِوون و قومی سَر حاکِم ووئه.

8و دِشتِه اونانیگه زَمینی سَر دَرِنِه و هون وحشی جانِوَرِ پرسش کِنِنِه - یَعنی هر کَس گه وی اِسم، وَرکایی حیاتی دَفتری دِلِه بَنوِشت نَوِه، همون وَرکا گه پِش از هَینگه دِنیا خلق بَوو قِروونی بَوِه وِه.

9اونگه گوش دارنِه بِشنُئِه:

10اگه قَرار ووئه یَنَفر اَسیر بَوو، اَسیری ای سِه شونِه. اگه قرار ووئه ینفر شَمشیری هَمرا بَکوشت بَوو، وِنِه شَمشیری هَمرا بَکوشت بَوو. و هَین مقدّسینی پایداری و وِشونی ایمونِ خواینِه.

11اَزما یَت دییَر وحشی جانِوَر بَئیمِه گه زَمینی جا دیرگا اِنِه. دِتا شاخ هِتی وَرکایی تَرا داشتِه و اژدهایی تَرا گَب زووِه.

12وی، اوّلین وحشی جانِوَری دِشتِه اقتدارِ وی عوض به کار گیتِه، و زمین و اونانیگه زَمینی سَر دَرِنِه رِه مجبور کِردِه گه اوّلین وحشی جانِوَر گه وی کِشنده زخم خِب بَوِه وِه رِه پَرَسِش هاکِنِن.

13دِوّمین وحشی جانِوَر گَتِه نِشونِه ها و معجزات نِمایش بِشتِه، جوریگه حتّی مَردِنی چِشی پِش آسِمونی جا تَش زَمینی سَر بیاردِه.

14و هون نِشونِه ها و معجزاتی خاطری گه اجازه داشتِه هون اوّلین وحشی جانِوَری عوض به کار بَیرِه، اونانیگه زَمینی سَر دَوِنِه رِه گول بَزو و وِشونِه بُتِه یَتِه مِجَسَمِه هون وحشی جانِوَری جا بَساجِن گه شمشیری هَمرا زخمی بَوِه، ولی با هَین وجود زینِّه بَمونِسِه.

15و وِرِه اِجازه هادا بَوِه تا هون وحشی جانِوَری مِجَسمِه رِه نَفَس هادِه تا هون وحشی جانِوَری مِجَسمِه بَتِنِّه حتّی گَب بَزِنِه و باعث بَوو اونانیگه وحشی جانِوَری مِجَسمِه رِه پَرَسِش نَکِردِنِه بَکوشت بَوون.

16هَینجوری، دِشتِه آدمِنِ از گَت تا کِچیک، پولدار و فقیر، و نوکَر و آزادِ مجبور کِردِه تا شی راسِ دَس یا شی سالی سَر علامت بِلِن.

17تا هیچکَس نَتِنِّه بَخرینِه یا بَروشِه، بِجز اونیگه هون علامت، یَعنی هون وحشی جانِوَری اِسم یا وی اِسمی شِمارِ رِه دارِه.

18هَین حِکمت خواینِه. هر کی فهم دارنِه، بِل تا هون وحشی جانِوَری شِمارِ رِه حِساب هاکِنِه، چونگه هون شِمارِ اِنسونی شِمارِ هَسِّه و وی شِمارِ شِشصد و شَص و شِش هَسِّه.

← Chapter 12 Jump to: Chapter 14 →