Acts 1

Dutch Frisian

Jump to: Chapter 2 →

1Daut easchte Buak Berejcht ha etj vefoot äwa aules, o Teofilus, waut Jesus aunfong, soo aus too doone aus uck too leahre,

2bott däm Dach, aun däm hee [em Himmel] oppjenohme word, no däm hee de Apostel, de hee ütjewält haud, derjch dän Heiljen Jeist Befäl jejäft haud;

3diese haud hee sich uck aus läwendijch doajestalt jewäse, no sienem Liede, derjch väl Teatjen Bewiese, enn däm hee veatijch Doag ahn erschiend sich seene leet en räd äwa daut Ritj Gottes.

4En aus hee met ahn toop wea, befool hee ahn, nijch von Jerusalem wajch togohne, oba opp daut Vesproakne vom Voda too wachte, soo aus daut jie von mie jeheat ha;

5Dann Jehaun haft zwoa met Wota jetauft, oba jie woare met däm Heiljen Jeist jetauft woare, no diesem - nijch no väle Doag.

6See oba, aus see toop jekohme weare, fruage am en säde: Harr, stalst dü enn diese Tiet wada daut Ritj fe Iesrael hea?

7Oba hee säd too ahn: Daut es nijch jüne Sach, Tiet en Tiede too weete, dee de Voda enn siene eajne Macht faustjesat haft.

8Oba jie woare Krauft emfange, wann de Heilje Jeist opp jünt jekohme es; enn jie woare miene Zeije senne, soo aus enn Jerusalem aus uck enn gauns Judäa en Samaria en bott aum Enj de Ead.

9Aus hee dit jesajcht haud, aus see am sache, word hee nehejcht oppjehowe, en eene Woltj neem am opp, wajch von äare Uage.

10En aus see jespaunt nom Himmel tjitjte, aus hee nehejcht fuah, en tjitj, twee Manna stunde bie ahn enn witte Tjleeda,

11dee doa säde: Manna von Galiläa, waut stoh jie, en tjitje nehejcht nom Himmel? Diss Jesus, dee von jünt wajch jenohme es enn däm Himmel, woat kratjt soo kohme, aus jie am jeseehne ha hangohne enn däm Himmel.

12Donn jinje see vom Boajch tridj no Jerusalem, jenant Eeljboajch, dee doa dijcht bie Jerusalem es, een Saubatwajch auf es.

13En aus see enenn jekohme weare, jinje see nopp enne Bowastow, wua see sich opphilde, soo aus Peeta en uck Jehaun en Joakopp en Aundreas, Filip en Toomas, Bartolamäus en Matäus, Joakopp, Alfäus Sän, en Siemoon, de Selootes, en Judas, Joakopps Sän.

14Dise aule weare faust eenes Sennes em Jebäd met de Frües en Marie, de Mutta Jesus, en siene Breeda.

15En enn dise Doag stund Peeta enne Medd de Breeda opp, en säd (oba doa wea aun däm Uat eene Menj von onnjefäa hundat twintijch toopjekohme):

16Manna, Breeda, daut wea needijch, daut de Schreft erfellt wort, dee de Heilje Jeist verhäa jesajcht haud derjch Doft sien Mül äwa Judas, de een Wajchwiesa word fe dän de Jesus faust nehme.

17Wiel hee wea eena unja ons en hee haud daut Loos tom Deenst jetjräaje.

18Disa tjreajch doafäa jewonn een Acka vom onnjerajchten Loon, en enn däm hee äwakopp voll, enne Medd vebruak, en aul sien Enneret rütjesched word.

19En daut word aule Ennwohna enn Jerusalem bekaunt, soo daut jan Acka enn äare eajne Sproak Hakeldama jenant wort, daut heet Blootacka.

20Dan daut steit em Psalmbuak jeschräwe: „Sien Hüs saul eed vewiest woare, en tjeena saul doa benne wohne“, {Ps.69,26} en: „Sien Aumt tjrijcht een aundra“. {Ps.109,8}

21Aulsoo esset needijch, daut von de Manna, dee met ons de gaunse Tiet jegohne send, enn de Tiet de de Harr Jesus bie ons enenn en ütjegohne es,

22aunjefonge vonne Jehauns Taufe bott däm Dach, aun däm hee von ons oppjenohme word, eena von diese enn Zeije von siene Oppstohninj met ons senne.

23En see stalde twee väa: Joosaf, jenant Barsabas, dee met bienome Jusstus jenant word, en Matias.

24En see bäde en säde: Dü, Harr, dee dü aule Hoate tjannst, wies, eenen von diese twee däm dü ütjewält hast,

25omm däm Plautz enn diesem Deenst en Apostelaumt too emfange, von däm Judas aufjevolle es, omm no sienem äjnem Uat too gohne.

26En see jäwe ahn Loose, en daut Looss voll opp Matias, en hee word too de alf Apostel doatoo jetalt.

Jump to: Chapter 2 →