Revelation 14

Nyankole 1964

← Chapter 13 Jump to: Chapter 15 →

1Ku naimukize amaisho, naareeba Omwana gw'entaama ayemereire aha rushozi Saayuuni hamwe n'abantu akasiriira n'obukumi buna n'enkumi ina, aha buso bwabo hahandiikirweho eiziina rye n'eiziina rya Ishe.

2Naahurira eiraka eririkuhoorera nk'amaizi maingi kandi nk'eiraka ery'okuhinda kuhango niriruga omu iguru; kandi eiraka eryo eri naahuriire rikaba riri nk'ery'enanga ezirikuteerwa abateezi baazo;

3nibeeshongorera ekyeshongoro kisya omu maisho g'ekitebe ky'obukama n'omu maisho g'ebihangirwe ebiine amagara ebina n'ag'abo bakuru. Kandi tihariho owaabaasize kwega ekyeshongoro ekyo, kureka abo akasiriira n'obukumi buna n'enkumi ina, abaacungwirwe okuruga omu nsi.

4Abo nibo abatareesiisire na bakazi, ahakuba bakaba nibabyerinda; kandi abo nibo bakuratira Omwana gw'entaama ei aza yoona. Abo bakacungurwa omu bantu okuba omuganuro ahari Ruhanga n'aha Mwana gw'entaama;

5kandi omu kanwa kaabo hakaba hatabamu bishuba, ahakuba bakaba batagira kamogo.

6Kandi naareeba ondiijo maraika naagyendera ahaiguru hagati omu mwanya, aine engiri ey'ebiro n'ebiro okubuurira abatuura omu nsi amahanga goona n'enganda zoona n'endimi n'abantu;

7yaagamba n'eiraka rihango ati: Mutiine Ruhanga, mumuhe ekitiinisa, ahakuba obunaku bwe bw'okucweramu orubanja buhikire; muramye Ogwo owaahangire eiguru n'ensi n'enyanja n'enshuro z'amaizi.

8Haakurataho maraika owa kabiri, naagira ati: Orurembo orukuru Babulooni rugwire, rugwire, orwanyweisize amahanga goona amarwa g'ekiniga ky'obushambani bwarwo.

9Maraika ondiijo owa kashatu yaakurataho, naagamba n'eiraka rihango ati: omuntu weena, orikuramya enyamaishwa n'ekishushani kyayo, akateebwa akamanyiso kaayo aha buso bwe nari aha mukono gwe,

10ogwo nawe aryanywa aha amarwa g'ekiniga kya Ruhanga, agaashukirwe omu kikopo ky'okubiihirwa kwe agatafungwire, kandi aryabonabonesibwa n'omuriro n'obuganga bw'ekibiriiti omu maisho ga baamaraika abarikwera n'omu maisho g'Omwana gw'entaama.

11Omwika gw'okubonabonesibwa kwabo gucumbuuka ebiro n'ebiro; abo abaramya enyamaishwa n'ekishushani kyayo, n'omuntu weena oteebwaho akamanyiso k'eiziina ryayo tibahuumura nyomushana na nyekiro.

12Aho niho okugumiriza kw'abarikwera kumanyirwa, aboorobera ebiragiro bya Ruhanga, bakaikiriza Yesu.

13Kandi naahurira eiraka eririkuruga omu iguru niringira riti: Handiika. Okwiha hati baine omugisha abafu abafeera omuri Mukama; eego, nikwo Omwoyo arikugira, ngu babone kuhuumurira kimwe emirabanamu yaabo; ahakuba ebi baakozire bigyenda nabo.

14Bwanyima ku naimukize amaisho, naareeba ekicu kirikwera, kandi aha kicu ekyo hashutamiho orikushusha Omwana w'omuntu ajwaire ekirunga ky'ezaabu aha mutwe, kandi omu ngaro ze ainemu omuhoro gw'obwogi.

15Maraika ondiijo yaaruga omuri hekalu, yaagamba n'eiraka rihango, naagira Ogwo owaabaire ashutami aha kicu ati: Kiika omuhoro gwawe oteme, ahabw'okuba obunaku bw'okutema buhikire; kandi eby'okushaaruurwa by'ensi byereire kimwe.

16Atyo owaabaire ashutami aha kicu yaanaga omuhoro gwe aha nsi, ensi yaashaaruurwa.

17Maraika ondiijo yaaruga omuri hekalu ey'omu iguru, kandi nawe aine omuhoro gw'obwogi.

18Na maraika ondiijo, oine obushoboorozi aha muriro, yaaruga ha aitambiro, yaagamba n'eiraka rihango, naagira ogwo owaabaire aine omuhoro gw'obwogi ati: Kiika omuhoro gwawe gw'obwogi, ogucwise ebijuma by'omuzaabibu gw'ensi; ahakuba bihiisiize kimwe.

19Atyo maraika yaanaga omuhoro gwe aha nsi, yaacwa ebijuma by'omuzaabibu gw'ensi, yaabishuka omu inyuukiro rihango ery'ekiniga kya Ruhanga.

20Byanyuukirwa omu inyuukiryo eryo n'ebigyere aheeru y'orurembo, eshagama yaaruga omu inyuukiro, yaijura okuhika ahaiguru aha nkoba z'embaraasi, kandi ahansi yaahitsya mahiro magana abiri.

← Chapter 13 Jump to: Chapter 15 →