Revelation 18

Nyankole 1964

← Chapter 17 Jump to: Chapter 19 →

1Bwanyima y'ebyo naareeba maraika ondiijo naashuuma okuruga omu iguru, aine obushoboorozi bwingi. Ensi yaajwerwa omushana gw'ekitiinisa kye.

2Yaagamba n'eiraka rihango ati: Orurembo orukuru Babulooni rugwire, rugwire! Ruhindukire obutaaho bwa baadaimoni, n'obweshereko bw'emyoyo yoona emibi n'obw'amahungu goona amabi agarikunugwa;

3ahakuba amahanga goona ganyweire viinyo y'okurigira okubi kw'orurembo orwo, n'abagabe b'eisni bashambaine narwo, kandi n'abashuubuzi b'ensi batungisiibwe ebintu byarwo n'okwegira gye kwarwo okurengyesereize.

4Kandi naahurira eiraka erindi niriruga omu iguru nirigira riti: Mururugyemu, imwe bantu bangye 'mwe, mutakaakwatanisa narwo omu bibi byarwo, mukaheebwa ekifubiro ky'ebirikwija kurubonabonesa;

5ahakuba ebibi byarwo bituumire byahika ahaiguru munonga, kandi Ruhanga aijukire eby'okushiisha byarwo.

6Murugire, nk'oku rwagizire abandi; murwihure kabiri ahabw'ebi rwakozire; omu kikopo eki rwabaijuriizemu ebijwangire, murujwangizemu ebijwangire, murujwangizemu kabiri.

7Nk'oku rwayehimbiise, rukarengyesereza omu kwegira gye, mube nikwo mwarwihura okubonabona n'amaganya; ahakuba nirugira omu mutima gwarwo ruti: Nshutami nk'omugabekazi; tindi mufaakazi; tindigira maganya na kakye.

8N'ahabw'ekyo ebibonaboneso ebyo biryarugwaho omu izooba rimwe, rufu n'amaganya n'enjara, rwokibwe n'omuriro; ahabw'okuba Mukama Ruhanga orikurucwera orubanja n'ow'amaani.

9Abagabe b'ensi abaashambaine narwo n'abaakunire narwo, ku barireeba okucumbuuka kw'omwika gwarwo nirusya, baryarucurira, baruborogyere;

10baryayemerera hangahari ahabw'okutiina okubonabonesibwa kwarwo nibagira bati: Ai bambe! Ai bambe! Babulooni orurembo orukuru orw'amaani! Okucwerwa orubanja kwawe kwaizira omu shaaha emwe.

11Abashuubuzi b'ensi nibarira nibarucurira, ahabw'okuba tihakiriho b'okugura eby'obushuubuzi byabo,

12eby'ezaabu n'efeeza, amabaare ag'obuguzi bwingi n'eruuru, emyenda emirungi ya kitaani n'eya bujwa n'eya riiri n'erikutukura, ebiti eby'emigaju eby'emiringo yoona, ebintu by'emiino, n'ebintu byona ebibaizirwe omu mbaaho z'obuguzi bwingi, n'eby'emiringa n'eby'ebyoma, n'ebibaizirwe omu ibaare eririkwetwa maruburo,

13omudarasiini n'ebinzaari n'omugaju na sumuruna n'obubaane, viinyo n'amajuta n'esaano y'obunono n'engano, ente n'entaama, embaraasi n'ebigaari, n'abahuuku, niyo mibiri y'abantu n'emyoyo yaabo.

14Ebyana ebi omutima gwawe gwayetengire bikurugireho, n'ebintu byona ebinuzire, n'ebirungi byawe, bikuhweireho; tibirigaruka kureebwa na kakye.

15Abashuubuzi b'ebintu ebyo, abu rwatungiise, baryayemerera hangahari ahabw'okutiina okubonabonesibwa kwarwo nibarira, nibaborooga, nibagira bati:

16Ai bambe! Ai bambe! Orurembo orukuru orwabaire rujwara emyenda mirungi ya kitaani n'eya bujwa n'erikutukura, rwehunzire eby'ezaabu n'amabaare ag'obuguzi bwingi n'eruuru!

17Omu shaaha emwe obutungi obu bwona bwacwekyerezibwa. Bakama b'emeeri boona, n'abarikuzigyenderamu, abavugi baazo na boona abarikukora omu nyanja, baayemerera hangahari;

18baateera enduuru nibareeba omwika gw'okusya kwarwo, nibagira bati: Ebyo harabaireho orurembo orurikwingana n'orurembo oru orukuru!

19Baayeshuka omucuucu omu mitwe, nibarira nibaborooga, nibagira bati: Ai bambe! Ai bambe! orurembo orukuru, orwatungiise boona abaabaire baine emeeri aha nyanja! Omu shaaha emwe rwacwekyerezibwa.

20Nurwehimbisizeho, iwe eiguru, naimwe abarikwera n'entumwa na baanabi, ahakuba Ruhanga arucwereire orubanja ahabwanyu.

21Bwanyima maraika ow'amaani yaiha ahansi eibaare eririkwingana n'orubengo ruhango, yaarirekyera omu nyanja, naagira ati: Oku nikwo orurembo orukuru Babulooni rurinagwa aha nsi n'amaani maingi, kandi tirurireebwa bundi.

22Amaraka g'abateezi b'enanga n'abeeshongozi, n'ag'abateezi b'esheegu n'enzamba, tigarigaruka kuhurirwa bundi omuriiwe; n'emengo tizirigaruka kuhurirwa obundi omuriiwe;

23omuriiwe tiharyakiramu tabaaza obundi; kandi eiraka rya kishwera n'erya kishwerwa tigarigaruka kuhurirwa omuriiwe, ahakuba abashuubuzi baawe bakaba bari bakuru omu nsi, kandi oburogo bwawe bukagobeza amahanga goona.

24N'eshagama ya baanabi n'abarikwera n'eya boona abaitsirwe omu nsi ekashangwa omuri orwo rurembo.

← Chapter 17 Jump to: Chapter 19 →