Revelation 17

Nyankole 1964

← Chapter 16 Jump to: Chapter 18 →

1Bwanyima omwe ahari baamaraika mushanju abaabaire baine enyabya mushanju yaija, yangira ati: Ija nkworekye orubanja oruricwerwa maraaya omukuru oshutami aha maizi maingi,

2owaashambaine n'abagabe b'ensi, n'abatuura omu nsi bakasinda viinyo, nibwo bushambani bwe.

3Yantwara omu ihamba ndi omu Mwoyo, naareeba omukazi ashutami aha nyamaishwa erikutukura, eijwire amaziina g'okurogota, kandi eine emitwe mushanju n'amahembe ikumi.

4Omukazi ogwo akaba ajwaire emyenda ya bujwa n'erikutukura, ayehunzire eby'ezaabu n'amabaare ag'obuguzi bwingi n'eruuru, aine ekikopo ky'ezaabu omu ngaro ze ekiijwire ebihagaro n'okusiisikara kw'obushambani bwe;

5kandi aha buso bwe hahandiikirweho eiziina erisherekirwe, BABULOONI ORUREMBO ORUKURU, NYINA WA BAAMARAAYA N'EBIHAGARO BY'ENSI.

6Naareeba omukazi ogwo asinzire eshagama y'abarikwera n'ey'abaitsirwe ahabwa Yesu. Ku naamureebire, naatangaara munonga.

7Maraika yambuuza ati: Waatangaazibwa ki? Niinyija kukugambira eky'omubonano ky'ogwo mukazi n'eky'enyamaishwa ei arikugyenderaho, eine emitwe mushanju n'amahembe ikumi.

8Enyamaishwa ei waareeba ekaba eriho, hati teriho, neeyenda kuruga omu kiina ekitaine bugarukiro, eze omu kuhwerekyerera; kandi abatuura omu nsi, abu amaziina gaabo gatakahandiikwaga mu kitabo ky'amagara okuruga aha kuhangwa kw'ensi, baryatangaara ahabw'okureeba enyamaishwa egyo, ahakuba ekaba eriho, mbwenu teriho, haza kandi n'eija kubaho.

9Eki nikyetenga omutima ogwine obwengye. Emitwe mushanju nibwo bubungo mushanju, ahu ogwo mukazi ashutami;

10kandi nibo bagabe mushanju; aharibo bataano bakagwa, omwe ariho, ondiijo takaizire; ku ariija, ashemereire kugumaho omwanya mukye.

11Enyamaishwa eyaabaire eriho, bwenu etariho, niwe mugabe owa munaana, kwonka n'omwe ahari abo mushanju, kandi nawe naija kuhwerekyerera.

12Kandi amahembe ikumi agu waareeba n'abagabe ikumi abatakeemire; kwonka nibaija kuheebwa obushoboorozi nka'bagabe okumara eshaaha emwe hamwe n'egyo nyamaishwa.

13Abo nibakwatanisa hamwe kuha egyo nyamaishwa amaani gaabo n'obushoboorozi bwabo;

14baryarwanisa Omwana gw'entaama, kwonka Omwana gw'entaama aryabasingura, ahakuba ni Mukama w'abakama kandi Omugabe w'abagabe, kandi abo abu aine n'abaayetsirwe, abaatoorainwe kandi abeesigwa.

15Yaagaruka yangira ati: Amaizi agu waareeba ahi maraaya ogwo yaaba ashutami, n'abantu b'emiringo mingi n'emitwe mingi n'amahanga n'endimi.

16Kandi amahembe ikumi agu waareeba hamwe n'enyamaishwa baryayanga maraaya ogwo, atsigare wenka ajwaire busha; baryarya enyama ye, bamwokyeze kimwe n'omuriro;

17ahakuba Ruhanga akakita omu mitima yaabo ngu bahikiirize enaama ye, ahabw'okugira omutima gumwe okuha enyamaishwa egyo obushoboorozi bw'okutegyeka obugabe bwabo, okuhitsya obu ebigambo bya Ruhanga birihikiirizibwa.

18Kandi omukazi ogwo, ou waareeba, nirwo rurembo orukuru orurikutegyeka abagabe b'ensi.

← Chapter 16 Jump to: Chapter 18 →