Exodus 20

Kirundi (Bibliya Yera 1951, 1967 (Burundi))

← Chapter 19 Jump to: Chapter 21 →

1Imana ivuga aya majambo yose,

2iti Nd’ Uhoraho Imana yawe, yagukūye mu gihugu ca Egiputa, mu nzu y’ubuja.

3Ntukagire izindi mana umbangikanya.

4Ntukibāzire igishushanyo, cank’ igisa n’ishusho y’ikintu na kimwe kiri hejuru mw ijuru, canke hasi kw isi, canke mu mazi yo mu biyaga;

5ntuz’ uvyikubite imbere, ntuz’ ubisabe, kuko jewe Uhoraho Imana yawe nd’ Imana ifuha, mpōra abana ibigabitanyo vya ba se, nkageza ku runganwe rugira gatatu no ku rugira kane rw’abanyanka,

6nkagirira ikigongwe abankunda, bakitondera ivyagezwe vyanje, nkageza ku runganwe rwabo uko ruzogenda rukurikirana gushitsa igihumbi.

7Ntugapfe kuvuga izina ryanje, jewe Uhoraho Imana yawe, ku vy’ ubusābusa; kuk’ uworivuga ku vy’ubusābusa, jewe Uhoraho ntobura kubimuhōra.

8Wibuke kuziririza umusi w’ isabato.

9Mu misi itandatu uz’ ukore, abe ari yo ukoreramw’ ibikorwa vyawe vyose:

10arik’ umusi ugira indwi ni wo sabato yanje, jewe Uhoraho Imana yawe. Ntukagire igikorwa na kimwe ukora kuri wo, wewe ubgawe, cank’ umuhungu wawe, cank’ umukobga wawe, cank’ umugurano wawe, cank’ umuguranokazi wawe, cank’ inka zawe, cank’ uw’ inyambukīra aba i wawe:

11kukw imisi itandatu ari yo jewe Uhoraho naremyemw’ ijuru n’isi n’ikiyaga n’ ibiri muri vyo vyose, nkaruhuka ku musi ugira indwi: ni co catumye jewe Uhoraho mpezagira umusi w’isabato, nkaweza.

12Wubahe so na nyoko, kugira ng’urambire mu gihugu jewe Uhoraho Imana yawe nzoguha.

14Ntugasambane.

16Ntukāgirize ibinyoma mugenzawe.

17Ntukifuze inzu ya mugenzawe, ntukifuze umugore wa mugenzawe, cank’ umugurano wiwe, cank’ umuguranokazi wiwe, cank’ inka yiwe, cank’ indogoba yiwe, cank’ ikintu na kimwe ca mugenzawe.

18Abantu bose bumvise ya mituragaro, babonye ya miravyo, bumvise n’ijwi rya ya nzamba, babonye na wa musozi upfūndūka umwotsi, baterwa n’ubgoba bahinda agashitsi, barasuha bahagarara kure.

19Babgira Mose, bati Ba ari wewe utubarira, ni ho twovyumva: arikw Imana yoye kuba ari yo itwibaririra, ntiduhave dupfa.

20Mose yishura abantu, ati Ni muhūmure: kukw Imana ije kubagerageza, kugira ngw igitinyiro cayo came imbere yanyu, mwoye gukora icaha.

21Nukw abantu baguma ngaho aho bahagaze kure, ariko Mose yegera wa mwiza w’umuzitanya ah’ Imana iri.

22Uhoraho abarira Mose, at’ Uku abe ari k’ubarira Abisirayeli, ut’ Ubganyu murīboneye kw avuganye namwe ari mw ijuru.

23Uti Ntimukarondere izindi mana ngo muzibangikanye na we: ntihakagire ivyitwa imana mucura, ari mw ifeza canke mw izahabu.

24Igicaniro muzongirira, muze mukirundarunde mw ivu, abe ari ho mutangira ibimazi vyanyu vyo kwoswa n’ivy’ ishimwe, ar’ ivyo mu ntama zanyu canke mu nka: ahantu hose izina ryanje rizokwibukirwa nzohabasanga, mbahe umugisha.

25Kandi ni mwangirira igicaniro c’amabuye, ntimuze mucubakishe amabuye abājwe, kukw ibuye murikojejekw icuma canyu mwoba murihumānije.

26Kandi ntimuze mugire ico kwūririrako ngo muje ku gicaniro canje, kugira ng’ubgambure bganyu bgoye kukibonekako.

← Chapter 19 Jump to: Chapter 21 →