Exodus 23

Kirundi (Bibliya Yera 1951, 1967 (Burundi))

← Chapter 22 Jump to: Chapter 24 →

1Ntimuze mwāmāmaze inkuru z’ibinyoma; ntihaze hagire uwifatanya n’ikigāba kuba icabona c’ibinyoma.

2Ntimuze muherēre ku ruhande rwa benshi bari mu nama y’ibibi, kand’ ūshinga intahe mu manza, ntaz’ aje iyo benshi bari, bigatuma bagoreka urubanza;

3kandi ntimuze mutsindanishirize umuntu mubitewe n’ukw ar’ umworo.

4Ni hagira ūhūra n’inka y’ umwansi wiwe izimiye, cank’ indogoba yiwe, ntaz’ abure kuyimugarurira.

5Kandi hagize ūbona indogoba y’ūmwanka ifyāritswe n’umutwaro, ntapfe kumurengana, akwiye kumufasha kuyiremurura.

6Ntihaze hagire ūgoreka urubanza rw’umworo wo mu b’i wanyu.

7Mwitandukanye n’urubanza rw’ibinyoma, kandi ntihakagire uwo mwica atācumuye kand’ ar’ umugororotsi, kuko jewe ntazotsindanishiriza uwacumuye.

8Ntimuze mwemere ingurire: kukw ingurire ihuma amaso y’ ababona, kand’ igoreka imanza z’ abagororotsi.

9Ntimuze muhahaze umunyamahanga, kuko muzi umutima w’ umunyamahanga, kuko namwe mwar’ abanyamahanga mu gihugu ca Egiputa.

10Mu myaka itandatu mwame murima indimiro zanyu, mwimbure ivyimburwa vyazo;

11arik’ umwaka ugira indwi muzireke zirāre, zibe imisito, kugira ngw abakene bo mu bgoko bganyu barye ivyimeza, maz’ uduhūmbga basize turibge n’ibikōko vyo ku misozi. N’uruzabibu rwanyu n’ibiti vyanyu vy’imyelayo abe ari ko muzobigenza.

12Mu misi itandatu muze mukore ibikorwa vyanyu, maze ku musi ugira indwi muze muruhuke, kugira ngw inka zanyu n’indogoba zanyu mukoresha na zo zibone kuruhuka, n’abana b’abaguranokazi banyu n’ab’ akavantara bari muri mwebge babone guta akuya.

13Kand’ ivyo nababgiye vyose muze muvyitondere; ntimukagire amazina y’izindi mana muvuga, ntakumvikane mu kanwa kanyu.

14Muze mungirire imisi mikuru gatatu‐gatatu mu mwaka:

15muze mugire imisi mikuru y’ imitsima itambiwe: nk’uko nababariye, mumare imisi ndwi murya imitsima itambiwe, mu gihe cashinzwe co mu kwezi Abibu, kukw ari kwo mwaviriyemwo muri Egiputa: ntihaze hagire ūrenguka iminwe misa imbere yanje.

16Kand’ umusi wo gusoroma ivy’ akera, muze muwugire mukuru, ari wo w’intangamarāra w’ivyo mwacumukuriye, murima mu ndimiro. Kandi n’umusi w’iyimbura rya vyose na wo muze muwugire mukuru, igihe muzokwimbura ivyabatamije vyo mu ndimiro zanyu, ku mpera y’umwaka.

17Nuko haze harenguke izinamuhungu wese imbere yanje, jewe Umwami Uhoraho, gatatu‐gatatu mu mwaka.

18Amaraso y’ikimazi nshikaniwe ntimuze muyahēreze hamwe n’ imitsima yambiwe; ibinure vy’ icābāzwe ku musi wanje mukuru ntibize birāre ngo bishitse mu gatondo.

19Ivy’ intangamarāra vyo mu vy’imishuzo yo mu mirima yanyu muze mwame mubizana mu ngoro yanje, jewe Uhoraho Imana yanyu. Ntimuze mutekeshe umwagazi w’impene amata ya nyina.

20Ehe ngira ntume umumarayika imbere yanyu, abazigame mu nzira, abashikane aho nateguye.

21Muze mumwubahe, mumwumvire, ntimuze mumugararize, kukw atazobaharira ibicumuro vyanyu, kukw izina ryanje riri muri we.

22Ariko ni mwamwumvira vy’ukuri, mugakora ivyo nzovuga vyose, nanje nzoba umwansi w’abansi banyu, nzoba umurwanizi w’ababarwanya.

23Kuk’ uwo mumarayika wanje azoja imbere yanyu, gushitsa no mu Bamori, no mu Baheti, no mu Baferizi, no mu Banyakanani, no mu Bahiwi, no mu Bayebusi, nanje nzogenda ndabarandura.

24Kandi ntimukikubite imbere y’ibigirwamana vyabo, canke ngo mubisabe, canke ngo mwīgāne ingeso zabo: ariko muze mubihenebereze rwose, mumenagure amabuye yavyo bāshinze kw inkingi.

25Ariko jewe Uhoraho Imana yanyu abe ari jewe musaba, nanje nzohezagira ivyo kurya vyanyu n’amazi yanyu, kandi nzokūra indwara muri mwebge.

26Mu gihugu canyu nta wuzokorokesha inda, nta wuzoba intavyara: ibitigiri vy’imisi y’ukubaho kwanyu nzobishitsa, ntimuzokenyuka.

27Nzotuma igitinyiro canje kibītangire imbere, nce ivutu abantu bose muzoshikamwo, ntume abansi banyu babaha ibitugu, babahunge.

28Nzogomora amavubi abītangire imbere, yirukane Abahiwi n’Abanyakanani n’Abaheti imbere yanyu.

29Sinzogīrako ngo mbirukane imbere yanyu mu mwaka umwe, kugira ngw igihugu coye guhinduka amatongo, ibikōko vyo mw ishamba bikagwira bikabatera.

30Ariko nzobirukana imbere yanyu si ruto si ruto, gushitsa aho muzogwirira, mukegukira ico gihugu.

31Nzobashirirah’ urugabano guhēra ku Kiyaga Gitukura gushitsa ku kiyaga c’Abafilisitiya, no guhēra ku bugaragwa gushitsa ku ruzi Efurate; kukw ababa mur’ ico gihugu nzobashira mu maboko yanyu, mubirukane.

32Ntimuze mugire isezerano musezerana na bo, canke n’imana zabo.

33Ntibaze bakomeze kuba mu gihugu canyu, kugira ngo ntibaze babacumuze kuri jewe; kuko muramutse musavye imana zabo bitobura kubabera umutego.

← Chapter 22 Jump to: Chapter 24 →