Exodus 6

Kirundi (Bibliya Yera 1951, 1967 (Burundi))

← Chapter 5 Jump to: Chapter 7 →

1Uhoraho abarira Mose, at’ Uhereye none uzorāba ivyo nzogirira Farawo: ukuboko kw’ ubushobozi kuzomugondōza, abarekure, mber’ ukuboko kw’ubushobozi kuzomugondōza, abirukane mu gihugu ciwe.

2Imana ibarira Mose, iti Nd’ UHORAHO;

3kandi niyeretse Aburahamu, na Isaka, na Yakobo, ko nd’ Imana Ishobora vyose, ariko sinabīmenyesha mur’ iryo zina ryanje UHORAHO.

4Kandi nakomeje isezerano ryanje na bo, ko nzobaha igihugu c’i Kanani, igihugu bābayemw’ ar’ inyambukīra.

5Kandi numvise amaborogo y’Abisirayeli, Abanyegiputa bazigiye mu buja; nibuka isezerano ryanje.

6Nuko barira Abisirayeli yuko nd’ Uhoraho, kandi nzobakūra ku bikebere Abanyegiputa babakebera, mbakūre mu buja barimwo, mbacunguze ukuboko kuramvuye, n’ibihano bikomeye:

7kandi nzobagira abantu banje, nanje nzoba Imana yanyu; ni ho muzomenya ko nd’ Uhoraho Imana yanyu, ibakūye ku bikebere Abanyegiputa babakebera.

8Kandi nzobajana mu gihugu narahiye mmanitse ukuboko ko nemeye kuzogiha Aburahamu na Isaka na Yakobo; nzokibaha kibe ishamvu yanyu; nd’ Uhoraho.

9Mose abibarira Abisirayeli nk’uko nyene; ariko ntibāmwumvira kubg’ ubgihebe bgo mu mitima, no kubg’ ubuja bārimwo bg’agahahazo.

10Uhoraho abarira Mose,

11ati Genda kwa Farawo umwami wa Egiputa, umubarire arekure Abisirayeli bave mu gihugu ciwe.

12Mose arishura ar’ imbere y’ Uhoraho, ati Rāba, Abisirayeli ntibanyumviye, none Farawo yonyumvira ate, kand’ iminwa yanje ihumanye?

13Arik’ Uhoraho abarira Mose na Aroni, abatuma ku Bisirayeli no kuri Farawo umwami wa Egiputa, ngo bakūre Abisirayeli mu gihugu ca Egiputa.

14Aba ni bo bakuru b’amazu ya ba sekuruza. Bene Reyubeni imfura ya Isirayeli ni Henoki na Palu na Hesironi na Karumi: abo ni bo mazu ya Reyubeni.

15Bene Simeyoni ni Yemuweli na Yamini na Ohadi na Yakini na Sohari, bo na Sauli umwana yavyaye ku Munyakananikazi: abo ni bo mazu ya Simeyoni.

16Aya ni yo mazina ya bene Lewi, nk’ uko bagiye bavyarana: bene Lewi ni Gerushoni na Kohati na Merari; imyaka Lewi yamaze n’ijana na mirongwitatu n’indwi.

17Bene Gerushoni ni Libuni na Shimeyi, nk’ukw amazu yabo ari.

18Bene Kohati ni Amuramu na Isihari na Heburoni na Uziyeli: imyaka Kohati yamaze n’ijana na mirongwitatu n’itatu.

19Bene Merari ni Mahili na Mushi; abo ni bo mazu y’Abalewi, nk’uko bagiye bavyarana.

20Amuramu arongora Yokebedi inasenge: bavyarana Aroni na Mose; imyaka Amuramu yamaze n’ijana na mirongwitatu n’indwi.

21Bene Isihari ni Kora na Nefegi na Zikiri.

22Bene Uziyeli ni Mishayeli na Elisafani na Sitiri.

23Aroni arongora Elisheba, umukobga wa Aminadabu, mushiki wa Nahashoni; bavyarana Nadabu na Abihu na Eleyazari na Itamari.

24Bene Kora ni Asiri na Elikana na Abiyasafu; abo ni bo mazu y’ Abakora.

25Eleyazari mwene Aroni arongora umwe mu bakobga ba Putiyeli; bavyarana Finehasi. Abo ni bo bakuru b’amazu ya ba sekuruza b’Abalewi, nk’ukw inzu zabo ziri.

26Abo ni bo ba bandi Aroni na Mose, Uhoraho yabariye, ati Ni mukūre Abisirayeli mu gihugu ca Egiputa, mubakurikiranye mu mice yabo.

27Mose na Aroni abo, ni bo bavuganye na Farawo umwami wa Egiputa ivy’ ugukūra Abisirayeli muri Egiputa.

28Ku musi Uhoraho yabaririye Mose mu gihugu ca Egiputa,

29yaramubariye, ati Nd’ Uhoraho: bgira Farawo umwami wa Egiputa ico nkubarira cose.

30Ariko Mose yishura ar’ imbere y’Uhoraho, ati Rāba, iminwa yanje imeze nk’umubiri utākebge: none Farawo yonyumvira ate?

← Chapter 5 Jump to: Chapter 7 →