Exodus 32

Kirundi (Bibliya Yera 1951, 1967 (Burundi))

← Chapter 31 Jump to: Chapter 33 →

1Abantu babonye Mose atevye kur’ uwo musozi, atamanutse, bakoranira kuri Aroni, baramubarira, bat’ Enda, n’uturonkere imana zo kutuja imbere; kuk’ umwe Mose yadukūye mu gihugu ca Egiputa, tutazi ico yabaye.

2Aroni arabishura, ati Ni mukātūre impeta z’izahabu, ziri ku matwi y’abagore banyu no ku y’abahungu n’abakobga banyu, muzinzanire.

3Nukw abantu bose bakātūra impeta z’izahabu zo ku matwi yabo, bazishīra Aroni.

4Arazābīra, azivugutira mu nkero, azikūramw’ igishushanyo c’imasa, agitunganishije isinzo; baravuga, bati Yemwe Bisirayeli, ngiyo imana yanyu, yabakūye mu gihugu ca Egiputa.

5Aroni abibonye, yubaka igicaniro imbere yaco; arabitāngāza, aravuga, at’ Ejo hazoba umusi mukuru w’Uhoraho.

6Bukeye bakoroka kare, batanga ibimazi, baravyosa, bazana n’ibimazi vy’ishimwe; bicarikwa no kurya no kunywa, bava hasi baravyina.

7Uhoraho abarira Mose, ati Manuka ugende, kuko ba bantu bawe wakūye mu gihugu ca Egiputa bamaze kwononekara.

8Inzira nabageze bayitaye ata n’akanya, bīronkeye igishushanyo c’imasa bakivugutiye mu nkero, bagisenze, bagihaye n’ibimazi, baravuga, bati Yemwe Bisirayeli, ngiyo imana yanyu, yabakūye mu gihugu ca Egiputa.

9Uhoraho arongera abarira Mose, at’ Abo bantu ndababonye ico barimwo: n’abantu batagonda izosi;

10none rer’ upfe kundeka gusa, uburake bganje bubarurumbeko, mbahonnye; ariko weho nze nguhindure ihanga rikomeye.

11Mose atakambira Uhoraho Imana yiwe, ati Mbeg’ Uhoraho, n’iki gitumye uburake bgawe bururumba ku bantu bawe wakūje mu gihugu ca Egiputa ububasha bginshi n’ukuboko kw’inkomezi?

12N’iki cotuma uha Abanyegiputa kuvuga, ngo Kubatēza ivyago ni kwo kwatumye ibakūra ino, ngw ibatsinde mu misozi miremire, ibahonnye mw isi? Enda se n’ushire uburake bgawe bg’inkazi, wigarure, ntutēze abantu bawe ivyo vyago.

13Ni wibuke Aburahamu na Isaka na Isirayeli, abasavyi bawe, abo wabariye wigize indahiro, uti Nzogwiza uruvyaro rwanyu, rungane n’inyenyeri zo kw ijuru, kand’ iki gihugu cose mvuze nzogiha uruvyaro rwanyu, bacegukire ibihe vyose.

14Nuk’ Uhoraho arīgarura, areka ivyo vyago yari yavuze gutēza abantu biwe.

15Maze Mose arahindukira, amanuka uwo musozi, afise vya bisate vyompi mu minwe birikw Ibishinga intahe, vyanditswekw impande zompi, imbere n’inyuma.

16Ivyo bisate vyari bikozwe n’ Imana, kand’ inyandiko zikorogoshowe kuri vyo zar’ inyandiko z’Imana.

17Maze Yosuwa yumvise urwamo rw’abantu bayogora, abarira Mose, ati Har’ urwamo rw’intambara mu nsago!

18Aramwishura, at’ Ivyo numva s’urwamo rw’abadēdēsha akarūru ko kunesha, kandi s’urw’ abatakambishwa no kuneshwa, ariko n’urw’ abavyina.

19Nukw ashitse hafi y’aho bashagaje, abona ya masa n’abariko baratamba; uburake bga Mose buraziriringa, ata hasi ivyo bisate yar’ afise mu ntoke, abimenera mu mucāmo w’uwo musozi.

20Maze yābīra iyo masa bakoze, arayiturira, arayisya, ayigira ifu, ayimēmēra ku mazi, ayanywesha Abisirayeli.

21Mose abaza Aroni, ati Mbeg’ aba bantu bakugize bate catumye ubazanakw icaha kingana girtyo?

22Aroni aramwishura, at’ Uburake bgawe bgoye kuziriringa mwami wanje! Urazi aba bantu, ingene bamogoreye mu bibi:

23kuko bambariye, bati N’uturonkere imana yo kutuja imbere, bati Kuk’ umwe Mose yadukūye mu gihugu ca Egiputa tutazi ico yabaye.

24Nanje ndabishura, nt’ Ūri n’izahabu wese n’ ayikātūre; nuko barazimpa, nziterera mu muriro, havamw’ iyo masa.

25Maze Mose abonye kw abantu bīrekuriye mu buyobe, kuko Aroni yabakundiye kwirekurira muri bgo, bagahinduka agatwengo ku bansi babo,

26ahagarara mw ishikiro ry’aho bashagaje, aravuga, ati Ni nde ari ku ruhande rw’Uhoraho? N’aze hano aho ndi. Abalewi bose bakoranira ah’ ari.

27Arababgira, at’ Uku ni k’Uhoraho, Imana y’ Abisirayeli, agize, ngo Ni muhagatire inkota zanyu mwese, mukwiragire hose aho dushagaje, muhēre ku ruhande rumwe mushitse ku rundi, umuntu wese yice mwene wabo na mugenzi we n’ umubanyi wiwe.

28Abalewi babigenza nk’uko Mose yavuze; kur’ uwo musi mu bantu hapfamwo nk’ibihumbi bitatu.

29Mose arababarira, at’ Uyu musi mwiyeguriye igikorwa c’Uhoraho, kukw ata warenganye umwana wiwe canke mwene wabo; ivyo bitumye Uhoraho abaha umugisha uyu musi.

30Bukeye bgaho, Mose abarira abantu, ati Mwakoze icaha gikomeye; none ngira ndūge nje k’ Uhoraho, kumbure nobona ingene mbatangira impongano kubg’ icaha canyu.

31Nuko Mose asubira k’ Uhoraho, aravuga, ati Tegēra Bgirukiro! Abo bantu bakoze icaha gikomeye koko, bicuriye ikigirwamana c’izahabu.

32Es’ icompa ukabaharira icaha cabo! Na ho bidashobotse, jewe upfume usibanganya izina ryanje mu gitabo cawe wanditse.

33Uhoraho yishura Mose, at’ Ūncumuyeko wese ni we nzosibanganya mu gitabo canje.

34None genda, ujane abo bantu ha hantu nakubarira; kand’ ehe rāba, umumarayika wanje azokuja imbere: yamara ku musi wo guhōra, nzobasubiriza mu nkōko ico caha cabo.

35Uhoraho atēza abo bantu ivyago, kuko bacurishije ya masa Aroni yacura.

← Chapter 31 Jump to: Chapter 33 →