Exodus 40

Kirundi (Bibliya Yera 1951, 1967 (Burundi))

← Chapter 39 Jump to:

1Uhoraho abarira Mose,

2ati Ku musi wa mbere w’ukwezi kwa mbere uz’ ushinge iryo hema, ari ryo hema ry’ibonaniro.

3Uheze ushiremwo ya sandugu y’ Ibishinga intahe, uyikingirize ca gihuzu.

4Maze winjizemwo ya meza, uyaterekekw ibintu vyayo, ubiroranye; winjize na ca gitereko c’amatara, ugishirekw amatara yaco;

5na ca gicaniro c’izahabu co kwoserezakw imibavu uz’ ugitereke hino ya ya sandugu y’Ibishinga intahe, ukinge ca gihuzu ku muryango w’iryo hema.

6Uheze ushire ca gicaniro co kwoserezakw ibimazi imbere y’ umuryango w’iryo hema, ari ryo hema ry’ibonaniro.

7Maz’ utereke ca kigārigāri co gukaraba hagati y’ihema ry’ibonaniro n’ico gicaniro, ugisukemw’ amazi.

8Uheze ushireh’ urugo rukikuza impande zose, umanike n’impuzu yo gukinga mw irembo ryarwo.

9Uheze wābire ya mavuta yo kurobanuza abahabga ibango, uyarobanuze iryo hema n’ibirimwo vyose, uryezanye n’ibintu vyaryo vyose: nuko rizoba ribaye iryera.

10Uyarobanuze n’igicaniro co kwoserezakw ibimazi, n’ibintu vyaco vyose, uceze: nuko kizoba kibaye icera cane.

11Uyarobanuze n’ikigārigāri bo n’intebe yaco, uceze.

12Uheze uzane Aroni n’abana biwe ku muryango w’iryo hema ry’ibonaniro, ubuhagire.

13Wambike Aroni ya myambaro yejejwe, umurobanuze ayo mavuta, umweze, kugira ngw ankorere igikorwa c’ubuherezi.

14Uheze uzane n’abana biwe, ubambike ya makanzo.

15Ubarobanuze amavuta, nk’uk’ uyarobanuje se, kugira ngo bankorere igikorwa c’ubuherezi: ukwo kurobanurwa kwabo kuzoba kubahaye ubuherezi bg’intahava ukw ibihe vy’urunganwe rwabo bizogenda bikurikirana.

16Nuko Mose abigenza artyo: uk’ Uhoraho yamubariye kwose, ni ko yabikoze.

17Nuko mu kwezi kwa mbere kwo mu mwaka ugira kabiri, ku musi wakwo wa mbere, iryo hema ry’ imbere rirashingwa.

18Mose ararishinga, ashirah’ ibitereko vyaryo, ashingamw’ imbaho zaryo, azisobekamw’ ibiti vyazo vy’ intumba, ashinga inkingi zaryo.

19Araheza arirenzako rya hema ryo hejuru, iryo hema na ryo arirenzakw ikindi hejuru, nk’uk’ Uhoraho yari yaramubariye.

20Yābīra vya Bishinga intahe, abishira muri ya sandugu, ayisobekakw iminiho yayo, arumika wa mutemere wo guhongerako kur’ iyo sandugu hejuru:

21yinjiza iyo sandugu mw ihema, amanika ca gihuzu co gukingīra Ahēra cane, gikingīra iyo sandugu y’Ibishinga intahe, nk’uk’ Uhoraho yari yaramubariye.

22Ashira ya meza mur’ iryo hema ry’ibonaniro, ayaherereza ku ruhande rw’i burārūko rw’iryo hema, hino y’ico gihuzu.

23Ayaterekako ya mitsima imbere y’Uhoraho, nk’uk Uhoraho yari yaramubariye.

24Ashira na ca giterekwakw amatara mur’ iryo hema ry’ibonaniro, aharābana n’ ayo meza, ku ruhande rw’i bumanuko rw’iryo hema.

25Agishirakw amatara imbere y’ Uhoraho, nk’uk’ Uhoraho yari yaramubariye.

26Ashira na ca gicaniro c’izahabu mur’ iryo hema ry’ibonaniro, hino ya ca gihuzu,

27acoserezakw imibavu y’ibintu bimoga, nk’uk’ Uhoraho yari yaramubariye.

28Akinga ca gihuzu ku muryango w’iryo hema.

29Ashira ca gicaniro co kwoserezakw ibimazi imbere y’umuryango w’iryo hema, ari ryo hema ry’ibonaniro, agitangirakw ikimazi, aracosa, agitangirako n’ishikanwa ry’ ifu, nk’uk’ Uhoraho yari yaramubariye.

30Atereka ca kigārigāri hagati y’ihema ry’ibonaniro n’ico gicaniro, agisukamw’ amazi yo gukaraba,

31Mose ubgiwe na Aroni n’abana biwe barayakaraba, bayoga n’ibirenge;

32iyo bagiye kwinjira mw ihema ry’ ibonaniro, n’iyo bagiye kwēgēra ico gicaniro, bārakaraba, bakoga ibirenge, nk’uk’ Uhoraho yari yarabariye Mose.

33Araheza ashirah’ urugo rukīkūza iryo hema n’igicaniro impande zose, ashiraho n’impuzu yo gukinga mw irembo ryarwo. Uko ni ko Mose yarangije ico gikorwa.

34Maze ca gicu gipfuka ihema ry’ibonaniro, ubgiza bg’Uhoraho bguzura mw ihema ry’imbere.

35Mose ntiyashobora kwinjira mur’ iryo hema ry’ibonaniro, kukw ico gicu cari kuri ryo, n’ubgiza bg’Uhoraho bguzuye mur’ iryo hema ry’imbere.

36Kandi mu rugendo rwabo rwose, iy’ ico gicu kivuye kur’ iryo hema kigasubira hejuru, Abisirayeli bāca bafata inzira;

37arikw iy’ ico gicu kidasubiye hejuru, ntibāgenda, gushitsa ku musi gisubiye hejuru.

38Kukw ico gicu c’Uhoraho ku murango caba kur’ iryo hema, mw ijoro kikākamw’ umuriro, imbere y’ab’ inzu ya Isirayeli bose, mu rugendo rwabo rwose.

← Chapter 39 Jump to: