Joshua 11

Kirundi (Bibliya Yera 1951, 1967 (Burundi))

← Chapter 10 Jump to: Chapter 12 →

1Yabina umwami w’i Hasori avyumvise, atuma kuri Yobabu umwami w’i Madoni, no ku mwami w’i Shimuroni, no ku mwami w’i Akishafi,

2atuma no ku bami bo mu mugamba w’i burārūko, n’abo mu kiyaya Araba giherereye i Kinereti i bumanuko bgaho, n’abo mu gihugu c’imisozi iciye bugufi, n’abo mu misozi ihagaze y’i Dori ahahera i burengerazuba;

3atuma no ku Banyakanani b’i burasirazuba n’ab’i burengerazuba, no ku Bamori no ku Baheti no ku Baferizi no ku Bayebusi bo mu mugamba, no ku Bahiwi bo musi ya Herumoni mu gihugu c’i Misipa.

4Nuko bazanana n’ingabo zabo zose; bāri benshi nk’umusenyi wo kw isēsero ry’ikiyaga, bo n’amafarasi n’imikogote vy’isinzi.

5Abo bami bose bakoranira hamwe, baraza basagaza ku mazi y’i Meromu, ngo batere Abisirayeli.

6Maz’ Uhoraho abarira Yosuwa, ati Ntubatinye; kukw ejo nk’aya mango bose nzobagabura bagwe imbere y’Abisirayeli; amafarasi yabo uz’ uyacagagure ibitsi, n’imikogote yabo uz’ uyiturire.

7Nuko Yosuwa azanana n’ingabo ziwe zose, abaterera ku mazi y’i Meromu, abahungiye ata co bīnona.

8Uhoraho abagabura mu maboko y’Abisirayeli, barabanesha, barabakinagiza, babashitsa ku gisagara kinini Sidoni n’i Misirefoti‐mayimu no mu kiyaya c’i Misipe ahahera i burasirazuba; barabica ntibasiga n’uwa kirazira.

9Yosuwa abagirira nk’uk’ Uhoraho yamubariye; amafarasi yabo ayacagagura ibitsi, n’imikogote yabo arayiturira.

10Maz’ ico gihe Yosuwa arakebanuka, atsinda i Hasori, yicisha umwami waho inkota; kand’ i Hasori ubga mbere ni co cār’ igisagara gikuru mu bihugu vy’abo bami bose.

11Batōngōza inkota abari muri co bose, barabageseza; ntihasigara n’umwe agihumeka, kandi n’i Hasori bahatōngōza umuriro.

12Yosuwa atsinda ibisagara vyose vy’abo bami, abo bami bose abicisha inkota, arabageseza, nk’uko Mose umusavyi w’Uhoraho yageze.

13Arikw ibisagara vyubatswe ku dusozi tunungaraye, Abisirayeli nta na kimwe bāturiye, atar’ i Hasori honyene: aho ho Yosuwa yarahaturiye.

14Iminyago yose y’ivyo bisagara, n’inka zose, Abisirayeli bavyijanira kw iminyago; arikw icitwa umuntu wese bamwicisha inkota, gushitsa babaranduye rwose: ntibasigaza n’umwe agihumeka.

15Nk’ uk’ Uhoraho yageze Mose umusavyi wiwe, ni ko Mose yageze Yosuwa, Yosuwa na we abigenza kuno: nta kintu na kimwe atākoze, mu vy’Uhoraho yageze Mose vyose.

16Uko ni ko Yosuwa yanesheje ico gihugu cose: umugamba waho, n’i Negebu hose, n’igihugu cose c’i Gosheni, n’ic’ imisozi iciye bugufi, n’ikiyaya Araba, n’umugamba witwa uwa Isirayeli, n’igihugu c’imisozi iciye bugufi kiwegamiye,

17uhereye ku musozi Halaki, uk’ udūga utumbereye i Seyiri, gushitsa i Bayali‐gadi ku mwonga w’i Lebanoni uri musi y’umusozi Herumoni; anesha n’abami baho bose, arabafata, arabica.

18Mbere Yosuwa yamaze igihe kirekire arwana n’abo bami bose.

19Nta gisagara na kimwe cigeze kwisaba Abisirayeli, atar’ Abahiwi bāba i Gibeyoni: ibindi bisagara vyose babinesheje birwanye.

20Kukw ivyo vyari bivuye k’Uhoraho, yakomantaje imitima yabo, bakaza kurwana n’Abisirayeli, kugira ngw Abisirayeli babarandure rwose ata kagongwe, babageseze, nk’uk’ Uhoraho yari yarabariye Mose.

21Ico gihe Yosuwa aragenda, ageseza Abanaki bo mu gihugu c’ umugamba, uhereye i Heburoni n’i Debira n’i Anabu, umugamba wose watwaye Abayuda, n’umugamba wose watwaye Abisirayeli; Yosuwa arabarandura rwose, bo n’ibisagara vyabo.

22Ntihagira n’umwe wo mu Banaki asigara mu gihugu c’Abisirayeli, atari bamwe‐bamwe basigaye i Gaza n’i Gati n’i Ashidodi.

23Uko ni ko Yosuwa yanesheje ico gihugu cose, nk’uk’ Uhoraho yari yarabariye Mose. Maze Yosuwa akigabanganya Abisirayeli ngo kibe ishamvu yabo, nk’ukw imiryango yabo iri. Nukw igihugu gihabga impore.

← Chapter 10 Jump to: Chapter 12 →