Joshua 14

Kirundi (Bibliya Yera 1951, 1967 (Burundi))

← Chapter 13 Jump to: Chapter 15 →

1Aya ni yo mashamvu Abisirayeli bāhawe mu gihugu c’i Kanani, uko bayagabanganijwe na Eleyazari umuherezi na Yosuwa mwene Nuni, n’abakuru b’amazu ya ba sekuruza bo mu miryango y’Abisirayeli.

2Imiryango cenda n’igihimba, amashamvu yabo bayaheshejwe n’ubupfindo, nk’uk’ Uhoraho yari yarabariye Mose;

3kuko Mose ubgiwe ari we yari yagaburiye iyindi miryango ibiri n’igihimba amashamvu hakurya ya Yorodani; arikw Abalewi bo ntiyabahaye ishamvu mu bandi.

4Kuko bene Yosefu babayemw’ imiryango ibiri: uw’Abamanase n’uw’Abefurayimu; nta mugabane Abalewi bāhawe, atar’ ibisagara vyo kubamwo, n’amaragiro ar’ inyuma yavyo, yo kuragiramw’ inka zabo n’ibitungwa vyabo.

5Nk’ uk’ Uhoraho yari yarabariye Mose, ni kw Abisirayeli bābigenjeje, mu kugabura igihugu.

6Maz’ Abayuda baza kuri Yosuwa i Gilugali; Kalebu mwene Yefune Umukenizi aramubarira, at’ Urazi ivyo Uhoraho yatuvuzeko twe nawe, akabibgira Mose umuntu w’Imana, tur’ i Kadeshi‐baruneya.

7Nari mmaze imyaka mirongwine, igihe Mose umusavyi w’Uhoraho yantuma, ngo mve i Kadeshi‐baruneya nje gutata igihugu; ngarutse nkamubarira inkuru ntacishije i ruhande;

8ariko bagenzi banje twari twadūganye bakarandura abantu imitima: mugabo jeho nakurikiye Uhoraho Imana yanje muri vyose.

9Maz’ uwo musi nyene Mose arandahira, ati N’ukuri igihugu wakandagiyemwo kizoba ishamvu yawe n’iy’ abana bawe gushitsa ibihe vyose, kuko wakurikiye Uhoraho Imana yanje muri vyose.

10Kalebu arongera aravuga, ati Kand’ ehe rāba, Uhoraho yampaye kumara iyi myaka mirongwine n’itanu nk’ uko yavuze, uhereye igihe yabaririye Mose iryo jambo, Abisirayeli bagatangura kuyerēra mu bugaragwa; non’ ehe rāba, uyu musi mmaze imyaka mirongumunani n’ itanu.

11Kandi n’uyu musi ndacafise inkomezi, nk’uko nari ndazifise kuri wa musi Mose yantuma; ukw inkomezi zanje zari ziri ico gihe ngitabara mu rugamba ngatabaruka, n’ubu ni ko zikiri.

12None rero n’umpe uriya musozi Uhoraho yavuze wa musi. Ico gihe wumvise kw ar’ah’ Abanaki, kandi ko bahafise ibisagara binini‐binini bizitijwe inzitiro z’amabuye; kumbure Uhoraho azoba kumwe nanje, ndabaneshe nk’uko yambariye.

13Maze Yosuwa ahezagira Kalebu mwene Yefune, amuha Heburoni kw ishamvu.

14Nuko Heburoni hacika ishamvu ya Kalebu mwene Yefune Umukenizi na bugingo n’ubu, kuko yakurikiye Uhoraho Imana y’Abisirayeli muri vyose.

15Kand’ i Heburoni kera hitwa Igisagara ca Araba: Araba uwo yasumba abandi Banaki bose. Nukw igihugu gihabga impore.

← Chapter 13 Jump to: Chapter 15 →