Joshua 23

Kirundi (Bibliya Yera 1951, 1967 (Burundi))

← Chapter 22 Jump to: Chapter 24 →

1Hashize igihe kirekire, Uhoraho ahaye Abisirayeli impore, abakijije abansi babo bose bari babakikije; kandi Yosuwa yar’ ashaje, ageze mu zabukuru;

2Yosuwa ahamagaza Abisirayeli bose, abashingantahe babo n’abakuru, n’abacamanza babo n’abagabisha b’ingabo, arababarira, ati Rāba ndashaje, ngeze mu zabukuru.

3Kandi mwabonye ivyo Uhoraho yagiriye ayo mahanga yose kubganyu; kuk’ Uhoraho Imana yanyu ari we yagenda abarwanira.

4None rāba amahanga agisigaye, hamwe n’amahanga yose naranduye, nabahesheje ubupfindo ibihugu vyabo ngo bibe amashamvu y’imiryango yanyu, uhereye kuri Yorodani ugashitsa ku kiyaga kinini gihera i burengerazuba.

5Kand’ Uhoraho Imana yanyu azobakinagiza imbere yanyu, abirukane babave imbere, muheze mubone kwegukira igihugu cabo, nk’uk’ Uhoraho Imana yanyu yababgiye.

6Nuko rero ni mugumye imitima, mushikame, mubone kwitondera no gushitsa ivyanditswe vyose mu gitabo c’ivyagezwe vya Mose, kugira ngo ntimukikamire i buryo cank’ i bumoso, ngo mubiveko,

7mukifatanya n’ayo mahanga agisigaye muri mwebge, canke ngo mushire mu kanwa amazina y’imana zabo, canke ngo muzirahire, canke ngo muzisabe, canke ngo muzunamire;

8ariko muze mwifatanye akaramata n’Uhoraho Imana yanyu, nk’uko mwakoze kugeza ubu.

9Kuk’ Uhoraho yirukanye imbere yanyu amahanga ahambaye afise amagara; ariko mwebge nta muntu n’umwe yigeze kubahagarara imbere gushitsa ubu;

10arik’ umwe muri mwebge akinagiza abantu igihumbi, kuk’ Uhoraho Imana yanyu ari we abarwanira, nk’uko yababgiye.

11Mugire umwete cane wo kubera maso ubugingo bganyu, kugira ngo mukunde Uhoraho Imana yanyu.

12Ariko ni mwahīrahīra mukarāba irya, mukīfatanya n’aya mahanga asigaye muri mwebge, mugashingirana na bo, mukābīra abageni babo, na bo bakābīra abanyu,

13mumenye rwose yuk’ Uhoraho Imana yanyu atazosubira kwirukana ayo mahanga ngw ayabakūre imbere, ariko bazobabera ururiba n’umutego, bababere nk’ikimōko kibakubita mu mbavu, nk’amahwa abahanda mu maso, kugeza aho muzorandukira, mugashira mur’ iki gihugu ciza Uhoraho Imana yanyu yabahaye.

14Rāba ubu ngiye kugenda nk’ ukw abandi bose bagenda; namwe mu mitima yanyu no mu vyiyumviro vyanyu murazi neza mwese yukw ata kintu na kimwe mu vyiza vyose Uhoraho Imana yanyu yabasezeraniye kitāshitse; vyose vyarasohoye, nta kintu na kimwe muri vyo kitāshitse.

15Nk’ ukw ivyiza vyose Uhoraho Imana yanyu yabasezeraniye vyāshitse, uko ni k’Uhoraho azobashitsakw ivyago vyose yababūriye, kugeza ah’ azobaherengetereza, mugashira mur’ iki gihugu ciza mwahawe n’ Uhoraho Imana yanyu,

16ni mwaca mw isezerano ryiwe yabasezeraniye, mukaja gusaba izindi mana, mukazūnamira. Uburake bg’Uhoraho buzoca bubaziriringira, muranduke bidatevye, mushire mu gihugu ciza yabahaye.

← Chapter 22 Jump to: Chapter 24 →