Joshua 3

Kirundi (Bibliya Yera 1951, 1967 (Burundi))

← Chapter 2 Jump to: Chapter 4 →

1Bukeye Yosuwa arazinduka, avana i Shitimu n’Abisirayeli bose, bashika kuri Yorodani, barāra batajabutse.

2Hashize imisi itatu, abagaba abantu banyuranganya aho bashagaje,

3babarira abantu, bati Ni mwabona isandugu y’isezerano ry’Uhoraho Imana yanyu ireruwe n’abaherezi ari bo Balewi, muze muce muhaguruka muve aho muri, muyikurikire,

4kugira ngo mumenye inzira mukwiye kujana, kuko mutigeze guca mur’ iyi nzira. Mugabo, hagati yanyu na yo haze hasigare ikirere c’intambuko igihumbi; ntimuze muyēgēre.

5Maze Yosuwa abarira abantu, ati Ni mwiyeze, kukw ejo Uhoraho azokora ibitangaza muri mwebge.

6Yosuwa araheza abarira abaherezi, ati Ni murerure isandugu y’ isezerano, mwītangire imbere y’ abantu mu kujabuka. Nuko barerura iyo sandugu, bītangira imbere y’abantu.

7Maz’ Uhoraho abarira Yosuwa, at’ Uyu musi ngira ntangure kugukuza imbere y’Abisirayeli bose, kugira ngo bamenye yuko ndi kumwe nawe nk’uko nāmana na Mose.

8Kand’ ubarire abaherezi bareruye isandugu y’isezerano, uti Ni mwashika ah’ amazi ya Yorodani agarukira, muyashōreremw’ ibirenge, muhagararemwo.

9Yosuwa abarira Abisirayeli, ati Ni mwigire hano, mwumve amajambo y’Uhoraho Imana yanyu.

10Araheza aravuga, at’ Iki ni co kigira kibamenyeshe yukw Imana nzima iri muri mwebge, kandi yukw itazobura kwirukana Abanyakanani imbere yanyu, bo n’ Abaheti n’Abahiwi n’Abaferizi n’Abagirugashi n’Abamori n’Abayebusi.

11Ehe rāba, isandugu y’isezerano ry’Uhoraho Nyen’ isi yose igira ibītangire imbere mu kuja muri Yorodani.

12Nuko ni murobanure abantu cumi na babiri mu miryango y’Abisirayeli, mu muryango wose havemw’ umuntu umwe‐umwe.

13Maz’ abaherezi barerura isandugu y’ Uhoraho Nyen’ isi yose ni bashinga ibirenge mu mazi ya Yorodani, amazi yarwo ava ruguru aca yīmīrwa, yirundanye.

14Nukw abantu bashīngūra amahema yabo, kugira ngo bajabuke Yorodani, kand’ abaherezi bareruye isandugu y’isezerano babītangira imbere.

15Nukw abo baherezi bareruye iyo sandugu bashika kuri Yorodani, maze bagishōrera ibirenge vyabo ah’amazi agarukira (kuko mu gihe c’iyimbura, Yorodani rwama rurenga inkombe zarwo),

16amazi ava ruguru aca arīmīrwa, yirundaniriza aharinganiye n’igisagara citwa Adamu kibangikanye n’i Saretani, kure y’aho bagomba kujabukira, kand’ ayo hepfo atembera mu kiyaga co mu kiyaya citwa Araba, ari co Kiyaga c’Umunyu, arakamuka. Nukw abantu barajabuka batumbereye i Yeriko.

17Abaherezi bareruye isandugu y’isezerano ry’Uhoraho bahagarara muri Yorodani hūmūtse, maz’ Abisirayeli bose bajabukira ahūmūtse, kugeza ah’ abantu bose barangirije kujabuka Yorodani.

← Chapter 2 Jump to: Chapter 4 →