1 Chronicles 11 — Shan

1မိူဝ်ႈၼၼ်ႉမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ၸူႉတုမ်တီႈ တႃႇဝိတ်ႈ ၵႃႈတီႈဝဵင်း ႁေႇပြုၼ်ႇ ၼၼ်ႉသေလႄႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈၸိူဝ်းၼႆႉပဵၼ်လုပ်ႇၸဝ်ႈႁဝ်းၼိူဝ်ႉၸဝ်ႈႁဝ်းတီႈၶႃႈဢေႃႈ။-

2မိူဝ်ႈဢွၼ်ၼႆႉ မိူဝ်ႈဢၼ် သေႃးလူႉ ပဵၼ်ၶုၼ်ႁေႃၶမ်းၶႃႈၸဝ်ႈႁဝ်းၶဝ်ယူႇၼၼ်ႉ၊ ၸဝ်ႈႁဝ်းၼႆႉဢွၼ်ဢဝ်မဵဝ်း ဢီႉသရေႇလႃႉ ၵႂႃႇယူႇ၊ ဢွၼ်ဢဝ်ၶိုၼ်းသႂၢင်းၶဝ်ႈယူႇသေလႄႈ ယူႇမႃးယဝ်ႉတီႈၶႃႈယဝ်ႉ။ ထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းၵေႃႈမီးဢမိင်ႉတီႈၸဝ်ႈႁဝ်းလႄႈဝႃႈ၊ မႂ်းတၵ်းလႆႈ ႁဵတ်းလဵင်ႉႁဵတ်းလူၵူၼ်းၵဝ်မဵဝ်း ဢီႉသရေႇလႃႉ လႄႈ ပဵၼ်ငဝ်ႈပဵၼ်ႁူဝ် ၵူၼ်းၵဝ်မဵဝ်း ဢီႉသရေႇလႃႉ ဢေႃႈ၊ ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

3ၼင်ႇၼၼ်လႄႈ ၵူၼ်းဢၼ်ပဵၼ်ၵႄႇပဵၼ်ႁူဝ် မဵဝ်း ဢီႉသရေႇလႃႉ တင်းလၢႆၼၼ်ႉ ဢွၼ်ၵၼ်မႃးၸူးတီႈၶုၼ်ႁေႃၶမ်းၵႃႈတီႈဝဵင်း ႁေႇပြုၼ်ႇ ၼၼ်ႉသေယဝ်ႉ၊ တႃႇဝိတ်ႈ ႁဵတ်းမိၵ်ႉသႃႇႁႃယႃႉ လူၺ်ႈၵၼ်တင်းၶဝ်ၵႃႈတီႈၽၢႆႇၼႃႈထႃႇဝရႃႉၽြႃး ၵႃႈၼႂ်းဝဵင်း ႁေႇပြုၼ်ႇ လႄႈ၊ ၶဝ်ၼၼ်ႉဢွၼ်ၵၼ်ပၼ်ၽိၵ်ႈသိၵ်ႈတီႈ တႃႇဝိတ်ႈ ႁႂ်ႈမၼ်းပဵၼ်ၶုၼ်ႁေႃၶမ်း ဢီႉသရေႇလႃႉ မႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃး ဢဝ် သမူၺ်ႇလႃႉ ဝႆႉပျႃႇတိၵ်ႈၼၼ်ႉဢေႃႈ။

4လႆႈသမ်ႉ တႃႇဝိတ်ႈ ဢိၵ်ႇတင်းၵူၼ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ ၵႂႃႇၸူးၵႃႈတီႈဝဵင်း ယေႇရူႉသလႅမ်ႇ ဢၼ်ဝႃႈ ဝဵင်း ယေႇပုတ်ႉ တီႈယူႇၵူၼ်း ယေႇပူႉသီႉ ဢၼ်ပဵၼ်ၵူၼ်းဝၢၼ်ႈၵူၼ်းမိူင်းၵဝ်ႇၵဝ်ႇၼၼ်ႉလႄႈ၊-

5ၵူၼ်းဝဵင်း ယေႇပုတ်ႉ ၸိူဝ်းၼၼ်ႉ ဢွၼ်ၵၼ်လၢတ်ႈတီႈ တႃႇဝိတ်ႈ လႄႈဝႃႈ၊ မႂ်းဢမ်ႇလႆႈၶဝ်ႈၵႃႈၼႂ်းၼႆႉ၊ ဝႃႈၼင်ႇၼႆသေၵေႃႈ၊ တႃႇဝိတ်ႈ တိုၵ်းဢဝ်တိူၵ်ႈတီႈတိုၵ်းသိုၵ်း ၸီႉဢုၼ်ႇ ဢၼ်ဝႃႈဝဵင်း တႃႇဝိတ်ႈ ၼၼ်ႉဢေႃႈ။-

6တႃႇဝိတ်ႈ ၊ ၵေႃႈမီးဢမိင်ႉလႄႈဝႃႈ၊ ႁႂ်ႈၵေႃႉဢၼ်တိုၵ်းတေႃးယႃႉပႅတ်ႈၵူၼ်း ယေႇပူႉသီႉ ၸိူဝ်းၼၼ်ႉ ဢွၼ်တၢင်းပိူၼ်ႈၼၼ်ႉပဵၼ်တူၼ်ႈပဵၼ်ငဝ်ႈ ဢၼ်ဝႃႈပူဝ်ႇၶျုၵ်ႈသေ၊ ဝႃႈၼင်ႇၼႆလႄႈ၊ ယႂႃႇၽႃႉ လုၵ်ႈၸၢႆး ၸေႇရူႉယႃႇ ၼၼ်ႉ ၶိုၼ်ႈဢွၼ်တၢင်းပိူၼ်ႈလႄႈလႆႈၶၢမ်ႇဢရႃႇ ၵေႃႉဢၼ်ပဵၼ်တူၼ်ႈပဵၼ်ငဝ်ႈဢေႃႈ။-

7လိုၼ်းၼၼ်ႉ ၵွပ်ႈပိူဝ်ႈဢၼ် တႃႇဝိတ်ႈ ယူႇၵႃႈၼႂ်းတိူၵ်ႈတီႈတိုၵ်းသိုၵ်းၼၼ်ႉလႄႈ ၶဝ်ဢွၼ်ၵၼ်ႁွင်ႉႁဵၵ်ႈၸိုဝ်ႈဝဵင်းၼၼ်ႉ ဝဵင်း တႃႇဝိတ်ႈ ဢေႃႈ။-

8မၼ်းၼၼ်ႉ တႄႇႁဵတ်းၵႃႈတီႈႁိမ်းႁွမ်းလဵပ်ႈႁွပ်ႈဝဵင်း ၸႃႉၸဵမ်ၵႃႈတီႈ မီႉလေႃႇ လႄႈ ၵႃႈတီႈလဵပ်ႈႁွပ်ႈဝဵင်းသေယဝ်ႉ၊ ယႂႃႇၽႃႉ မႄးၵုမ်းမႄးႁဵတ်းတီႈဢၼ်ၵိုတ်းဢၼ်ၵျၢၼ်ႇဝဵင်းၼၼ်ႉဢေႃႈ။-

9တႃႇဝိတ်ႈ ၼၼ်ႉ ယႂ်ႇၽႄႈတူဝ်းတွၼ်းမႃးယူႇသေလႄႈ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးယူႇလူၺ်ႈၵၼ်တင်းမၼ်းဢေႃႈ။

10ၸရၢင်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ် ၼႂ်းပူဝ်ႇႁူဝ်ႁၢၼ်ၵူၼ်းသိုၵ်းလူင်တင်းလၢႆ ဢၼ်ၵိုတ်ႉႁၢပ်ႇဢမူႉ တႃႇဝိတ်ႈ လႄႈ ၽွမ်ႉၵၼ်တင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်သေလႄႈ ၵျူဝ်းၸႃးဢဝ်ႁႅင်းဢွၵ်ႇယူႇၽၢႆႇမၼ်း ႁႂ်ႈလႆႈယုၵ်ႉယွင်ႈမၼ်းဝႆႉၵႃႈၼႂ်းဢရႃႇၶုၼ်ႁေႃၶမ်း ၸွမ်းၵႃႈၼင်ႇဢၼ်ဢမိင်ႉထႃႇဝရႃႉၽြႃးမီးဝႆႉ လူၺ်ႈလွင်ႈမဵဝ်း ဢီႉသရေႇလႃႉ ၼၼ်ႉၸမ်ႉ၊-

11ၸရၢင်းပူဝ်ႇႁူဝ်ႁၢၼ်ၵူၼ်းသိုၵ်းလူင် ဢၼ်ၵိုတ်ႉႁၢပ်ႇဢမူႉ တႃႇဝိတ်ႈ ၼၼ်ႉ ၸိူဝ်းၼၼ်ႉၸိုင်၊ ယႃသေႃႉၽမ်ႇ မဵဝ်း ႁၵ်ႉမေႃးၼီႉ ၼၼ်ႉ ပဵၼ်ပူဝ်ႇၶျုၵ်ႈၵႃႈၼိူဝ်ပူဝ်ႇသၢမ်သိပ်းၵေႃႉဢေႃႈ။ မၼ်းၼၼ်ႉယိပ်းၵမ်ဢဝ်ႁွၵ်ႇသေလႄႈ တိုၵ်းတေႃးယႃႉပႅတ်ႈၵူၼ်းသၢမ်ပၢၵ်ႇၵမ်းလဵဝ်ၵူၺ်းဢေႃႈ။-

12လိုၼ်းမၼ်းၼၼ်ႉ ဢေးလႃႇၸႃႇ လုၵ်ႈၸၢႆး တေႃးတေႃး မဵဝ်း ဢႁေႃႇႁီႉ ၼၼ်ႉ ၶဝ်ႈပႃးၼႂ်းပူဝ်ႇႁူဝ်ႁၢၼ်ၵူၼ်းသိုၵ်းလူင်သၢမ်ၵေႃႉဢေႃႈ။-

13မၼ်းလႆႈၸွမ်းလူၺ်ႈၵၼ်တင်း တႃႇဝိတ်ႈ ၵႂႃႇၵႃႈတီႈဝဵင်း ပႃႇသႃႉတမ်ႇမိမ်း လႄႈ၊ ၵူၼ်း ၽီႉလိတ်ႉတီႉ တင်းလၢႆ ၸူႉၵၼ်တုမ်ၵၼ်ႁႂ်ႈလႆႈတိုၵ်းသိုၵ်း ၵႃႈတီႈတူင်ႈၼႃး ဢၼ်ၽုၵ်ႇသွမ်ႈၶဝ်ႈမူႉယေႃးၼၼ်ႉလႄႈ ၵူၼ်း ဢီႉသရေႇလႃႉ တင်းလၢႆ ဢွၼ်ၵၼ်ဢွၵ်ႇပၢႆႈၵႃႈတီႈၽၢႆႇၼႃႈၵူၼ်း ၽီႉလိတ်ႉတီႉ ၸိူဝ်းၼၼ်ႉသေယဝ်ႉ၊-

14ၶဝ်ၼၼ်ႉ ၸုၵ်းၵႃႈၼႂ်းတူင်ႈၼႃးလႄႈ ပႂ်ႉလူပႂ်ႉတူၺ်းႁႄႉၶႅၼ်ယူႇသေလႄႈ တိုၵ်းတေႃးယႃႉပႅတ်ႈၵူၼ်း ၽီႉလိတ်ႉတီႉ ၸိူဝ်းၼၼ်ႉလႄႈ ထႃႇဝရႃႉၽြႃး ႁဵတ်းတၢင်းဢၼ်ပႄႉၼႅင်ႇဢၼ်ယႂ်ႇၼႃႇၵႄႇသႄႇၶျွတ်ႈဢဝ်ၶဝ်ဢေႃႈ။-

15ၵူၼ်းသၢမ်ၵေႃႉဢၼ်ၶဝ်ႈပႃးၼႂ်းပူဝ်ႇလူင်သၢမ်သိပ်းၼၼ်ႉ ဢွၼ်ၵၼ်လူင်းၸူးၵႃႈတီႈ မၢၵ်ႇႁိၼ်မၢၵ်ႇၽႃ တႃႇဝိတ်ႈ ၵႃႈတီႈႁူးထမ်ႈ ဢတူႉလမ်ႇ ၼၼ်ႉလႄႈ မုၵ်ႉၸိူဝ်းၵူၼ်း ၽီႉလိတ်ႉတီႉ ၸိူဝ်းၼၼ်ႉ ၶျႃးတပ်ႉၶဝ်မီးယူႇၵႃႈတီႈ ပၢင်ႇႁူၺ်ႈ ရေႇၽဵမ်ႇ ဢေႃႈ။-

16မိူဝ်ႈၼၼ်ႉ တႃႇဝိတ်ႈ ယူႇၵႃႈၼႂ်းတိူၵ်ႈတီႈတိုၵ်းသိုၵ်းလႄႈ တပ်ႉၵူၼ်း ၽီႉလိတ်ႉတီႉ ၸိူဝ်းၼၼ်ႉ မီးယူႇၵႃႈတီႈဝဵင်း ပႅတ်ႉလႁႅမ်ႇ ဢေႃႈ။-

17တႃႇဝိတ်ႈ ၵေႃႈ မီးတၢင်းၸႂ်ဢၼ်တူၵ်းဢၢင်ႈသေလႄႈဝႃႈ၊ ႁႂ်ႈသေၵေႃႉသေၵူၼ်းတဵၵ်းဢဝ်ၼမ်ႉၵႃႈၼႂ်းၼမ်ႉမေႃႇ ဢၼ်မီးၵႃႈတီႈႁိမ်းၽၵ်းတူဝဵင်း ပႅတ်ႉလႁႅမ်ႇ ၼၼ်ႉ ပၼ်ၵဝ်ၵိၼ်သေၵမ်းလူၺ်ႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

18ၶဝ်သၢမ်ၵေႃႉၼၼ်ႉ လေႃႇၽၢင်ႈလေႃႇၽႃႇတပ်ႉ ၵူၼ်း ၽီႉလိတ်ႉတီႉ ၵႂႃႇသေလႄႈ တဵၵ်းဢဝ်ၼမ်ႉၵႃႈၼႂ်းၼမ်ႉမေႃႇ ဢၼ်မီးၵႃႈတီႈႁိမ်းၽၵ်းတူဝဵင်း ပႅတ်ႉလႁႅမ်ႇ ၼၼ်ႉသေယဝ်ႉ၊ ဢဝ်မႃးၸူးၵႃႈတီႈ တႃႇဝိတ်ႈ ဢေႃႈ။ ၵူၺ်းၵႃႈ တႃႇဝိတ်ႈ ယင်းဢမ်ႇၶႂ်ႈၵိၼ်လႄႈ ဢဝ်ထွၵ်ႇႁိုဝ်ႈၵႃႈတီႈၽၢႆႇၼႃႈထႃႇဝရႃႉၽြႃးယူႇသေလႄႈ လဝ်ႊလၢတ်ႈလႄႈဝႃႈ၊-

19ၽြႃးပဵၼ်ၸဝ်ႈတီႈၶႃႈ၊ ႁႂ်ႈဢမူႉဢၼ်ၶႃႈၸဝ်ႈၵိၼ်ၼမ်ႉၼႆႉ ၵႆၵၼ်တင်းၶႃႈၸဝ်ႈသေၵမ်းလူၺ်ႈ။ ၶႃႈၸဝ်ႈတၵ်းလႆႈၵိၼ်လိူတ်ႈၶဝ်ၸိူဝ်းဢၼ် ယင်းဢမ်ႇသေလၢႆဢသၢၵ်ႈတူဝ်ၸဝ်ႈၵဝ်ႇလႄႈ ၵႂႃႇၸိူဝ်းၼၼ်ႉတီႈၶႃႈႁိုဝ်။ ၶဝ်ၼႆႉၸုၼ်ႉဢသၢၵ်ႈတူဝ်ၸဝ်ႈၵဝ်ႇသေလႄႈ ဢဝ်ၼမ်ႉၼႆႉမႃးတီႈၶႃႈယဝ်ႉ၊ ဝႃႈၼင်ႇၼႆသေလႄႈ ယင်းဢမ်ႇၵိၼ်လႄႈယူႇဢေႃႈ။ ပူဝ်ႇႁူဝ်ႁၢၼ်ၵူၼ်းသိုၵ်းသၢမ်ၵေႃႉၼၼ်ႉ ႁဵတ်းလွင်ႈတၢင်းၸိူဝ်ႉၼင်ႇၼၼ်ၼၼ်ႉဢေႃႈ။

20ဢၽီႉသေး ၼွင်ႉၸၢႆး ယႂႃႇၽႃႉ ၼၼ်ႉၵေႃႈ ပဵၼ်ၵႄႇပဵၼ်ႁူဝ်ၼႂ်းပူဝ်ႇႁူဝ်ႁၢၼ်ၵူၼ်းသိုၵ်းသၢမ်ၵေႃႉဢေႃႈ၊ မၼ်းၼၼ်ႉယိပ်းၵမ်ဢဝ်ႁွၵ်ႇသေလႄႈ တိုၵ်းယႃႉပႅတ်ႈၵူၼ်းသၢမ်ပၢၵ်ႇလႄႈ လႆႈၸိုဝ်ႈလႆႈသဵင်ၵႃႈၼႂ်းသၢမ်ၵေႃႉၼၼ်ႉဢေႃႈ။-

21ၼႂ်းသၢမ်ၵေႃႉၼၼ်ႉ မၼ်းပဵၼ်ၵေႃႉဢၼ်မီးမုၼ်သရေႇၼႃႇသေသွင်ၵေႃႉၼၼ်ႉလႄႈ လႆႈဢရႃႇပူဝ်ႇၶျုၵ်ႈၶဝ်ဢေႃႈ။ ၵူၺ်းၵႃႈမၼ်းဢမ်ႇၶိုတ်းဢမ်ႇပဵင်း ပူဝ်ႇႁူဝ်ႁၢၼ်ပထမႃႉသၢမ်ၵေႃႉၼၼ်ႉ။-

22ပေႇၼႃႇယႃႉ လုၵ်ႈၸၢႆးပူဝ်ႇႁူဝ်ႁၢၼ်ၵူၼ်းသိုၵ်း ယေႃးယတႃႉ ၵူၼ်းဝဵင်း ၵပ်ႉၸေးလႃႉ ဢၼ်ယၢမ်ႈႁဵတ်းလွင်ႈတၢင်းဢၼ်ယႂ်ႇၼႃႇ လူင်လၢင်ၸိူဝ်းၼၼ်ႉၼၼ်ႉၵေႃႈ၊ ဢဝ်လုၵ်ႈၸၢႆး ဢႃႇရေႇလႃႉ ၵူၼ်း မေႃႇၽႃႉ သွင်ၵေႃႉတၢႆဢေႃႈ၊ လိူဝ်သေၼၼ်ႉ ၼႂ်းၶိင်ႇမိူဝ်ႈဢၼ် မီးမူၺ်ႁႃႇၼၼ်ႉၵေႃႈ၊ မၼ်းၼၼ်ႉလူင်းၵႂႃႇလႄႈ ဢဝ်သၢင်ႇသီႈၵႃႈၼႂ်းႁူးလိၼ်ၶုမ်လိၼ်တၢႆဢေႃႈ။-

23ၵူၼ်း ဢေႇၵိပ်ႉတူႉ ဢၼ်ယႂ်ႇၶိုၵ်ႉၼႃႇလႄႈ တၢင်းသုင်မၼ်းမီးႁႃႈသွၵ်ႇၼၼ်ႉၵေႃႈ မၼ်းဢဝ်တၢႆဢေႃႈ၊ ပိၵ်ႉသမ်ႉၵူၼ်း ဢေႇၵိပ်ႉတူႉ ၼၼ်ႉ ယိပ်းၵမ်ႁွၵ်ႇဢၼ်ယႂ်ႇပဵင်းတၢၼ်ႇမႆႉသီႈပၼ်ႉႁမ်းႁုၵ်ႇၼၼ်ႉသေၵေႃႈ၊ မၼ်းယိပ်းၵမ်ၶွၼ်ႉတဝ်ႉသေလႄႈ လူင်းၵႂႃႇႁိမ်ဢဝ်ႁွၵ်ႇၼၼ်ႉ ၵႃႈတီႈမိုဝ်းၵူၼ်း ဢေႇၵိပ်ႉတူႉ ၼၼ်ႉသေယဝ်ႉ၊ ဢဝ်ႁွၵ်ႇမၼ်းၼၼ်ႉ ဢဝ်မၼ်းတၢႆဢေႃႈ။-

24ပေႇၼႃႇယႃႉ လုၵ်ႈၸၢႆး ယေႃးယတႃႉ ၼၼ်ႉ ႁဵတ်းလွင်ႈတၢင်းၸိူဝ်းၼၼ်ႉလႄႈ လႆႈၸိုဝ်ႈလႆႈသဵင် ၵႃႈၼႂ်းပူဝ်ႇႁူဝ်ႁၢၼ်သၢမ်ၵေႃႉဢေႃႈ။-

25ပိၵ်ႉသမ်ႉမၼ်းယဵင်ႈၶႅၼ်းမီးမုၼ်သရေႇၼႃႇသေ ပူဝ်ႇသၢမ်သိပ်းၼၼ်ႉသေၵေႃႈ၊ မၼ်းဢမ်ႇၶိုတ်းဢမ်ႇပဵင်းပူဝ်ႇႁူဝ်ႁၢၼ်ပထမႃႉသၢမ်ၵေႃႉၼၼ်ႉ။ ဢၼ်ဢုပ်ႉၶျုၵ်ႈဢတႂၢင်းဝုၼ်ႇတင်းလၢႆၵေႃႈ တႃႇဝိတ်ႈ ပၼ်တီႈမၼ်းဢေႃႈ။

26ၵူၼ်းဢၼ်ႁႅင်းယႂ်ႇလႄႈၶဝ်ႈပႃး ၼႂ်းမုၵ်ႉၼႂ်းၸိူဝ်းပူဝ်ႇတင်းလၢႆၸမ်ႉ၊ ပဵၼ် ဢသႃႇႁေးလႃႉ ၼွင်ႉၸၢႆး ယႂႃႇၽႃႉ၊ ဢေးလႁႃႇၼၼ်ႇ လုၵ်ႈၸၢႆး တေႃးတေႃး ဢၼ်ယူႇၵႃႈတီႈဝဵင်း ပႅတ်ႉလႁႅမ်ႇ ၊-

27သမ်ႇမႃႉ မဵဝ်း ႁေႇရေႃးရီႉ၊ ႁေးလိတ်ႉ မဵဝ်း ပေးလေႃးၼီႉ ၊-

28ဢီႇရႃႉ လုၵ်ႈၸၢႆး ဢီႉၵေးသႃႉ မဵဝ်း တေႇၵေႃႇ၊ ဢပျေႇၸႃႇ မဵဝ်း ဢၼေႇသေႃးသီႉ ၊-

29သီႉပေႇၵေး မဵဝ်း ႁူႉသသီႉ၊ ဢီႉလေး မဵဝ်း ဢႁေႃႇႁီႉ ၊-

30မႁႃႇရေး မဵဝ်း ၼေႇတေႃႇၽႃႇသီႉ၊ ႁေးလိတ်ႉ လုၵ်ႈၸၢႆး ပႃႇၼႃႇ မဵဝ်း ၼေႇတေႃႇၽႃႇသီႉ ၊-

31ဢိတ်ႉတေႇ လုၵ်ႈၸၢႆး ရီႉၽေး ဢၼ်ယူႇဝဵင်း ၵီႉပႃႉ မဵဝ်း ပိၼ်ႇယႃႇမိၼ်ႇ၊ ပေႇၼႃႇယႃႉ မဵဝ်း ပီႉရႃႉသေႃႇၼီႉ ၊-

32ႁူႉရေး ၵူၼ်းၵႃႈတီႈၼမ်ႉႁူၺ်ႈၼမ်ႉႁွင်ႈ ၵႃႇဢတ်ႉ၊ ဢပျေႇလႃႉ မဵဝ်း ဢႃႇပႃႇသီႉ ၊-

33ဢႃႇၸမႃႇဝိတ်ႉ မဵဝ်း ပႃႇႁူႉမီႉ၊ ဢေးလျႃႇၽႃႉ မဵဝ်း သႃႇလႃႇပေႃးၼီႉ ၊-

34ယေႃးၼသၼ်ႇ လုၵ်ႈၸၢႆး ၵေႇသႃႉ မဵဝ်း ႁႃႇရရီႉ ဢၼ်ၶဝ်ႈပႃးၵႃႈၼႂ်းလုၵ်ႈၸၢႆး ယႃႇသိမ်း မဵဝ်း ၵီႉသေႃးၼီႉ ၊-

35ဢႃႇႁီႉဢမ်ႇ လုၵ်ႈၸၢႆး သႃႇၵရႃႉ မဵဝ်း ႁႃႇရရီႉ၊ ဢေးလီႉၽလႃႉ လုၵ်ႈၸၢႆး ဢူႉရႃႉ ၊-

36ႁေႇၽႃႇ မဵဝ်း မေႇၶေးရႃႉသီႉ၊ ဢႁီႉယႃႉ မဵဝ်း ပေးလေႃးၼီႉ ၊-

37ႁေႇၸရေႃႇ မဵဝ်း ၵရမေႇလႃႉ၊ ၼႃႇရေး လုၵ်ႈၸၢႆး ဢေးၸပေး ၊-

38ယူဝ်းဢေးလႃႉ ၼွင်ႉၸၢႆး ၼႃႇသၼ်ႇ၊ မီႉပႁႃႇ လုၵ်ႈၸၢႆး ႁၵ်ႉၵေးရီႉ ၊-

39ၸေးလႅၵ်ႉ မဵဝ်း ဢမ်ႇမုၼ်ႇ၊ ၼႁႃႇရေး မဵဝ်း ပေႇရေႃႇသီႉ ဢၼ်ပဵၼ်ၵူၼ်းဢွၼ်ႇ ဢၼ်ပႃးလၢၵ်ႈၼၢၵ်ႈ ယႂႃႇၽႃႉ လုၵ်ႈၸၢႆး ၸေႇရူႉယႃႇ ၼၼ်ႉ၊-

40ဢီႇရႃႉ မဵဝ်း ဢီႉသႃႇရီႉ၊ ၵေႇရိပ်ႉ မဵဝ်း ဢီႉသရီႉ ၊-

41ဢူႉရီႉယႃႉ မဵဝ်း ႁိတ်ႉတီႉ၊ ၸႃႇပတ်ႉ လုၵ်ႈၸၢႆး ဢႃႇလေႇ ၊-

42ဢတီႉၼႃႉ လုၵ်ႈၸၢႆး သီႉၸႃႉ ၵူၼ်းမဵဝ်း ရူႉပိၼ်ႇ ဢၼ်ပဵၼ်ပူဝ်ႇဢၼ်ဢုပ်ႉၵႃႈၼိူဝ်ၵူၼ်းမဵဝ်း ရူႉပိၼ်ႇ သၢမ်သိပ်းၵေႃႉၼၼ်ႉ၊-

43ႁႃႇၼၼ်ႇ လုၵ်ႈၸၢႆး မႃႇၶႃႇ၊ ယူဝ်းသၽတ်ႉ မဵဝ်း မီႉသၼီႉ ၊-

44ဢေႃႇၸီႉ မဵဝ်း ဢႃႇသတရေႃႇသီႉ၊ သႃႇမႃႇ တင်း ယေႇယေႇလႃႉ လုၵ်ႈၸၢႆး ႁေႃးသမ်ႇ မဵဝ်း ဢႃႇရေႃႇ ၊-

45ယေႇတေႇလႃႉ ဢိၵ်ႇတင်းၼွင်ႉၸၢႆးမၼ်း ယေႃးႁႃႉ လုၵ်ႈၸၢႆး သီႉမရီႉ မဵဝ်း တီႉၸီႉ ၊-

46ဢေးလေႇလႃႉ မဵဝ်း မႁႃႇဝီႉ၊ ယေႇရပေး ဢိၵ်ႇတင်း ယေႃးသဝီႉ လုၵ်ႈၸၢႆး ဢေးလၼၼ်ႇ၊ ဢီႉသမႃႇ မဵဝ်း မေႃႇၽႃႉ ၊-

47ဢေးလေႇလႃႉ၊ ဢူဝ်းပိတ်ႉ တင်း ယႃႇသေးလႃႉ မဵဝ်း မေႇၸေႃးပဵတ်ႉ ဢေႃႈ။