1 Chronicles 17

Shan

← Chapter 16 Jump to: Chapter 18 →

1မိူဝ်ႈဢၼ် တႃႇဝိတ်ႈ လႆႈယူႇၼိမ်ၼိမ်လီလီၵႃႈတီႈႁေႃၸဝ်ႈၼၼ်ႉၸိုင်၊ တႃႇဝိတ်ႈ လၢတ်ႈတီႈပရေႃးၽႅတ်ႈ ၼႃႇသၼ်ႇ လႄႈဝႃႈ၊ တူၺ်းလူး၊ ၵဝ်ၸိုင်လႆႈယူႇၵႃႈၼႂ်းႁေႃမႆႉ ဢႃႇရိတ်ႉ ဢေႃႈ။ တိူၵ်ႈတႃႇပတီႉၺိၺ်ႇထႃႇဝရႃႉၽြႃးၸမ်ႉ၊ လႆႈမီးတၢင်းဢၼ်ဢဝ်ၽႃႈၵင်ႈမုင်းႁူမ်ႇဝႆႉၵူၺ်းဢေႃႈ၊ ဝႃႈၼင်ႇၼႆသေယဝ်ႉ၊-

2ၼႃႇသၼ်ႇ ၶိုၼ်းလၢတ်ႈတီႈ တႃႇဝိတ်ႈ လႄႈဝႃႈ၊ ႁဵတ်းၸွမ်းၵႃႈၼင်ႇဢၼ်မီးၼႂ်းႁူဝ်ၸႂ်ၸဝ်ႈႁဝ်းၼၼ်ႉသေၵမ်းတီႈၶႃႈ။ ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။

3ၼႂ်းၶိုၼ်းၼၼ်ႉ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ ၼႃႇသၼ်ႇ လႄႈဝႃႈ၊-

4ၵႂႃႇလႄႈမွၵ်ႇလၢတ်ႈတီႈၶႃႈၵဝ် တႃႇဝိတ်ႈ ၼၼ်ႉလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ မႂ်းဢမ်ႇလႆႈႁဵတ်းႁိူၼ်းပုၼ်ႈဢၼ်ၵဝ်တၵ်းယူႇ။-

5ၵဝ်ဢမ်ႇယူႇၵႃႈၼႂ်းႁိူၼ်းၸႃႉၸဵမ်မိုဝ်ႉဝၼ်းဢၼ်ၵဝ်ၼုၵ်ႈဢဝ်မဵဝ်း ဢီႉသရေႇလႃႉ ဢွၵ်ႇမႃးၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉလႄႈ လုၵ်ႉသေၵႃႈတီႈမူဝ်းၵႃႇလင်ၼိုင်ႈ ၶၢႆႉၸူးၵႃႈတီႈမူဝ်းၵႃႇလင်ၼိုင်ႈလႄႈ၊ လုၵ်ႉသေၵႃႈတီႈသုမ်ႉထဵင်လင်ၼိုင်ႈ ၶၢႆႉၸူးၵႃႈတီႈ သုမ်ႉထဵင်လင်ၼိုင်ႈ မႃးယဝ်ႉ။-

6ၵႃႈတီႈဢၼ်ၵဝ်လႄႇလဵပ်ႈလူၺ်ႈၵၼ်တင်း မဵဝ်း ဢီႉသရေႇလႃႉ တင်းသဵင်ႈတင်းမူတ်းၵူႈတီႈၵူႈလႅၼ်ၼၼ်ႉ ၵဝ်ယၢမ်ႈထၢမ်တီႈၵူၼ်းလူင်ဢၼ်ၸီႇယၢင်ႇတြႃးမဵဝ်း ဢီႉသရေႇလႃႉ ဢၼ်ၵဝ်ၸႂ်ႉသွႆႁႂ်ႈလႆႈလဵင်ႉလႆႈထိင်း မဵဝ်းၵူၼ်းၵဝ်ၸိူဝ်းၼၼ်ႉ သေၵေႃႉသေၵူၼ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းဢမ်ႇႁဵတ်းႁိူၼ်းမႆႉ ဢႃႇရိတ်ႉ ပုၼ်ႈၵဝ်ၼင်ႇႁိုဝ်၊ ဝႃႈၼင်ႇၼႆႁိုဝ်။-

7မိူဝ်ႈလဵဝ်ၼႆႉၸိုင်၊ မႂ်းလၢတ်ႈတီႈၶႃႈၵဝ် တႃႇဝိတ်ႈ ၼၼ်ႉလႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵဝ်ၼုၵ်ႈဢဝ်မႂ်းသေၵႃႈၼႂ်းၶွၵ်ႈသူဝ်းတီႈဢၼ်လဵင်ႉထိင်းသူဝ်းၼၼ်ႉမႃးလႄႈ ၶၢၼ်းမႂ်းဝႆႉၵႃႈၼႂ်းဢရႃႇၶုၼ်ဢၼ်ဢုပ်ႉပိူင်ႇၵူၼ်းၵဝ် ၵူၼ်းမဵဝ်း ဢီႉသရေႇလႃႉ တင်းလၢႆၼႆႉယဝ်ႉ။-

8ၵဝ်ၸွမ်းလူၺ်ႈၵၼ်တင်းမႂ်းၵႂႃႇၵႃႈတီႈၵႃႈဢၼ်မႂ်းၵႂႃႇၼၼ်ႉလႄႈ ပႄႇၽဵဝ်ႈရၢၼ်ႇသူႇမႂ်းၵႃႈမီးပႅတ်ႈသေၵႃႈတီႈၽၢႆႇၼႃႈမႂ်းသေယဝ်ႉ။ ပၼ်ၼႃႇမႃႉၸိုဝ်ႈသဵင်တီႈမႂ်း မိူၼ်ၸိူဝ်ႉၼင်ႇၼႃႇမႃႉၸိုဝ်ႈသဵင် ၵူၼ်းယႂ်ႇၵူၼ်းလူင်ၼႂ်းၵူၼ်းလိၼ်မိူင်းတင်းလၢႆယဝ်ႉ။-

9လိူဝ်သေၼၼ်ႉ၊ ၵဝ်တၵ်းၸီႇယၢင်ႇတီႈဢၼ်ၵူၼ်းၵဝ် မဵဝ်း ဢီႉသရေႇလႃႉ တၵ်းယူႇၼၼ်ႉလႄႈ ႁႂ်ႈၶဝ်မၼ်ႈၶိူင်ႇ၊ ႁႂ်ႈၶဝ်ဢမ်ႇလႆႈၶၢႆႉလႆႈပုတ်ႈၵမ်းလိုၼ်းလႄႈ ယူႇၵႃႈၼႂ်းတီႈယူႇၶဝ်ၼၼ်ႉဢေႃႈ။ ၵမ်းလိုၼ်းၶဝ်ၸိူဝ်းဢၼ်ဢမ်ႇတြႃးၼၼ်ႉ ဢမ်ႇလႆႈပႄႇၽဵဝ်ႈၶဝ်ပႅတ်ႈ မိူၼ်ၸိူဝ်ႉၼင်ႇဢၼ်မိူဝ်ႈဢွၼ်တၢင်းၼၼ်ႉ၊-

10ဢိၵ်ႇတင်းၶိင်ႇမိူဝ်ႈဢၼ် ၵဝ်ၶၢၼ်းၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉဝႆႉၵႃႈၼိူဝ်ၵူၼ်းၵဝ် မဵဝ်း ဢီႉသရေႇလႃႉ တင်းလၢႆၼၼ်ႉ။ ၵဝ်တၵ်းဢဝ်ရၢၼ်ႇသူႇမႂ်းတင်းလၢႆ ၶျႃးတူၵ်းတီႈတႅမ်ႇ၊ လိူဝ်သေၼၼ်ႉဢမ်ႇၵႃး ၵဝ်မီးဢမိင်ႉတီႈမႂ်းလႄႈဝႃႈ၊ ထႃႇဝရႃႉၽြႃးတၵ်းႁႂ်ႈမဵဝ်းၸိူဝ်ႉၶိူဝ်းမႂ်းတႄႇပဵၼ်ဢေႃႈ၊ ဝႃႈၼင်ႇၼႆယဝ်ႉ။-

11မိူဝ်ႈဢၼ်မိုဝ်ႉဝၼ်းဢသၢၵ်ႈမႂ်းတၵ်းတဵမ်လႄႈ၊ မႂ်းတၵ်းၵႂႃႇႁႂ်ႈလႆႈယူႇလူၺ်ႈၵၼ်တင်းပူႇမွၼ်ႇမႂ်းၼၼ်ႉၸိုင်၊ ၵဝ်တၵ်းယုၵ်ႉယွင်ႈၸိူဝ်ႉၶိူဝ်းမႂ်း ဢၼ်ပဵၼ်ၵႃႈၼႂ်းလုၵ်ႈၸၢႆးမႂ်းၸိူဝ်းၼၼ်ႉလိုၼ်းမႂ်းလႄႈ ႁႂ်ႈသိုင်ႇၸိုင်ႈဝၢၼ်ႈမိူင်းမၼ်းတႄႇယူႇဢေႃႈ။-

12မၼ်းၼၼ်ႉတၵ်းလႆႈႁဵတ်းႁိူၼ်းပုၼ်ႈၵဝ်လႄႈ၊ ၵဝ်တၵ်းႁႂ်ႈရႃႇၸႃႉပလၢင်ႇမၼ်းၼၼ်ႉတႄႇယူႇတႃႇသေႇဢေႃႈ။-

13ၵဝ်တၵ်းပဵၼ်ပေႃႈမၼ်းလႄႈ၊ မၼ်းၵေႃႈတၵ်းပဵၼ်လုၵ်ႈၸၢႆးၵဝ်ဢေႃႈ။ ၵဝ်တၵ်းဢမ်ႇၼုၵ်ႈဢမ်ႇထွတ်ႇ ၵရူႉၼႃႇၵဝ်တီႈမၼ်းၼၼ်ႉ မိူၼ်ၸိူဝ်ႉၼင်ႇဢၼ် ၵဝ်ၼုၵ်ႈထွၼ်တီႈၵေႃႉဢၼ်မီးဢွၼ်တၢင်းမႂ်းၼၼ်ႉ။-

14ၵဝ်တၵ်းဢဝ်မၼ်းၼၼ်ႉၶျႃးတီႈယူႇတီႈသဝ်းပၼ်ၵႃႈတီႈႁိူၼ်းၵဝ်၊ ၵႃႈတီႈသိုင်ႇၸိုင်ႈဝၢၼ်ႈမိူင်းၵဝ်တႃႇသေႇဢေႃႈ။ ရႃႇၸႃႉပလၢင်ႇမၼ်းၵေႃႈ တၵ်းလႆႈတႄႇယူႇတႃႇသေႇဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

15ၼင်ႇၼၼ်လႄႈ ၼႃႇသၼ်ႇ ဢဝ်ၵႂၢမ်းပျႃႇတိၵ်ႈၸဝ်ႈၵႃႈမီးၼႆႉ ဢိၵ်ႇတင်းရူႇပႃႇရူင်ႇတင်းသဵင်ႈတင်းမူတ်း ၶိုၼ်းမွၵ်ႇလၢတ်ႈတီႈ တႃႇဝိတ်ႈ ဢေႃႈ။

16မိူဝ်ႈၼၼ်ႉ ၶုၼ်လူင် တႃႇဝိတ်ႈ ၶဝ်ႈၵႂႃႇၵႃႈၼႂ်းလႄႈ ၼင်ႈယူႇၵႃႈတီႈၽၢႆႇၼႃႈထႃႇဝရႃႉၽြႃးသေလႄႈ သူးတွင်းလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈတီႈၶႃႈ၊ ၶႃႈၸဝ်ႈၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈ၊ ၸဝ်ႈႁဝ်းတၵ်းယုၵ်ႉယွင်ႈၶႃႈၸဝ်ႈၼႃႇလူင်လၢင်ထၼ်ႈၼႆႉတီႈၶႃႈ။ မဵဝ်းၸိူဝ်ႉၶိူဝ်းၶႃႈၸဝ်ႈၼႆႉ ပဵၼ်မဵဝ်းၸိူဝ်ႉၶိူဝ်းၸိူဝ်ႉၼင်ႇႁိုဝ်တီႈၶႃႈ။-

17ၵူၺ်းၵႃႈ ၽြႃးပဵၼ်ၸဝ်ႈတီႈၶႃႈ၊ ၵျေးၸူးၸဝ်ႈၼၼ်ႉပဵၼ်ၵျေးၸူးဢၼ်လဵၵ်ႉဢၼ်ၵေႇသိုဝ်ႈၼႃႈတႂ်ႈတႃၸဝ်ႈႁဝ်းလႄႈ ၸဝ်ႈႁဝ်းဢဝ်မဵဝ်းၸိူဝ်ႉၶိူဝ်းၶႃႈၸဝ်ႈ သိၼ်ႇၽႃႁွမ်းလူၺ်ႈၵၼ်တင်းၶိင်ႇၵႃႇလႃႉ ဢၼ်ႁိုင်မိူဝ်းၼႃႈလူင်လၢင်ယူႇသေလႄႈ သမ်ႉမီးဢမိင်ႉယဝ်ႉတီႈၶႃႈလူင်ပႄႇ။ ထႃႇဝရႃႉၽြႃး ၽြႃးပဵၼ်ၸဝ်ႈတီႈၶႃႈ၊ ၸဝ်ႈႁဝ်းမၢတ်ႈၶႃႈၸဝ်ႈၸွမ်းၵႃႈၼင်ႇဢၼ် ပဵၼ်ၵေႃႉဢၼ် မုၼ်ၽုင်းယႂ်ႇၼႃႇၼၼ်ႉတီႈၶႃႈလူင်ပႄႇ။-

18တႃႇဝိတ်ႈ တၵ်းလႆႈထၢပ်ႈထႅင်ႈလႄႈ လဝ်ႊလၢတ်ႈလူၺ်ႈလွင်ႈမုၼ်ၽုင်းဢၼ်မီးတီႈၶႃႈၸဝ်ႈႁဝ်းၼႆႉၼၼ်ႉၸိူဝ်ႉၼင်ႇႁိုဝ် လူးၵွၼ်ႇတီႈၶႃႈ။ ၸဝ်ႈႁဝ်းႁူႉၶႃႈၸဝ်ႈႁဝ်းယူႇတီႈၶႃႈဢေႃႈ။-

19ထႃႇဝရႃႉၽြႃးတီႈၶႃႈ၊ ၵွပ်ႈပိူဝ်ႈဢၼ်ၸဝ်ႈႁဝ်းထွၵ်ႈလူၺ်ႈဢၵျူဝ်းၶႃႈၸဝ်ႈႁဝ်းလႄႈ ၸွမ်းၵႃႈၼင်ႇဢၼ်ဢလူဝ်ႇႁူဝ်ၸႂ်ၸဝ်ႈႁဝ်းမီးၼၼ်ႉလႄႈ၊ ၸဝ်ႈႁဝ်းႁဵတ်းလွင်ႈတၢင်းၵူႈၸိူဝ်ႉၵူႈပိူင်ဢၼ်ယႂ်ႇၼႃႇလူင်လၢင်ၼႆႉ၊ လွင်ႈတၢင်းၵူႈၸိူဝ်ႉၵူႈပိူင်ဢၼ်ယႂ်ႇၼႃႇလူင်လၢင်ၼႆႉ ထၢင်ႇသႃးတီႈၶႃႈယဝ်ႉ။-

20ပိူဝ်ႈဢၼ်ပဵၼ်ၼင်ႇၼႆလႄႈ ထႃႇဝရႃႉၽြႃးတီႈၶႃႈ၊ ၵႃႈၼင်ႇဢၼ်ႁူၶႃႈၸဝ်ႈႁဝ်းလႆႈငိၼ်းၼၼ်ႉ၊ ဢမ်ႇမီးၽြႃးဢၼ်မိူၼ်ၵၼ်တင်းၸဝ်ႈႁဝ်းတီႈၶႃႈ။ ၼွၵ်ႈသေၸဝ်ႈႁဝ်းဢမ်ႇမီးၽြႃးတၢင်ႇသူႇတၢင်ႇပႃးတီႈၶႃႈ။-

21ၵႃႈၼိူဝ်လိၼ်မိူင်းၼႆႉမီးမဵဝ်းၵူၼ်းသေၸိူဝ်ႉသေမဵဝ်း ဢၼ်မိူၼ်ၵၼ်တင်းၵူၼ်းၸဝ်ႈႁဝ်းမဵဝ်း ဢီႉသရေႇလႃႉ ဢၼ်ၽြႃးပဵၼ်ၸဝ်ႈၵႂႃႇလႄႈထုတ်ႇၼုၵ်ႈဢဝ်ပုၼ်ႈမၼ်းၸဝ်ႈ လွင်ႈၼင်ႇႁိုဝ်တၵ်းဢဝ်လွင်ႈတၢင်းဢၼ်ယႂ်ႇဢၼ်လူင်လႄႈ လီၵူဝ်လီႁႄၸိူဝ်းၼၼ်ႉ ႁႂ်ႈၼႃႇမႃႉၸိုဝ်ႈသဵင်ၸဝ်ႈထၢင်ႇသႃးပုၼ်ႈၸဝ်ႈႁဝ်းၼႂ်းလွင်ႈမိူဝ်ႈဢၼ် ၸဝ်ႈႁဝ်းႁေႃႈၵူၼ်းၵူႈၸိူဝ်ႉၵူႈမဵဝ်း ဢွၵ်ႇသေၵႃႈတီႈၽၢႆႇၼႃႈၵူၼ်းၸဝ်ႈႁဝ်း ဢၼ်ၸဝ်ႈႁဝ်းၼုၵ်ႈဢဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉ လူးၵွၼ်ႇတီႈၶႃႈႁိုဝ်။-

22လွင်ႈမၼ်းၸမ်ႉ ၸဝ်ႈႁဝ်းႁဵတ်းႁႂ်ႈၵူၼ်းၸဝ်ႈႁဝ်း မဵဝ်း ဢီႉသရေႇလႃႉ လႆႈပဵၼ်ၵူၼ်းၸဝ်ႈႁဝ်းယူႇတႃႇသေႇမၼ်ႈၶိူင်ႇလႄႈ၊ ၸဝ်ႈႁဝ်းထႃႇဝရႃႉၽြႃးၼႆႉ ပဵၼ်ၽြႃးပဵၼ်ၸဝ်ႈၶဝ်တီႈၶႃႈဢေႃႈ။-

23မိူဝ်ႈလဵဝ်ၼႆႉၸိုင်၊ ထႃႇဝရႃႉၽြႃးတီႈၶႃႈ၊ ႁႂ်ႈၵႂၢမ်းဢၼ်ၸဝ်ႈႁဝ်းမီးဢမိင်ႉဝႆႉတီႈၶႃႈၸဝ်ႈႁဝ်း ဢိၵ်ႇတင်းတီႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၸိူဝ်းၼၼ်ႉ တႄႇယူႇတႃႇသေႇမၼ်ႈၶိူင်ႇလႄႈ၊ ႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉဝႆႉၼၼ်ႉသေၵမ်းတီႈၶႃႈ။-

24ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်းတႄႇယူႇလႄႈ မီးတၢင်းဢၼ်ယုၵ်ႉယွင်ႈယူႇတႃႇသေႇလႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉ ပဵၼ်ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢၼ်ဝႃႈၽြႃးပဵၼ်ၸဝ်ႈဢၼ်သႅင်ႇတင်းမဵဝ်း ဢီႉသရေႇလႃႉ ဢေႃႈ၊ ဝႃႈၼင်ႇၼႆယူႇၼၼ်ႉသေၵမ်းလူၺ်ႈတီႈၶႃႈ။ ႁႂ်ႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်း တႃႇဝိတ်ႈ ၼႆႉ တႄႇယူႇၵႃႈတီႈၽၢႆႇၼႃႈၸဝ်ႈႁဝ်းသေၵမ်းလူၺ်ႈတီႈၶႃႈ။-

25လွင်ႈမၼ်းၸမ်ႉ ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၵွပ်ႈပိူဝ်ႈဢၼ်ၸဝ်ႈႁဝ်းပၼ်ပျႃႇတိၵ်ႈတီႈၶႃႈၸဝ်ႈႁဝ်းၼႆႉ လူၺ်ႈလွင်ႈဢၼ်တၵ်းႁႂ်ႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းတႄႇၼၼ်ႉလႄႈ ၶႃႈၸဝ်ႈႁဝ်းၼႆႉမီးၸႂ်ဢၼ်ၶႂ်ႈႁဵတ်းသူးတွင်းပထၼႃႇ ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။-

26မိူဝ်ႈလဵဝ်ၼႆႉၵေႃႈ၊ ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းၸႂ်ႈၽြႃးပဵၼ်ၸဝ်ႈတီႈၶႃႈဢေႃႈ။ ၵျေးၸူးၼႆႉၸိုင်၊ ၸဝ်ႈႁဝ်းဝႆႉၵတီႉတီႈၶႃႈၸဝ်ႈႁဝ်းၼႆႉတီႈၶႃႈယဝ်ႉ။-

27ပိူဝ်ႈဢၼ်ပဵၼ်ၼင်ႇၼႆလႄႈ၊ ၶႅၼ်းတေႃႈမီးၸႂ်ဢၼ်ဢူၼ်ႈၼူပ်ႈၵွမ်းၸူးႁႂ်ႈလႆႈပၼ်တၢင်းလီတီႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်း ႁႂ်ႈလႆႈတႄႇယူႇၵႃႈတီႈၽၢႆႇၼႃႈၸဝ်ႈႁဝ်းတႃႇသေႇ မၼ်ႈၶိူင်ႇသေၵမ်းတီႈၶႃႈ။ ထႃႇဝရႃႉၽြႃးတီႈၶႃႈ၊ ပေႃးၸဝ်ႈႁဝ်းပၼ်တၢင်းလီၸိုင်၊ တၵ်းလႆႈၶၢမ်ႇတၢင်းလီမင်ႇၵလႃႇယူႇတႃႇသေႇမၼ်ႈၶိူင်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။

← Chapter 16 Jump to: Chapter 18 →