1 Chronicles 12 — Shan

1ၶဝ်ၸိူဝ်းဢၼ်မႃးယူႇၽၢႆႇ တႃႇဝိတ်ႈ ၵႃႈတီႈဝဵင်း ၸီႉၵလတ်ႉ ၼႂ်းမိူဝ်ႈဢၼ်မၼ်းယင်းတိုၵ်ႉငိူင်ႉဝႄႈ သေႃးလူႉ လုၵ်ႈၸၢႆး ၵီႉသႃႉ ယူႇၼၼ်ႉလႄႈ ပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇ၊-

2ၵေႃႉဢၼ်ၸွႆႈသိုၵ်းထႅမ်သိုၵ်းၽၢႆႇမၼ်းဢၼ်ပႃးလၢၵ်ႈၼၢၵ်ႈၵၢင်ႇလႄႈ ယင်းဢမ်ႇလိူၵ်ႈၽၢႆႇၶႂႃၽၢႆႇသၢႆႉ ၸၢင်ႈပိုတ်းယိုဝ်းထိမ်ႈမၢၵ်ႇႁိၼ်တင်းပိုၼ်ၵၢင်ႇ၊ မဵဝ်း ပိၼ်ႇယႃႇမိၼ်ႇ ပီႈၼွင်ႉၸိူဝ်ႉၶိူဝ်း သေႃးလူႉ ၼၼ်ႉၸမ်ႉ၊-

3ဢႁေႇၸႃႇ ဢၼ်ပဵၼ်တူၼ်ႈပဵၼ်ငဝ်ႈ၊ လိုၼ်းမၼ်း ယေႃးသႃႉ လုၵ်ႈၸၢႆး သေးမႃႇ ၵူၼ်းဝဵင်း ၵီႉပႃႉ တင်းလၢႆ၊ ယေႇသေးလႃႉ တင်း ပေးလိတ်ႉ ၵူၼ်း ဢႃႇၸမႃႇဝိတ်ႉ၊ ပေႇရႃႇၶႃႉ၊ ယေႇႁူႉ မဵဝ်း ဢႃႇၼသုတ်ႉ ၊-

4ဢီႉသမႃႇယႃႉ ၵူၼ်းဝဵင်း ၵီႉပွင်ႇ ဢၼ်ပဵၼ်ၵေႃႉဢၼ်ႁႅင်းယႂ်ႇၼႃႇၵႃႈၼႂ်းမုၵ်ႉပူဝ်ႇ ၸိူဝ်းပူဝ်ႇသၢမ်သိပ်းၵေႃႉလႄႈ ႁဵတ်းၵႄႇႁဵတ်းႁူဝ်သၢမ်သိပ်းၵေႃႉၼၼ်ႉ၊ ယေႇရမီႉ၊ ယႁႃႇၸေးလႃႉ၊ ယေႃးႁၼၼ်ႇ၊ ယေႃးၸပတ်ႉ မဵဝ်း ၵေးတရႃႉသီႉ ၊-

5ဢေးလူႉၸေး၊ ယေႇရီႉမုတ်ႉ၊ ပေးလျႃႇ၊ သေႇမရီႉ၊ သေႇၽတ်ႉတီႉ မဵဝ်း ႁရူႉၽီႉ ၊-

6ဢေးလႃႉၵႃႇၼႃႉ၊ ယေႇသႃႉ၊ ဢႃႇၸရေႇလႃႉ၊ ယေႃးၸႃႇ၊ ယႃႇသေႃးၽမ်ႇ မဵဝ်း ၵေႃႇရသီႉ ၊-

7ယေႃးလႃႉ တင်း ၸေႇပတီႉ လုၵ်ႈၸၢႆး ယေႇရေႃးႁမ်ႇ ဢၼ်ယူႇၵႃႈတီႈဝဵင်း ၵေးတေႃး ၼၼ်ႉ ၸိူဝ်းၼၼ်ႉဢေႃႈ။

8လိူဝ်သေၼၼ်ႉ ၵူၼ်းမဵဝ်း ၵၢတ်ႉ ၸိူဝ်းဢၼ်ဢွၵ်ႇၵႂႃႇၸူးတီႈ တႃႇဝိတ်ႈ ၵႃႈတီႈတိူၵ်ႈတီႈတိုၵ်းသိုၵ်း ၵႃႈၼႂ်းထိူၼ်ႇဢၼ်ပဵၼ်ၵေႃႉဢၼ်ႁႅင်းယႂ်ႇၼႃႇ၊ ၵေႃႉဢၼ်တၢတ်ႈၼိူင်ႇႁႂ်ႈလႆႈတိုၵ်းသိုၵ်းလႄႈ မေႃသုင်းသွင်ႇၶိူင်ႈႁႄႉလၢၵ်ႈၼၢၵ်ႈဢိၵ်ႇတင်းႁွၵ်ႇ ဢၼ်ၼႃႈတႃၶဝ်မိူၼ်ၸိူဝ်ႉၼင်ႇၼႃႈတႃသၢင်ႇသီႈလႄႈ ၶၼ်ၽႂ်းမိူၼ်ၸိူဝ်ႉၼင်ႇၵႂၢင်ၵႃႈၼိူဝ်လွႆၼၼ်ႉၸမ်ႉ၊-

9ပဵၼ် ဢေးၸႃႇ ဢၼ်ပဵၼ်တူၼ်ႈပဵၼ်ငဝ်ႈ၊ ဢေႃးပတီႉ ဢၼ်ပဵၼ်ၵေႃႉတူႉတီႉယႃႉ၊ ဢေးလျႃႇၽႃႉ ဢၼ်ပဵၼ်ၵေႃႉတႃႉတီႉယႃႉ၊-

10မီႉသမၼ်ႇၼႃႉ ဢၼ်ပဵၼ်ၵေႃႉၸတုၵ်ႉထႃႉ၊ ယေႇရမီႉ ဢၼ်ပဵၼ်ၵေႃႉပိၼ်ႇၸမႃႉ၊-

11ဢတ်ႉတေႇ ဢၼ်ပဵၼ်ၵေႃႉသႃႉထမႃႉ၊ ဢေးလေႇလႃႉ ဢၼ်ပဵၼ်ၵေႃႉသတ်ႉတမႃႉ၊-

12ယေႃးႁၼၼ်ႇ ဢၼ်ပဵၼ်ၵေႃႉဢႃႉထမႃႉ၊ ဢေးလႃႉၸႃႇပတ်ႉ ဢၼ်ပဵၼ်ၵေႃႉၼဝမႃႉ၊-

13ယေႇရမီႉ ဢၼ်ပဵၼ်ၵေႃႉတႃႉသမႃႉ၊ မႃႇၶပႃႇၼေႇ ဢၼ်ပဵၼ်ၵေႃႉဢေႇၵႃႉတႃႉသမႃႉဢေႃႈ။-

14ၶဝ်ၸိူဝ်းၼႆႉ ဢွၼ်ၵၼ်ႁဵတ်းပူဝ်ႇၵႃႈၼႂ်းမုၵ်ႉၼႂ်းၸိူဝ်းမဵဝ်း ၵၢတ်ႉ လႄႈ ၵေႃႉဢၼ်လဵၵ်ႉၸမ်ႉ၊ တၢၼ်ႇၵူၼ်းယေႈပၢၵ်ႇ၊ ၵေႃႉဢၼ်ယႂ်ႇၸမ်ႉ၊ တၢၼ်ႇၵူၼ်းယေႈႁဵင်ဢေႃႈ။-

15ၶဝ်ၼႆႉ ပဵၼ်ၶဝ်ၸိူဝ်းဢၼ်ၶၢမ်ႈၼမ်ႉႁွင်ႈ ယေႃးတၢၼ်ႇ ၼႂ်းလိူၼ်ပထမႃႉ ၶိင်ႇဢၼ်ၼမ်ႉႁွင်ႈၼၼ်ႉထူမ်ႈႁူမ်ႇၽင်ႇတင်းသဵင်ႈတင်းမူတ်းၼၼ်ႉၵႂႃႇသေလႄႈ ႁႂ်ႈၵူၼ်းၵႃႈဢၼ်ယူႇၵႃႈတီႈပၢင်ႇတီႈပဵင်း ၽၢႆႇဝၼ်းဢွၵ်ႇ၊ ၽၢႆႇဝၼ်းတူၵ်းၼၼ်ႉ ဢွၵ်ႇပၢႆႈၼၼ်ႉဢေႃႈ။

16ၽဝ်ႇၼိုင်ႈ ၵူၼ်းမဵဝ်း ပိၼ်ႇယႃႇမိၼ်ႇ ဢိၵ်ႇတင်းၵူၼ်းမဵဝ်း ယူႉတႃႉ ၵမ်ႈၽွင်ႈမႃးၵႃႈတီႈတိူၵ်ႈတီႈတိုၵ်းသိုၵ်းၸူးတီႈ တႃႇဝိတ်ႈ လႄႈ၊-

17တႃႇဝိတ်ႈ ဢွၵ်ႇၵႂႃႇ ႁႂ်ႈလႆႈႁပ်ႉႁူဝ်တၢင်းၶဝ်လႄႈလၢတ်ႈလႄႈဝႃႈ၊ ပေႃးပႃးတၢင်းၸႂ်မႅတ်ႈတႃႇမႃးႁႂ်ႈလႆႈၸွႆႈထႅမ်မႃႉၸႃႉၵဝ်ၸိုင်၊ ၵဝ်တၵ်းပဵၼ်ၸႂ်လဵဝ်ၵၼ်တင်းသူဢေႃႈ။ ပေႃးဢမ်ႇၸႂ်ႈၼင်ႇၼၼ်၊ ပေႃးသူမႃးႁႂ်ႈလႆႈဢဝ်ၵဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၵဝ်ၸိုင်၊ ၵွပ်ႈပိူဝ်ႈဢၼ်မိုဝ်းၵဝ်ဢမ်ႇႁဵတ်းဢပႅတ်ႈလႄႈ ႁႂ်ႈၽြႃးပဵၼ်ၸဝ်ႈပူႇမွၼ်ႇႁဝ်းၼၼ်ႉလူတူၺ်းလႄႈ သင်ႇသွၼ်သုင်းမႃႉပၼ်သေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊-

18ဝီႉၺိၺ်ႇၸဝ်ႈတူၵ်းႁွတ်ႈၵႃႈၼိူဝ် ဢႃႇမသေး ဢၼ်ပဵၼ်တူၼ်ႈပဵၼ်ငဝ်ႈၼႂ်းသၢမ်သိပ်းၵေႃႉၼၼ်ႉလႄႈ မၼ်းၼၼ်ႉၶိုၼ်းလၢတ်ႈ လႄႈဝႃႈ၊ တႃႇဝိတ်ႈ ဢိူၺ်း၊ ႁဝ်းၶႃႈၸိူဝ်းၼႆႉပဵၼ်ၵူၼ်းၸဝ်ႈႁဝ်းၶႃႈဢေႃႈ။ လုၵ်ႈၸၢႆး ယေႇသႄး ဢိူၺ်း၊ ႁဝ်းၶႃႈၸိူဝ်းၼႆႉပဵၼ်ၵေႃႉဢၼ်ၶဝ်ႈယူႇၽၢႆႇၸဝ်ႈႁဝ်းၶႃႈဢေႃႈ။ ႁႂ်ႈမင်ႇၵလႃႇမီးတီႈၸဝ်ႈႁဝ်းသေၵမ်းလူၺ်ႈ။ ႁႂ်ႈမင်ႇၵလႃႇမီးသေၵမ်းလူၺ်ႈ။ ႁႂ်ႈမင်ႇၵလႃႇမီးတီႈၶဝ်ၸိူဝ်းဢၼ် ၸွႆႈထႅမ်မႃႉၸႃႉၸဝ်ႈႁဝ်းၼၼ်ႉသေၵမ်းလူၺ်ႈ။ လွင်ႈမၼ်းၸမ်ႉ ၽြႃးပဵၼ်ၸဝ်ႈ ၸဝ်ႈႁဝ်းၼၼ်ႉၸွႆႈထႅမ်မႃႉၸႃႉၸဝ်ႈႁဝ်းၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊ တႃႇဝိတ်ႈ ႁပ်ႉတုင်းဢဝ်ၶဝ်လႄႈ ဢဝ်ၶဝ်ၶၢၼ်းဝႆႉၵႃႈၼႂ်းဢရႃႇပူဝ်ႇဢေႃႈ။

19လိူဝ်သေၼၼ်ႉ၊ ၵူၼ်းမဵဝ်း မၼႃႇသေႇ ၵမ်ႈၽွင်ႈ ၶဝ်ႈယူႇၽၢႆႇ တႃႇဝိတ်ႈ ၼႂ်းမိူဝ်ႈဢၼ်မၼ်းၸွမ်းၵူၼ်း ၽီႉလိတ်ႉတီႉ တင်းလၢႆၵႂႃႇတိုၵ်း သေႃးလူႉ ၼၼ်ႉဢေႃႈ။ ၵူၺ်းၵႃႈ ၶဝ်ယင်းဢမ်ႇၸွႆႈသိုၵ်းထႅမ်သိုၵ်းတီႈၶဝ်ၼၼ်ႉ ၵွပ်ႈပိူဝ်ႈဢၼ်ၶုၼ် ၽီႉလိတ်ႉတီႉ တင်းလၢႆၼၼ်ႉ တိူင်ႇပၢင်ႇၵၼ်သေလႄႈ ပွႆႇၶဝ်ၶိုၼ်းမိူဝ်းၵႂႃႇလႄႈဝႃႈ၊ ၵေႃႉၼႆႉၵူဝ်မၼ်းတၵ်းဢဝ်ႁဝ်းၵႂႃႇသေလႄႈ ၶဝ်ႈယူႇၽၢႆႇၸဝ်ႈမၼ်း သေႃးလူႉ ဢေႃႈ၊ ဝႃႈၼင်ႇၼႆၼၼ်ႉဢေႃႈ။-

20ၵူၼ်းမဵဝ်း မၼႃႇသေႇ ဢၼ်ၶဝ်ႈယူႇၽၢႆႇမၼ်းၼႂ်းမိူဝ်ႈဢၼ်ယင်းတိုၵ်ႉၵႂႃႇၵႃႈတီႈဝဵင်း ၸီႉၵလတ်ႉ ယူႇၼၼ်ႉၸမ်ႉ၊ ပဵၼ် ဢႃႇတၼႃႉ၊ ယေႃးၸပတ်ႉ၊ ယေႇတယေးလႃႉ၊ မိၵ်ႉၶေႇလႃႉ၊ ယေႃးၸပတ်ႉ၊ ဢေးလီႉႁူႉ၊ ၸီႉလသေး ဢၼ်ပဵၼ်ပူဝ်ႇ ဢၼ်ဢုပ်ႉၵႃႈၼိူဝ်ယေႈႁဵင်ၵႃႈၼႂ်းမဵဝ်း မၼႃႇသေႇ ၸိူဝ်းၼၼ်ႉဢေႃႈ။-

21ၶဝ်ၸိူဝ်းၼၼ်ႉ ဢွၼ်ၵၼ်ၸွႆႈထႅမ်မႃႉၸႃႉ တႃႇဝိတ်ႈ လႄႈယူႇၽၢႆႇၼိုင်ႈ တင်းၶဝ်ၸိူဝ်းဢၼ်ႁဵတ်းၸူၼ်ၼၼ်ႉဢေႃႈ။ လွင်ႈမၼ်းၸမ်ႉ ၶဝ်ပဵၼ်ပူဝ်ႇလူင်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇဢေႃႈ။-

22မိူဝ်ႈၼၼ်ႉ ဝၼ်းၼိုင်ႈထႅင်ႈဝၼ်းၼိုင်ႈ ၵူၼ်းဢွၼ်ၵၼ်ၶဝ်ႈယူႇၽၢႆႇ တႃႇဝိတ်ႈ ႁႂ်ႈလႆႈၸွႆႈထႅမ်မႃႉၸႃႉမၼ်းတေႃႇထိုင်ႁွတ်ႈပဵၼ်ပူဝ်ႇပႃႇ ဢၼ်ယႂ်ႇၼႃႇလူင်လၢင် မိူၼ်ၸိူဝ်ႉၼင်ႇပူဝ်ႇပႃႇၽြႃးပဵၼ်ၸဝ်ႈၼၼ်ႉဢေႃႈ။

23ၸရၢင်းၵူၼ်းတပ်ႉဢၼ်ပျေႉၸုမ်ႇတင်းလၢၵ်ႈၼၢၵ်ႈတိုၵ်းသိုၵ်း ဢၼ်မႃးၸူးတီႈ တႃႇဝိတ်ႈ ၵႃႈတီႈဝဵင်း ႁေႇပြုၼ်ႇ ႁႂ်ႈလႆႈဢဝ် သိုင်ႇၸိုင်ႈဝၢၼ်ႈမိူင်း သေႃးလူႉ ဢၢပ်ႈပၼ်ၵႃႈၼႂ်းမိုဝ်း တႃႇဝိတ်ႈ ၸွမ်းၵႃႈၼင်ႇဢမိင်ႉထႃႇဝရႃႉၽြႃးၼၼ်ႉၸမ်ႉ၊-

24ၵူၼ်းမဵဝ်း ယူႉတႃႉ ဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈ ဢိၵ်ႇတင်းႁွၵ်ႇလႄႈ ပျေႉၸုမ်ႇတင်းလၢၵ်ႈၼၢၵ်ႈတိုၵ်းသိုၵ်းၼၼ်ႉ ႁူၵ်းႁဵင်ပၢႆပႅတ်ႇပၢၵ်ႇ၊-

25ၵူၼ်းမဵဝ်း သီႉမုၼ်ႇ ဢၼ်ပဵၼ်ႁူဝ်ႁၢၼ်ၵူၼ်းသိုၵ်း ဢၼ်ႁႅင်းယႂ်ႇၼႃႇၼၼ်ႉ ၸဵတ်းႁဵင်ပၢႆပၢၵ်ႇၼိုင်ႈ၊-

26ၵူၼ်းမဵဝ်း လေႇဝီႉ သီႇႁဵင်ပၢႆႁူၵ်းပၢၵ်ႇ၊-

27ၵူၼ်းမဵဝ်း ဢႃႇရုၼ်ႇ ဢၼ်ပႃးလူၺ်ႈၵၼ်တင်း ယေႃးယတႃႉ ဢၼ်ဢုပ်ႉၵႃႈၼိူဝ်ၶဝ်ၼၼ်ႉ သၢမ်ႁဵင်ပၢႆၸဵတ်းပၢၵ်ႇ၊-

28ၵူၼ်းၼုမ်ႇ ၸႃႇတုၵ်ႉ ဢၼ်ပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်း၊ တပ်ႉမူး သၢဝ်းပၢႆသွင်ပႃး၊-

29ၵူၼ်းမဵဝ်း ပိၼ်ႇယႃႇမိၼ်ႇ ၊ ဢၼ်ပဵၼ်ပီႈၼွင်ႉၸိူဝ်ႉၶိူဝ်း သေႃးလူႉ ပိၵ်ႉသမ်ႉၼႂ်းၶဝ်ၵူၼ်းၼမ်ၼႃႇ လႆႈပႂ်ႉယူႇၽၢႆႇမဵဝ်းၸိူဝ်ႉၶိူဝ်း သေႃးလူႉ မိူဝ်ႈဢွၼ်တၢင်းၼၼ်ႉသေၵေႃႈ၊ ၶဝ်ၼၼ်ႉ သၢမ်ႁဵင်၊-

30ၵူၼ်းမဵဝ်း ဢေႇၽရိမ်ႇ ဢၼ်ပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇလႄႈ ၸိုဝ်ႈဢွၵ်ႇသဵင်ဢွၵ်ႇၵႃႈၼႂ်းပီႈၼွင်ႉၸိူဝ်ႉၶိူဝ်းပေႃႈၶဝ်ၼၼ်ႉ သွင်မိုၼ်ႇပၢႆပႅတ်ႇပၢၵ်ႇ၊-

31ၵူၼ်းမဵဝ်း မၼႃႇသေႇ ၶိုင်ႈၼိုင်ႈဢၼ်ၸိုဝ်ႈၶဝ်သဵင်ၶဝ် ၶဝ်ႈပႃးၼႂ်းၸရၢင်း ႁႂ်ႈလႆႈမႃးလႄႈယုၵ်ႉယွင်ႈ တႃႇဝိတ်ႈ ဝႆႉၵႃႈၼႂ်းဢရႃႇၶုၼ်ႁေႃၶမ်းၼၼ်ႉ မိုၼ်ႇပၢႆပႅတ်ႇႁဵင်၊-

32ၵူၼ်းမဵဝ်း ဢီႉသၶႃႇ ဢၼ်ၸၢင်ႈႁူႉလူၺ်ႈၶိင်ႇၵႃႇလႃႉလႄႈ ႁူႉလွင်ႈဢၼ်ၵူၼ်းမဵဝ်း ဢီႉသရေႇလႃႉ တင်းလၢႆထုၵ်ႇလီႁဵတ်းၸိူဝ်ႉၼင်ႇႁိုဝ်ၼၼ်ႉ၊ ဢၼ်ဝႃႈၶဝ်ၸိူဝ်းဢၼ် ပဵၼ်တူၼ်ႈပဵၼ်ငဝ်ႈဢၼ်မဵဝ်းၸိူဝ်ႉၶိူဝ်းၶဝ်ထွမ်ႇဢဝ်ၵႂၢမ်းၶဝ်ၼၼ်ႉ သွင်ပၢၵ်ႇ၊-

33ၵူၼ်းမဵဝ်း ၸေႇပူႉလုၼ်ႇ ဢၼ်တၢတ်ႈၼိူင်ႇႁႂ်ႈလႆႈၶီႇသိုၵ်းလႄႈ ၸၢင်ႈယၼ်ႇတပ်ႉၶၢင်းတပ်ႉ၊ ဢၼ်ပျေႉၸုမ်ႇတင်းလၢၵ်ႈၼၢၵ်ႈတိုၵ်းသိုၵ်းၵူႈၸိူဝ်ႉၵူႈမဵဝ်းယူႇသေလႄႈ ၸၢင်ႈမႄးႁႅၼ်းႁႂ်ႈလႆႈတိုၵ်းသိုၵ်းလႄႈ ဢမ်ႇမီးၸႂ်သွင်ငၢမ်ႈၼၼ်ႉ ႁႃႈမိုၼ်ႇ၊-

34ၵူၼ်းမဵဝ်း ၼပ်ႉထလီႉ ပူဝ်ႇႁဵင်ၼိုင်ႈ ဢိၵ်ႇတင်းၶဝ်ၸိူဝ်းဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈတင်းႁွၵ်ႇ သၢမ်မိုၼ်ႇပၢႆၸဵတ်းႁဵင်၊-

35ၵူၼ်းမဵဝ်း တၢၼ်ႇ ဢၼ်ၸၢင်ႈယၼ်ႇတပ်ႉၶၢင်းတပ်ႉလႄႈ တိုၵ်းသိုၵ်းၼၼ်ႉ သွင်မိုၼ်ႇပႅတ်ႇႁဵင်ပၢႆႁူၵ်းပၢၵ်ႇ၊-

36မဵဝ်း ဢႃႇသႃႇ ၶဝ်ၸိူဝ်းဢၼ်တၢတ်ႈၼိူင်ႇႁႂ်ႈလႆႈတိုၵ်းသိုၵ်းလႄႈ ၸၢင်ႈယၼ်ႇတပ်ႉၶၢင်းတပ်ႉၼၼ်ႉ သီႇမိုၼ်ႇ၊-

37ၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ၊ ၵႃႈၼႂ်းၵူၼ်းမဵဝ်း ရူႉပိၼ်ႇ ၊ မဵဝ်း ၵၢတ်ႉ ၊ မဵဝ်း မၼႃႇသေႇ ၶိုင်ႈၼိုင်ႈၼၼ်ႉ ၶဝ်ၸိူဝ်းဢၼ်ပျေႉၸုမ်ႇတင်းလၢၵ်ႈၼၢၵ်ႈၸုမ်ႇဢၼ်တိုၵ်းသိုၵ်းၵူႈၸိူဝ်ႉၵူႈမဵဝ်းၼၼ်ႉ သႅၼ်ပၢႆသွင်မိုၼ်ႇဢေႃႈ။-

38ၶဝ်ၵႃႈမီးၸိူဝ်းၼႆႉၸမ်ႉ၊ ပဵၼ်လုၵ်ႈသိုၵ်းၵူၼ်းသိုၵ်း ဢၼ်ၸၢင်ႈယၼ်ႇတပ်ႉၶၢင်းတပ်ႉလႄႈ မီးၸႂ်ဢၼ်ႁႅင်းယႂ်ႇၼႃႇသေလႄႈ ဢွၼ်ၵၼ်မႃးၵႃႈတီႈဝဵင်း ႁေႇပြုၼ်ႇ ႁႂ်ႈလႆႈယုၵ်ႉယွင်ႈ တႃႇဝိတ်ႈ ဝႆႉၵႃႈၼႂ်းဢရႃႇၶုၼ်ႁေႃၶမ်း ၵႃႈၼႂ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢေႃႈ။ ၵူၼ်းမဵဝ်း ဢီႉသရေႇလႃႉ ဢၼ်ယင်းၵိုတ်းယင်းၵျၢၼ်ႇတင်းသဵင်ႈတင်းလူင်ၵေႃႈ ၽွမ်ႉၸႂ်ၵၼ်သေလႄႈ ၶႂ်ႈယုၵ်ႉယွင်ႈ တႃႇဝိတ်ႈ ဝႆႉၵႃႈၼႂ်းဢရႃႇၶုၼ်ႁေႃၶမ်းဢေႃႈ။-

39ၶဝ်ၸိူဝ်းၼၼ်ႉမီးယူႇတီႈ တႃႇဝိတ်ႈ သၢမ်ဝၼ်းတဵမ်တဵမ်လႄႈ ဢွၼ်ၵၼ်ၵိၼ်ယူႇၶူပ်းယူႇဢေႃႈ၊ ၶဝ်ၸိူဝ်းဢၼ်ပဵၼ်မဵဝ်းလဵဝ်ၵၼ်တင်းၶဝ်ၼၼ်ႉ ဢွၼ်ၵၼ်မႄးႁႅၼ်းဝႆႉထႃႈပုၼ်ႈၶဝ်ယဝ်ႉ။-

40ၶဝ်ၸိူဝ်းဢၼ်ယူႇၸႃႉၸဵမ်ၵႃႈတီႈႁိမ်းၸမ်ၶဝ်ၼၼ်ႉ တေႃႇထိုင်ႁွတ်ႈၵႃႈတီႈၼႂ်းလိၼ် ဢီႉသၶႃႇ ၊ လိၼ် ၸေႇပူႉလုၼ်ႇ ၊ လိၼ် ၼပ်ႉထလီႉ ၸိူဝ်းၼၼ်ႉ ဢွၼ်ၵၼ်ပႃးဢဝ်တၢင်းၵိၼ်တၢင်းၶူပ်း ဢၼ်တၢင်ႇၵႃႈၼိူဝ်လီႈ၊ ၵလႃးဢုၵ်ႉ၊ လေႃႈ၊ ဝူဝ်း ဢၼ်ဝႃႈ ၽွင်ၶဝ်ႈမုၼ်း၊ ၶႅပ်းမၢၵ်ႇလိူဝ်ႇသၢင်းၽေႃး၊ ပုၵ်ႉမၢၵ်ႇၸပိတ်ႈ၊ ၼမ်ႉၸပိတ်ႈ၊ ၼမ်ႉမၼ်း၊ သူဝ်း၊ ဝူဝ်း ၼမ်ၼႃႇၼၼ်ႉမႃးဢေႃႈ။ လွင်ႈမၼ်းၸမ်ႉ ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ ဢွၼ်ၵၼ်မီးတၢင်းဢၼ်မူၼ်ႈဢၼ်ပျေႃႇဢေႃႈ။