1 Chronicles 9 — Shan

1ၼင်ႇၼၼ်လႄႈ မဵဝ်း ဢီႉသရေႇလႃႉ တင်းသဵင်ႈတင်းမူတ်း လႆႈၶၢမ်ႇတၢင်းဢၼ်မၢတ်ႈမၢႆၶဝ်ႈပႃးၵႃႈၼႂ်းၸရၢင်းလႄႈ တႅမ်ႈဝႆႉမီးယူႇၵႃႈၼႂ်းလိၵ်ႈဢၼ်မၢတ်ႈမၢႆၶုၼ်ႁေႃၶမ်း ဢီႉသရေႇလႃႉ ဢေႃႈ။ မဵဝ်း ယူႉတႃႉ လႆႈၶၢမ်ႇတၢင်းဢၼ်သိမ်းဢဝ်ၵႂႃႇ ၵႃႈတီႈဝဵင်း ပႃႇပူႉလုၼ်ႇ ၵွပ်ႈပိူဝ်ႈဢပႅတ်ႈၶဝ်ၼၼ်ႉဢေႃႈ။-

2လိုၼ်းၼၼ်ႉၶဝ်ၸိူဝ်းဢၼ်တူၵ်းတီႈတူၵ်းလႅၼ်သေလႄႈယူႇဢွၼ်တၢင်းပိူၼ်ႈ ၵႃႈတီႈဝၢၼ်ႈဝဵင်းဢၼ်ၶဝ်ထိူၵ်ႈပိူင်ႇၼၼ်ႉၸမ်ႉ၊ ပဵၼ်ၵူၼ်းမဵဝ်း ဢီႉသရေႇလႃႉ ၊ ယိတ်ႈပရေႃးႁဵၵ်ႈ၊ ၵူၼ်းမဵဝ်း လေႇဝီႉ ဢိၵ်ႇတင်းၶႃႈၽြႃးပဵၼ်ၸဝ်ႈတင်းလၢႆဢေႃႈ။-

3ၵူၼ်းမဵဝ်း ယူႉတႃႉ ၊ ၵူၼ်းမဵဝ်း ပိၼ်ႇယႃႇမိၼ်ႇ ၊ ၵူၼ်းမဵဝ်း ဢေႇၽရိမ်ႇ တင်း မၼႃႇသေႇ ဢၼ်ယူႇၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉၸမ်ႉ၊-

4ပဵၼ် ဢူႉသေႇ လုၵ်ႈၸၢႆး ဢမီႉႁုတ်ႉ ၊ လုၵ်ႈၸၢႆး ဢေႃးမရီႉ ၊ လုၵ်ႈၸၢႆး ဢီႉမရီႉ ၊ လုၵ်ႈၸၢႆး ၽႃႇၼီႉ ဢၼ်ပဵၼ်မဵဝ်းၸိူဝ်ႉၶိူဝ်း ၽေးရိတ်ႉ လုၵ်ႈၸၢႆး ယူႉတႃႉ ၼၼ်ႉၵေႃႉၼိုင်ႈ၊-

5ဢသႃႇယႃႉ လုၵ်ႈၸၢႆးတူၼ်ႈ ဢိၵ်ႇတင်းလုၵ်ႈၸၢႆးမၼ်း ဢၼ်ပဵၼ်မဵဝ်းၸိူဝ်ႉၶိူဝ်း သီႉလေႃးၼီႉ ၼၼ်ႉမုၵ်ႉၸိူဝ်းၼိုင်ႈ၊-

6ယူၺ်ႇလႃႉ ဢိၵ်ႇတင်းပီႈၼွင်ႉမၼ်းဢၼ်ပဵၼ်မဵဝ်းၸိူဝ်ႉၶိူဝ်း ၸေးရႃႉ ၼၼ်ႉမုၵ်ႉၸိူဝ်းၼိုင်ႈ ဢၢၼ်ႇပွင်းၵၼ်ပဵၼ်ႁူၵ်းပၢၵ်ႇပၢႆၵဝ်ႈသိပ်းဢေႃႈ။

7ၵူၼ်းမဵဝ်း ပိၼ်ႇယႃႇမိၼ်ႇ ၸမ်ႉ၊ ပဵၼ် သႃႇလူႉ လုၵ်ႈၸၢႆး မေႇသူႉလမ်ႇ ၊ လုၵ်ႈၸၢႆး ႁေႃးတဝီႉ ၊ လုၵ်ႈၸၢႆး ႁသေးၼႂႃႇ ၼၼ်ႉၵေႃႉၼိုင်ႈ၊-

8ဢီႉပၼေႇယႃႉ လုၵ်ႈၸၢႆး ယေႇရေႃးႁမ်ႇ ၵေႃႉၼိုင်ႈ၊ ဢေးလႃႇ လုၵ်ႈၸၢႆး ဢေႃႇၸီႉ ၊ လုၵ်ႈၸၢႆး မီႉၶရီႉ ၵေႃႉၼိုင်ႈ၊ မေႇသူႉလမ်ႇ လုၵ်ႈၸၢႆး သေႇၽတီႉ ၊ လုၵ်ႈၸၢႆး ရူႉဢေးလႃႉ ၊ လုၵ်ႈၸၢႆး ဢီႉပၼီႉယႃႉ ၵေႃႉၼိုင်ႈ၊-

9ဢိၵ်ႇတင်းပီႈၼွင်ႉၶဝ် ဢၼ်ၸွမ်းလူၺ်ႈမဵဝ်းၸိူဝ်ႉၶိူဝ်းသိုပ်ႇလူင်းမႃးၼၼ်ႉ ဢၢၼ်ႇပွင်းၵၼ်ပဵၼ်ၵဝ်ႈပၢၵ်ႇႁႃႈသိပ်းပၢႆႁူၵ်းၵေႃႉဢေႃႈ။ ၶဝ်ၵႃႈမီးၼႆႉ ပဵၼ်ၵေႃႉဢၼ်ပဵၼ်တူၼ်ႈပဵၼ်ငဝ်ႈၼႂ်းမဵဝ်းၸိူဝ်ႉၶိူဝ်းပေႃႈၶဝ်ၸွမ်းလူၺ်ႈမဵဝ်းၸိူဝ်ႉၶိူဝ်းပေႃႈၶဝ်ၼၼ်ႉဢေႃႈ။

10ယိတ်ႈပရေႃးႁဵၵ်ႈၸမ်ႉ၊ ပဵၼ် ယေႇတႃႇယႃႉ၊ ယေႇယႃႇရိပ်ႉ၊ ယႃႇၶိၼ်ႇ ဢိၵ်ႇတင်း၊-

11ဢႃႇၸရီႉ ဢၼ်ဢုပ်ႉၵႃႈၼိူဝ်ႁိူၼ်း ပိၵ်ႈမၢၼ်ႇၽြႃးပဵၼ်ၸဝ်ႈ ဢၼ်ပဵၼ်လုၵ်ႈၸၢႆး ႁီႉလၶီႉ ၊ လုၵ်ႈၸၢႆး မေႇသူႉလမ်ႇ ၊ လုၵ်ႈၸၢႆး ၸႃႇတုၵ်ႉ ၊ လုၵ်ႈၸၢႆး မရႃႇယုတ်ႉ လုၵ်ႈၸၢႆး ဢႁီႉတုပ်ႉ ၼၼ်ႉပႃးၼိုင်ႈ၊-

13ဢိၵ်ႇတင်းပီႈၼွင်ႉၶဝ် ဢၼ်ပဵၼ်ၵေႃႉဢၼ်ပဵၼ်တူၼ်ႈပဵၼ်ငဝ်ႈမဵဝ်းၸိူဝ်ႉၶိူဝ်းပေႃႈၶဝ်ၼၼ်ႉ ဢၢၼ်ႇပွင်းၵၼ်ပဵၼ် ႁဵင်ၸဵတ်းပၢၵ်ႇပၢႆႁူၵ်းသိပ်းဢေႃႈ။ ၶဝ်ၸိူဝ်းၼႆႉပဵၼ်ၵေႃႉဢၼ်တၢတ်ႈၼိူင်ႇႁႂ်ႈလႆႈ ၵိုတ်ႉႁၢပ်ႇဢမူႉႁိူၼ်းပိၵ်ႈမၢၼ်ႇၽြႃးပဵၼ်ၸဝ်ႈဢေႃႈ။

14ၵူၼ်းမဵဝ်း လေႇဝီႉ ၸမ်ႉ၊ ပဵၼ် သေႇမႃႇယႃႉ လုၵ်ႈၸၢႆး ႁႃႇသုပ်ႉ ၊ လုၵ်ႈၸၢႆး ဢႃႇၸရီႉၵမ်ႇ လုၵ်ႈၸၢႆး ႁႃႇသီႉပီႉ ဢၼ်ပဵၼ်မဵဝ်းၸိူဝ်ႉၶိူဝ်း မေႇရႃႇရီႉ ၼၼ်ႉပႃးၼိုင်ႈ၊-

15ပႃႉၵပိၵ်ႉၵႃႇ၊ ႁေးရိတ်ႉ၊ၵလႃးလႃႉ သၢမ်ပႃး၊ မတ်ႉတၼီႉ လုၵ်ႈၸၢႆး မီႉၶႃႇ ၊ လုၵ်ႈၸၢႆး ၸီႉၶရီႉ ၊ လုၵ်ႈၸၢႆး ဢႃႇသပ်ႉ ၼၼ်ႉပႃးၼိုင်ႈ၊-

16ဢေႃးပတီႉ လုၵ်ႈၸၢႆး သေႇမႃႇယႃႉ ၊ လုၵ်ႈၸၢႆး ၵလႃးလႃႉ ၊ လုၵ်ႈၸၢႆး ယေႇတူႉသုၼ်ႇ ပႃးၼိုင်ႈ၊ ပေႇရၶီႉ လုၵ်ႈၸၢႆး ဢႃႇသႃႉ ၊ လုၵ်ႈၸၢႆး ဢေးလႃႉၵႃႇၼႃႉ ဢၼ်ယူႇၵႃႈတီႈဝၢၼ်ႈၵူၼ်း ၼေႇတေႃႇၽႃႇသီႉ ၸိူဝ်းၼၼ်ႉပႃးၼိုင်ႈဢေႃႈ။-

17ၵူၼ်းဢၼ်ပႂ်ႉၽၵ်းတူၸမ်ႉ၊ ပဵၼ် သႃႇလုမ်ႇ၊ ဢၵ်ႉၵုပ်ႉ၊ တႃႇလမုၼ်ႇ၊ ဢႁီႉမၼ်ႇ ဢိၵ်ႇတင်းပီႈၼွင်ႉၶဝ်မုၵ်ႉၸိူဝ်းၼိုင်ႈဢေႃႈ။-

18သႃႇလုမ်ႇ ၼၼ်ႉ ပဵၼ်ၵႄႇၽၵ်းတူတၢင်းဝၼ်းဢွၵ်ႇဢၼ်ၶုၼ်ႁေႃၶမ်းၶဝ်ႈၼၼ်ႉဢေႃႈ။ ၶဝ်ၸိူဝ်းၼႆႉလႆႈပဵၼ်ၵူၼ်းပႂ်ႉၽၵ်းတူဢၼ်ပႃးလူၺ်ႈမုၵ်ႉလူၺ်ႈၸိူဝ်းၵူၼ်းမဵဝ်း လေႇဝီႉ ဢေႃႈ။-

19သႃႇလုမ်ႇ လုၵ်ႈၸၢႆး ၵေႃးရႃႉ ၊ လုၵ်ႈၸၢႆး ဢေးပျႃႇသပ်ႉ ၊ လုၵ်ႈၸၢႆး ၵေႃးရႃႉ ၼၼ်ႉဢိၵ်ႇတင်း ပီႈၼွင်ႉမၼ်းဢၼ်ပဵၼ်မဵဝ်းၸိူဝ်ႉၶိူဝ်းပေႃႈမၼ်း၊ ၵူၼ်းမဵဝ်း ၵေႃႇရသီႉ ၸိူဝ်းၼၼ်ႉ လႆႈပႂ်ႉလူပႂ်ႉထိင်းတၢင်းဢၼ်ၵိုတ်ႉဢၼ်ႁၢပ်ႇဢမူႉၸဝ်ႈလႄႈ ပဵၼ်ၵူၼ်းပႂ်ႉၽၵ်းတူသုမ်ႉထဵင်ၸဝ်ႈဢေႃႈ။ ပူႇပေႃႈၶဝ်ၼၼ်ႉလႆႈပႂ်ႉလူပႂ်ႉထိင်းတပ်ႉပူဝ်ႇပႃႇထႃႇဝရႃႉၽြႃးလႄႈ ပဵၼ်ၵေႃႉဢၼ်ပႂ်ႉၼႃႈသုမ်ႉထဵင်ၸဝ်ႈဢေႃႈ။-

20ၽီႉၼႁတ်ႉ လုၵ်ႈၸၢႆး ဢေးလႃႇၸႃႇ လႆႈဢုပ်ႉၵႃႈၼိူဝ်ၶဝ်ၼၼ်ႉ မိူဝ်ႈၵွၼ်ႇဢွၼ်ၼႆႉၼၼ်ႉလႄႈ ထႃႇဝရႃႉၽြႃးမီးယူႇလူၺ်ႈၵၼ်တင်းမၼ်းၼၼ်ႉဢေႃႈ။-

21ၸႃႇၶရီႉ လုၵ်ႈၸၢႆး မသေးလမီႉ ပဵၼ်ၵေႃႉဢၼ်ပႂ်ႉၽၵ်းတူမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈၼၼ်ႉဢေႃႈ။-

22ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်လိူၵ်ႈၵဵပ်းဢဝ် ႁႂ်ႈလႆႈပဵၼ်ၵေႃႉဢၼ်ပႂ်ႉၽၵ်းတူၼၼ်ႉ ပွင်းၵၼ်ပဵၼ်သွင်ပၢၵ်ႇသိပ်းပၢႆသွင်ၵေႃႉဢေႃႈ။ ၶဝ်ၼၼ်ႉလႆႈၶၢမ်ႇတၢင်းဢၼ်မၢတ်ႈမၢႆၶဝ်ႈပႃး ၼႂ်းၸရၢင်းတီႈဝၢၼ်ႈၶဝ်လႄႈ ပဵၼ်ၵေႃႉဢၼ် ၶုၼ်လူင် တႃႇဝိတ်ႈ ဢိၵ်ႇတင်း ပရေႃးၽႅတ်ႈ သမူၺ်ႇလႃႉ ဢၼ်ပဵၼ်ၵေႃႉဢၼ်ႁူပွင်ႇတႃလႅင်းၼၼ်ႉ ၶၢၼ်းဝႆႉၼႂ်းဢရႃႇၶဝ်ၼၼ်ႉဢေႃႈ။-

23ၶဝ်ဢိၵ်ႇတင်းလုၵ်ႈလၢင်းၶဝ်ၼၼ်ႉ လႆႈပႂ်ႉလူပႂ်ႉထိင်းၽၵ်းတူႁိူၼ်းထႃႇဝရႃႉၽြႃး ဢၼ်ဝႃႈသုမ်ႉထဵင်ၸဝ်ႈၼၼ်ႉ ၸွမ်းလူၺ်ႈတီႈၽႂ်တီႈမၼ်းဢေႃႈ။-

24ၵူၼ်းပႂ်ႉၽၵ်းတူၸိူဝ်းၼၼ်ႉ လႆႈဢွၼ်ၵၼ်ပႂ်ႉယူႇၵႃႈတီႈတၢင်းဢွၵ်ႇ၊ တၢင်းတူၵ်း၊ တၢင်းႁွင်ႇ၊ တၢင်းၸၢၼ်း သီႇၼႃႈဢေႃႈ။-

25ပီႈၼွင်ႉၶဝ်ဢၼ်ယူႇၵႃႈတီႈဝၢၼ်ႈၶဝ်ၸိူဝ်းၼၼ်ႉ၊ ၸဵတ်းဝၼ်းၸဵတ်းဝၼ်းလႆႈဢွၼ်ၵၼ်မႃးႁႂ်ႈလႆႈမီးလူၺ်ႈၵၼ်တင်းၶဝ် ၸွမ်းၵႃႈၼင်ႇဢၼ်တူၵ်းလႄႉတူၵ်းၵမ်းၼၼ်ႉဢေႃႈ။-

26ၵႄႇၽၵ်းတူသီႇၵေႃႉဢၼ်ပဵၼ်ၵူၼ်းမဵဝ်း လေႇဝီႉ ၼၼ်ႉ ၸွမ်းၵႃႈၼင်ႇဢၼ်လႆႈၶၢမ်ႇဢရႃႇဢၼ်သေႇသေႇၼၼ်ႉလႄႈ လႆႈဢွၼ်ၵၼ်ပႂ်ႉလုၵ်းတင်းလၢႆ ဢိၵ်ႇတင်းတိူၵ်ႈၽၼ်ႇတႃႇႁိူၼ်းပိၵ်ႈမၢၼ်ႇၽြႃးပဵၼ်ၸဝ်ႈတင်းလၢႆယူႇဢေႃႈ။-

27ၵွပ်ႈပိူဝ်ႈဢၼ်ၶဝ်လႆႈပႂ်ႉ ၸိူဝ်ႉၼင်ႇၼၼ်သေလႄႈ၊ ၵူႈၼႂ်ၵူႈၼႂ်လႆႈၽုၺ်ႇၽၵ်းတူၼၼ်ႉလႄႈ၊ ၶဝ်လႆႈဢွၼ်ၵၼ်ၼွၼ်းၵႃႈတီႈလဵပ်ႈႁွပ်ႈႁိူၼ်းပိၵ်ႈမၢၼ်ႇၽြႃးပဵၼ်ၸဝ်ႈဢေႃႈ။-

28ၵမ်ႈၽွင်ႈၵေႃႈလႆႈပႂ်ႉၶိူင်ႈပိူင်ဢၼ်ၵိုတ်ႉႁၢပ်ႇဢမူႉၸဝ်ႈၸိူဝ်းၼၼ်ႉလႄႈ လႆႈဢွၼ်ၵၼ်ဢဝ်သႂၢင်းၶဝ်ႈယူႇ ဢဝ်ဢွၵ်ႇယူႇ ၸွမ်းၵႃႈၼင်ႇဢၼ်ၼပ်ႉဢၼ်ဢၢၼ်ႇၼၼ်ႉဢေႃႈ။-

29ၵမ်ႈၽွင်ႈၵေႃႈလႆႈၶၢမ်ႇတၢင်းဢၼ်ၶၢၼ်းဝႆႉ ႁႂ်ႈလႆႈပႂ်ႉလူပႂ်ႉထိင်းၶိူင်ႈပိူင်ဢၼ်သုင်းဢၼ်သွင်ႇတင်းလၢႆ ဢိၵ်ႇတင်းၶိူင်ႈပိူင်ထႃႇၼႃႉတီႈမူတ်းၸၢင်ႇၸဝ်ႈၵႃႈမီး၊ ၽွင်ၶဝ်ႈမုၼ်း၊ ၼမ်ႉၸပိတ်ႈ၊ ၼမ်ႉမၼ်း၊ လေႃႇပၢၼ်ႇ မဵဝ်းၼၢမ်ႇသႃႇတင်းလၢႆလႄႈယူႇဢေႃႈ။-

30ၵူၼ်းမဵဝ်းယိတ်ႈပရေႃးႁဵၵ်ႈၵမ်ႈၽွင်ႈၵေႃႈ လႆႈဢွၼ်ၵၼ်ၽေႃႇႁဵတ်းၼမ်ႉမၼ်းၼၢမ်ႇသႃႇဢေႃႈ။-

31မတ်ႉတီႉသီႉ လုၵ်ႈၸၢႆး သႃႇလုမ်ႇ ဢၼ်ပဵၼ်မဵဝ်းၸိူဝ်ႉၶိူဝ်း ၵေႃႇရသီႉ ၼႂ်းၵူၼ်းမဵဝ်း လေႇဝီႉ ၼၼ်ႉ လႆႈမီးဢရႃႇဢၼ်ပႂ်ႉမဵဝ်း ၶဝ်ႈမုၼ်းဢၼ်ဢဝ်တင်းၶႅပ်းလဵၵ်းၽဝ်ၼၼ်ႉဢေႃႈ။-

32ပီႈၼွင်ႉၶဝ်ဢၼ်ပဵၼ်မဵဝ်းၸိူဝ်ႉၶိူဝ်း ၵေႃႇရသီႉ ၵမ်ႈၽွင်ႈၼၼ်ႉလႆႈဢွၼ်ၵၼ်ပႂ်ႉလူပႂ်ႉထိင်းၶဝ်ႈမုၼ်းၽၢႆႇၼႃႈၸဝ်ႈ ႁႂ်ႈလႆႈပွင်မႄးပွင်ႁႅၼ်း ပုၼ်ႈဝၼ်းၵမ်သိၼ်ၵူႈဝၼ်းဢေႃႈ။-

33ၶဝ်ၸိူဝ်းဢၼ်ႁဵတ်းၵႂၢမ်း ဢၼ်ပဵၼ်တူၼ်ႈပဵၼ်ငဝ်ႈ ၼႂ်းမဵဝ်းၸိူဝ်ႉၶိူဝ်းပေႃႈၶဝ်ၼႂ်းမဵဝ်း လေႇဝီႉ ၼၼ်ႉၸိူဝ်းၼၼ်ႉ လႆႈယူႇၵႃႈတီႈ လုၵ်းႁိူၼ်းၸဝ်ႈတင်းလၢႆလႄႈ လႆႈလွတ်ႈတၢင်းဢမူႉတၢင်ႇၸိူဝ်ႉတၢင်ႇဢၼ် ၵွပ်ႈပိူဝ်ႈဢၼ်ၶဝ်လႆႈပႂ်ႉဢမူႉၶဝ်ယူႇ ၵူႈဝၼ်းၵူႈၶိုၼ်းဢမ်ႇထၢတ်ႇၼၼ်ႉဢေႃႈ။-

34ၶဝ်ၸိူဝ်းၼႆႉၸမ်ႉ၊ ပဵၼ်ၶဝ်ၸိူဝ်းဢၼ် ပဵၼ်တူၼ်ႈပဵၼ်ငဝ်ႈၼႂ်းမဵဝ်းၸိူဝ်ႉၶိူဝ်းပေႃႈၶဝ် ၼႂ်းမဵဝ်း လေႇဝီႉ ၼၼ်ႉ ၸွမ်းလူၺ်ႈတၢင်းဢၼ်ၶဝ်သိုပ်ႇလူင်းမႃးၼၼ်ႉလႄႈ ပဵၼ်ငဝ်ႈပဵၼ်ႁူဝ်သေလႄႈ ဢွၼ်ၵၼ်တူၵ်းတီႈတူၵ်းလႅၼ်ယူႇၵႃႈတီႈဝဵင်း ယေႇရူႉသလႅမ်ႇ ဢေႃႈ။

35ၵႃႈတီႈဝဵင်း ၵီႉပွင်ႇ ၼၼ်ႉ ယေႇႁီႉလႃႉ ပေႃႈ ၵီႉပွင်ႇ ဢၼ်မေးမၼ်းလႆႈၸိုဝ်ႈ မႃႇၶႃႇ ၼၼ်ႉယူႇဢေႃႈ။-

36လုၵ်ႈၸၢႆးတူၼ်ႈမၼ်းၸမ်ႉ၊ ပဵၼ် ဢႃႇပတုၼ်ႇ ၊ လိုၼ်းမၼ်းၼၼ်ႉ ၸူႉရႃႉ၊ ၵီႉသႃႉ၊ ပႃႇလႃႉ၊ ၼေးရႃႉ၊ ၼႃႇတပ်ႉ ၊-

37ၵေးတေႃး၊ ဢႁီႉဢေႃး၊ ၸႃႇၶရီႉ တင်း မီႉၵလုတ်ႉ ဢေႃႈ။-

38လုၵ်ႈၸၢႆး မီႉၵလုတ်ႉ ၸမ်ႉ၊ ပဵၼ် သီႉမၢမ်ႇ ဢေႃႈ၊ ၶဝ်ၸိူဝ်းၼႆႉတူၵ်းတီႈတူၵ်းလႅၼ်ယူႇလူၺ်ႈၵၼ်တင်းပီႈၼွင်ႉၶဝ် ၵႃႈၼႂ်းဝဵင်း ယေႇရူႉသလႅမ်ႇ ၵႃႈတီႈႁိမ်းမူႇပီႈၸိူဝ်းၼွင်ႉၽၢၵ်ႇၼိုင်ႈဢေႃႈ။-

39ၼေးရႃႉ မီးလုၵ်ႈၸၢႆး ၵီႉသႃႉ၊ ၵီႉသႃႉ မီးလုၵ်ႈၸၢႆး သေႃးလူႉ၊ သေႃးလူႉ မီးလုၵ်ႈၸၢႆး ယေႃးၼသၼ်ႇ၊ မေႇလၶီႉသႂႃႇ၊ ဢၽီႉၼတပ်ႉ တင်း ဢီႉသပႃႇလႃႉ ဢေႃႈ။-

40လုၵ်ႈၸၢႆး ယေႃးၼသၼ်ႇ ၸမ်ႉ၊ ပဵၼ် မေးရိပ်ႉပႃႇလႃႉ ၊ လုၵ်ႈၸၢႆး မေးရိပ်ႉပႃႇလႃႉ ပဵၼ် မီႉၶႃႇ ၊-

41လုၵ်ႈၸၢႆး မီႉၶႃႇ ပဵၼ် ပီႉသုၼ်ႇ၊ မေးလႅၵ်ႉ၊ တႃႇရႃႇ တင်း ဢႃႇၶတ်ႉ ဢေႃႈ။-

42ဢႃႇၶတ်ႉ ၼၼ်ႉ မီးလုၵ်ႈၸၢႆး ယေႇႁေႃးတႃႉ၊ ယေႇႁေႃးတႃႉ မီးလုၵ်ႈၸၢႆး ဢႃႇလမိတ်ႉ၊ ဢႃႇၸမႃႇဝိတ်ႉ တင်း ၸီႉမရီႉ ဢေႃႈ၊ ၸီႉမရီႉ ၼၼ်ႉ မီးလုၵ်ႈၸၢႆး မေႃႇၸႃႉ ၊-

43မေႃႇၸႃႉ မီးလုၵ်ႈၸၢႆး ပီႉၼႃႉ၊ ပီႉၼႃႉ မီးလုၵ်ႈၸၢႆး ရေႇၽႃႇယႃႉ၊ ရေႇၽႃႇယႃႉ မီးလုၵ်ႈၸၢႆး ဢေးလႃႇသႃႉ၊ ဢေးလႃႇသႃႉ မီးလုၵ်ႈၸၢႆး ဢႃႇၸေးလႃႉ ဢေႃႈ။-

44ဢႃႇၸေးလႃႉ မီးလုၵ်ႈၸၢႆးႁူၵ်းၵေႃႉဢၼ်လႆႈၸိုဝ်ႈ ဢႃႇၸရီႉၵမ်ႇ၊ ပေႃးၶေႇရူႉ၊ ဢီႉသမေႇလႃႉ၊ သရီႉယႃႉ၊ ဢေႃးပတီႉ တင်း ႁႃႇၼၼ်ႇ ဢေႃႈ။ ၶဝ်ၵႃႈမီးၼႆႉပဵၼ်လုၵ်ႈၸၢႆး ဢႃႇၸေးလႃႉ ဢေႃႈ။