1 Chronicles 21 — Shan

1လိုၼ်းၼၼ်ႉ ၸႃႇတၢၼ်ႇ လုၵ်ႉယူႇၽၢႆႇၼိုင်ႈတင်းမဵဝ်း ဢီႉသရေႇလႃႉ လႄႈတိုၵ်းယူင်း တႃႇဝိတ်ႈ ႁႂ်ႈမၼ်းၼပ်ႉဢၢၼ်ႇမဵဝ်း ဢီႉသရေႇလႃႉ ဢေႃႈ။-

2တႃႇဝိတ်ႈ ၵေႃႈ မီးဢမိင်ႉတီႈ ယႂႃႇၽႃႉ ဢိၵ်ႇတင်းၶုၼ်ဢၼ်ဢုပ်ႉၵႃႈၼိူဝ်ၵူၼ်းတင်းလၢႆၸိူဝ်းၼၼ်ႉလႄႈဝႃႈ၊ သူဢွၼ်ၵၼ်ၵႂႃႇဢဝ်ၵႃႈတီႈၸႃႉၸဵမ်ဝဵင်း ပေႇရသေႇၽႃႉ ၊ တေႃႇထိုင်ႁွတ်ႈဝဵင်း တၢၼ်ႇ လႄႈ ၼပ်ႉဢၢၼ်ႇၵူၼ်းမဵဝ်း ဢီႉသရေႇလႃႉ တင်းလၢႆသေယဝ်ႉ၊ သႂၢင်းပၼ်ၸရၢင်းတီႈၵဝ် ႁႂ်ႈၵဝ်လႆႈႁူႉလွင်ႈဢၼ်ၵူၼ်းပွင်းၵၼ်မီးၼမ်လႂ်ၼၼ်ႉတႃႉ၊ ဝႃႈၼင်ႇၼႆဢေႃႈ။-

3ယႂႃႇၽႃႉ ၵေႃႈ လဝ်ႊလၢတ်ႈလႄႈဝႃႈ ႁႂ်ႈထႃႇဝရႃႉၽြႃးထၢပ်ႈၵူၼ်းထႅင်ႈလႄႈ ႁႂ်ႈၵူၼ်းမၼ်းၸဝ်ႈယႂ်ႇၽႄႈၼမ်ၵိုၼ်းမႃးပၢၵ်ႇပုၼ်ႈ ၵႃႈဢၼ်မီးၼၼ်ႉသေၵမ်းလူၺ်ႈ။ ၼႂ်းဝႃႈၼၼ်သေၵေႃႈ ၸဝ်ႈႁဝ်းၶႃႈၸဝ်ႈၶုၼ်လူင်တီႈၶႃႈ၊ ၶဝ်ၵႃႈမီးၼၼ်ႉပဵၼ်ၶႃႈၸဝ်ႈႁဝ်းဢမ်ႇၸႂ်ႈတီႈၶႃႈႁိုဝ်။ ပိူဝ်ႈဢၼ်ပဵၼ်ၼင်ႇၼႆလႄႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈၵဝ်ၶႃႈၸီႇယၢင်ႇဢမူႉၼႆႉၼင်ႇႁိုဝ်တီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းႁဵတ်းလွင်ႈဢၼ်မဵဝ်း ဢီႉသရေႇလႃႉ တၵ်းၽိတ်းပိူင်ႈၼင်ႇႁိုဝ်တီႈၶႃႈ၊ ဝႃႈၼင်ႇၼႆဢေႃႈ။-

4ၵူၺ်းၵႃႈဢမိင်ႉၶုၼ်ႁေႃၶမ်းပႄႉၼႅင်ႇၵႂၢမ်း ယႂႃႇၽႃႉ လႄႈ ယႂႃႇၽႃႉ ဢွၵ်ႇသေလႄႈ လႄႇလဵပ်ႈၵႂႃႇၵႃႈၼႂ်းမိူင်း ဢီႉသရေႇလႃႉ တင်းသဵင်ႈတင်းမူတ်းသေယဝ်ႉ၊ ၶိုၼ်းႁွတ်ႈထိုင်ၵႃႈတီႈဝဵင်း ယေႇရူႉသလႅမ်ႇ ဢေႃႈ။

5ယႂႃႇၽႃႉ ၵေႃႈ ဢဝ်ၸရၢင်းၵူၼ်းတင်းလၢႆ ဢၢၼ်ႇပွင်းၵၼ်ယဝ်ႉၼၼ်ႉ သၢၵ်ႈတီႈ တႃႇဝိတ်ႈ လႄႈ ၵႃႈတီႈမဵဝ်း ဢီႉသရေႇလႃႉ မီး ႁူဝ်ႁၢၼ်ၵူၼ်းသိုၵ်း ဢၼ်ယိပ်းၵမ်လၢပ်ႇလၢၼ်ႉပၢႆသႅၼ်ၼိုင်ႈ၊ ၵႃႈတီႈမဵဝ်း ယူႉတႃႉ ၊ မီးႁူဝ်ႁၢၼ်ၵူၼ်းသိုၵ်းယိပ်းၵမ်လၢပ်ႇ သီႇသႅၼ်ပၢႆၸဵတ်းမိုၼ်ႇဢေႃႈ။-

6ၵူၺ်းၵႃႈမဵဝ်း လေႇဝီႉ တင်းမဵဝ်း ပိၼ်ႇယႃႇမိၼ်ႇ ဢမ်ႇလႆႈၶၢမ်ႇတၢင်းဢၼ်ၼပ်ႉဢၼ်ဢၢၼ်ႇၶဝ်ႈပႃးၼႂ်းၸရၢင်းၶဝ်ၼၼ်ႉ ၵွပ်ႈပိူဝ်ႈဢၼ် ယႂႃႇၽႃႉ လီႁင်ႈဢဵတ်ႇသဵတ်ႇဢမိင်ႉၶုၼ်ႁေႃၶမ်းၼၼ်ႉ။-

7ၽြႃးပဵၼ်ၸဝ်ႈဢမ်ႇၵျိူၵ်ႈလွင်ႈတၢင်းဢၼ်ၼပ်ႉဢၼ်ဢၢၼ်ႇၼၼ်ႉလႄႈပၼ်တၢမ်ႇတီႈမဵဝ်း ဢီႉသရေႇလႃႉ သေယဝ်ႉ၊-

8တႃႇဝိတ်ႈ တွင်းပၢၼ်ႇလဝ်ႊလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ ၶႃႈၸဝ်ႈၽိတ်းပိူင်ႈၼႃႇလူင်လၢင် ၼႂ်းလွင်ႈတၢင်းဢၼ်ၶႃႈၸဝ်ႈႁဵတ်းမႅၼ်ႈၼၼ်ႉတီႈၶႃႈယဝ်ႉ။ ၶႅၼ်းတေႃႈပွႆႇလွတ်ႈဢပႅတ်ႈၶႃႈၸဝ်ႈႁဝ်းသေၵမ်းတီႈၶႃႈ။ ၶႃႈၸဝ်ႈလႆႈႁဵတ်းဢမူႉဢၼ်မိူၵ်ႈၼႃႇလူင်လၢင်တီႈၶႃႈယဝ်ႉ၊ ဝႃႈၼင်ႇၼႆဢေႃႈ။

9ထႃႇဝရႃႉၽြႃးမီးဢမိင်ႉတီႈ ၵၢတ်ႉ ဢၼ်ပဵၼ်ၵူၼ်းဢၼ်ႁူပွင်ႇတႃလႅင်း တီႈ တႃႇဝိတ်ႈ ၼၼ်ႉလႄႈဝႃႈ၊-

10မႂ်းၵႂႃႇမွၵ်ႇလၢတ်ႈတီႈ တႃႇဝိတ်ႈ လႄႈဝႃႈ၊ ထႃႇဝရႃႉၽြႃးမီးဢမိင်ႉၸဝ်ႈၸမ်ႉ၊ ၵဝ်ၼႄပျႃးလွင်ႈတၢင်းသၢမ်ပိူင်တီႈမႂ်းဢေႃႈ။ လိူၵ်ႈၵဵပ်းဢဝ်သေပိူင်ပိူင် ပုၼ်ႈဢၼ်ၵဝ်တၵ်းႁဵတ်းတီႈမႂ်းတႃႉ၊ ဝႃႈၼင်ႇၼႆလႄႈ၊-

11ၵၢတ်ႉ ၼၼ်ႉ ၵႂႃႇၵႃႈတီႈ တႃႇဝိတ်ႈ လႄႈ လဝ်ႊလၢတ်ႈလႄႈဝႃႈ၊ ထႃႇဝရႃႉၽြႃးမီးဢမိင်ႉၸဝ်ႈၸမ်ႉ၊-

12ၼႂ်းၽေးဢၼ်ၶဝ်ႈၵႃႈမၢၵ်ႇပႅင်း သၢမ်ပီႊတဵမ်တဵမ်၊ ၽေးဢၼ်လႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈ ၵႃႈတီႈၽၢႆႇၼႃႈရၢၼ်ႇသူႇမႂ်းတင်းလၢႆလႄႈ၊ လၢပ်ႇလႅဝ်းရၢၼ်ႇသူႇၸိူဝ်းၼၼ်ႉလႆႈၸွမ်းၶိုတ်းမႂ်းယူႇၼၼ်ႉသၢမ်လိူၼ်တဵမ်တဵမ်၊ ၽေးလၢပ်ႇထႃႇဝရႃႉၽြႃး ဢၼ်ဝႃႈၵႃႇလႃႉႁႃႈလႅင်မိူင်း ႁွတ်ႈထိုင်ၵႃႈတီႈမိူင်းၸဝ်ႈလႄႈ တမၢၼ်ႇၵၢင်ႁၢဝ်ထႃႇဝရႃႉၽြႃး ယႃႉပႅတ်ႈၵႃႈၼႂ်းၼမ်ႉၼႂ်းလိၼ် ဢီႉသရေႇလႃႉ ၵူႈတီႈၵူႈလႅၼ်ၼၼ်ႉ သၢမ်ဝၼ်းတဵမ်တဵမ် ၸိူဝ်းၼၼ်ႉၸိုင် လိူၵ်ႈၵဵပ်းဢဝ်သေၸိူဝ်ႉသေပိူင်တႃႉ၊ ဝႃႈၼင်ႇၼႆတီႈၶႃႈယဝ်ႉ။ ပိူဝ်ႈၼႆလႄႈ မိူဝ်ႈလဵဝ်ၼႆႉၶႅၼ်းတေႃႈ ၶႆႈၸႂ်ဝူၼ်ႉၸႂ်လူၺ်ႈလွင်ႈ ဢၼ်ၶႃႈၸဝ်ႈတၵ်းလႆႈၶိုၼ်းလၢတ်ႈတီႈၵေႃႉဢၼ်ပွႆႇၸႂ်ႉၶႃႈၸဝ်ႈမႃးၼၼ်ႉ ၸိူဝ်ႉၼင်ႇႁိုဝ်ၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

13တႃႇဝိတ်ႈ ၵေႃႈၶိုၼ်းလၢတ်ႈတီႈ ၵၢတ်ႉ လႄႈဝႃႈ၊ ၵဝ်ၼႆႉႁွတ်ႈထိုင်ၵႃႈၼႂ်းတၢင်းဢၼ်ၵိတ်ႇဢၼ်ၵႅပ်ႈၼႃႇလူင်လၢင်ယဝ်ႉလူင်ပႄႇ။ ႁႂ်ႈၵဝ်ႁွတ်ႈထိုင်ၵႃႈၼႂ်းမိုဝ်းထႃႇဝရႃႉၽြႃးသေၵမ်းလူၺ်ႈ။ ၵရူႉၼႃႇမၼ်းၸဝ်ႈယႂ်ႇၼႃႇဢေႃႈ။ ယႃႇပေႁႂ်ႈၵဝ်ႁွတ်ႈထိုင်ၵႃႈၼႂ်းမိုဝ်းၵူၼ်းသေၵမ်း၊ ဝႃႈၼင်ႇၼႆဢေႃႈ။

14ထႃႇဝရႃႉၽြႃးၵေႃႈပွႆႇၸႂ်ႉၵႃႇလႃႉႁႃႈလႅင်မိူင်းႁွတ်ႈထိုင်ၵႃႈတီႈမဵဝ်း ဢီႉသရေႇလႃႉ လႄႈ ၵူၼ်းတၢႆၸဵတ်းမိုၼ်ႇဢေႃႈ။-

15ၽြႃးပဵၼ်ၸဝ်ႈပွႆႇၸႂ်ႉတမၢၼ်ႇၵၢင်ႁၢဝ်မႃး ႁႂ်ႈလႆႈယႃႉပႅတ်ႈဝဵင်း ယေႇရူႉသလႅမ်ႇ လႄႈ၊ မိူဝ်ႈဢၼ်မၼ်းယင်းတိုၵ်ႉယႃႉပႅတ်ႈယူႇၼၼ်ႉၸိုင်၊ ထႃႇဝရႃႉၽြႃးလူတူၺ်းသေယဝ်ႉ၊ ၶုၵ်းၸႂ်လႆႈမႆႈၸႂ်လူၺ်ႈၽေးၼၼ်ႉလႄႈ မီးဢမိင်ႉတီႈတမၢၼ်ႇၵၢင်ႁၢဝ်ဢၼ်ယႃႉပႅတ်ႈၼၼ်ႉလႄႈဝႃႈ၊ ပေႃးယဝ်ႉ။ ယိုတ်းဢဝ်မိုဝ်းမႂ်းၶိုၼ်းသေတႃႉ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉ ၸုၵ်းယူႇၵႃႈတီႈႁိမ်းတလၢင်းယဵပ်ႇၶဝ်ႈ ဢေႃးၼၼ်ႇ ၵူၼ်း ယေႇပူႉသီႉ ၼၼ်ႉဢေႃႈ။-

16တႃႇဝိတ်ႈ ႁႅၼ်တူၺ်းလႄႈႁၼ်တမၢၼ်ႇၵၢင်ႁၢဝ်ထႃႇဝရႃႉၽြႃး ဢဝ်မိုဝ်းမၼ်းယိပ်းၵမ်ဢဝ်လၢပ်ႇသေလႄႈ မုင်းၵႃႈၼိူဝ်ဝဵင်း ယေႇရူႉသလႅမ်ႇ ယူႇလႄႈ ၸုၵ်းယူႇၵႃႈတီႈၵႄႈဝူင်ႈၵၢင်ၽႃႉၵၢင်ႁၢဝ်တင်းလိၼ်မိူင်းၼၼ်ႉသေယဝ်ႉ၊ တႃႇဝိတ်ႈ ဢိၵ်ႇတင်း ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ဢီႉသရေႇလႃႉ ၸိူဝ်းၼၼ်ႉ ၼုင်ႈၼင်ပေႃယူႇသေလႄႈ ဢွၼ်ၵၼ်ၶုပ်ႉမူပ်ႇၵူမ်ႈၼႃႈၶဝ်ယူႇဢေႃႈ။-

17တႃႇဝိတ်ႈ ၵေႃႈတွင်းပၢၼ်ႇတီႈၽြႃးပဵၼ်ၸဝ်ႈလႄႈဝႃႈ၊ ၵေႃႉဢၼ်ၸီႇယၢင်ႇႁႂ်ႈၼပ်ႉဢၢၼ်ႇၵူၼ်းဝၢၼ်ႈၵူၼ်းမိူင်းၸမ်ႉ၊ ပဵၼ်ၶႃႈၸဝ်ႈႁဝ်းၼႆႉဢမ်ႇၸႂ်ႈတီႈၶႃႈႁိုဝ်။ ၶႃႈၸဝ်ႈၽိတ်းပိူင်ႈတီႈၶႃႈယဝ်ႉ။ ၶႃႈၸဝ်ႈႁဵတ်းတူႉၸရိူၵ်ႈမႅၼ်ႈတီႈၶႃႈယဝ်ႉ။ သူဝ်းၸိူဝ်းၼႆႉၸမ်ႉ၊ ႁဵတ်းၵႃႈသင်မႅၼ်ႈတီႈၶႃႈ။ ထႃႇဝရႃႉၽြႃး ၽြႃးပဵၼ်ၸဝ်ႈၶႃႈၸဝ်ႈတီႈၶႃႈ၊ ႁႂ်ႈမိုဝ်းၸဝ်ႈႁဝ်းႁွတ်ႈထိုင်ၵႃႈၼိူဝ်ၶႃႈၸဝ်ႈ ဢိၵ်ႇတင်းပီႈၼွင်ႉၸိူဝ်ႉၶိူဝ်းၶႃႈၸဝ်ႈသေၵမ်းတီႈၶႃႈ။ ယႃႇပေႁႂ်ႈႁွတ်ႈထိုင်ၵႃႈၼိူဝ်ၵူၼ်းၸဝ်ႈႁဝ်းတင်းလၢႆ၊ လႆႈပၼ်တၢမ်ႇတီႈၶဝ်သေၵမ်းတီႈၶႃႈ၊ ဝႃႈၼင်ႇၼႆဢေႃႈ။

18တမၢၼ်ႇၵၢင်ႁၢဝ်ထႃႇဝရႃႉၽြႃး သင်ႇလၢတ်ႈတီႈ ၵၢတ်ႉ ႁႂ်ႈမၼ်းမွၵ်ႇလၢတ်ႈတီႈ တႃႇဝိတ်ႈ လူၺ်ႈလွင်ႈဢၼ် တႃႇဝိတ်ႈ တၵ်းလႆႈ ၶိုၼ်ႈၵႂႃႇလႄႈ တႄႇႁဵတ်းယိတ်ႈပလၢင်ႇပုၼ်ႈထႃႇဝရႃႉၽြႃး ၵႃႈတီႈတလၢင်းယဵပ်ႇၶဝ်ႈ ဢေႃးၼၼ်ႇ ၵူၼ်း ယေႇပူႉသီႉ ၼၼ်ႉသေယဝ်ႉ၊-

19တႃႇဝိတ်ႈ ၶိုၼ်ႈၵႂႃႇၸွမ်းၵႃႈၼင်ႇဢမိင်ႉထႃႇဝရႃႉၽြႃး ဢၼ် ၵၢတ်ႉ သင်ႇလၢတ်ႈၼၼ်ႉဢေႃႈ။-

20ဢေႃးၼၼ်ႇ ၼၼ်ႉ ဝၢႆႇတူၺ်းလႄႈႁၼ်တမၢၼ်ႇၵၢင်ႁၢဝ်သေယဝ်ႉ၊ မၼ်းဢိၵ်ႇတင်းလုၵ်ႈၸၢႆးမၼ်းသီႇၵေႃႉ ဢွၼ်ၵၼ်တဵတ်ႇမႅပ်ႉယူႇဢေႃႈ။ မိူဝ်ႈၼၼ်ႉ ဢေႃးၼၼ်ႇ ယင်းတိုၵ်ႉယဵပ်ႇၼူတ်ႈၶဝ်ႈယူႇဢေႃႈ။-

21ၼႂ်းမိူဝ်ႈဢၼ် တႃႇဝိတ်ႈ ယင်းတိုၵ်ႉမႃးၸူးၵႃႈတီႈ ဢေႃးၼၼ်ႇ ၼၼ်ႉယူႇၼၼ်ႉၸိုင်၊ ဢေႃးၼၼ်ႇ လူတူၺ်းလႄႈႁၼ် တႃႇဝိတ်ႈ သေယဝ်ႉ၊ လုၵ်ႉသေၵႃႈၼႂ်းတလၢင်းယဵပ်ႇၶဝ်ႈဢွၵ်ႇလႄႈ ၵူမ်ႈၵွမ်းၶုပ်ႉမူပ်ႇဝၢင်းႁူဝ် ၵႃႈတီႈၽၢႆႇၼႃႈ တႃႇဝိတ်ႈ ဢေႃႈ။-

22တႃႇဝိတ်ႈ ၵေႃႈမီးဢမိင်ႉတီႈ ဢေႃးၼၼ်ႇ လႄႈဝႃႈ၊ လွင်ႈၼင်ႇႁိုဝ်ၽေးၵႃႇလႃႉႁႃႈလႅင်မိူင်း တၵ်းထၢတ်ႇယဵၼ်သေၵႃႈၼႂ်းၵူၼ်းတင်းလၢႆၸိုင် ၶၢႆတီႈတလၢင်းယဵပ်ႇၶဝ်ႈၼႆႉၸွမ်းၵႃႈၼင်ႇဢၼ် ၵႃႈမၼ်းၶၼ်မၼ်းထိူၵ်ႈတၢၼ်ႇၼၼ်ႉပၼ်တီႈၵဝ် ႁႂ်ႈၵဝ်လႆႈတႄႇႁဵတ်း ယိတ်ႈပလၢင်ႇပုၼ်ႈထႃႇဝရႃႉၽြႃးသေၵမ်း။ မိူဝ်ႈဢၼ်ဝႃႈၼင်ႇၼႆၸိုင်၊-

23ဢေႃးၼၼ်ႇ လဝ်ႊလၢတ်ႈတီႈ တႃႇဝိတ်ႈ လႄႈဝႃႈ၊ ၸဝ်ႈႁဝ်းၶႃႈ၊ ၸဝ်ႈၶုၼ်လူင်တီႈၶႃႈ၊ ဢဝ်လႄႈႁဵတ်းၸွမ်းၵႃႈၼင်ႇဢၼ် ၸႂ်ၸဝ်ႈႁဝ်းမီးသေၵမ်းတီႈၶႃႈ။ တူၺ်းတီႈၶႃႈလူး၊ ၶႃႈၸဝ်ႈဢဝ်ဝူဝ်းပုၼ်ႈယိတ်ႈဢၼ်တုတ်ႇၽႆး၊ ၶိူင်ႈပိူင်ဢၼ်ပေႃႉၶဝ်ႈၼူတ်ႈၶဝ်ႈပုၼ်ႈၽိုၼ်း၊ ၶဝ်ႈပိူၵ်ႇၵျုင်ႇပုၼ်ႈၶိူင်ႈပုၵ်ႈၸေႃႇၽေႃးၸဵၼ်ႇသၢၵ်ႈတီႈၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈဢဝ်ၸိူဝ်းၼႆႉတင်းသဵင်ႈတင်းလူင် သၢၵ်ႈတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

24ၶုၼ်လူင် တႃႇဝိတ်ႈ မီးဢမိင်ႉတီႈ ဢေႃးၼၼ်ႇ လႄႈဝႃႈ၊ ဢမ်ႇၸႂ်ႈၵူၺ်ႉ၊ ၵဝ်တၵ်းပၼ်ၸွမ်းၵႃႈၼင်ႇဢၼ် ၵႃႈမၼ်းၶၼ်မၼ်းထိူၵ်ႈတၢၼ်ႇၼၼ်ႉလႄႈ သိုဝ်ႉဢဝ်ဢမၢၼ်ႇၶၼ်ပဵၼ်ဢေႃႈ။ ၵဝ်ဢမ်ႇသိမ်းဢဝ်ဢုၵ်ႉၸႃႇမႂ်းပုၼ်ႈထႃႇဝရႃႉၽြႃး။ ငိုၼ်းၵဝ်ယင်းဢမ်ႇသဵင်ႈလႄႈ ၵဝ်ဢမ်ႇမီးဢလူဝ်ႇၶႂ်ႈပုၵ်ႈၸေႃႇယိတ်ႈဢၼ်တုတ်ႇၽႆးၼၼ်ႉၵူၺ်ႉ၊ ဝႃႈၼင်ႇၼႆသေယဝ်ႉ၊-

25တႃႇဝိတ်ႈ ၸင်ႈႁိဝ်ႈၶမ်းႁူၵ်းပၢၵ်ႇၵျၢပ်ႈ သၶေးလႃႉ ပၼ်တီႈ ဢေႃးၼၼ်ႇ သေလႄႈ သိုဝ်ႉဢဝ်တီႈၼၼ်ႉသေယဝ်ႉ၊-

26တႃႇဝိတ်ႈ တႄႇႁဵတ်းယိတ်ႈပလၢင်ႇပုၼ်ႈထႃႇဝရႃႉၽြႃး ၵႃႈတီႈၼၼ်ႈလႄႈ ပုၵ်ႈၸေႃႇယိတ်ႈဢၼ်တုတ်ႇၽႆး ဢိၵ်ႇတင်းယိတ်ႈမိၵ်ႉသႃႇႁႃယႃႉဢေႃႈ။ ၼင်ႇၼၼ်လႄႈ ယၢမ်းမိူဝ်ႈဢၼ်သူးတွင်းပထၼႃႇတီႈ ထႃႇဝရႃႉၽြႃးၼၼ်ႉၸိုင် မၼ်းၸဝ်ႈဢဝ်ၽႆးတူၵ်းမႃးသႂ်ႇၵႃႈၼိူဝ်ယိတ်ႈပလၢင်ႇ၊ ယိတ်ႈဢၼ်တုတ်ႇၽႆးၼၼ်ႉသေလႄႈ ယူႇၵႃႈၼိူဝ်ၵၢင်ႁၢဝ်ဢိူဝ်ဢေႃႈ။-

27ထႃႇဝရႃႉၽြႃးသင်ႇလၢတ်ႈတီႈတမၢၼ်ႇၵၢင်ႁၢဝ်ၼၼ်ႉလႄႈ မၼ်းဢဝ်လၢပ်ႇမၼ်းသမ်ႉၶိုၼ်းသွတ်ႇသႂ်ႇဝႆႉၵႃႈၼႂ်းၵပ်းမၼ်းသေဢေႃႈ။

28မိူဝ်ႈၼၼ်ႉ တႃႇဝိတ်ႈ ႁူႉႁၼ်လွင်ႈဢၼ် ထႃႇဝရႃႉၽြႃးဢိူဝ်မၼ်းၵႃႈၼႂ်းတလၢင်းယဵပ်ႇၶဝ်ႈ ဢေႃးၼၼ်ႇ ၵူၼ်း ယေႇပူႉသီႉ ၼၼ်ႉသေယဝ်ႉ၊ ႁဵတ်းတၢင်းဢၼ်ပုၵ်ႈၸေႃႇယိတ်ႈၵႃႈတီႈၼၼ်ႈဢေႃႈ။-

29လွင်ႈမၼ်းၸမ်ႉ ၼႂ်းၶိင်ႇမိူဝ်ႈၼၼ်ႉ သုမ်ႉထဵင်ထႃႇဝရႃႉၽြႃးဢိၵ်ႇတင်းယိတ်ႈပလၢင်ႇဢၼ် မူဝ်းသေႇ ႁဵတ်းၵႃႈၼႂ်းထိူၼ်ႇမႃးယဝ်ႉၼၼ်ႉ မီးယူႇၵႃႈၼိူဝ်ထႃႇၼႃႉတီႈသုင်ဝဵင်း ၵီႉပွင်ႇ ဢေႃႈ။-

30တႃႇဝိတ်ႈ ဢမ်ႇႁတ်းၵႂႃႇလဝ်ႊထၢမ်တီႈၽြႃးပဵၼ်ၸဝ်ႈ ၵႃႈတီႈၽၢႆႇၼႃႈၼၼ်ႉ ၵွပ်ႈပိူဝ်ႈဢၼ်မၼ်းၵူဝ်ႁႄ လၢပ်ႇတမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉ။