1 Chronicles 29

Shan

← Chapter 28 Jump to:

1လႆႈသမ်ႉ ၶုၼ်လူင် တႃႇဝိတ်ႈ မီးဢမိင်ႉတီႈပရဵၵ်ႈသၢတ်ႈတင်းသဵင်ႈတင်းလူင်လႄႈဝႃႈ၊ လုၵ်ႈၸၢႆးၵဝ် သေႃးလမုၼ်ႇ ဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၼၼ်ႉ ဢသၢၵ်ႈလဵၵ်ႉလႄႈယင်းၼုမ်ႇဢေႃႈ။ ဢမူႉတၢင်းႁဵတ်းၸမ်ႉ၊ ယႂ်ႇၼႃႇဢေႃႈ။ ပိၵ်ႈမၢၼ်ႇဢၼ်လႆႈတႄႇႁဵတ်းၼၼ်ႉ ပဵၼ်ပုၼ်ႈၵူၼ်းဢမ်ႇၸႂ်ႈ။ ပဵၼ်ပုၼ်ႈထႃႇဝရႃႉၽြႃး ၽြႃးပဵၼ်ၸဝ်ႈဢေႃႈ။-

2ပိူဝ်ႈၼႆလႄႈ ၵႃႈၼင်ႇဢၼ်ၵဝ်တၢတ်ႈၼိူင်ႇၼၼ်ႉ ၵဝ်ပွင်ႁဵတ်းပွင်ႁႅၼ်းၶမ်းပုၼ်ႈဢၼ်တၵ်းႁဵတ်းၶိူင်ႈၶမ်း၊ ငိုၼ်းပုၼ်ႈဢၼ်တၵ်းႁဵတ်းၶိူင်ႈငိုၼ်း၊ တွင်းလိူင်ပုၼ်ႈဢၼ်တၵ်းႁဵတ်းၶိူင်ႈတွင်းလိူင်၊ လဵၵ်းပုၼ်ႈဢၼ်တၵ်းႁဵတ်းၶိူင်ႈလဵၵ်း၊ မႆႉၸိင်ပုၼ်ႈဢၼ်တၵ်းႁဵတ်းၶိူင်ႈမႆႉၸိင်၊ သႅင်ၸၢႆးၶႃးယွတ်ႇ ဢိၵ်ႇတင်းသႅင်ဢၼ်လီ ပုၼ်ႈဢၼ်တၵ်းၸီႇ၊ သႅင်ဢၼ်ဢရွင်ႇလုၵ်ႉႁိူဝ်ႈ၊ သႅင်ဢၼ်ပဵၼ်လဵၼ်းပဵၼ်လၢႆး၊ သႅင်ဢၼ်ထိူၵ်ႈၵႃႈထိူၵ်ႈၶၼ်၊ ႁိၼ်ၽိူၵ်ႇႁိၼ်ၶၢဝ်ဢၼ်ၼမ်ၼႃႇၸိူဝ်းၼၼ်ႉ ဝႆႉပုၼ်ႈႁိူၼ်းၽြႃးပဵၼ်ၸဝ်ႈၵဝ်ယဝ်ႉ။-

3ၵွပ်ႈပိူဝ်ႈဢၼ်ႁူဝ်ၸႂ်ၵဝ်ၸပ်းၸွႆးႁိူၼ်းၽြႃးပဵၼ်ၸဝ်ႈၵဝ်လႄႈ ၼွၵ်ႈသေဢုၵ်ႉၸႃႇ ဢၼ်ၵဝ်ပွင်ႁဵတ်းပွင်ႁႅၼ်းပုၼ်ႈႁိူၼ်းဢၼ်မူတ်းၸၢင်ႇၼၼ်ႉ၊ ၵဝ်ဢဝ်ၵႃႈၼႂ်းၽၼ်ႇတႃႇဢုၵ်ႉၸႃႇငိုၼ်းၶမ်း ဢၼ်ၵဝ်ပိူင်ႇၼၼ်ႉဢၼ်ဝႃႈ၊-

4ၶမ်း ဢေႃႇၽီႉရႃႉ သၢမ်ႁဵင် တလၢၼ်ႇတၢၼ်ႇ ဢိၵ်ႇတင်းငိုၼ်းလီပုၼ်ႈဢၼ်တၵ်းဢုမ်ႇႁေႃႇၽႃႁိၼ် ၸဵတ်းႁဵင် တလၢၼ်ႇတၢၼ်ႇ ၊-

5ၶမ်းပုၼ်ႈၶိူင်ႈၶမ်း၊ ငိုၼ်းပုၼ်ႈၶိူင်ႈငိုၼ်း ဢိၵ်ႇတင်းပုၼ်ႈၵႃႈဢၼ်သြႃႇသမႃးၶဝ်တၵ်းႁဵတ်းၵူႈၸိူဝ်ႉၵူႈပိူင်ၼၼ်ႉပၼ်ပုၼ်ႈႁိူၼ်းၽြႃးပဵၼ်ၸဝ်ႈၵဝ်ဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ ဝၼ်းမိူဝ်ႈၼႆႉ ၽူႈလႂ်ၶႂ်ႈဢဝ်တဵမ်ၵမ်တဵမ်မိုဝ်းတူဝ်ၸဝ်ႈၵဝ်ႇသေလႄႈ လူႇတၢၼ်းတီႈထႃႇဝရႃႉၽြႃး၊ ဝႃႈၼင်ႇၼႆသေယဝ်ႉ၊-

6ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ပီႈၼွင်ႉၸိူဝ်ႉၶိူဝ်းပေႃႈၶဝ် ၶုၼ်မဵဝ်း ဢီႉသရေႇလႃႉ တင်းလၢႆ၊ ၶဝ်ၸိူဝ်းဢၼ်ဢုပ်ႉၵႃႈၼိူဝ် ၵူၼ်းယေႈႁဵင်၊ ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇ၊ ၶဝ်ၸိူဝ်းဢၼ်ၸီႇယၢင်ႇဢမူႉၸဝ်ႈၶုၼ်ႁေႃၶမ်းတင်းလၢႆၸိူဝ်းၼၼ်ႉ မီးၸႂ်ၸေႇတၼႃႇလႄႈ၊-

7ဢွၼ်ၵၼ်လူႇၶမ်းႁႃႈႁဵင် တလၢၼ်ႇတၢၼ်ႇ တင်းတႅင်းၵႃးၶမ်း တရႅၵ်ႉ မိုၼ်ႇၼိုင်ႈ၊ ငိုၼ်းမိုၼ်ႇ တလၢၼ်ႇတၢၼ်ႇ ၊ တွင်းလိူင်မိုၼ်ႇပၢႆပႅတ်ႇႁဵင် တလၢၼ်ႇတၢၼ်ႇ ၊ လဵၵ်းသႅၼ် တလၢၼ်ႇတၢၼ်ႇ ပုၼ်ႈဢၼ်တၵ်းၵိုတ်ႉႁၢပ်ႇဢမူႉႁိူၼ်းၽြႃးပဵၼ်ၸဝ်ႈဢေႃႈ။-

8ၶဝ်ၸိူဝ်းဢၼ်မီးသႅင်မျၢတ်ႈၵေႃႈ၊ ဢွၼ်ၵၼ်ဢဝ်ဢၢပ်ႈပၼ်ၵႃႈၼႂ်းမိုဝ်း ယေႇႁေႇလႃႉ ၵူၼ်းမဵဝ်း ၵေႇရသုၼ်ႇ သႂၢင်းၶဝ်ႈၵႃႈၼႂ်းၽၼ်ႇတႃႇႁိူၼ်းထႃႇဝရႃႉၽြႃးဢေႃႈ။-

9မိူဝ်ႈၼၼ်ႉၵူၼ်းတင်းလၢႆဢွၼ်ၵၼ် ၸူမ်းသိူဝ်းလူၺ်ႈလွင်ႈဢၼ်ၶဝ်ပႃးၸႂ်ၸေႇတၼႃႇလူႇတၢၼ်းၵွပ်ႈပိူဝ်ႈဢၼ်ၶဝ်ပႃးႁူဝ်ၸႂ် ဢၼ်ၸေးၸုမ်ႇသေလႄႈ မီးၸႂ်ၸေႇတၼႃႇလႄႈလူႇတၢၼ်းၼၼ်ႉဢေႃႈ။ ၶုၼ်လူင် တႃႇဝိတ်ႈ ၊ ၵေႃႈမီးတၢင်းဢၼ်ၸူမ်းသိူဝ်းၼႃႇလူင်လၢင်လႄႈ ၸူမ်းသိူဝ်းဢေႃႈ။

10မိူဝ်ႈၼၼ်ႉ တႃႇဝိတ်ႈ ယွင်ႈယေႃးထႃႇဝရႃႉၽြႃးၵႃႈတီႈၽၢႆႇၼႃႈပရဵၵ်ႈသၢတ်ႈတင်းလၢႆလႄႈ တႃႇဝိတ်ႈ လဝ်ႊလၢတ်ႈလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ၊ ပေႃႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈ၊ ႁႂ်ႈၸဝ်ႈႁဝ်းမီးမင်ႇၵလႃႇၵမ်ႇၽႃႇသိုပ်ႇသိုပ်ႇတၢမ်းတၢမ်း သေၵမ်းလူၺ်ႈတီႈၶႃႈ။-

11ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းပျေႉၸုမ်ႇတင်းမုၼ်တၼ်းၶူဝ်းဢႃႇၼူႉၽေႃႇ၊ ဢၶႂၢင်ႉတၢင်းဢၼ်ပႄႉၼႅင်ႇ၊ ဢႃႇၼႃႇၸၢၵ်ႈတီႈၶႃႈဢေႃႈ။ ၸဝ်ႈႁဝ်းဢုပ်ႉပိူင်ႇၵႃႈဢၼ်မီးၵႃႈတီႈၽႃႉၵၢင်ႁၢဝ် ဢိၵ်ႇတင်းၵႃႈတီႈလိၼ်မိူင်းတီႈၶႃႈဢေႃႈ။ ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းပိူင်ႇသိုင်ႇၸိုင်ႈဝၢၼ်ႈမိူင်းတီႈၶႃႈဢေႃႈ။ ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းယႂ်ႇသုင်မျၢတ်ႈလီၼႃႇလႄႈ ပဵၼ်ၸိၵ်းပဵၼ်ၸွမ်ပိူၼ်ႈတင်းသဵင်ႈတင်းလူင်တီႈၶႃႈဢေႃႈ။-

12မုၼ်ၵုင်ႇသရေႇဢိၵ်ႇတင်းၸေးၸိမ်ႇဢုၵ်ႉၸႃႇ ဢွၵ်ႇပဵၼ်တီႈၸဝ်ႈႁဝ်းမႃးတီႈၶႃႈဢေႃႈ။ ၸဝ်ႈႁဝ်းဢုပ်ႉပိူင်ႇၵူၼ်းတင်းသဵင်ႈတင်းလူင်တီႈၶႃႈဢေႃႈ။ ႁႅင်းတၼ်းၶူဝ်းဢိၵ်ႇတင်းတၢင်းၵတ်ႉတၢင်းၶၼ်မီးၵႃႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ။ ၵႃႈၼႂ်းမိုဝ်းၸဝ်ႈႁဝ်းၼၼ်ႉ မီးဢၶႂၢင်ႉဢၼ်ႁႂ်ႈယႂ်ႇမျၢတ်ႈ ဢိၵ်ႇတင်းဢၶႂၢင်ႉဢၼ် ဢၢပ်ႈပၼ်တၢင်းဢၼ်မၼ်ႈၶိူင်ႇ တီႈၵူၼ်းတင်းသဵင်ႈတင်းလူင်တီႈၶႃႈဢေႃႈ။-

13ပိူဝ်ႈဢၼ်ပဵၼ်ၼင်ႇၼႆလႄႈ ၽြႃးပဵၼ်ၸဝ်ႈႁဝ်းၶႃႈတီႈၶႃႈ၊ ၶႃႈၸဝ်ႈႁဝ်းၼႆႉ ဢွၼ်ၵၼ်ႁပ်ႉတုင်းဢဝ် လွင်ႈဢၼ်ၵျေးၸူးၸဝ်ႈႁဝ်း ယႂ်ႇၼႃႇလူင်လၢင်ၼၼ်ႉလႄႈ၊ ယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်းဢၼ်မုၼ်ယႂ်ႇၼႃႇၼၼ်ႉတီႈၶႃႈဢေႃႈ။-

14ၵူၺ်းၵႃႈၶႃႈၸဝ်ႈႁဝ်း ဢိၵ်ႇတင်းၵူၼ်းၶႃႈၸဝ်ႈႁဝ်းၸိူဝ်းၼႆႉ ပဵၼ်ၵူၼ်းၸိူဝ်ႉၼင်ႇႁိုဝ်လႄႈ ႁႂ်ႈထၼ်ႈပေႃးပႃးတင်းၸႂ်ၸေႇတၼႃႇလႄႈ ပုၵ်ႈၸေႃႇထၼ်ႈၼႆႉလႆႈတီႈၶႃႈ၊ လွင်ႈတၢင်းၵႃႈမီးတင်းသဵင်ႈတင်းလူင် ဢွၵ်ႇပဵၼ်မႃးတီႈၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈႁဝ်းၸိူဝ်းၼႆႉ ဢဝ်ၼႂ်းဢုၵ်ႉၸႃႇၸဝ်ႈႁဝ်းၼၼ်ႉၵူၺ်းပုၵ်ႈၸေႃႇတီႈၸဝ်ႈႁဝ်းတီႈၶႃႈဢေႃႈ။-

15ၶႃႈၸဝ်ႈႁဝ်းၸိူဝ်းၼႆႉ ပဵၼ်ၶႅၵ်ႇဢႃႇၵၼ်ႇတူႉ ၵႃႈတီႈၽၢႆႇၼႃႈၸဝ်ႈႁဝ်း မိူၼ်ၸိူဝ်ႉၼင်ႇပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉတီႈၶႃႈဢေႃႈ။ မိုဝ်ႉဝၼ်းဢၼ်ၶႃႈၸဝ်ႈႁဝ်းၶဝ် ယူႇၵႃႈၼိူဝ်လိၼ်မိူင်းၼႆႉၸိူဝ်းၼၼ်ႉ ပဵၼ်မိူၼ်ၸိူဝ်ႉၼင်ႇ ႁူမ်ႈၵွင်ႉငဝ်းတီႈၶႃႈဢေႃႈ။ ဢမ်ႇမီးတီႈဢၼ်သွၼ်ႈဢၼ်ပိုင်ႈတီႈၶႃႈ။-

16ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈတီႈၶႃႈ၊ ၽၼ်ႇတႃႇၵႃႈဢၼ်မီးဢၼ်ၶႃႈၸဝ်ႈႁဝ်းၶဝ်ပွင်ႁဵတ်းပွင်ႁႅၼ်းႁႂ်ႈလႆႈ တႄႇႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်ႈသဵင်ၸဝ်ႈႁဝ်းၼၼ်ႉၸိူဝ်းၼႆႉ ဢွၵ်ႇပဵၼ်တီႈၸဝ်ႈႁဝ်းၶႃႈလႄႈ ၸဝ်ႈႁဝ်းပိူင်ႇၵႃႈမီးတင်းသဵင်ႈတင်းလူင်တီႈၶႃႈဢေႃႈ။-

17ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၸဝ်ႈႁဝ်းၶႃႈႁူႉလွင်ႈဢၼ် ၸဝ်ႈႁဝ်းၸႅတ်ႈထၢမ်ၸႅတ်ႈတူၺ်းႁူဝ်ၸႂ်လႄႈ ထုၵ်ႇၸႂ်ၵျိူၵ်ႈၸႂ်သၽေႃးဢၼ်သိုဝ်ႈတေႃႇၼၼ်ႉတီႈၶႃႈဢေႃႈ။ ၶႃႈၸဝ်ႈၸမ်ႉ၊ ပႃးတင်းသၽေႃးတၢင်းဢၼ်သိုဝ်ႈတေႃႇ၊ သၽေႃးဢၼ်မီးၸေႇတၼႃႇသေလႄႈ ဢဝ်ၽၼ်ႇတႃႇၵႃႈမီးၼႆႉ ပုၵ်ႈၸေႃႇတီႈၶႃႈဢေႃႈ။ တေႃႈလဵဝ်ၼႆႉၶႃႈၸဝ်ႈႁၼ်ၵူၼ်းၸဝ်ႈႁဝ်းတင်းလၢႆ ဢၼ်မီးၵႃႈတီႈၼႆႈၸိူဝ်းၼႆႉ ပႃးတင်းၸႂ်ၸေႇတၼႃႇသေလႄႈပုၵ်ႈၸေႃႇတီႈၸဝ်ႈႁဝ်းၼၼ်ႉလႄႈ ၸူမ်းသိူဝ်းတီႈၶႃႈဢေႃႈ။-

18ထႃႇဝရႃႉၽြႃး ၽြႃးပဵၼ်ၸဝ်ႈ ဢႃႇပြႃႇႁၢမ်ႇ၊ ဢီႉၸၢၵ်ႈ၊ ဢီႉသရေႇလႃႉ ပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉတီႈၶႃႈ၊ ၶႅၼ်းတေႃႈႁႂ်ႈလွင်ႈတၢင်းၼႆႉ ပဵၼ်ယူႇတႃႇသေႇၼႂ်းသၽေႃးတၢင်းဢၼ်ႁူဝ်ၸႂ်ၵူၼ်းၸဝ်ႈႁဝ်းတင်းလၢႆၵျၢမ်ႇပွင်ယူႇၼၼ်ႉလႄႈ ႁႂ်ႈႁူဝ်ၸႂ်ၶဝ်တႄႇယူႇၵႃႈတီႈၸဝ်ႈႁဝ်းသေၵမ်းတီႈၶႃႈ။-

19ၶႅၼ်းတေႃႈဢဵတ်းလူပၼ်ႁူဝ်ၸႂ်ဢၼ် ၸေးၸုမ်ႇတီႈလုၵ်ႈၸၢႆးၶႃႈၸဝ်ႈႁဝ်း သေႃးလမုၼ်ႇ ႁႂ်ႈမၼ်းၵမ်ၵျၢင်ႉပႂ်ႉၸွမ်းပိင်းၺၢပ်ႈၸဝ်ႈႁဝ်း လွင်ႈတၢင်းဢၼ်ၸဝ်ႈႁဝ်းၶၢမ်ႇသၢၵ်ႈသေႇဝႆႉ၊ ထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉယူႇသေလႄႈ ႁဵတ်းလွင်ႈတင်းသဵင်ႈတင်းလူင်ၸိူဝ်းၼႆႉလႄႈ တႄႇႁဵတ်းပိၵ်ႈမၢၼ်ႇၸဝ်ႈ ဢၼ်ၶႃႈၸဝ်ႈပွင်ႁဵတ်းပွင်ႁႅၼ်းဝႆႉ ပုၼ်ႈမၼ်းၼၼ်ႉလႆႈသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

20တီႈပရဵၵ်ႈသၢတ်ႈတင်းသဵင်ႈတင်းလူင်ၵေႃႈ တႃႇဝိတ်ႈ မီးဢမိင်ႉလႄႈဝႃႈ၊ ဢွၼ်ၵၼ်ယွင်ႈယေႃးထႃႇဝရႃႉၽြႃး ၽြႃးပဵၼ်ၸဝ်ႈတႃႉ၊ ဝႃႈၼင်ႇၼႆလႄႈ ပရဵၵ်ႈသၢတ်ႈတင်းသဵင်ႈတင်းလူင်ၼၼ်ႉ ဢွၼ်ၵၼ်ယွင်ႈယေႃးထႃႇဝရႃႉၽြႃး ၽြႃးပဵၼ်ၸဝ်ႈပူႇမွၼ်ႇၶဝ်ယူႇသေလႄႈ ၶုပ်ႉမူပ်ႇဝၢင်းႁူဝ်လႄႈ ဝႆႈထႃႇဝရႃႉၽြႃးဢိၵ်ႇတင်းၶုၼ်ႁေႃၶမ်းဢေႃႈ။

21ဝၼ်းမိူဝ်ႈၽုၵ်ႈၼၼ်ႉ ၶဝ်ဢွၼ်ၵၼ်ႁဵတ်းတၢင်းဢၼ် ပုၵ်ႈၸေႃႇယိတ်ႈလႄႈ ပုၵ်ႈၸေႃႇယိတ်ႈဢၼ်တုတ်ႇၽႆး ဝူဝ်းႁဵင်ၼိုင်ႈ၊ သူဝ်းပေႃႈႁဵင်ၼိုင်ႈ၊ သူဝ်းဢွၼ်ႇႁဵင်ၼိုင်ႈ ဢိၵ်ႇတင်းၶိူင်ႈပုၵ်ႈၸေႃႇဢၼ်သွၼ်းလေႃႇၶဝ်တင်းယိတ်ႈဢၼ်ၼမ်ၼႃႇလူင်လၢင် တီႈထႃႇဝရႃႉၽြႃး ပုၼ်ႈမဵဝ်း ဢီႉသရေႇလႃႉ တင်းသဵင်ႈတင်းလူင်ဢေႃႈ။-

22ၼႂ်းဝၼ်းၼၼ်ႉၵမ်းလဵဝ်၊ ၶဝ်ႁဵတ်းတၢင်းဢၼ်မူၼ်ႈပျေႃႇယူႇသေလႄႈ ဢွၼ်ၵၼ်ၵိၼ်ၶူပ်းၵႃႈတီႈၽၢႆႇၼႃႈထႃႇဝရႃႉၽြႃးလႄႈ ဢဝ် သေႃးလမုၼ်ႇ လုၵ်ႈၸၢႆး တႃႇဝိတ်ႈ ယုၵ်ႉယွင်ႈဝႆႉၵႃႈၼႂ်းဢရႃႇၶုၼ်ႁေႃၶမ်းၵမ်းတူႉတီႉယႃႉလႄႈ ပၼ်ၽိၵ်ႈသိၵ်ႈ ႁႂ်ႈမၼ်းပဵၼ်ၶုၼ်တႂ်ႈထႃႇဝရႃႉၽြႃး ဢိၵ်ႇတင်း ၸႃႇတုၵ်ႉ ၵေႃႈ ႁႂ်ႈပဵၼ်ယိတ်ႈပရေႃးႁဵၵ်ႈဢေႃႈ။-

23မိူဝ်ႈၼၼ်ႉ သေႃးလမုၼ်ႇ ၼင်ႈယူႇၵႃႈၼိူဝ်ရႃႇၸႃႉပလၢင်ႇထႃႇဝရႃႉၽြႃးလႄႈ ႁဵတ်းၶုၼ်ႁေႃၶမ်းတၢင်တူဝ်ၸဝ်ႈပေႃႈမၼ်း တႃႇဝိတ်ႈ သေလႄႈ ႁဵတ်းလႆႈပဵၼ်လႆႈဢေႃႈ။ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ထွမ်ႇဢဝ်ၸွမ်းဢဝ်ၵႂၢမ်းမၼ်းဢေႃႈ။-

24မူးမၢတ်ႈၽွင်းမိူင်းၵႃႈမီး၊ ၶဝ်ၸိူဝ်းဢၼ်ပဵၼ်ၶုၼ်ပူဝ်ႇတင်းလၢႆ ဢိၵ်ႇတင်းလုၵ်ႈၸၢႆးၸဝ်ႈ တႃႇဝိတ်ႈ တင်းသဵင်ႈတင်းလူင်ၼၼ်ႉဢွၼ်ၵၼ်ႁပ်ႉတုင်းဢဝ် တၢင်းဢၼ်ၶုၼ်ႁေႃၶမ်း သေႃးလမုၼ်ႇ ဢုပ်ႉပိူင်ႇၼၼ်ႉဢေႃႈ။-

25ထႃႇဝရႃႉၽြႃးယုၵ်ႉယွင်ႈ သေႃးလမုၼ်ႇ ၼႃႇလူင်လၢင်သိုဝ်ႈၼႃႈတႂ်ႈတႃၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်လႄႈ ဢဵတ်းလူပၼ်မုၼ်ၽုင်းဢႃႇၼူႉၽေႃႇ ဢၼ်ၶုၼ်ႁေႃၶမ်း ဢီႉသရေႇလႃႉ သေၵေႃႉသေၵူၼ်းဢမ်ႇတွၼ်ႉလႆႈၶၢမ်ႇၼၼ်ႉဢေႃႈ။

26တႃႇဝိတ်ႈ လုၵ်ႈၸၢႆး ယေႇသႄး ၼၼ်ႉ ဢုပ်ႉပိူင်ႇၸၢမ်ႇၸႃး မိူင်း ဢီႉသရေႇလႃႉ တင်းမိူင်းဢေႃႈ။-

27မၼ်းလႆႈဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ သီႇသိပ်းပီႊ ဢၼ်ဝႃႈ ဢုပ်ႉပိူင်ႇၸၢမ်ႇၸႃးၵႃႈတီႈဝဵင်း ႁေႇပြုၼ်ႇ ၸဵတ်းပီႊ၊ ဢုပ်ႉပိူင်ႇၸၢမ်ႇၸႃးၵႃႈတီႈဝဵင်း ယေႇရူႉသလႅမ်ႇ သၢမ်သိပ်းပၢႆသၢမ်ပီႊဢေႃႈ။-

28မၼ်းၼၼ်ႉမီးတၢင်းဢၼ်ဢသၢၵ်ႈၵႄႇထူၼ်ႈယဝ်ႉလႄႈ ၶိင်ႇၵႃႇလႃႉဝၼ်းတဵမ်ယဝ်ႉၸေးယဝ်ႉ၊ တၢင်းဢၼ်မုၼ်ၸေးၸိမ်ႇ လိူင်ႇၼမ်ယူႇသေလႄႈ ႁွတ်ႈထိုင်ဢၼိၵ်ႈၸႃႉလႄႈ လုၵ်ႈၸၢႆးမၼ်း သေႃးလမုၼ်ႇ ၼၼ်ႉ ၼင်ႈႁၢင်ႈၼင်ႈႁေႃ တၢင်တူဝ်ၸဝ်ႈပေႃႈမၼ်းဢေႃႈ။-

← Chapter 28 Jump to: