1 Chronicles 16 — Shan

1ၼင်ႇၼၼ်လႄႈၶဝ်ဢွၼ်ၵၼ်ဢဝ်တိူၵ်ႈတႃႇၽြႃးပဵၼ်ၸဝ်ႈသႂၢင်းၶဝ်ႈလႄႈ ဝႆႉၵႃႈၼႂ်းၶိုင်ႈၵၢင်မူဝ်းၵႃႇၸဝ်ႈဢၼ် တႃႇဝိတ်ႈ ပူၵ်းတင်ႈဝႆႉ၊ ပုၼ်ႈမၼ်းၼၼ်ႉသေယဝ်ႉ ပုၵ်ႈၸေႃႇယိတ်ႈဢၼ်တုတ်ႇၽႆးဢိၵ်ႇတင်းယိတ်ႈမိၵ်ႉသႃႇႁႃယႃႉတင်းလၢႆ ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။-

2မိူဝ်ႈဢၼ် တႃႇဝိတ်ႈ ႁႂ်ႈဢမူႉတၢင်းဢၼ်၊ ပုၵ်ႈၸေႃႇယိတ်ႈဢၼ်တုတ်ႇၽႆး၊ ယိတ်ႈမိၵ်ႉသႃႇႁႃယႃႉယဝ်ႉတူဝ်ႈယဝ်ႉၼၼ်ႉၸိုင်၊ မၼ်းဢဝ်ၼႃႇမႃႉၸိုဝ်ႈသဵင်ထႃႇဝရႃႉၽြႃး ပၼ်တၢင်းလီတီႈပရဵၵ်ႈသၢတ်ႈတင်းလၢႆဢေႃႈ။-

3မၼ်းၼၼ်ႉတူၵ်းမႅင်ႇပၼ်တီႈၵူၼ်းတင်းသဵင်ႈတင်းလူင်ၵႃႈဢၼ်ၶဝ်ႈပႃးၼႂ်းမဵဝ်း ဢီႉသရေႇလႃႉ ၸႃႉၸဵမ်ၵူၼ်းၸၢႆးၵူၼ်းယိင်းၸိူဝ်းၼၼ်ႉ ယေႈၵေႃႉၶဝ်ႈမုၼ်းယေႈၶႅပ်း၊ ၼိူဝ်ႉယေႈၵွၼ်ႈ၊ ၶႅပ်းမၢၵ်ႇၸပိတ်ႈယေႈၶႅပ်းၼင်ႇၵၼ်ဢေႃႈ။

4လႆႈသမ်ႉ ၵူၼ်းမဵဝ်း လေႇဝီႉ ဢၼ်မၼ်းၶၢၼ်းဝႆႉ ႁႂ်ႈလႆႈၵိုတ်ႉႁၢပ်ႇဢမူႉၸဝ်ႈ ၵႃႈတီႈၽၢႆႇၼႃႈတိူၵ်ႈတႃႇထႃႇဝရႃႉၽြႃးလႄႈ ၶုၵ်းၸႂ်လႆႈၶႆႈၸႂ်ထူပ်း ၵုင်ႇၵျေးၸူးထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ သေလႄႈ ယွင်ႈယေႃးႁဵတ်းထေႃးပၼႃႇၼၼ်ႉၸမ်ႉ၊-

5ဢႃႇသပ်ႉ ဢၼ်ပဵၼ်တူၼ်ႈပဵၼ်ငဝ်ႈ၊ ၵေႃႉတူႉတီႉယႃႉ ၸႃႇၶရီႉ ၊ လႆႈသမ်ႉ ယေႇလႃႉ၊ သေႇမီႉရႃႇမုတ်ႉ၊ ယေႇႁေႇလႃႉ၊ မတ်ႉတီႉသီႉ၊ ဢေးလျႃႇၽႃႉ၊ ပေႇၼႃႇယႃႉ၊ ဢူဝ်းပိတ်ႉဢေႇတုမ်ႇ တင်း ယေႇလႃႉ ဢၼ်လဵတ်းတိင်ႇတရေႃး၊ ဢႃႇသပ်ႉ ဢၼ်ႁႆႇသႅင်ႇလင်မေႃး၊-

6ပေႇၼႃႇယႃႉ တင်း ယႁႃႇၸေးလႃႉ ယိတ်ႈပရေႃးႁဵၵ်ႈ ဢၼ်ပဝ်ႇတိုင်ႈၼႄးၶရႃႇယူႇတႃႇသေႇ ၵႃႈတီႈၽၢႆႇၼႃႈတိူၵ်ႈတႃႇပတီႉၺိၺ်ႇ ၽြႃးပဵၼ်ၸဝ်ႈဢေႃႈ။-

7ၵႂၢမ်းဢၼ် တႃႇဝိတ်ႈ ၸႃႉဢၢပ်ႈပၼ်ၵႃႈၼႂ်းမိုဝ်း ဢႃႇသပ်ႉ တင်းပီႈၼွင်ႉမၼ်းတင်းလၢႆၼႂ်းဝၼ်းၼၼ်ႉ ႁႂ်ႈလႆႈယွင်ႈယေႃးၵျေးၸူးထႃႇဝရႃႉၽြႃးၼၼ်ႉၸမ်ႉ၊

8ယွင်ႈယေႃးၵျေးၸူးထႃႇဝရႃႉၽြႃးတႃႉ။ ႁဵတ်းပထၼႃႇတီႈၼႃႇမႃႉၸိုဝ်ႈသဵင်မၼ်းၸဝ်ႈတႃႉ။ ၼႄပျႃးလွင်ႈတၢင်းဢၼ်မၼ်းၸဝ်ႈၸီႇယၢင်ႇႁဵတ်းဝႆႉ ၸိူဝ်းၼၼ်ႉတီႈၵူၼ်းတင်းလၢႆတႃႉ။-

9ႁဵတ်းၵႂၢမ်းတီႈမၼ်းၸဝ်ႈတႃႉ။ ႁဵတ်းၵႂၢမ်းထေႃးပၼႃႇတီႈမၼ်းၸဝ်ႈတႃႉ။ ၶႆႈၸႂ်ဝူၼ်ႉၸႂ်လူၺ်ႈလွင်ႈတၢင်းဢၼ်လီဢၢမ်းမၼ်းၸဝ်ႈၵႃႈမီးၸိူဝ်းၼၼ်ႉတႃႉ။-

10ဢုပ်ႇဝၢဝ်းၼႂ်းၼႃႇမႃႉၸိုဝ်ႈသဵင်ဢၼ်မူတ်းၸၢင်ႇမၼ်းၸဝ်ႈၼၼ်ႉတႃႉ။ ႁႂ်ႈႁူဝ်ၸႂ်ၶဝ်ၸိူဝ်းဢၼ်ႁႃဢဝ်ထႃႇဝရႃႉၽြႃးၼၼ်ႉ သႂၢင်ႇသိူဝ်းတႃႉ။-

11ထၢမ်ႁႃထႃႇဝရႃႉၽြႃးတင်းတၼ်းၶူဝ်းမၼ်းၸဝ်ႈတႃႉ။ ႁႃၼႃႈမၼ်းၸဝ်ႈတႃႇသေႇဢမ်ႇထၢတ်ႇတႃႉ။-

12ၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းဢၼ်လီဢၢမ်း ဢၼ်မၼ်းၸဝ်ႈၸီႇယၢင်ႇႁဵတ်းဝႆႉ ဢိၵ်ႇတင်းလွင်ႈတၢင်းဢၼ်လၢၵ်ႇလၢႆးမၼ်းၸဝ်ႈ တင်းပိင်းၺၢပ်ႈဢၼ်ဢွၵ်ႇၵႃႈၼႂ်းသူပ်းမၼ်းၸဝ်ႈၸိူဝ်းၼၼ်ႉတႃႉ။-

13ၸိူဝ်ႉၶိူဝ်းၶႃႈမၼ်းၸဝ်ႈ ဢီႉသရေႇလႃႉ ၊ လုၵ်ႈလၢၼ် ယႃႇၵုပ်ႈ ဢၼ်မၼ်းၸဝ်ႈလိူၵ်ႈၵဵပ်းဢဝ်ၼၼ်ႉၶဝ်ဢိူၺ်း၊-

14မၼ်းၸဝ်ႈပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းလႄႈ လွင်ႈတၢင်းဢၼ်မၼ်းၸဝ်ႈၸီႇယၢင်ႇတြႃးဝႆႉၸိူဝ်းၼၼ်ႉ ၸွတ်ႇတူဝ်ႈၵႃႈၼိူဝ်လိၼ်မိူင်းတင်းသဵင်ႈတင်းမူတ်းဢေႃႈ။-

15သူဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်း ပတီႉၺိၺ်ႇတြႃးမၼ်းၸဝ်ႈ၊ ၼုၵ်ႈၵပၢတ်ႈဢၼ်မၼ်းၸဝ်ႈသင်ႇလၢတ်ႈ တေႃႇထိုင်ႁွတ်ႈသိုပ်ႇမဵဝ်းၵူၼ်းႁဵင်သိုပ်ႇ၊-

16ပတီႉၺိၺ်ႇတြႃးဢၼ်ဝႆႉၵႃႈတီႈ ဢႃႇပြႃႇႁၢမ်ႇ ၊ တၢင်းဢၼ်တိူင်ႇဝႃႈ ဢၼ်မၼ်းၸဝ်ႈတိူင်ႇဝႃႈတီႈ ဢီႉၸၢၵ်ႈ ၊-

17ပတီႉၺိၺ်ႇတြႃးဢၼ်မၼ်းၸဝ်ႈတႄႇဝႆႉပုၼ်ႈဢၼ် တၵ်းပဵၼ်ထုင်းၽိင်ႈတြႃးဢၼ်မၼ်ႈမၼ်ႈၶိူင်ႇၶိူင်ႇတီႈ ယႃႇၵုပ်ႈ တင်းပတီႉၺိၺ်ႇတြႃး ဢၼ်ပဵၼ်ၼိၵ်ႈၸႃႉထႃႇဝရႃႉတီႈ ဢီႉသရေႇလႃႉ ၼၼ်ႉလႄႈ၊-

18လၢတ်ႈလႄႈဝႃႈ၊ ၵဝ်တၵ်းဢဝ်မိူင်း ၶႃႇၼၢၼ်ႇ ဢၼ်ဝႃႈ လိၼ်ဢၼ်သူတၵ်းလႆႈၶၢမ်ႇဢမူၺ်ႇၼၼ်ႉပၼ်တီႈမႂ်းဢေႃႈ၊ ဝႃႈၼင်ႇၼႆဝႆႉ၊-

19ၼႂ်းမိူဝ်ႈဢၼ် မဵဝ်းသူၼပ်ႉဢၢၼ်ႇဢမ်ႇၼမ်၊ ၵေႇၼႃႇလူင်လၢင်လႄႈ ပဵၼ်ၶႅၵ်ႇယူႇၵႃႈၼႂ်းမိူင်းၼၼ်ႉၼၼ်ႉ ယူႇတႃႇသေႇဢမ်ႇထၢတ်ႇတႃႉ။-

20ၶဝ်ၼၼ်ႉ လႆႈလႄႇၵႂႃႇလႄႇမႃး ဢဝ်ၵႃႈတီႈမဵဝ်းၵူၼ်းမဵဝ်းၼိုင်ႈ တေႃႇထိုင်ႁွတ်ႈမဵဝ်းၵူၼ်းမဵဝ်းၼိုင်ႈ ဢဝ်ၵႃႈတီႈမိူင်းမိူင်းၼိုင်ႈ တေႃႇထိုင်ႁွတ်ႈမိူင်းမိူင်းၼိုင်ႈယူႇဢေႃႈ။-

21မၼ်းၸဝ်ႈဢမ်ႇပၼ်ဢၶႂၢင်ႉတီႈၽူႈလႂ်ႁႂ်ႈလႆႈၼိၵ်ႈၸၢၵ်ႈငႅၼ်းသႄးၶဝ်၊ ၵွပ်ႈပိူဝ်ႈၶဝ်ၵေႃႈမၼ်းၸဝ်ႈသင်ႇသွၼ်သုင်းမႃႉတီႈၶုၼ်ႁေႃၶမ်းတင်းလၢႆလႄႈဝႃႈ၊-

22ယႃႇပေတိူဝ်ႉပေထုၵ်ႇ ၶဝ်ၸိူဝ်းဢၼ်လႆႈၶၢမ်ႇၽိၵ်ႈသိၵ်ႈတီႈၵဝ်၊ ယႃႇပေႁဵတ်းဢပႅတ်ႈတီႈပရေႃးၽႅတ်ႈၵဝ်ၸိူဝ်းၼၼ်ႉ၊ ဝႃႈၼင်ႇၼႆဢေႃႈ။

23လိၼ်မိူင်းတင်းသဵင်ႈတင်းမူတ်းၼႆႉဢိူၺ်း၊ ႁဵတ်းၵႂၢမ်းတီႈထႃႇဝရႃႉၽြႃးတႃႉ။ ဝၼ်းၼိုင်ႈထႅင်ႈဝၼ်းၼိုင်ႈ၊ ဢဝ်တြႃးတၢင်းဢၼ်မၼ်းၸဝ်ႈၵႄႇၶျွတ်ႈဢဝ်ၼၼ်ႉမွၵ်ႇလၢတ်ႈတႃႉ။-

24ၽုၺ်ႇဢွၵ်ႇၼႄပျႃးမုၼ်ၽုင်းမၼ်းၸဝ်ႈ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈ လွင်ႈတၢင်းဢၼ်လီဢၢမ်းမၼ်းၸဝ်ႈၸိူဝ်းၼၼ်ႉ ၵႃႈၼႂ်းမဵဝ်းၵူၼ်းၵူႈမဵဝ်းတႃႉ။-

25လွင်ႈမၼ်းၸမ်ႉ ထႃႇဝရႃႉၽြႃးယႂ်ႇမျၢတ်ႈလႄႈ ပဵၼ်တီႈဢၼ်ထုၵ်ႇလီယွင်ႈယေႃးၼႃႇလူင်လၢင်ဢေႃႈ။ ပဵၼ်တီႈဢၼ်လီၵူဝ်လီႁႄၼႃႇသေၽြႃးတင်းသဵင်ႈတင်းလူင်ဢေႃႈ။-

26ၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းတင်းသဵင်ႈတင်းလူင်ၼၼ်ႉ ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်လႄႈ၊ ထႃႇဝရႃႉၽြႃးၸမ်ႉ၊ ႁဵတ်းပဵၼ်ၽႃႉၵၢင်ႁၢဝ်ဢေႃႈ။-

27မုၼ်ၽုင်းဢိၵ်ႇတင်းဢႃႇၼူႉၽေႃႇ မီးၵႃႈတီႈၽၢႆႇၼႃႈမၼ်းၸဝ်ႈလႄႈ၊ ႁႅင်းတၼ်းၶူဝ်းဢိၵ်ႇတင်းတၢင်းဢၼ်သိူဝ်းပျေႃႇ မီးၵႃႈတီႈထႃႇၼႃႉမၼ်းၸဝ်ႈဢေႃႈ။

28ၵူၼ်းၵူႈၸိူဝ်ႉၵူႈမဵဝ်းၶဝ်ဢိူၺ်း၊ ႁပ်ႉတုင်းဢဝ်တီႈထႃႇဝရႃႉၽြႃးလႄႈဝႃႈ၊ ႁပ်ႉတုင်းဢဝ်တီႈထႃႇဝရႃႉၽြႃးလႄႈဝႃႈ၊ ၸဝ်ႈႁဝ်းမီးမုၼ်ၽုင်းဢိၵ်ႇတင်း ႁႅင်းတၼ်းၶူဝ်းတီႈၶႃႈဢေႃႈ၊ ဝႃႈၼင်ႇၼႆတႃႉ။-

29ႁပ်ႉတုင်းဢဝ်တီႈထႃႇဝရႃႉၽြႃးလႄႈဝႃႈ၊ ၼႃႇမႃႉၸိုဝ်ႈသဵင်ၸဝ်ႈႁဝ်းထိူၵ်ႈၶၢမ်ႇမုၼ်ၽုင်းတီႈၶႃႈဢေႃႈ၊ ဝႃႈၼင်ႇၼႆလႄႈ၊ ပႃးတင်းၶိူင်ႈပုၵ်ႈၸေႃႇမႃးလႄႈ ၶဝ်ႈၸူးၵႃႈတီႈၽၢႆႇၼႃႈမၼ်းၸဝ်ႈတႃႉ။ ဢဝ်တင်းၶိူင်ႈပိူင်ဢၼ်မူတ်းၸၢင်ႇႁၢင်ႈၶိူင်ႈလႄႈ ၵူဝ်းၵႂၢႆႇထႃႇဝရႃႉၽြႃးတႃႉ။-

30လိၼ်မိူင်းတင်းသဵင်ႈတင်းမူတ်းဢိူၺ်း၊ သၼ်ႇသၼ်ႇသၢႆသၢႆယူႇၵႃႈတီႈၽၢႆႇၼႃႈမၼ်းၸဝ်ႈတႃႉ။ လေႃးၵထၢတ်ႈၼႆႉတႄႇယူႇမၼ်ႈမၼ်ႈၶိူင်ႇၶိူင်ႇ ထၼ်ႈပေႃးဢမ်ႇၼိုင်ဢမ်ႇၶွၼ်းလႆႈဢေႃႈ။-

31ႁႂ်ႈၵၢင်ႁၢဝ် မီးတၢင်းဢၼ်ၸူမ်းသိူဝ်းသေၵမ်းလူၺ်ႈ။ လိၼ်မိူင်းၵေႃႈ ႁႂ်ႈမီးတၢင်းဢၼ်သႂၢင်ႇသိူဝ်းသေၵမ်းလူၺ်ႈ။ မွၵ်ႇလၢတ်ႈၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈဝႃႈ၊ ထႃႇဝရႃႉၽြႃးၼင်ႈႁၢင်ႈၼင်ႈႁေႃယူႇဢေႃႈ၊ ဝႃႈၼင်ႇၼႆတႃႉ။-

32ႁႂ်ႈပၢင်ႇလၢႆႇဢိၵ်ႇတင်းတၢင်းဢၼ်မီးတဵမ်ဝႆႉၵႃႈၼႂ်းမၼ်းၼၼ်ႉ ႁဵတ်းသဵင်လင်သဵင်မေႃးသေၵမ်းလူၺ်ႈ။ ပၢင်ႇတူင်ႈၼႃးဢိၵ်ႇတင်း ၵႃႈဢၼ်မီးၵႃႈၼႂ်းမၼ်းၵေႃႈ၊ ႁႂ်ႈသႂၢင်ႇၸႂ်သိူဝ်းၸႂ်သေၵမ်းလူၺ်ႈ။-

33မိူဝ်ႈၼၼ်ႉ တူၼ်ႈမႆႉတူၼ်ႈတွၵ်ႇဢၼ်မီးၵႃႈၼႂ်းထိူၼ်ႇၼႂ်းၶိူဝ်းၸိူဝ်းၼၼ်ႉ တၵ်းဢွၼ်ၵၼ်ႁဵတ်းၵႂၢမ်းသႂၢင်ႇသႂၢင်ႇသိူဝ်းသိူဝ်း ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ လွင်ႈမၼ်းၸမ်ႉ မၼ်းၸဝ်ႈမႃးႁႂ်ႈလႆႈ ၸီႇယၢင်ႇတြႃးတီႈလိၼ်မိူင်းၼႆႉဢေႃႈ။

34ဢွၼ်ၵၼ်ယွင်ႈယေႃး မုၼ်ၵျေးၸူးထႃႇဝရႃႉၽြႃး ၵွပ်ႈပိူဝ်ႈဢၼ်မၼ်းၸဝ်ႈလီမျၢတ်ႈလႄႈ ၵရူႉၼႃႇမၼ်းၸဝ်ႈတႄႇယူႇတႃႇသေႇဢမ်ႇထၢတ်ႇၼၼ်ႉတႃႉ။-

35ဢွၼ်ၵၼ်ဢွၵ်ႇသူပ်းလႄႈဝႃႈ၊ ၽြႃးဢၼ်ၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်တီႈၶႃႈဢိူၺ်း၊ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႅၼ်းတေႃႈဢဝ်ၶႃႈၸဝ်ႈႁဝ်းၶဝ်ၸူႉၵၼ်တုမ်ၵၼ်လႄႈ ၵႄႇသႄႇၼုၵ်ႈဢဝ်ဢွၵ်ႇသေၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉ ႁႂ်ႈလႆႈႁပ်ႉတုင်းဢဝ်လႄႈဝႃႈ၊ ၵျေးၸူးၼႃႇမႃႉၸိုဝ်ႈသဵင်ဢၼ်မူတ်းၸၢင်ႇၸဝ်ႈႁဝ်းၼၼ်ႉယႂ်ႇၼႃႇတီႈၶႃႈဢေႃႈ၊ ဝႃႈၼင်ႇၼႆလႄႈ ဢုပ်ႇဝၢဝ်းၸူမ်းသိူဝ်းၵႃႈၼႂ်းတၢင်းဢၼ်ယွင်ႈယေႃးၸဝ်ႈႁဝ်းၼၼ်ႉသေၵမ်းတီႈၶႃႈ၊ ဝႃႈၼင်ႇၼႆတႃႉ။-

36ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးမင်ႇၵလႃႇၵူႈၵမ်ႇၽႃႇသိုပ်ႇသိုပ်ႇတၢမ်းတၢမ်းသေၵမ်းလူၺ်ႈ၊ ဝႃႈၼင်ႇၼႆလႄႈ၊ ၵူၼ်းတင်းသဵင်ႈတင်းလူင် ဢွၼ်ၵၼ်ႁပ်ႉတုင်းဢဝ်လႄႈဝႃႈ၊ ဢႃႇမိၼ်ႇ၊ ဝႃႈၼင်ႇၼႆသေလႄႈ ယွင်ႈယေႃးထႃႇဝရႃႉၽြႃးဢေႃႈ။

37လွင်ႈၼင်ႇႁိုဝ်တၵ်းႁႂ်ႈၵိုတ်ႉႁၢပ်ႇ ဢမူႉဢၼ်လီၵိုတ်ႉႁၢပ်ႇၵူႈဝၼ်းၵႃႈတီႈၽၢႆႇၼႃႈတိူၵ်ႈတႃႇၸဝ်ႈတႃႇသေႇၸိုင်၊ မၼ်းၶၢၼ်း ဢႃႇသပ်ႉ တင်းပီႈၼွင်ႉမၼ်းလႂ်၊-

38ဢူဝ်းပိတ်ႉဢေႇတုမ်ႇ တင်းပီႈၼွင်ႉမၼ်းႁူၵ်းသိပ်းပၢႆပႅတ်ႇၵေႃႉ၊ ဢူဝ်းပိတ်ႉဢေႇတုမ်ႇ လုၵ်ႈၸၢႆး ယေႇတူႉသုၼ်ႇ ၊ ဢိၵ်ႇတင်း ႁေႃးသမ်ႇ ဢၼ်ပႂ်ႉၽၵ်းတူၼၼ်ႉၸိူဝ်းၼၼ်ႉ ၵႃႈတီႈၽၢႆႇၼႃႈတိူၵ်ႈတႃႇပတီႉၺိၺ်ႇၸဝ်ႈ၊-

39ဢိၵ်ႇတင်းယိတ်ႈပရေႃးႁဵၵ်ႈ ၸႃႇတုၵ်ႉ တင်းပီႈၼွင်ႉမၼ်းယိတ်ႈပရေႃးႁဵၵ်ႈၸိူဝ်းၼၼ်ႉ ၵႃႈတီႈၽၢႆႇၼႃႈသုမ်ႉထဵင်ထႃႇဝရႃႉၽြႃး ဢၼ်မီးၵႃႈၼိူဝ်ထႃႇၼႃႉတီႈဢၼ်သုင် ၵႃႈၼႂ်းဝဵင်း ၵီႉပွင်ႇ ၼၼ်ႉ၊-

40ႁႂ်ႈလႆႈပုၵ်ႈၸေႃႇယိတ်ႈဢၼ်တုတ်ႇၽႆးတီႈထႃႇဝရႃႉၽြႃး ၵႃႈၼိူဝ်ယိတ်ႈပလၢင်ႇတီႈဢၼ်တုတ်ႇၽႆးၸွမ်းလူၺ်ႈမိုဝ်ႉဝၼ်းၸႅၼ်ႇတၢမ်းၵၼ်ၶိင်ႇၵၢင်ၼႂ်ပွၵ်ႈၼိုင်ႈ ၶိင်ႇႁူဝ်ၶမ်ႈပွၵ်ႈၼိုင်ႈလႄႈ ႁဵတ်းၵႃႈဢၼ်ပႃးတီႈၵျၢမ်းလိၵ်ႈပိင်းၺၢပ်ႈတီႉထႃႇဝရႃႉၽြႃး ဢၼ်မၼ်းၸဝ်ႈဝႆႉပၼ်တီႈမဵဝ်း ဢီႉသရေႇလႃႉ ၼၼ်ႉ၊-

41တင်း ႁေႇမၼ်ႇ တင်း ယေႇတူႉသုၼ်ႇ ဢိၵ်ႇလူၺ်ႈၵၼ်တင်း ၵူၼ်းတၢင်ႇၵေႃႉဢၼ်လႆႈၶၢမ်ႇတၢင်းဢၼ်လိူၵ်ႈၵဵပ်းဢဝ်လႄႈ ၶဝ်ႈပႃးၼႂ်းၸရၢင်းၸွမ်းလူၺ်ႈၼႃႇမႃႉၸိုဝ်ႈသဵင်ၶဝ်ၼၼ်ႉ ႁႂ်ႈလႆႈယွင်ႈယေႃးၵျေးၸူးထႃႇဝရႃႉၽြႃး ၵွပ်ႈပိူဝ်ႈဢၼ် ၵရူႉၼႃႇမၼ်းၸဝ်ႈတႄႇယူႇတႃႇသေႇမၼ်ႈၶိူင်ႇၼၼ်ႉၸိူဝ်းၼၼ်ႉ၊-

42တင်း ႁေႇမၼ်ႇ တင်း ယေႇတူႉသုၼ်ႇ ဢၼ်ယိပ်းၵမ်ၸႃႉၸဵမ်ၼႄးၶရႃႇ၊ သႅင်ႇ၊ ပုၼ်ႈၶဝ်ၸိူဝ်းဢၼ် တၵ်းႁဵတ်းသဵင်လင် သဵင်မေႃး ဢိၵ်ႇတင်းမဵဝ်းတူႇရီႉယႃႇ ပုၼ်ႈဢၼ်တၵ်းသုင်းသွင်ႇသေလႄႈ ႁဵတ်းၵႂၢမ်းၽြႃးပဵၼ်ၸဝ်ႈၼၼ်ႉၸိူဝ်းၼၼ်ႉ တင်းလုၵ်ႈၸၢႆး ယေႇတူႉသုၼ်ႇ တင်းလၢႆ ႁႂ်ႈလႆႈပႂ်ႉၽၵ်းတူၼၼ်ႉၸိူဝ်းၼၼ်ႉဝႆႉဢေႃႈ။-

43လိုၼ်းၼၼ်ႉၵူၼ်းတင်းသဵင်ႈတင်းလူင် ဢွၼ်ၵၼ်ၶိုၼ်းမိူဝ်းၵႂႃႇၸူးၵႃႈတီႈႁိူၼ်းတီႈယူႇၶဝ် ႁင်းၽႂ်ႁင်းမၼ်းသေလႄႈ၊ တႃႇဝိတ်ႈ ၵေႃႈ မိူဝ်းၵႂႃႇႁႂ်ႈလႆႈပၼ်တၢင်းလီတီႈၵူၼ်းႁၢင်ႈၵူၼ်းႁေႃၸဝ်ႈဢေႃႈ။