1 Chronicles 10

Sotho 1951 (BIBELE)

← Chapter 9 Jump to: Chapter 11 →

1Bafilisita ba kile ba lwa le Baisiraele. Bana ba Isiraele ba rakwa ke Bafilisita, ba fedišwa ba bolailwe dithabeng tša Giliboa.

2Bafilisita ba hlomara Saulo le barwa ba gagwe; ba bolaya Jonathane, le Abinadaba, le Malakisua, barwa ba Saulo.

3Tlhabano ya thatafalela Saulo a hweditšwe ke babetši ba mesebe, a gobatšwa ke babetši bao;

4a botša morwadi wa marumo a gagwe a re: Swara tšhoša ya gago o ntlhabe, mašoboro ao a se tlo tla a nkgoboša. Morwadi wa dibetša a gana ka gobane a tšhogile ka kudu. Saulo a tšea tšhoša ya gagwe a ipolaya ka go ikwetša mo go yona.

5Morwadi wa dibetša ge a bona Saulo a hwile, le yena a ipolaya ka go ikwetša mo go tšhoša ya gagwe.

6Ya ba gona go hwa ga Saulo le barwa ba gagwe; ba hwile mmogo ka leloko.

7Batho ba Isiraele ka moka ba molaleng woo, ge ba bona ba fentšwe, le gore Saulo le barwa ba gagwe ba hwile, ba falala metseng ya bona ba tšhaba; mme Bafilisita ba tla ba dula go yona.

8Ka la ka moswana Bafilisita ba tla ba hlakola ba ba bolailwego, ba hwetša Saulo le barwa ba gagwe ba rapaletše gona moo dithabeng tša Giliboa.

9Ba mo hlakola, ba tšea hlogo ya gagwe le dibetša tša gagwe, ba di iša nageng ya Bafilisita thoko tšohle, gore taba ye e begwe go medimo ya bona ya diswantšho le go setšhaba.

10Dibetša tša Saulo ba di boloka mo ngwakong wa modimo wa bona; legata la hlogo ya gagwe ba le kokotela mo ngwakong wa Dagoni.

11Batho ba Jabese wa Gileada, ge ka moka ga bona ba ekwa tšohle tše Bafilisita ba di dirilego Saulo,

12ba tšwa, banna ka moka ba bahlabani, ba kuka setoto sa Saulo le ditoto tša barwa ba gagwe, ba di tliša Jabese, ba boloka mašapo a bona ka tlase ga mohlopi wa gona moo Jabese, ba fetša matšatši a šupago ba ikona dijo.

13Saulo o hwile a hlanogetše Morena, a ganne go hlokomela se Morena a se boletšego, a ba a nyaka senoge a botšiša sona,

14a se ke a botšiša Morena. Morena a mo lesa a hwa; bogoši a bo lesa bja fetela go Dafida morwa wa Isai.

← Chapter 9 Jump to: Chapter 11 →