1 Chronicles 5

Sotho 1951 (BIBELE)

← Chapter 4 Jump to: Chapter 6 →

1Bana ba Rubeni morwa wa ntlha wa Isiraele -- gobane e be e le yena wa pele; fela, o gobošitše malao a tatagwe, mme bogolwane bja gagwe bja newa barwa ba Josefa morwa wa Isiraele, le ge mo tokologanyong ya moloko a sa ka a fiwa bogolwane;

2gobane e a bego a feta bana babo ka moka e be e le Juda; go yena gwa tšwa kgoši ya bona. Bogolwane bjona e be e le bja Josefa.

3Bana ba Rubeni morwa wa ntlha wa Isiraele, ke Hanoge, le Palu, le Hetsirone, le Karami.

4Bana ba Joele ke Semaya; morwa wa gagwe ke Gogo morwa wa gagwe ke Simai;

5morwa wa gagwe ke Mika; morwa wa gagwe ke Reaya; morwa wa gagwe ke Baali;

6morwa wa gagwe ke Beera; ke yola wa go išwa bothopša ke Thigilathe-Pilesere kgoši ya Siria; gomme yena e be e le mokgoma wa ba ga Rubeni.

7Bana babo ka mo ba bego ba balwa melokong ya bona, le ka mo ba bego ba hlatlamana matswalong, mogolo wa bona e be e le Jehiele, gwa tla Sakaria,

8le Bela morwa wa Asasi morwa wa Sema morwa wa Joele. Yena o be a agile kua Aroere go goma ka Nebo le ka Baali-Meone.

9O be a agile go fihla lešokeng le le thomago nokeng ya Forate, gobane mehlape ya bona e be e le e mentši nageng ya Gileada.

10Mehleng ya Saulo ba kile ba lwa le Bahagari, ba ba bolaya ba dula metseng ya bona thoko yeo ya bohlabela nageng ka moka ya Gileada.

11Bana ba Gada ba be ba agile ba batagane le bona nageng ya Basani go goma ka Salika.

12Mokgoma wa bona e be e le Joele; wa bobedi wa bona e be e le Safama, le Jaenai, le Safate gona kua Basani.

13Bana babo bona ba meloko ya bona e be e le Mikaele, le Mesulama, le Seba, le Jorai, le Jakane, le Sia, le Ebere; ke ba ba šupago.

14Ke bona barwa ba Abihaili morwa wa Huri morwa wa Jaroa morwa wa Gileada morwa wa Mikaele morwa wa Jesisai morwa wa Jado morwa wa Busi.

15Mokgoma wa leloko la gabo bona e be e le Ahi morwa wa Abadiele.

16Ba be ba agile Gileada le Basani le metsaneng ya ntshe, le ya mabaleng ka moka a Sarona mo a fihlago ntshe.

17Ka moka ba ngwadilwe mehleng ya Jothama kgoši ya Juda, le mehleng ya Jerobeama kgoši ya Isiraele.

18Bana ba Rubeni le ba Gada, le ba seripa sa leloko la Manase, ge go balwa banna ba bagale, ba ba swarago kotse le lerumo, ba kgona go hlabana, e be e le ba dikete tše masome a mane a metšo e mene le makgolo a šupago a nago le masome a selelago ba ba tšwago dira.

19Ba kile ba lwa le Bahagari le Jeturi le Nafisi le Nodaba,

20ba ba fenya; Bahagari ba gafelwa diatleng tša bona le bao ba bego ba ema nabo; ka gobane ba le tlhabanong, ba hlabetše Modimo mokgoši, a ba kwa ka ge ba mmotile;

21ba thopa dikgomo tša bona; ba thopa dikamela tše dikete tše masome a mahlano, le dihuswana tše dikete tše makgolo a mabedi a nago le masome a mahlano a dikete, le dipokolo tše dikete tše pedi, le batho ba dikete tše lekgolo ba mathopša;

22gobane ntweng yeo go bolailwe ba bantši, ka ge ntwa e be e etšwa go Modimo. Gomme madulong ao a bona ba dula go fihla ge ba išwa bothopša.

23Ba seripa sa leloko la Manase ba be ba agile nageng yeo go tloga Basani go fihla Baali-Heremone le Senire, le thabeng ya Heremone, e le ba bantši.

24Bakgoma ba dilete tša bona šeba; Ke Efere, le Jisei, le Eliele, le Asiriele, le Jeremia, le Hodafya, le Jadiele, banna ba bagale le ba maatla, banna ba ba bego ba tumile, bakgoma ba dilete tša bona.

25Fela, ba hlanogetše Modimo wa bona, ba latela medimo ya ditšhaba tšeo Modimo a di fedišitšego ge ba fihla.

26Modimo a ba a hlohletša pelo ya Phule kgoši ya Asiria, le pelo ya Thigilathe-Pilesere kgoši ya Asiria, a ba iša bothopša, bona Barubeni le Bagada le seripa sa leloko la Bamanase, a ba iša Hala le Haboro nokeng ya kua Gosana; le lehono ba sa ile.

← Chapter 4 Jump to: Chapter 6 →