1 Chronicles 28

Sotho 1951 (BIBELE)

← Chapter 27 Jump to: Chapter 29 →

1Gomme Dafida a botha bakgoma ka moka ba Isiraele, ba tla Jerusalema, e lego babuši ba meloko, le balaki ba diphohla tša go direla kgoši, le balaoladikete, le balaolamakgolo, le balaki ba ba beilwego go laka thoto le dikgomo tša kgoši le tša barwa ba gagwe, le balaki ba nywako, le bagale, le banna ba ntwa ka moka.

2Kgoši Dafida a ema ka maoto a re: Nkweng, lena bana bešo, setšhaba sa ka! Nna ke be ke gopotše go agela polokelo ya kgwerano ya Morena Ngwako wo e kago dula go wona, gore e be bogato bja maoto a Modimo wa rena; ke be ke šetše ke lokišitše dikago.

3Fela, Modimo o ntherile a re: O se ke wa agela leina la ka ngwako, gobane o monna wa ditlhabano, mme o tšholotše madi.

4Bjale Morena Modimo wa Isiraele o nkgethile mo go bana ba tate ka moka, mme ka ba kgoši ya ka mehla le mehla; o kgethile Juda a ba moetapele; mo go Juda a kgetha leloko lešo; mme go barwa ba tate a kgahlwa ke nna a mpea kgoši ya Isiraele ka moka.

5Go bana baka ka moka, gobane Morena o mphile bana ba bantši, Morena o kgethile Salomo morwa wa ka gore a dule sedulong sa mmušo wa Morena a buše Isiraele.

6A mpotša a re: Salomo morwa wa gago ke yena a tlogo aga Ngwako le malapa a ka, gobane ke ikgethetše yena gore e be morwa wa ka, mme nna ke be tatagwe.

7Mmušo wa gagwe ke tlo o thekga ka go sa felego, ge a ka tiiša a dira ka melao ya ka, le ka mekgwa ya ka ka mokgwa wa lehono.

8Bjale ke bolela Baisiraele ka moka ba phuthego ya Morena ba le gona, le Modimo a di kwe, ke re; Hlokomelang melao ka moka ya Morena Modimo wa lena, le nyake yona, ke mo le tlogo ba beng ba naga e botse ye, ya tlo ba magae a lena le a bana ba lena ba ba tlogo le latela neng le neng.

9Wena Salomo ngwanaka, o fele o tseba Modimo wa tatago, o mo hlankele ka pelo yohle le ka moya wa mafolofolo; gobane Morena o fenyeka dipelo ka moka, o hlaologanya thopa tšohle tša dikelelo; ge o mo nyaka, o tlo re: Ke nna e! Ge o ka mo tlogela, gona o tlo go lahla ya ba moka.

10Bjale o hlokomele taba ye; Morena o go kgethetše go aga Ngwako wa felo gokgethwa. Tia maatla gee, o dire!

11Gomme Dafida a nea Salomo morwa wa gagwe seswantšho sa mathudi, le sa meago ya gona, le sa nywako ya matlotlo, le sa diphapoši tša godimo, le sa diphapoši tša ka gare, le sa Ngwako wa sekhurumelo sa poelanyo.

12A mo nea seswantšho sa tšohle tše di bego di le mogopolong wa gagwe, tša malapa le Ngwako wa Morena, le tša nywakwana ya go tlo o dikologa ya go tlo boloka mahumo a Ngwako wa Modimo le tše di kgethwa,

13le tša dihlopha tša baperisita le tša Balefi, le tša mediro yohle ya go direla Ngwakong wa Morena, le tša dibjana ka moka tša go tlo dira Ngwakong wa Morena.

14A mo nea le digauta ka kelo ya tšona e lekanego go tlo dira dibjana tšohle tša modiro ka moka, le disilifera ka kelo ya tšona e lekanego go dira dibjana tšohle tša silifera tša modiro o mokgethwa.

15A mo nea le gauta e lekanego dihlomapone, le tšona dipone tša tšona tša gauta ka kelo ya sehlomapone ka setee le dipone tša sona, le silifera ya dihlomapone tša silifera ka kelo ya tšona le ya dipone tša yona ka mo go lekanego sehlomapone ka setee.

16A mo elela le gauta e lekanego go dira dithalana tša dinkgwaponwa, ka kelo ya sethalana ka setee, le silifera ya go dira dithalana tša silifera.

17A mo nea le gautatshekegi ya go dira dihlaba, le ya meruswi ya go foka, le ya megopo; a mo nea ka kelo e tlogo lekana sebjana se sengwe le se sengwe, le silifera e lekanego sebjana se sengwe le se sengwe sa silifera.

18A mo elela le gautatshekegi ya go dira aletare ya diorelo, le seswantšho sa leako, le Bakerubi ba gauta ba ba phurollotšego diphego ba širetša polokelo ya kgwerano ya Morena.

19Tše ka moka tša ya ka go latela lengwalo le lengwadilwego ka taelo ya Morena, le le laodišago modiro wa moago.

20Dafida a bolela le Salomo morwa wa gagwe a re: Tia maatla, o tleme pelo, o dire, o se boife, o se tšhoge selo, gobane Morena Modimo, Modimo wa ka, o tlo ba le wena; a ka se ke a go gerula, a ka se ke a go lahla, mme o tlo ba wa phetha mediro ka moka ya tše tša ngwako wa Morena.

21Le gona, dihlopha tša baperisita le tša Balefi šedi tša go tlo dira mediro ka moka ya Ngwakong wa Modimo; gomme medirong ka moka ba o nago le bona ke banna ba go ithapa, ba ba hlalefetšego mediro ka moka. Bakgoma le setšhaba ka moka ba tlo kwa se o se bolelago.

← Chapter 27 Jump to: Chapter 29 →