1 Chronicles 22

Sotho 1951 (BIBELE)

← Chapter 21 Jump to: Chapter 23 →

1Gomme Dafida a re: Felo fa e tlo ba ga Ngwako wa Morena Modimo, gomme aletare ya dihlabelo e tlo ba fa.

2A laela gore go bothwe ba mašalela ala a go šala nageng ya Isiraele, a ba dira babetli ba go betla maswika a go tlo aga Ngwako wa Modimo.

3Le gona a lokiša tshipi e ntši ya go dira dimapolo le mekgokelo ya mamati, le mphiri o montši o sa kago wa elwa,

4le dikwata tša morokwana tše di sa kago tša balwa, gobane Basidone le Batiro ba be ba tlišetša Dafida dikwata tše ntši tša marokwana.

5Ka gobane Dafida o be a re: Salomo morwa wa ka e sa le lesoganyana le le botete; gomme Ngwako wo o tlogo agelwa Morena e tlo ba o mogolo wa thokamela, gore o bolelwe o retwe dinageng ka moka; ke mo lokišetša tša go o aga. Ka kgonthe a di lokiša a sešo a hwa.

6Gomme Dafida a bitša Salomo morwa wa gagwe, a mo laela a re a agele Morena Modimo wa Isiraele Ngwako.

7A mmotša a re: Ngwanaka! Pelong ya ka ke be ke rerile ka re ke tlo agela Morena Modimo wa ka Ngwako.

8Fela, ka tlelwa ke lentšu la Morena la re: Wena o tšholotše madi a mantši; o lwile dintwa tše kgolo; wena o ka se agele leina la ka Ngwako, ka gobane ke go bone o tšholola madi a mantši lefaseng.

9Tseba gore o tlo belegelwa morwa; yena e tlo ba monna wa šebešebe; yena ke tlo mo khutšiša manaba ka moka thoko tšohle, gobane leina la gagwe e tlo ba Salomo (Rakhutšo), gobane mehleng ya gagwe ke tlo ba ke neile Isiraele khutšo le leago.

10Ke yena a tlogo agela leina la ka Ngwako; e tlo ba morwa wa ka, mme nna ke tlo ba tatagwe, ka tiiša sedulo sa bogoši bja gagwe go Isiraele ka go sa felego.

11Bjale, Ngwanaka! Morena a be nago, o be wa mahlatse, o age Ngwako wa Morena Modimo wa gago ka mo a boletšego ka gona.

12A Morena a go fe bohlale le tlhaologanyo ge a go gafela setšhaba sa Isiraele, gore o hlokomele melao ya Morena Modimo wa gago.

13Ke mo o tlogo ba le mahlatse, ge o tiišetša go dira ka melao le ka mekgwa ye Morena a e laetšego Isiraele ka Moshe. Tiiša maatla o dire senna; o se boife mme o se tšhoge selo.

14O ko bone, ke le mabothateng a ka ke lokišeditše Ngwako wa Morena digauta tša talente tše dikete tše lekgolo, le silifera le talente tše dikete tše sekete, le mphiri, le tshipi ye e sa lekanywego; di gona, ke tše ntši; le dikwata, le maswika ke di lokišitše. Gomme wena o ka di oketša ka tše dingwe.

15Le gona o na le badiri ba bantši, babetli ba maswika, le baagi, le babetli ba dikwata, le bomakgone ka moka ba mediro.

16Ge e le disilifera, le digauta, le mphiri, le tshipi, ke tše di sa balwego. Ema gee o dire; Morena o tlo ba nago.

17Bakgoma ba Isiraele ka moka, Dafida o ba laetše a re ba thuše Salomo morwa wa gagwe;

18a re: A ga ke re Morena Modimo wa lena o na le lena, mme o le khutšišitše mola beng ba naga ye a ba gafela seatleng sa ka? Bjale naga ye e kokobeditšwe pele ga Morena le pele ga setšhaba sa gagwe.

19Bjale gafelang dipelo tša lena le meoya ya lena go tsoma Morena Modimo wa lena. Emang le age Ntlokgethwa ya Modimo Morena, gore le kgone go iša polokelo ya Morena le dibjana tše kgethwa tša Modimo mo Ngwakong woo o tlogo agelwa leina la Morena.

← Chapter 21 Jump to: Chapter 23 →