1 Chronicles 12

Sotho 1951 (BIBELE)

← Chapter 11 Jump to: Chapter 13 →

1Šeba ba go tla go Dafida mola a le motseng wa Tsikilaga, mola a sa iphihlela Saulo morwa wa Kisi; le bona e be e le ba bagale ba ba bego ba tlatša Dafida.

2E be e le ba go swara bora, ba ba bego ba betša ka seragamabje ka le letona le ka la ntsogošo, ba ba bego ba betša ka bora le ka mesebe; e be e le ba gabo Saulo ba Benyamini.

3Thwadi ya bona e be e le Abiesere le Joase barwa ba Semaa wa Gibea, le Jesiele le Pelete barwa ba Asimafethe, le Baraka, le Jesu wa Anathothe,

4le Jesimaya wa Gibeoni mogale mo go ba masome a mararo bala, a ba a ba thwadi ya bona, le Jeremia, le Jehasiele, le Johanana, le Josabadi wa Gedera,

5le Elusai, le Jerimothe, le Bealia, le Semaria, le Sefatya wa Harifi,

6le Elikana, le Jisia, le Asariele, le Joesere, le Jesobeama ba leloko la Korage,

7le Johele le Sebadya barwa ba Jerohama wa Gedora.

8Mo go Bagada go tšwile banna ba bangwe ba tla go Dafida mola a le sebong sa kua lešokeng; e be e le bagale ba maatla, banna ba tlhabano, ba ba tsebago ntwa, ba swere kotse le marumo, ba difahlogo tša ditau, ba lebelo la kome thabeng.

9Wa pele e be e le Esere; wa bobedi e be e le Obadya, wa boraro e le Eliaba,

10wa bone e le Misamana, wa bohlano e le Jeremia,

11wa go selela e le Athai, wa go šupa e le Eliele,

12wa seswai e le Johanana, wa senyane e le Elisabadi,

13wa lesome e le Jeremia, wa lesome le motšo o tee e le Makabanai.

14Ke bona ba leloko la Gada, balaodi ba dira; yo monyenyane wa bona o be a lekana le lekgolo, e mogolo wa bona a lekana le ba sekete.

15Ke bona ba ba kilego ba sela noka ya Jorodane ka kgwedi ya pele mohla e aparetše maboto mo go fela, ba raka bohle ba ba bego ba agile melaleng thoko ya bohlabela le ya bodikela.

16Ba bangwe ba leloko la Benyamini le la Juda ba tlile go Dafida mola a le sebong.

17Dafida a tšwa a ema a lebana nabo, a ba rera a re: Ge e ka ba le tlile go nna ka šebešebe go ntlatša, gona re tlo ba batee ka dipelo. Fela, ge e ka ba le tlile go nkeka gore le nkgafele diatleng tša manaba a ka, etšwe go se bokgopo diatleng tša ka, gona go tlo bona Modimo wa botatawešo a le otla.

18Ke mo Amasia molaodi wa bona bao ba masome a mararo a tletšwego ke moya, a re: Re ba gago, wena Dafida! Re nago wena morwa wa Isai! Khutšo, -- khutšo a e be le wena; khutšo a e be le ba ba emago nago; gobane o lwelwa ke Modimo wa gago. Ke moka Dafida a ba amogela, a ba dira balaodi ba dikgao tša bahlabani.

19Le ba bangwe ba Manase ba tla ba itiga go Dafida mola a tšwile le Bafilisita ge ba lwa le Saulo mme a se ba tlatše, ka gobane dikgošana tša Bafilisita di be di kwane, tša mo gomiša tša re: A ka itiga go Saulo mong wa gagwe ka dihlogo tša rena!

20A sa boela Tsikilaga, gwa tla bona bao ba Manase, ba mo tlatša; e be e le Adina, le Josabadi, le Elihu, le Tsilethai; e be e le bakgoma ba dilete tša Bamanase.

21Bona ba thuša Dafida mola a elwa le bahlakodi bala, gobane ka moka ga bona e be e le banna ba bagale, e le balaodi ba dira.

22Ka tšatši le lengwe le le lengwe go be go etla ba bangwe ba mo tlatša, ya ba dira tše kgolo bjalo ka dira tša Modimo.

23Palo ya ba ba itlhametšego ntwa mme ba tla go Dafida mola a le motseng wa Heburone go mo gafela bogoši bja Saulo ka mo molomo wa Morena o bego o boletše, še:

24Ba leloko la Juda ba tla ba swere kotse le lerumo; e be e le ba dikete tše di selelago le makgolo a seswai, ba itlhametše ntwa.

25Ba leloko la Simeone ba e bego e le banna ba bagale ba ntwa, e be e le ba dikete tše di šupago le lekgolo.

26Ba leloko la Lefi e be e le ba dikete tše nne le makgolo a selelago;

27ba tla ba na le Joyada molaodi wa ba gaArone a na le ba dikete tše tharo le makgolo a šupago,

28le Tsadoko lesogana le bogale le maatla, a na le ba gabo, e le bakgoma ba masome a mabedi a metšo e mebedi.

29Ba leloko la Benyamini ba gabo Saulo e be e le ba dikete tše tharo; gobane go fihla moo ba bantši ba bona ba be ba sa emela ba lešika la Saulo.

30Ba leloko la Efuraimi e be e le ba dikete tše masome a mabedi le makgolo a seswai, bagale ba ba tiilego, banna ba maina mo go ba gabo.

31Ba seripa sa leloko la Manase e be e le ba dikete tše lesome le metšo e seswai, ba ba bego ba boletšwe ka maina a bona gore ba ye ba dire Dafida kgoši.

32Ba leloko la Isashara, ba ba bego ba tseba mme ba hlaologanya lebaka, ba tseba se Baisiraele ba swanetšego go se dira, bakgoma ba bona e be e le ba makgolo a mabedi, bao bana babo ka moka ba bego ba ekwa se ba se bolelago.

33Ba leloko la Sebulone, ba ba bego ba ithlametše ntwa ka ditlhamo ka moka, e be e le ba dikete tše masome a mahlano, ba le setlemo, ba sa dikadike.

34Banafutali e be e le balaodi ba sekete, ba na le ba dikete tše masome a mararo a metšo a šupago, ba kotse le lerumo.

35Badani e be e le ba dikete tše masome a mabedi a metšo a seswai le makgolo a selelago a ba ba itlhametšego ntwa.

36Baasere e be e le ba dikete tše masome a mane tša ba ba tšwago dira ba itlhamile.

37Mošola wa Jorodane go Barubeni le Bagada le ba seripa sa leloko la Manase e be e le dikete tše lekgolo le nago le masome a mabedi a dikete tša ba ba itlhametšego ntwa ka ditlhamo ka moka.

38Bahlabani ba ka moka ba tlile Heburone, ba lokologana ka dikgao, dipelo e le tše tšhweu, ba dira Dafida kgoši ya Baisiraele ka moka; Baisiraele bohle ba tla ba le setlemo setee, ba mo dira kgoši.

39Ba dula ntshe le Dafida, ba fetša matšatši a mararo ba le ntshe, ba eja, ba enwa, gobane bana babobona ba be ba ba hlabetše.

40Ba kgauswi, go goma ka Baisašara le Basebulone le Banafutali, ba tliša dijo ka dipokolo le ka dikamela le ka dimeila le ka makaba, e le dijo tša maupi, le dinkgwa, le mago, le makwapi a morara, le beine, le makhura, le dikgomo le dihuswa tše ntši, gobane Baisiraele ba be ba thabile.

← Chapter 11 Jump to: Chapter 13 →