1 Chronicles 29

Sotho 1951 (BIBELE)

← Chapter 28 Jump to:

1Bjale Dafida a botša phuthego ka moka a re: Salomo morwa wa ka yo, yo Modimo a mo kgethilego a nnoši, e sa le lesogana le le botete; ge e le modiro wona ke o mogolo; gobane Ngwako o mogolo wo ga o agelwe motho, ke wa Morena Modimo.

2Nna ke dirile ka maatla a ka ka moka ka bolokela Ngwako wa Modimo wa ka digauta tša go tlo dira tša gauta, le silifera ya tša silifera, le mphiri wa tša mphiri, le tshipi ya tša tshipi, le dikota tša tša kota, le ditalama le magakabje a go tlo dira tša bothakga, le magakabje a mebalabala le a bohlokwa; le mabjemašweu a go tlo aga ke a mantši.

3Gape, ka gobane Ngwako wa Modimo wa ka ke a o rata, ke ntšha tše e lego tša ka, gauta le silifera, gore e be tša Ngwako wa Modimo wa ka; ke tša go tlatša tšeo tšohle, tše ke šetšego ke di boloketše Ngwako o mokgethwa.

4Ke talente tše dikete tše tharo tša gauta ya Ofira, le talente tše dikete tše di šupago tša siliferatshekegi, tša go tlo manega maboto a Ngwako ka tšona;

5gore gauta e dire tša yona, le silifera e dire tša yona, ka mo bakgoni ba tlogo dira ka gona. -- Gomme bjale ke mang e a ithapago a ntšhetša Morena ka seatla sa gagwe lehono?

6Gomme gwa ithapa bakgoma, le bagolo ba meloko, le balaoladikete, le balaolamakgolo, le balaki ba mediro ya kgoši;

7ba ntšha tša modiro wa Ngwakong wa Modimo, ya ba talente tše dikete tše tlhano tša gauta di nago le diponto tše dikete tše lesome, le ditalente tše dikete tše lesome tša silifera, le talente tše dikete tše lesome la metšo e seswai tša mphiri, le talente tše dikete tše lekgolo tša tshipi.

8Yo a bego a na le ditalama, a di tšhela mahumong a Ngwako wa Morena a di gafela diatleng tša Jehiele wa ga Gerisone.

9Gomme setšhaba sa thabela boithapo bja bona, ka gobane ba be ba tlišetša Morena dineo ka pelo e tšhewu. Dafida Kgoši le yena a thaba gagologolo.

10Gomme Dafida a leboga Morena a lebane le phuthego ka moka a re: A go lebogwe wena Morena, Modimo wa tatawešo Isiraele, wena wa mehleng ya kgalekgale le ya neng le neng!

11Morena, bogolo ke bja gago, le maatla, le letago, le ditheto, le borena; gobane tšohle kua legodimong le mo lefaseng ke tša gago; o mmuši, o hlogo ye e iphagamišitšego godimo ga tšohle.

12Lehumo le bogolo di tšwa go wena, o buša tšohle; maatla le thata di tšwa diatleng tša gago; gomme tšohle tše di golago mme tša tia, di gola di tia ka atla sa gago.

13Modimo, bjale rena re a go leboga, re reta leina la gago le le tagilego.

14Gobane ke nna mang, gomme setšhaba sa ka ke eng? Re fo kgantšha maatla re ithapa re ntšha dilo tše, mola di tšwile go wena tšohle, re go ntšheditše tšohle di tšwago atleng sa gago.

15Gobane pele ga gago re fo ba bafeti, re badiiledi bjalo ka botatawešo ka moka; mme matšatši a rena mo faseng a etša moriti; ga go na se re se holofelago.

16Morena Modimo wa rena! Lehumo le ka moka le re le boloketšego go agela leina le lekgethwa la gago ngwako, le re tletše le etšwa atleng sa gago; ke la gago ka moka.

17Modimo wa ka; ke tseba gore o fenyeka pelo, mme o kgahlwa ke boloki; mme nna ka dira ka pelobolo ka ntšha dilo tše ka moka ka go ithapa; bjale ke thaba ge ke bona setšhaba sa gago se se lego fa se go ntšhetša dineo ka go ithapa.

18Morena Modimo wa botatawešo, wa Aborahama le Isaka le Jakobo, leta dipelo tša batho ba gago gore di dule di na le thato e bjalo le kgopolo e bjalo tša bona; dipelo tša bona di tle di lebile wena.

19Salomo morwa wa ka o mo nee pelobolo, gore a hlokomele malaedi, le mabohlatse a gago, le melao ya gago, a dire mediro ye ka moka, a age Ngwako o mogolo wo ke o boloketšego tša wona.

20Ke mo Dafida a boletšego le phuthego ka moka a re: Lebogang Morena Modimo wa lena! Phuthego ka moka ya leboga Morena Modimo wa botatabo, ba khunama ba lotšha Morena, ba tsebo lotšha le kgoši.

21Ba tlišetša Morena didimo; ka la ka moswana ba tlišetša Morena dihlabelo tša dipowana tše sekete, le dikgapa tše sekete, le dinku tše sekete le dibego tša tšona, le didimo tše ntši tše ba di diretšego setšhaba sa Isiraele ka moka.

22Tšatši leo ba hlwa ba le pele ga Morena ba eja, ba enwa ba thabile gagolo; Salomo morwa wa Dafida ba buša ba mmea kgoši la bobedi, ba mo tloletša Morena gore a be ketapele, mme Tsadoko ba mmea moperisita.

23Ke moka Salomo a dula sedulong sa bogoši sa Morena, a ba kgoši legatong la Dafida tatagwe; mme a ba yo mahlatse; Baisiraele ka moka ba kwa se a se bolelago.

24Gomme bakgoma ka moka, le bagale, le bana ba kgoši Dafida ka moka ba loba Salomo.

25Ke Morena e a neilego Salomo bogolo bjo bokaakaa, Baisiraele ka moka ba mmona e le e mogolo; o mo neile bonatla bja bogoši bjo bo sa kago bja ba gona go kgoši e nngwe ya Isiraele pele ga gagwe.

26Dafida morwa wa Isai e be e le kgoši ya Isiraele ka moka.

27Lebaka le a le feditšego a buša Isiraele ke nywaga e masome a mane; nywaga e šupago o bušitše a le motseng wa Heburone; nywaga e masome a mararo a metšo e meraro a buša a le Jerusalema.

28O hwile a tšofetše gagolo, a atetšwe ke matšatši, le mahumo le go retwa. Legatong la gagwe gwa buša Salomo morwa wa gagwe.

29Ge e le ditaba tša kgoši Dafida, tša ge a thoma a ba a goma, tšona di ngwadilwe ditabeng tša Samuele mmoni, le ditabeng tša Nathane moporofeta, le ditabeng tša Gada mmoni.

30Di ngwadilwe gotee le tša mmušo wa gagwe ka moka, le tša bogale bja gagwe, le tše di tletšego yena le setšhaba sa Isiraele le mebušo ya dinaga tše dingwe.

← Chapter 28 Jump to: