1 Chronicles 13

Sotho 1951 (BIBELE)

← Chapter 12 Jump to: Chapter 14 →

1Dafida o kile a eletšana le balaodi ba dikgao le ba dira, le bakgoma ba bangwe.

2A tsebiša setšhaba sa Isiraele ka moka a re: Ge le ka thabela taba ye, gomme e le taba e tšwago go Morena Modimo wa rena, gona a re napeng re e iše go bana babo rena ba thoko tšohle tša naga ka moka ya Isiraele, le go baperisita le Balefi, metseng le metsaneng, re re ba tle ba phuthegele go rena,

3re tle re bušetše polokelo ya kgwerano ya Modimo wa rena fa go rena, gobane mehleng ya ge go buša Saulo ga ra ka ra e šetša.

4Lekgotla ka moka la re go dirwe bjalo. Ka kgonthe ya ba taba e thabelwago ke setšhaba ka moka.

5Gomme Dafida a botha Baisiraele bohle go goma ka noka ya Sihoro ya Egipita, le go fihla kwa Hamathi, gore ba tle ba rwale polokelo ya Morena kwa Kireathe-Hearima, ba e tliše.

6Ke moka Dafida, a na le Baisiraele bohle, a rotogela Baala motseng wa Kireathe-Jearima wa Juda, ba yo rwala polokelo ya Modimo Morena e a dutšego godimo ga Bakerubi, e lego mo go rapelwago ina la Morena.

7Ba rwala polokelo ya Modimo ka koloi e mpsha, ba tloga nayo lapeng la Abinadaba; Usa le Ahio ba sepediša koloi yeo.

8Dafida le Baisiraele ka moka ba bina, ba letša diletšo ka maatla a bona ka moka pele ga Modimo, ba bina dikoša, ba letša diletšo, ba hlaba difela ba letša meropa le makope le dinaka.

9Ya re ge ba tla seboeng sa Kidone, Usa a iša seatla a swarelela ka polokelo, ka gobane dikgomo di be di thelela.

10Bogale bja Morena bja tukela Usa, a mmolaya ka gobane a iša letsogo polokelong, a hwela gona moo pele ga Modimo.

11Dafida a šegama ka gobane a ubutše Usa, a mo hlothola ka mokgwa woo. Gomme leina la felo fao ya ba Peeretse-Usa le nankhono.

12Dafida a tšhoga Modimo mohla woo a re: Polokelo ya Morena nka e iša bjang kua ga ka?

13A lesa go e iša ga gagwe motseng wa Dafida; a e iša ngwakong wa Obede-Edomo wa Gathe.

14Polokelo ya Modimo ya dula moo ngwakong wa Obede-Edomo, gwa fela dikgwedi tše tharo e le ntshe; gomme Morena a šegofatša lapa la Obede-Edomo le tšohle tše a bego a na natšo.

← Chapter 12 Jump to: Chapter 14 →