1 Chronicles 23

Sotho 1951 (BIBELE)

← Chapter 22 Jump to: Chapter 24 →

1Dafida mola a šetše a tšofetše, a atetšwe ke matšatši, o beile Salomo morwa wa gagwe a ba kgoši ya Isiraele.

2Dafida o kile a botha bakgoma ba Isiraele, le baperisita, le Balefi.

3Balefi, ge go balwa ba ba feditšego nywaga e masome a mararo le e fetago yeo, gwa tšwa dikete tše masome a mararo a metšo e seswai tša banna.

4Go bona gwa hlaolwa ba dikete tše masome a mabedi a metšo e mene, ya ba ba go hlapetša mediro ya Ngwako wa Morena; ba dikete tše di selelago ya ba balaki le baahlodi.

5Ba dikete tše nne ya ba baleti ba dikgoro, le ba go reta Morena ka diletšo tše Dafida a di dirilego ya ba tša go opela; e be e le ba dikete tše nne.

6Balefi o ba arotše ka go ya ka meloko ya barwa ba Lefi, e lego Gerisome le Kahathe le Merari.

7Bagerisome e be le Laedani le Simei.

8Barwa ba Laedani e be e le Jehiele wa pele, le Sethama, le Joele; e be e le ba bararo.

9Barwa ba Simei e be e le Selomitha, le Hasiele, le Harane, ba bararo ba e be e le bona bagolo ba leloko la Laedani.

10Barwa ba Simei e be e le Jahathe, le Sina, le Jeusi, le Beria; ke bona barwa ba Simei, e be e le ba bane.

11Jahathe e be e le wa pele, Sina e be e le wa bobedi. Jeusi le Beria ba be ba se na bana ba bantši, ba fo balwa sekgao setee le leloko letee.

12Barwa ba Kahathe e be e le Amorama, le Jitsehara, le Heburone, le Usiele; e be e le ba bane.

13Barwa ba Amorama e be e le Arone le Moshe. Arone o hlaotšwe gore a kgethelwe sekgethwakgethwa, yena le barwa ba gagwe ka go sa felego; ya ba bona ba go thuntšhetša Morena diorelo, le ba go šegofatša setšhaba ka leina la Morena ka go sa felego.

14Ge e le Moshe monna wa Modimo barwa ba gagwe ba be ba balwa le leloko la Lefi.

15Barwa ba Moshe e be e le Gerisome le Eliesere.

16Barwa ba Gerisome e be e le Sebuele wa pele.

17Barwa ba Eliesere e be e le Rehabya wa pele. Gomme Eliesere o be a se na barwa ba bangwe; barwa ba Rehabya bona ba ata ka kudu.

18Barwa ba Jitsehara e be e le Selomitha wa pele.

19Barwa ba Heburone e be e le Jeria wa pele; wa bobedi e be e le Amaria; wa boraro e be e le Jehasiele; wa bone e be e le Jakamehama.

20Barwa ba Usiele e be e le Mika wa pele; wa bobedi e be e le Jisia.

21Barwa ba Merari e be e le Mahli le Musi. Barwa ba Mahli e be e le Eleasara le Kisi.

22Eleasara a hwa a se na barwa, ge e se barwedi fela; bona ba tšewa ke bana babobona ba Kisi.

23Barwa ba Musi e be e le Mahli, le Edere, le Jerimothe, ba bararo ba.

24Ke bona barwa ba Lefi ka meloko ya bona, ba e lego botatago meloko ka palo ya bona; ke bona ba go dira mediro ya Ngwako wa Morena, ge ba na le nywaga e masome a mabedi le e fetago yeo.

25Gobane Dafida o be a re: Morena Modimo wa Isiraele o neetše setšhaba sa gagwe khutšo; o dutše Jerusalema ka go sa felego.

26Le gona Balefi ga ba sa rwala ngwako wola le dilo tša wona tša modiro wa wona.

27Ka gobane ka taelo ya Dafida ya mafelelo barwa ba Lefi ba balwa ge ba na le nywaga e masome a mabedi le e fetago yeo.

28Modiro wa bona ke gore ba tlatše barwa ba Arone modirong wa ngwako wa Morena, le malapeng a wona le diphapošing tša wona, le go thakga dilo tše kgethwa ka moka, le mediro ka moka ya ngwakong wa Morena;

29le go hlokomela dinkgwabonwa, le maupi a tokilwego a dibego tša dijo, le dinkgwana tše di sa omelwago, le meruswi, le tše di bešwago, le ditekanyo le meelo.

30E be e le ba go ema ka moswana ka mehla, ba leboga ba reta Morena; ba dira bjalo le ka mantšiboa.

31E be e le ba go tliša dihlabelo tšohle tša Morena ka disabatha le ka dikgwedi tše mpsha le ka menyanya, ba ya ka palo ya bona le ka mokgwa wa bona wa ka mehla pele ga Morena.

32Ya ba ba go hlokomela tše di swanetšego go hlokomelwa ngwakong wa kgwerano le sekgethweng, le tše di bego di hlokomelwa ke barwa ba Arone bana babo bona, tša go direla ngwako wa Morena.

← Chapter 22 Jump to: Chapter 24 →