1 Chronicles 15

Sotho 1951 (BIBELE)

← Chapter 14 Jump to: Chapter 16 →

1Dafida o ikagetše nywako motseng wa gagwe. Polokelo ya Morena o e lokišeditše madulo a yona, a e hlomela ngwakwana.

2Mehleng yeo Dafida o itše: Polokelo ya Modimo e se ke ya rwalwa ke motho, ge e se Balefi, gobane ke bona ba Modimo a ba kgethetšego go rwala polokelo ya gagwe, le go mo hlankela ka mehla.

3Dafida a botha Baisiraele ka moka ba tla Jerusalema gore ba rwale polokelo ya Morena, ba e iše bodulong bja yona bjo a bego a bo lokišitše.

4A phutha ba leloko la Arone le la Lefi.

5Go ba leloko la Kahathe a hlaola Uriele mokgoma wa ba lekgolo le masome a mabedi ba leloko la gagwe.

6Go ba leloko la Merari a hlaola Asaya mokgoma, le ba makgolo a mabedi a masome a mabedi ba leloko la gagwe.

7Go ba leloko la Gerisone a hlaola Joele mokgoma, le ba lekgolo le masome a mararo ba leloko la gagwe.

8Go ba leloko la Elitsafane a hlaola Semaya mokgoma, le ba makgolo a mabedi ba leloko la gagwe.

9Go ba leloko la Heburone a hlaola Eliele mokgoma, le ba masome a seswai ba leloko la gagwe.

10Go ba leloko la Usiele a hlaola Aminadaba, le ba lekgolo le lesome le metšo e mebedi ba leloko la gagwe.

11A tsebo bitša Tsadoko le Abyathara baperisita, le Balefi boUriele, le Joele, le Semaya, le Eliele, le Aminadaba;

12a bolela le bona a re: Lena le bakgoma ba meloko ya geno ya Balefi; bjale ikgetheng, le kgethe le bana babolena gore le rwale polokelo ya Morena Modimo wa Isiraele, le e tliše mo ke e lokišeditšego gona;

13gobane mohla wola le be le se gona, gwa se dire bolena; mme Morena Modimo wa rena a re gogola ka ge re sa ka ra mmatamela ka mokgwa wa gona.

14Ke moka baperisita le Balefi ba ikgetha gore ba kgone go goroša polokelo ya Morena Modimo wa Isiraele.

15Ba leloko la Balefi ba rwala polokelo ya Modimo ka magetla a bona, ka mešikaro e lego mo go yona, ka mo Moshe a bego a laetše ka gona a boditšwe ke Morena.

16Dafida a botša bakgoma ba Balefi a re ba beakanye bana babo ka dihlopha tša baopedi, le tša baletši ba diletšo, le ba makope, le ba dinaka, le ba meropa, gore ba gobele ba hlaboše mantšu ka go thaba.

17Balefi ba bea Hemana morwa wa Joele, le Asafa morwa wa Berekia wa leloko la gabo; go leloko la Merari la gabobona ba bea Ethane morwa wa Kusaya.

18Gotee le bona ba bea bana babo ba sehlopha sa bobedi, e lego Sekaria morwa wa Jaasiele, le Semiramothe, le Jehiele, le Uni, le Eliaba, le Benaya, le Maaseya, le Mathitya, le Elifele, le Mikinea, le Obede-Edomo, le Jeiela baleti ba dikgoro.

19Ba dikoša e be e le Hemana, le Asafa, le Ethane, baletši ba diletšo tša mphiri.

20Sekaria, le Asiele, le Semiramothe, le Jehiele, le Uni, le Eliaba, le Maaseya, le Benaya, e be e le ba diletšo ka lentšu la pele.

21Mathitya, le Elifele, le Mikinea, le Obede-Edomo, le Asaya, e be e le ba makope, ba mantšu a banna.

22Kenanya mokgoma e mongwe wa Balefi, e be e le mohlabeledi wa go ruta bahlabeledi, gobane e be e le seopedi.

23Berekia le Elikana e be e le baleti ba mojako polokelong.

24Gomme baperisita, boSebanya, le Josafate, le Nethaniele, le Amasai, le Sakaria, le Benaya, le Eliesere, e be e le ba go letša diphalafala ba etile polokelo ya Morena pele. Obede-Edomo le Jehia e be e le baleti ba mojako polokelong.

25Bjale Dafida le bagolo ba Isiraele, le balaodi ba dikgao tša madira, ba ya go tšea polokelo ya kgwerano ya Morena, ba e ntšha ngwakong wa Obede-Edomo ba thabile.

26Ya re ge Modimo a tsebafa Balefi ba ba bego ba rwala polokelo ya kgwerano ya Morena, ba hlaba dipoana tše di šupago, le dikgapa tše di šupago.

27Dafida yena o be a apere kobo ya leokodi le lešweu, ye e bego e aperwe ke bohle Balefi ba ba bego ba rwala polokelo, le baopedi, le Kenanya mohlableledi wa baopedi. Dafida o be a apere le nkatana ya leokodi.

28Ka mokgwa o bjalo Baisiraele ka moka ba tla le polokelo ya Kgwerano ya Morena ka go hlalala, go letšwa diphalafala le dinaka le meropa le makope le diletšo.

29Ya re ge polokelo ya kgwerano ya Morena e fihla motseng, Mikala morwedi wa Saulo a ukamela ka lešoba, a bona kgoši Dafida a bina a fela a gobela, mme a mo nyatša pelong ya gagwe.

← Chapter 14 Jump to: Chapter 16 →