1 Chronicles 9

Sotho 1951 (BIBELE)

← Chapter 8 Jump to: Chapter 10 →

1Baisiraele ka moka ba be ba ngwadilwe lengwalong la meloko ya bona; ke bona ba ba ngwadilwego pukung ya dikgoši tša Isiraele. Bajuda ba išitšwe bothopša kua Babele ka baka la bohlanogi bja bona.

2Bjale madulong a bona le metseng ya bona gwa tla ba ba bego ba agile nageng yeo kgale; e be e le Baisiraele, le baperisita, le Balefi, le bahlanka ba Ntlokgethwa.

3Motseng wa Jerusalema go be go agile ba bangwe ba Bajuda, le ba bangwe ba Babenyamini, le ba bangwe ba Baefuraimi le Bamanase.

4Ke Uthai morwa wa Amihudi morwa wa Omiri morwa wa Imiri morwa wa Bani wa bana ba Pheretse morwa wa Juda.

5Le ba bangwe ba ga Selane; wa ntlha e be le Asaya le bana ba gagwe.

6Le ba bangwe ba ga Serage; e be e le Jehuele la bana babo ba makgolo a selelago le masome a senyane.

7Le ba bangwe ba ga Benyamini; e be e le Salu morwa wa Mesulama morwa wa Hodabya morwa wa Hasenua.

8Le Jibinea morwa wa Jerohama, le Ela morwa wa Usi morwa wa Makiri, le Mesulama morwa wa Sefatya morwa wa Reguele morwa wa Jibinea,

9le bana ba bobona ka meloko ya bona ba makgolo a senyane le masome a mahlano a metšo e selelago; banna ba ka moka e be e le bakgoma ba dilete tša ba gabobona.

10Baperisita e be e le Jeyada, le Joyariba, le Jakini,

11le Asaria morwa wa Hilikia morwa wa Mesulama morwa wa Tsadoko morwa wa Meryaothe morwa wa Ahitobo, moetapele Ngwakong wa Modimo,

12le Adaya morwa wa Jerohama morwa wa Pašuri morwa wa Malakia, le Mesai morwa wa Adiele morwa wa Jahasara morwa wa Mesulama morwa wa Mesilemithe morwa wa Imere,

13bana babobona ba bakgoma ba dilete ba sekete le makgolo a šupago le masome a selelago, banna ba ba hlalefetšego modiro wa go direla Modimo Ngwakong wa gagwe.

14Wa Balefi e be e le Semaya morwa wa Hasubi morwa wa Asirikama morwa wa Hasabya wa bana ba Merari,

15le Bakabakari, le Heresi, le Galala, le Mathanya morwa wa Milika morwa wa Sikiri morwa wa Asafa,

16le Obadya morwa wa Semaya morwa wa galala morwa wa Jeduthune, le Berekia morwa wa Asa morwa wa Elikana e a bego a agile metsaneng ya ba Netofa.

17Baleti ba dikgoro e be e le Salume, le Akubi, le Talamoni, le Ahimane, le bana ba bobona. Salume e be e le mokgoma wa bona.

18Le lehono e sa le yena a emago kgorong ya kgoši ka thoko ya bohlabela. Ke bona baletakgoro mo go Balefi.

19Le Salume morwa wa Kore morwa wa Abiasafa morwa wa Kora, le bana babo ba mo kgorong ya gabo. Bana ba Kora ba be ba beetšwe go leta mejako ya Ntlokgethwa, bjalo ka botatabo ba e bego e le baleti ba difero mo mešašeng ya Morena,

20mola Pinease morwa wa Eleasere e le moetapele wa bona, yo Morena a bego a na nae.

21Sekaria morwa wa Meselemia e be e le moleti wa mojako ngwakong wa kgorong.

22Ka ge bona ba bego ba hlaoletšwe go ba baleti ba mojako e be e le ba makgolo a mabedi le lesome la metšo e mebedi. Ba be ba ngwadilwe ka go ya ka meloko le metse ya bona. Modiro wo ba be ba o gafetšwe ke Dafida le Samuele mmoni,

23gore bona le bana ba bona e be baleti ba dikgoro tša Ngwako wa Morena, ntlong yela ya mešašeng, ba e diše.

24Baleti ba ba be ba ema dithokong tše nne, e lego ya bohlabela, le ya bodikela, le ya leboa, le ya borwa.

25Bana babobona ba metseng ya gabo ba be ba etla ka lebaka la bona ba diša ka matšatši a šupago;

26gobane baleti bao ba bane, ba e bego e le bona ba bagolo ba baleti ba dikgoro ba Balefi, ba be ba sa hlatlolwe; ba be ba beilwe gore ba hlapetše nywako ya dipolokelo mo Ngwakong wa Morena.

27Ba be ba lala moo ba hlapeditše Ngwako wa Modimo ka thoko tšohle, e le madišo a bona, ba bula ka mehla ka moswana.

28Ba bangwe ba bona e be e le ba go hlokomela dibjana tša tirelokgethwa, ba di boloke di badilwe, ba di ntšhe di badilwe.

29Ba bangwe e be e le ba go hlokomela thotokgethwa ka moka, le tše kgethwa tšohle, le maupi, le beine, le makhura.

30Ba bangwe ba barwa ba baperisita e be e le ba go dira ditlolo le dinoko.

31Mathatya e mongwe wa Balefi morwa wa ntlha wa Salume Mokora, e be e le wa go hlapetša baapei.

32Ba bangwe ba Bakahathe ba be ba beilwe gore ba hlokomele dinkgwaponwa, ba di lokiše ka mehla ka Sabatha.

33Baopedi le bona e be e le bagolo ba melokong ya Balefi; ba be ba dula diphapošing ba se na modiro o mongwe, ba šetša modiro woo mosegare le bošego.

34Ke bona bagolo ba meloko ya Balefi, bakgoma ba bona; ba be ba agile Jerusalema.

35Motseng wa Gibeoni go be go agile Jeiele tatago Bagibeoni; mosadi wa gagwe e be e le Maaka.

36Morwa wa gagwe wa ntlha e be e le Abedoni; ba bangwe ke Tsuri, le Kisi, le Baali, le Nere, le Nadaba,

37le Gedoro, le Ahio, le Sekaria, le Mikilothe.

38Mikilothe o tswetše Simeama; le bona ba be ba agile Jerusalema mo ba bego ba batagane le bana babo bona.

39Nere o tswetše Kisi, Kisi a tswala Saulo, Saulo a tswala Jonathane, le Malakisua, le Abinadaba, le Esibaali.

40Morwa wa Jonathane e be e le MeribaBaali; MeribaBaali a tswala Mika.

41Bana ba Mika ke Porona, le Meleke, le Tharea.

42Ahasi o tswetše Jaarea; Jaarea a tswala Alemelethe, le Asimafethe, le Simiri; Simiri a tswala Motsa.

43Motsa a tswala Binea; morwa wa gagwe ke Refaya; morwa wa gagwe ke Eleasa; morwa wa gagwe ke Atsele.

44Atsele o be a na le barwa ba ba selelago; maina a bona šea: Ke Asirikama, le Bokuru, le Jisimaele, le Searia, le Obadya, le Hanana. Ke bona bana ba Atsele.

← Chapter 8 Jump to: Chapter 10 →